Kico Pascu Ta Nificá pa Bo?

Con lo bo contestá? Pascu ta (1) un tempu pa ta huntu cu bo famia; (2) un tempu di fiesta; (3) un tempu religioso;

(4) un tempu di tension; (5) un tempu di nostalgia; (6) un tempu di comercialismo yamativo.

AUNKE e por parce sorprendente, di e mas cu 1.000 hende entrevistá na Inglatera, solamente 6 porciento a considerá cu Pascu ta un ocasion primordialmente religioso. Na contraste, 48 porciento a haña cu Pascu ta principalmente un tempu pa ta huntu cu nan famia. En berdad, hopi hende ta opiná cu pa mucha e ta un tempu special. Típicamente, ora un hobencita di 11 aña di edad a ser puntrá kico el a gusta mas tocante Pascu, el a respondé: “E emocion, e sintimentu di felicidad, [i] e dunamentu di regalo.” The Making of the Modern Christmas ta di acuerdo cu “e énfasis di mas fuerte di . . . Pascu ‘tradicional’ ta indudablemente riba e hogar, e famia i particularmente e muchanan.”

Pero ta specialmente den cristiandad occidental cu Pascu ta un ocasion di famia, ora famianan ta bini huntu pa intercambiá regalo. Den paisnan unda e Iglesia Oriental Ortodox ta e influencia dominante, hende ta pone mas énfasis riba Pascu di resureccion; tog, tempu di Pascu di nacementu ta generalmente un periodo di vacansi.

Un “Actividad Comercial”

Pascu a “pasa den un proceso di . . . comercialisacion extraordinario,” The New Encyclopædia Britannica ta declará. Ningun caminda talbes esaki ta mas cierto cu na Hapon.

“E haponesnan a bandoná tur pretension di religion i a combertí Pascu den un actividad estrictamente comercial,” Daily Record di Washington ta informá. E ta agregá cu Pascu na Hapon ta “un celebracion importante den cua hopi énfasis ta ser poní riba e parti comercial i mas bien poco énfasis riba e aspecto religioso.”

Asta den hopi asina yamá paisnan cristian, e “aspecto religioso” aki ta difícil pa detectá. Rond di 40 aña pasá, un pamfleta anti-Pascu a lamentá: “Pascu ta ser fomentá dor dje mundu comercial. E ta e temporada di aña di mayor ganamentu di placa. Comerciantenan cu ta yama nan mes cristian ta spera cu anticipacion riba e temporada di Pascu, no p’e causa di Cristo, sino p’e causa di ganashi financiero.” Ki cierto e palabranan ei ta awe! Den hopi pais, masha poco biaha nos ta yega n’e cuminsamentu dje último cuartal di aña sin cu nos tende recordatorionan di cuantu dia mas ta sobra pa cumpra regalo p’e próximo Pascu. Comercio ta bira mas activo segun cu e aña ta caba, cu tantu como un cuart dje bentanan anual di negoshinan ta bini durante e tempu di Pascu.

Sea loke sea Pascu ta nificá pa bo awor, bo por wel puntra bo mes ta con el a cuminsá. En efecto, Bijbel ta apoyá dunamentu di regalo di Pascu? Celebracionnan di Pascu di awendia ta berdaderamente cristian? Laga nos mira.