Un Tera Improductivo Ta Bira Fructi̇́fero

SEGUN E RELATO DI ARTHUR MELIN

Tabata un dia di primavera cu cielo cla na 1930, i mi tabata para na waf den e stad di Prince Rupert, British Columbia, Canadá. Mi tabata wak abao ne boto drumi riba e fondo di lamá, i mi a puntra mi mes, ‘Unda tur e awa a bai?’ Esei tabata mi promé experencia cu marea di costa di west di Lamá Pacífico unda nivel di lamá por baha tanto como 7 meter den seis ora so. Pero, di ki manera un mucha homber campesino di sabana di Canadá a yega di ser na oriya di Lamá Pacífico?

MI TABATA invitá pa engrandece mi privilegio di sirbishi di tempo completo di Jehova Dios door di bira miembro dje tripulacion dje boto yamá Charmian. Nos asignacion tabata pa iniciá e trabao di predicacion na costa di west isolá desde Vancouver te na Alaska. E pida di costa ei a consisti dje mayor parti dje costa di British Columbia hopi miya largu, locual no tabatin ningun alabador activo di Jehova. E único excepcion tabata un grupo chikito di publicador di Reino den e stad di Prince Rupert.

Mi tabata ansioso pa cuminza, p’sei ora mi a baha for dje trein, mi a bai na pia den direccion dje waf pa mira e boto Charmian i conoce e tripulacion, Arne i Christina Barstad. No tabatin hende na bordo, p’sei mi a bai. Ora mi a bolbe mas tardi den e dia, mi a keda asombrá. A parce cu lamá a seca!

Pero, kico a resulta den e asignacion interesante aki?

Un herencia spiritual

Mi aprecio pa cosnan spiritual a cuminza na cas riba sabana di Alberta, Canadá. Mi tata a haya un tratado cu Charles Taze Russell a skirbi dje Sociedad di Tratado Zion’s Watch Tower cu a cambia su bida profundamente. Papa a cuminza predica ne beciñanan, apesar dje trabao di cunuquero na Calmar, Alberta, cu ta ocupa hopi tempo. Esei tabata cien aña pasá, un poco despues di 1890.

Mi a nace den tal famía temeroso di Dios dia 20 di Februari di 1905, como yiu di ocho di loke despues a bira diez ruman. Tanto papa como otronan den e comunidad sueco, a asociánan cu Studiante Internacional di Bijbel. Cu tempo, nan a traha un lugar di reuni, yamá despues Salón di Reino. E tabata uno dje proménan den Canadá.

Trabao di cunucu nunca a stróbanos di asisti na reunion cristian, algun di locual tabatin orador bishitante cu e Sociedad Watch Tower a manda. Tal discurso a edifica den nos un deseo sincero pa participa den e trabao di predica. Como resultado, casi tur nos famía a camna firmemente den e luz di berdad bíblico.

Participacion den e trabao di predica

Pronto despues di 1920, mi tabata duná mi promé asignacion di duna testimonio. Mi tabatin cu parti invitacion pa discurso público di cas pa cas den e stad di Edmonton. E dia ei, ora mi a para mi so, mi a siña un les balioso: Confia den Jehova. (Proverbio 3:​5, 6) Ki feliz mi a keda pa cumpli cu mi promé asignacion cu e yudanza di Jehova!

Mi confianza den e organizacion visibel di Jehova Dios i den su grupo di esclabo fiel i prudente a sigi aumenta mientras cu mas comprendimento tabata duná di su Palabra di berdad. Hopi costumber i práctica di cristiandad, tal como celebracion di pascu i cumpliaña, tabata eliminá. Salbacion personal no tabata un preocupacion mas; mas bien, e predicacion dje Reino a bira e cos di importancia. Tur esei tabatin un efecto profundo riba mi bida. Pues, un poco tempo despues di a dedica mi bida na Jehova Dios dia 23 di April di 1923, mi a haci e ministerio di tempo completo mi meta.

