Bo ta yuda bo yiunan scoge Jehova?

“MI A kere cu estudio di Bijbel tabata realmente fastioso i trabahoso. Secretamente, den mi curazón mi a decidi cu ora mi bira grandi lo mi no ser un Testigo di Jehova,” segun un homber hoven. Aunque ta di spera cu e mayoría di yiu den famía cristian cu tempo lo decidi di ser adorador di Jehova Dios, hovenan mescos cu esun anterior por pasa door di un tempo dificultoso escogiendo Jehova como nan Dios.

Hopi bez mayornan no ta keda sigur dje manera di guia nan yiunan efectivamente. Nan ta experimenta hopi scudriñamento di alma, mescos cu e tata ansioso cu a bisa un biaha: “Francamente, tabatin bez cu ora mi a wak e cara di mi yiunan na soño, cu lágrima di desilusion den nan wowo ainda, mi a puntra mi mes si mi no mester a trátanan mas suave.” E dos yiu homber dje tata ei a bira grandi i a scoge di sirbi Jehova Dios.

Sin embargo, tin hoven cu ta bandona Jehova i ta bandona e tao cristian pa sigi e mundo di Satanás. Pues, exactamente con mayornan ta logra yuda nan yiunan scoge Jehova Dios? Pa contesta e pregunta, láganos descubri promé pakico algun hoven ta bandona Jehova Dios aunque nan mayornan kier asina intensamente pa nan keda cerca dje.

Pakico algun hovenan ta bandona Jehova Dios

Uno dje factornan di mas común ta cu algun hoven realmente nunca ta yega di conoce Jehova ni su camina. Aunque nan ta asisti na reunion cristian desde infancia, nan simplemente ta presente físicamente, i no tin un berdadero buscamento pa Jehova. (Isaías 55:6; Echo 17:27) E mucha homber mencioná anteriormente a sintié fastioso den reunion cristian pasobra e no a comprende loke orador riba podio tabata bisa.

E simía dje berdad ta ser plantá den algun mucha, pero nan ta laga e moda di biba materialista dje mundo di Satanás, cu ta parce liber di responsabilidad tenta nan curazón. Algun no por enfrenta e deseo extremamente fuerte di asociá cu hovenan di mundo i ser manera nan.​—⁠1 Crónica 28:9; Lucas 8:​12-14; 1 Corintio 15:⁠33.

Sin embargo, den tur e mundo hopi yiu di famía cristian a decidi di adora Jehova Dios. Tin les pa siña for di paso positivo cu nan mayornan a tuma?

Cuminza pronto

Un paso vital pa yuda bo yiunan scoge Jehova Dios ta di cuminza pronto. Den casi tur caso, impresion cu nan ta recibi i les cu nan ta siña ora nan curazón ta moli i receptivo lo permanece pe resto di nan bida. (Proverbio 22:⁠6) Pues, cuminza pronto pa bisa bo yiunan tocante e bondad di Jehova Dios, su amor i su grandeza, haciendo esfuerzo pa edifica den nan curazón un amor pa Jehova Dios i un aprecio pa loke el a haci pa nan. Pa logra esei, hopi mayornan cu éxito a usa e abundancia di artículo tocante e creacion di Jehova hayá den publicacion dje Sociedad Watchtower.

Obedencia i respet pa Jehova i su adoracion ta entre otro calidad cu mester ta inculcá durante nan niñez. Ta animador pa mira mucha cu no a bai scol ainda den reunion cristian lucha pa skirbi nota senciyo i busca texto den nan mes Bijbel of bai baño cu nan mayornan pa laba nan cara den awa friu ora nan ta cuminza cabishá. Eseinan ta cos senciyo, pero nan ta ki vital pa impresioná den mente hoven cu nan mester mustra respet i obedencia na Jehova Dios!

Instruccion bíblico personal serio també mester cuminza pronto. Ora nan yiu hombernan tabatin dos aña di edad, un pareha a cuminza leza cu nan e buki Scuchando e Gran Maestro.a Despues, ora e muchanan a cuminza scol, nan a lanta tempran i a studia tur maínta cu nan mama den e buki Mi buki di relato bíblico i Bo por biba pa semper den Paradijs riba tera.* Despues di esei, e tata a considera cu nan promé cu desayuno e texto diario. Esfuerzo dje mayornan a recibi un recompensa ricu ora nan yiunan a scoge Jehova recientemente, simbolizando nan dedicacion cu bautismo bao di awa na edad di 10 i 11.

Un homber hoven excelente cu ta sirbi den e oficina di sucursal dje Sociedad Watch Tower na Hapón ta corda ora e tabata mashá chikito, su mama a yudé desaroya un relacion cu Jehova Dios sintá banda di dje anochi, pa yudé haci oracion. E nunca a lubida e les cu el a siña​—⁠maske unda el a bai of kico el a haci, Jehova Dios semper tabata cerca i cla pa yudé.

