Pascu E Ta Realmente Cristian?

SEGUN The World Book Encyclopedia, “Pascu ta e dia riba cua cristiannan ta celebrá e nacementu di Jesucristo.” No obstante, e enciclopedia ta declará tambe: “E promé cristiannan no a celebrá [Jesus] su nacementu pasobra nan a considerá e celebracion di cualkier hende su nacementu un custumber pagano.”

The Making of the Modern Christmas, di Golby i Purdue, ta di acuerdo: “E promé cristiannan no a celebrá e nacementu di Cristo. Celebracionnan di dia di nacementu riba nan mes a ser asociá cu prácticanan pagano; e Evangelionan no ta bisa nada tocante e fecha real di Cristo su nacementu.”

Si celebracion di dia di nacementu no tin un antecedencia cristian, con e dia di nacementu di Cristo a bira un fiesta “cristian” asina prominente?

E Orígen Pagano di “Pascu”

“Tur hende tabata fiesta i alegrá, trabou i comercio tabata ser suspendí completamente pa un temporada, casnan tabata ser decorá cu taki di laurel i mata cu ta semper berde, bishita i regalonan a ser intercambiá entre amigunan, i hende tabata duna regalo n’e doñonan di negoshi di cua nan tabata cliente. Henter e temporada tabata unu di alegria i di bon boluntad, i e pueblo tabata entregá su mes na tur clase di diberticion.”​—⁠Paganism in Christian Festivals, di J. M. Wheeler.

E descripcion aki ta cuadra cu e festividadnan di Pascu cu abo conocé? Sorprendentemente esaki no tabata Pascu! Mas bien, esei ta un descripcion di Saturnalia​—⁠un festival romano pagano di un siman largu asociá cu e posicion di solo cu ta marca cuminsamentu di winter (ilustrá riba e siguiente página). E dia di nacementu dje solo invencibel a ser celebrá dia 25 di december, un dia di fiesta principal dje religion mitraico di Roma.

Segun The New Encyclopædia Britannica, “25 di december, e dia di nacementu di Mitra, e dios ireneo di lus i . . . e dia dedicá n’e solo invencibel, i tambe e dia despues dje Saturnalia, a ser adoptá dor dje iglesia como Pascu, e natividad di Cristo, pa contrarestá e efectonan dje festivalnan aki.” Asina e celebracion pagano di dia di nacementu a sigui cu un simpel cambio di nomber, di Mitra pa Cristo!

Sin embargo, kisas bo ta pensa cu e nacementu dje Yu di Dios, Jesus, tabata algu special, cu ta merecé pa ser recordá. Un bistaso den loke Bijbel ta relatá tocante esaki lo resultá masha informativo.

Un Acontecimentu Gososo

E segundo capítulo dje Evangelio di Lucas ta proveé e marco di circunstancia. Lucas ta conta nos con angelnan celestial, wardadornan humilde, sirbidornan deboto di Dios, i Maria mes a reaccioná n’e acontecimentu notabel aki.

Considerá promé e “wardadornan bibando pafó di cas” cu tabata “teniendo warda djanochi riba nan tounan,” locual nan lo no tabata haciendo meimei di winter. Ora e “angel di Jehova” a aparecé i e gloria di Dios a lusa tur rond di nan, e wardadornan tabatin miedu na promé instante. Nan a ser trankilisá ora e angel a splica: “No tene miedu, pasobra, mira! mi ta declarando na boso bon nobo di un gran goso cu tur pueblo lo haña, pasobra a nace na boso awe un Salbador, kende ta Cristo e Señor.” Ora “un multitud dje ehército celestial” di angelnan a aparecé di ripiente, e wardadornan tabata sa cu e nacementu aki tabata diferente for di tur otro. Interesantemente, e angelnan no a trece regalo p’e criatura recien nací. Mas bien, e angelnan a alabá Jehova, bisando: “Gloria den haltura na Dios, i riba tera pas entre hende di bon boluntad.”​—⁠Lucas 2:​8-14.

Naturalmente, e wardadornan kier a mira e baby aki pa nan mes, pasobra tabata Jehova kende a anunciá e acontecimentu felis. Ora nan a haña e criatura drumí den e pesebre, nan a conta e mayornan loke e angelnan a bisa. E ora ei e wardadornan a bai, “glorificando i alabando Dios,” no e baby.​—⁠Lucas 2:​15-18, 20.

Maria, Jesus su mama, sin duda a alegrá riba e parto exitoso di su primogénito. Pero tambe el a saca “conclusionnan den su curason.” Despues, compañá pa su esposo, José, el a biaha pa Jerusalem den obedencia n’e Ley di Moises. Esaki no tabata un celebracion di dia di nacementu. Mas bien, esei tabata un tempu pa presentá e criatura na Dios, “net manera ta skirbí den e ley di Jehova: ‘Tur baron cu habri un matris mester ser yamá santu pa Jehova.’ ”​—⁠Lucas 2:​19, 22-24.

N’e tempel den Jerusalem, Maria i José a topa Simeon, kende Lucas ta describí como “hustu i reverente, sperando riba e consolacion di Israel.” Bou di inspiracion, el a ser bisá cu lo e no muri promé cu e mira “e Cristo di Jehova.” Loke a sosodé despues tambe tabata “bou di poder di [Dios] su spiritu.” Simeon a tuma e criatura den su brasanan, no, no pa dun’é un regalo, sino, mas bien, pa bendicioná Dios, bisando: “Awor, Soberano Señor, bo ta laga bo esclabo bai liber na pas segun bo declaracion; pasobra mi wowonan a mira bo medio di salba cu bo a prepará den bista di tur pueblo.”​—⁠Lucas 2:​25-32.