Durante e tempo di friu di -18 grado riba sabana, nos a duna testimonio den campo usando cabai i slee. Un biaha mi a pasa dos siman cu un grupo den loke tabata yamá e trabao usando caravana. Tal caravana a resulta di ser práctico den dunamento di testimonio riba sabana di Canadá. Apesar di problema financiero, tempo severo, i biahamento di distancia largu, mi a logra persevera den e ministerio di pionero den Alberta de bez en cuando pa rond di tres aña te cu e dia importante di 1930 ora mi tabata invitá pa sirbi na costa di west di Lamá Pacífico. Siendo cu mi no tabata sa nada tocante lamá ni boto, tal invitacion a confundími. Wel, pronto despues cu mi a yega na Prince Rupert mi a sintími na cas cu mi colaborador nobo riba e boto. Ruman Barstad tabata un marinero cu experencia, ya cu e tabata un piscador comercial pa hopi aña. E sigiente seis aña tabata un tempo di predicacion intenso, nabegando e awa di costa di British Columbia for di Vancouver te na Alaska. Mi a siña otro les: Semper acepta asignacion di Jehova Dios, i nunca tarda di acepta.

Sembrando simía cant’i lamá

E promé haf cu nos a bishita den primavera di 1930 tabata Ketchikan, Alaska, unda nos a tuma e carga di 60 cartón di literatura bíblico. Pa varios siman, nos a bishita tur cas den Ketchikan, Wrangell, Petersburg, Juneau, Skagway, Haines, Sitka, i otro pueblo plamá leu for di otro. Despues, nos a predica na hende na henter e costa di British Columbia, i a cabé promé cu e fin dje berano. Nos a bishita campamento di corta palu, campamento pa procesá piscá, pueblo di indjan, pueblo chikito, i també, colonizador i yagdor isolá. Tabatin bez cu tabata difícil pa despidi di wardador solitario di faro cu a gusta recibi hende pa papia cu nan.

Cu tempo, e Sociedad a ármanos cu tocadisco portátil i discurso bíblico grabá. Nos a hiba eseinan cu nos, hunto cu buki, Bijbel, i revista. Hopi bez nos tabatin cu híbanan ora nos a subi barranca na costa. Ora lamá a seca, tabatin bez cu nos tabatin cu subi trapi swak cu nan pa yega waf halto. Mi a keda contentu pe entrenamento físico cu mi a recibi den mi hubentud trahando den campo di sabana.

Loudspeaker riba nos boto a sirbi como un instrumento fuerte pa plama e bon nobo. Siendo cu lamá a reflehá e sonido, hopi bez hende na distancia di hopi kilometer a tende discurso grabá. Un biaha ora nos tabata hancrá den un boca isolá di Isla di Vancouver, nos a toca un grabacion di un discurso bíblico. Su mañan hende cu a biba den interior a bísanos excitá: “Ayera nos a tende un sermón directamente foi cielo!”

Na un otro ocasion un pareha di edad a bisa cu nan a tende música sali for di nan chiminea, pero ora nan a sali for di cas, nan no a tende nada. Ora nan a bolbe drenta, nan a tende boz di hende. Pakico tabata asina? Wel, ora nan tabata pafó, nos tabata cambia e disco. Nos a toca música promé pa hala atencion di hende, anto a toca un discurso bíblico grabá.

Na un otro ocasion ainda, ora nos tabata hancrá cerca un isla cu un pueblo indjan, dos mucha homber indjan a rema nan boto cerca nos pa mira di unda e boz tabata bini. Algun hende riba e isla a kere cu nan tabata boz di hende morto cu a bolbe na bida!

No tabata extraordinario pa parti cientos di buki den un dia cu hende cu tabata traha den fábrica remoto di procesá piscá. Teniendo poco diverticion, nan tabatin tempo pa pensa riba cosnan spiritual. Despues, hopi hende isolá asina a bira Testigo di Jehova. Durante biahe despues, nos a anhela di bishitánan pa un “intercambio di animacion.”​—⁠Romano 1:⁠12.