Mayornan exitoso ta siña reconoce mal tendencia cu ta debí ne herencia di imperfeccion den nan yiunan, i e mayornan ta cuminza pronto pa yuda nan yiunan corrigi esei. (Proverbio 22:15) Inclinacion na egoísmo, obstinacion, orguyo, i demasiado crítico di otronan, mester recibi disiplina pronto. Si no, tal simía lo crece pa bira rebelion contra Dios i su camina mas tardi. Por ehempel, mayornan cu bon intencion pero mimando nan yiunan hopi bez ta láganan desaroya un actitud egoísta. Yiu asina ta haya cu ta difícil pa respeta of nan mayornan of Jehova Dios, pasobra nan ta bira manera ‘hende malagradicido’ mencioná den e Bijbel. (Proverbio 29:21) En cambio, yiu cu ta ser duná trabao na cas i cu ta ser siñá pa keda alerto pa yuda otro hende tin e tendencia di keda mas agradicido tanto na nan mayornan como na Jehova Dios.

Un otro cos necesario ta di cuminza pronto pa pone meta teocrático cu yiu por razonablemente alcanza. Si esei no ta ser hací pronto i consistentemente, otro hende por yena nan mente i curazón cu otro meta. Lezamento di Bijbel di capa pa capa, estudio personal di publicacion dje Sociedad Watchtower, matriculacion den e Scol di Ministerio Teocrático, ser proclamador dje bon nobo, i bautismo mester ta incluí den tal meta.

Takafumi ta corda cu su mama a siñé e costumber di leza e revista Toren di Vigilancia i Despertad! trahando pregunta senciyo i lagando nan riba e mesa di cushina pe haya ora el a yega cas for di scol. Yuri ta corda cu pasando algun dia cu pionerob sirbiendo unda cu tabatin mas necesidad pa evangelizador cristian tabata gozoso, saliendo cu nan den e ministerio, mirando nan cushiná cuminda, i observando nan gozo i celo a influenciá mashá su deseo pa sirbi Jehova Dios di igual manera. Hopi hoven ta corda cu nan mayornan a híbanan na Betel regularmente, locual ta e nomber di oficina central i sucursal dje Sociedad Watch Tower, unda nan por a mira otro homber i muher hoven sirbiendo Jehova Dios felizmente. Hopi di esnan cu a haci tal bishita como mucha awor ta sirbi den Betel rond di mundo.

Dedica tempo na bo yiunan

E cantidad i calidad di tempo cu bo ta dedica na bo yiunan probablemente lo tene un influencia directo riba nan decision di sirbi Jehova Dios of no. Nan ta lihé pa mira cuanto tempo i preparacion bo ta dedica ne estudio di Bijbel cu bo ta tene cu nan. Si bo no por corda unda bo a keda den e último estudio of bo ta cancela e estudio pa motibo no importante, bo ta comunica e mensahe di cu tal estudio no ta tanto importante. Pero, ora nan ta mira cu nan mayornan ta haci sacrificio pe estudio, ta prepara bon pe i ta tene e estudio regularmente apesar di cualkier strobanza cu por presenta, un mensahe henteramente diferente ta ser comunicá. Aunque no ta un requisito, algun mama ta bisti bon pe estudio cu nan yiunan, como si nan ta bai reunion of ta tene un estudio bíblico cu e beciña. E impresion cu esei ta duna ta cu e adoracion di Jehova Dios ta importante.

Hopi tempo i esfuerzo ta necesario pa haci educacion bíblico di bo yiunan gozoso, alcanzando nan curazón. Yiu chikito specialmente ta keda impresioná ora nan ta mira loke nan ta siña sosode dilanti nan. Por ehempel, un tata a yuda su yiunan visualiza e resureccion door di hunga e papel di Lázaro dje relato bíblico. El a drenta den camber i a sali como Lázaro resusitá.​—⁠Juan 11: 17-44.

Ora yiu ta bira grandi, asta mas tempo i aptitud ta necesario pa trata cu e diluvio di emocion, duda, i ansia cu ta enfrentánan. E tempo dedicá di mayornan amoroso i entendido na tal edad ta mashá importante pe yiunan desaroya confianza den Jehova Dios. Un tata exitoso di cuater yiu a relata cu ora varios problema a enfrenta su yiunan, el a busca i a considera cu nan informacion relacioná den publicacion di Watchtower tur dia te cu tal crisis a keda completamente vencí.

Un pionera activo, mama di dos yiu, a ripara cu su yiu muher a cuminza alehá i no tabatin gozo den actividad teocrático. P’sei, e mama a keda determiná di ser na cas ora e yiu a yega cas for di scol tur atardi, i a tene conbersacion cu e yiu durante cu nan a bebe te. Mediante tal conbersacion íntimo entre mama i yiu, e yiu a recibi e yudanza cu el a falta. Awor, ora el a gradua for di scol segundario, el a uni cu su mama den e sirbishi di pionero.​—⁠Proverbio 20:⁠5.

