E Bijbel cuanto berdadero balor e tin?

“E BIJBEL ta un misterio, un buki cu no tabata skirbí pa hende comprende,” segun un doño di cas. Un otro a bisa: “Mi sa cu e Bijbel ta un buki importante, pero mi no sa hopi cos tocante dje. E ta difícil pa comprende.”

“Hopi hende cristian sa . . . mashá poco tocante e Bijbel,” segun e corant The Toronto Star. Un señora católico a comenta: “Un Bijbel den mi poder ta hacími sintími bon. E ta duna trankilidad di curazón.” “E Bijbel ta manera un compás cu ta guia hende riba lamá bruto i tempestuoso di bida te na un lugar sigur,” segun un piscador. Usando e palabra di un ex-hindú, “E Bijbel ta e Palabra di Dios i un don pa humanidad i ta medicina pa sufrimento spiritual.”

Tin hopi opinion diferente tocante e berdadero balor di e Bijbel. Pero, cuanto berdadero balor e tin?

E Bijbel ta e buki di mas importante i mas plamá na existencia. Skirbí riba bladji di dje ta e solucion pa problema di mas confundidor cu humanidad a experimenta of cu lo enfrenta ainda. E balor práctico di su conseho ta sin igual. Norma moral cu e ta defende ta insuperable. Su mensahe ta fuerte i beneficioso. Tal buki di balor incomparable ta merece di ser sacá for di nos cashi i duná un examinacion i scudriñamento cuidadoso.

Nos por habrí e Bijbel cu plena confianza di cu e ta totalmente exacto, confiabel, i auténtico. Suceso histórico mencioná den dje tin e confirmacion di historia seglar. Bez tras bez, descubrimento arqueológico ta confirma cu e Bijbel ta basá riba echo i berdad. E franqueza di e mas cu 40 skirbidor dje Bijbel ta distingínan como homber di onradez i integridad. E armonía interno dje Bijbel ta indica cu e no ta di origen humano. Suceso mencioná den dje a sosode. Hende cu e ta mencioná a existi. Lugar i sitio cu e ta mencioná ta berdadero. Además, e Bijbel ta contene profecía sobresaliente cu innengablemente ta identifica Jehova Dios como e Autor dje Bijbel.​—⁠2 Pedro 1:⁠21.

Nos Gran Instructor a haci sigur cu conocimento di su boluntad i propósito lo ser disponibel pa hende cu kier conocénan. Realmente, Jehova Dios ta bísanos den idioma claro cu ta su boluntad pa hende di tur sorto studia su Palabra i “yega na un conocimento exacto dje berdad.” (1 Timoteo 2:​3, 4; Proverbio 1:​5, 20-33) Esei ta un cos di mas importancia cu nos por haci durante nos bida. Esei ta un desafío cu nos ta keda obligá di enfrentá. Hende cristian di promé a comprende esei. Uno di nan a keda conmoví pa bisa: “Esaki ta loke mi ta sigi pidi den oracion, pa boso amor abunda mas i mas ainda cu conocimento exacto i pleno discernimiento; pa boso haci sigur dje cosnan di mas importante.”​—⁠Filipense 1:​9, 10; Colosense 1:​9, 10.

E Bijbel ta e medio principal dje Creador di comunica su boluntad i propósito pe famía humano, i e ta splica con nos individualmente tin un parti den tal propósito. E Bijbel tin skirbi suceso di pasado, i e ta duna un bista claro dje futuro. E ta declara doctrina correcto i ta duna bon splicacion di loke nos mester kere i no kere. (Echo 17:11; 2 Timoteo 3:​16, 17) E ta duna regla di conducta pa hende biba conforme cu nan, i ta dirigi hende den e camina di bon éxito i felicidad. (Mateo, capítulo 5-7) E ta duna énfasis ne Reino di Dios como e único speranza pa tur humanidad i ta mustra con Su gobierno ta e instrumento pa santifica su nomber i vindica su soberanía. E Bijbel ta splica e camina cu nos tin cu sigi pa nos disfruta di un relacion estrecha i amoroso cu Jehova Dios, nos Dunador di bida.

Además, e Bijbel ta e único buki cu por guiábo te ne premio di mas grandi cu humanidad hamás por recibi​—⁠bida eterna riba e tera paradísico como hende perfecto. (Romano 6:23) E Yiu unigénito di Jehova Dios ta bísanos: “Esaki ta nifica bida eterna, nan ganando conocimento di bo, e único Dios berdadero, i di esun cu bo a manda, Jesucristo.” (Juan 17:⁠3) Siguramente un buki di un balor tanto grandi mester motivános pa siña loke nos mester haci pa gana e premio di bida eterna. E Bijbel ta un buki pa hende comprende, manera e sigiente artículo ta mustra.