Sirbishi despues cu un casá

Na aña 1931, mi a casa cu Anna, e ruman di Christina Barstad. Despues, nos a sigi traha como pionero hunto riba e boto i a disfruta di hopi experencia recompensador durante e añanan. Bayena, león di lamá, cachó di lamá, dolfijn, biná, oso, i águila tabata compañé di nos cu montaña mahestuoso na costa, boca scondí, i haf protehá i calmo, rondoná cu mondi di palu di pino gigante. Hopi biaha nos a yuda biná cansá i nan yiu ora nan a purba di cruza rio cu corriente fuerte pa scapa for di bestia salbahe.

Un atardi nos a mira un águila grandi pasando mashá abao riba awa lastrando firmemente den su huña un salmón grandi. E piscá tabata mucho grandi pe hizé completamente for di awa, pues e águila tabata lastra e salmón pe oriya. Frank Franske, un miembro dje tripulacion, a mira e posibilidad i a corre na oriya pa topa cu e águila cansá i convencele di bandona e piscá. Nos tripulacion di pionero a goza e salmón sabroso pa nan cena e anochi ei, i e águila a siña comparti su cuminda, aunque tabata cu mala gana.

Riba un isla chikito na punta di nort di Isla Vancouver, un pareha yamá Thuot a acepta e berdad bíblico. E homber tabata un persona independiente sin scol i cabezura rond di 95 aña di edad cu un esposa rond di 85 aña. Sin embargo, e tabata asina interesá den e berdad cu el a humiya su mes i a laga su esposa siñé leza. Pronto e mes por a studia e Bijbel i publicacion dje Sociedad. Menos cu tres aña despues, mi tabatin e gozo di bautiza nan dos riba nan isla remoto, nan cas, usando nos boto di rema como e tanki di bautismo!

També nos tabatin e gozo di mira e famía Sallis den e pueblo di Powell River acepta e mensahe di Reino. Walter a leza e foyeto na inglés Gera of paz​—⁠cua? i a reconocé como e berdad un bez. Un poco despues henter e famía a uni cu Walter den e sirbishi di pionero na Vancouver, unda Charmian a pasa e tempo di friu. El a resulta di ser mashá celoso, i durante e añanan tur e asociacion di rumanan den e territorio di Vancouver a yega di stimé. El a completa su carreda terrenal na 1976, lagando atrás un famía grandi di Testigonan.

Venciendo oposicion

Clero di pueblo indjan hopi bez no a gusta nos trabao, i a considera cu nos tabata invasor di nan dominio spiritual. Den Port Simpson e clero local a exigi pe hefe dje pueblo táhanos di bishita cas di pueblo. Nos a haci contacto cu e cacique i a puntré si e clero a califica hustamente su pueblo como mucho ignorante pa decidi pa nan mes. Nos a sugeri pa su pueblo ser duná e oportunidad di tende un consideracion dje Palabra di Dios i decidi pa nan mes loke nan kier kere. E resultado tabata cu el a dúnanos permiso pa sigi predica den e pueblo.

Un otro cacique a stroba pa década tur esfuerzo di miembro di raad i di grupo religioso di stroba Testigo di Jehova di haci contacto cu su pueblo. El a bisa, “Tan tempo cu mi ta cacique Testigo di Jehova ta bonbini aki.” Ta cierto cu hende no a recibínos na tur parti, pero apesar di oposicion nos nunca a keda obligá di bandona un territorio. Asina nos por a cumpli cu nos ministerio cada bez cu nos a hancra.

Wantando dificultad riba lamá

Durante e añanan, nos a enfrenta dificultad cu tempestad, marea, barranca bao di awa, i aveces problema cu e motor. Un biaha e corriente a híbanos mucho cerca Isla Lasqueti, rond di 160 kilometer panort di Vancouver. Nos a pega riba rif, pasobra e marea a cógenos ei, i nos siguridad a depende dje tempo. Si e tempo a bira malu, nos boto por kibra riba barranca. Nos tur a baha riba e barranca i a haci loke nos por den e situacion malu. Nos a come merdia, i a pasa e tempo na estudio bíblico, sperando pa lamá drenta atrobé.