Bon asociacion i bon ehempel

Además di dedica tempo, mayornan mester percura asociacion saludable pa nan yiunan. Proverbio 13:20 ta bisa: “Ken cu ta camna cu hende sabí lo bira sabí, pero ken cu tin tratamento cu hende estúpido lo pasa malu.”

Hopi mayornan exitoso ta reconoce e berdad dje proverbio. Un tata di cuater yiu a bisa: “Ora mi ta corda loke a pasa, mi ta kere cu tabata e grupo grandi di amigo den e berdad di nos yiunan cu a yuda conmovénan pa sirbi Jehova Dios. Mi a animánan pa haci amigo den otro congregacion i també den nos congregacion i pa cultiva tal amistad.” Un anciano cristian cu a sirbi den Betel pa hopi aña ta corda: “Ora mi tabata hoven, nos a biba den un cas chikito, pero semper nos a ofrece posada na superintendente di circuito. Además, pionero special den nos congregacion a come cerca nos regularmente. Nan a baña den nos cas i a asocia cu nos. Scuchando nan experencia i mirando nan gozo a yudámi cultiva aprecio pe sirbishi di tempo completo.”

Bon asociacion ta yuda esnan cu ta experimentando dificultad. Un mama cu tabatin un yiu homber cu tabata pasando un tempo turbulento a papia tocante e problema cu un superintendente biahero di Testigo di Jehova. El a recomenda pe mama hiba e mucha cuné den e sirbishi di feld. E superintendente a bisa, “Si bo ta haci esei, su spiritualidad i tur otro cos lo mehora.” Segun e mama: “Den nos congregacion tabatin un arreglo pa bai den e sirbishi atardi, i hopi mucha di edad di scol, varios pionero regular di mas edad, i por lo menos un anciano a participa den esei. Na principio tabata un lucha pa mi haci mi yiu sali cu regularidad, pero pronto esei a cambia pasobra e semper a bini cas mas alegre i animá debí ne asociacion saludable. Mientras cu e tabata alumno den scol segundario, el a bautiza i a sirbi como pionero auxiliar tur luna, i ora el a gradua, el a bira un pionero regular.” Asociacion saludable hunto cu e hacimento dje boluntad di Jehova a duna bon resultado.

Tal bez no tin localmente hovenan cu por ta un influencia saludable riba bo yiunan, pero un declaracion di hopi hoven bez tras bez cu a decidi di sirbi Jehova Dios ta toca ehempel di nan mayornan. Hopi hoven a admira nan mayornan i kier a imitánan. Yuri ta corda e hospitalidad di su mama i con el a stima otro hende, yamando nan na telefón i preparando cuminda pa esnan enfermo. Tatsuo, cu tabata miembro di un famía di cuater yiu homber, tur locual ta grandi awor i ta sirbi Jehova, a bisa: “Mama no por a studia cu nos regularmente pasobra papa no tabata un creyente i mama a recibi hopi oposicion for dje famía. Pero, mirando mama defende e berdad i su gozo den e sirbishi di Jehova a influenciámi mashá. També, mama tabata dispuesto pa keda lantá te madrugá pa yúdanos cu nos problemanan.” Palabra di sabiduría di mayornan tin poder ora obra fiel ta apoyánan. Yoichiro a bisa tocante su mayornan: “Mi no por corda cu nan hamás a expresa pensamento negativo tocante otronan den e congregacion; ni nan no a laga nos, e yiunan, haci redu tocante falta di otronan.”​—⁠Lucas 6:​40-42.

E gozo di mira yiu scoge Jehova Dios

No tin fórmula infalible pa yuda bo yiunan scoge Jehova Dios. Lo tin hopi momento ansioso. Pero e tata ansioso mencioná anteriormente a bisa: “Como mayornan nos semper a purba fielmente pa sigi sugerencia dje organizacion visibel di Jehova. Esei tabata un yudanza grandi pa vence problema.” Nan esfuerzo a goza bon resultado.

Sí, door di haci bo posibel pa sigi guía bíblico, siñando bo yiunan motibo sano pa stima Jehova, apoyá cu bo fiel ehempel i esfuerzo sincero pa yuda, abo també cu tempo por haya bo esfuerzo coroná cu bon éxito. Corda e mucha homber anterior cu un biaha a determiná di no bira Testigo di Jehova. Basta despues cu su mama a yudé cu bon éxito pasa su añanan dificultoso, el a bisa: “Mi ta keda contentu cu e nunca a entrega!” Tal bez lo bo tin resultado similar cu bo yiunan.​—⁠Galatio 6:⁠9.

[Footnotes]

[Caption on page 30]

Bo por corda e criamento di bo yiunan cu memoria feliz?