Apesar di hopi rísico i inconbeniencia, esei tabata un bida feliz i saludable. Pero, e nacimento di nos dos yiu homber, a resulta den un cambio grandi. Nos a sigi biba riba e boto, pero ora nos a nabega tanto leu na nort te cu Oona River, Anna i e dos yiu a keda ei cu su mayornan mientras cu nos tur a sigi mas nort te na Alaska. Anto, ora nos a bolbe pazuid, Anna i e yiunan a sigi cu nos.

Mi no ta corda cu e yiunan nunca a keha ni no a bira malu. Nan a bisti salba bida tur ora, i tabatin bez cu nos asta a mara cabuya rond di nan. Sí, tabatin tempo tenso.

Mas cambio

Na 1936, nos tabatin cu bandona Charmian, i mi a obtene empleo seglar. Despues nos a haya yiu di tres. Cu tempo, mi a cumpra un boto di pisca, locual no solamente a gana nos pan pa nos sino també a permitínos sigi den e trabao di predica cant’i costa.

Nos a establece un cas riba Isla Digby, na otro banda dje haf for di Prince Rupert, i pronto un congregacion chikito a forma. Durante Gera Mundial II, ora e trabao di predica di Testigo di Jehova tabata prohibí den Canadá, nos a bai cu e boto na Prince Rupert despues di meianochi i a cubri e territorio lihé, lagando literatura den tur cas. Nunca hende a relaciona nos bishita di meianochi cu e partimento di literatura prohibí!

E tera a bira fructífero

Gradualmente mas hende a cuminza asocia cu Testigo di Jehova, i na 1948 e necesidad pa un Salón di Reino den Prince Rupert a sali na cla. Despues di a cumpra un edificio militar na otro banda dje haf, nos a desmantelé, a hibé cu flota, i cu truck te ne sitio di construccion. Jehova Dios a bendiciona nos trabao duro, i nos a haya nos mes Salón di Reino.

Na 1956, mi a bira pionero di nobo, i Anna també na 1964. Nos a traha cu e boto atrobé na costa di Lamá Pacífico. Pa un tempo nos també a participa den e trabao di circuito, bishitando congregacion for di Isla Queen Charlotte pariba te na otro banda di montaña te Fraser Lake, i despues tanto leu como Prince George i Mackenzie. Durante e añanan, nos a biahá den tur e Pacific Northwest pa miles di kilometer cu auto, boto, i avion.

Den Prince Rupert nos a sigi disfruta di experencia excelente den e ministerio. Tanto Anna como ami a studia cu hende cu despues a asisti ne Scol Bíblico di Galad di Watchtower i despues a sirbi como misionero den tera di stranhería. Ta ki un gozo pa mira nos yiunan spiritual hiba e precioso mensahe di Reino na tera leu!

Awor nos dos a laga 80 aña di edad leu atrás i nos ta enfrenta salud empeorando, pero nos ta feliz ainda den e sirbishi di Jehova Dios. E boniteza natural cu nos a mira den Alaska i British Columbia ta estimula memoria precioso. Pero, ta duna asta mas gozo pa mira e mondi spiritualmente bashí dje territorio enorme florece awor cu hopi congregacion di alabador di Jehova Dios.

Nos curazón ta bira specialmente feliz mirando nos mes yiunan, i també nos yiunan spiritual, crece i bendiciona Jehova. Nos ta alegra di a tene un parti chikito den tal aumento spiritual den e parti dje tera aki. Por ehempel, awor Alaska tin su mes oficina di sucursal cu ta coordina e trabao di mas cu 25 congregacion.

Aki den Prince Rupert nos tabatin e privilegio na 1988 di dedica un bonita Salón di Reino nobo, net den centro dje stad. Sí, nos ta alegra, mescos cu Isaías, bisando: “Bo a aumenta e nacion; O Jehova, . . . bo a glorifica bo mes. Bo a extende na un gran distancia tur frontera dje país.”​—⁠Isaías 26:⁠15.

[Caption on page 21]

Sirbiendo den e trabao di circuito na 1964 te 1967

[Caption on page 24]

E clase di boto usá den e predicacion na costa