Siguientemente, e profetisa di edad avansá Ana a yega cerca. E tambe “a cuminsá duna gradicimentu na Dios i papia tocante e mucha cu tur esnan cu tabata sperando e liberacion di Jerusalem.”​—⁠Lucas 2:​36-38.

Maria, Simeon, Ana, e wardadornan, i tambe e angelnan celestial, tur a alegrá cu Jesus su nacementu. Sin embargo, nota por fabor, cu nan no a entregá nan mes den ningun paranda di celebracion dia di nacementu, tampoco nan a participá den dunamentu di regalo. Mas bien, nan a glorificá Jehova, e Proveedor celestial di nan medio di salbacion.

Tog algun hende por razoná, ‘Siguramente dunamentu di regalo di Pascu no por ta malu, pasobra no ta asina cu e “tres hombernan sabí” a onra Jesus cu regalo?’

Regalo di Pascu

Laga nos examiná atrobe e relato bíblico. Lo bo hañ’é skirbí den e Evangelio di Mateo, capítulo 2. E no ta mencioná ningun celebracion di dia di nacementu, tampoco e ta duna un tempu specífico, aunke claramente tabata algun tempu despues di Jesus su nacementu. Den versículo 1, Mateo ta yama e bishitantenan “astrólogonan [griego, maʹgoi] di partinan oriental,” pues paganonan sin ningun conocimentu di Jehova Dios. E strea cu e hombernan aki a sigui a guia nan, no directamente n’e lugá di nacementu di Jesus den Betlehem, sino na Jerusalem, unda Rey Herodes a goberná.

Ora e gobernante malbado aki a tende cu nan tabata averiguando tocante “esun cu a nace [como] rey dje hudiunan,” el a consultá cu e sacerdotenan pa haña sa exactamente “unda e Cristo mester a nace” p’e por a laga mata e mucha. E sacerdotenan a contestá citando e profecia di Miquéas cu a señalá na Betlehem como e Mesías su lugá di nacementu. (Miquéas 5:⁠2) Den un manera hipócrita Herodes a instruí su bishitantenan: “Bai i haci un búskeda cuidadoso p’e mucha chikitu, i ora boso hañ’é, bolbe i informá mi, pa mi tambe bai i rindi’é homenahe.” E astrólogonan a bai nan caminda, i e strea “a bai nan dilanti, te ora el a yega i a para ariba unda e mucha chikitu tabata.” Nota cu e ta ser describí como un “mucha chikitu,” no como un baby recien nací.​—⁠Mateo 2:​1-10.

Manera tabata pas pa ora magnatenan oriental bishitá un gobernante, e astrólogonan pagano a cai abou i a “presentá regalo [n’e mucha chikitu], di oro i olíbano i mirra.” Mateo ta agregá: “Sin embargo, debí cu nan a ricibí spiertamentu divino den un soño pa no bolbe cerca Herodes, nan a bai bek nan pais via un otro caminda.”​—⁠Mateo 2:​11, 12.

For dje relato bíblico breve aki, algun hende por purba haña apoyo pa nan dunamentu di regalo di Pascu. No obstante, Discovering Christmas Customs and Folklore ta splica cu e práctica actual di dunamentu di regalo tin su orígen den e regalonan di Saturnalia cu e romanonan a ofrecé na nan próhimo pober. “E iglesia di promé . . . astutamente a transferí su nificacion na un conmemoracion ritual dje regalonan dje magonan.” Ki un contraste esaki ta cu e berdadero adoradornan​—⁠manera e wardadornan humilde​—⁠kendenan simplemente a alabá Dios na e nacementu di Jesus!

Onra Cristo como Rey!

Awe Jesus no ta un baby mas. E ta un Gobernante poderoso, Rey di Dios su Reino celestial, i e mester ser onrá como tal.​—⁠1 Timoteo 6:​15, 16.

Si bo ta un adulto awor, bo a yega di sintí bo bergonsá ora, den bo presencia, hende a mustra potret di bo como un baby? Ta cierto cu potretnan asina ta recordá bo mayornan di nan goso ora bo a nace. Pero awor cu bo tin bo propio identidad, generalmente bo no ta preferá pa otronan mirá bo manera bo ta? Di igual manera, pensa cuantu falta di respet e ta pa Cristo Jesus ora esnan cu ta pretendé di ta su siguidornan bira asina absorbá cada aña den e tradicionnan pagano di Pascu i den onra un criatura, cu nan no ta onra e mes como Rey. Sí, asta den e promé siglo, apostel cristian Pablo a razoná riba ki apropiado ta pa pensa di Cristo manera e ta awor​—⁠un Rey den cielu. Pablo a skirbi: “Asta si nos a conocé Cristo segun carni, siguramente awor nos no conocé asina mas”!​—⁠2 Corintio 5:⁠16.

Cristo, como Rey dje Reino di Dios, pronto lo haci e promesa profético di kita dolor, sufrimentu, malesa i morto, bira realidad. E ta Esun kende lo garantisá vivienda adecuá i trabou recompensador pa tur hende bou di condicionnan paradísico aki riba tera. (Isaías 65:​21-23; Lucas 23:43; 2 Corintio 1:20; Revelacion 21:​3, 4) Siguramente, esakinan ta suficiente motibu pa evitá di desonrá Jesus!

Siguiendo Cristo su mes ehempel, cristiannan berdadero ta forsa pa duna nan próhimo un dje mayor regalonan cu un hende por ofrecé​—⁠un comprendimentu dje propósito di Dios, cua por hiba na bida eterno. (Juan 17:⁠3) E clase di dunamentu di regalo aki ta trece hopi goso pa nan, net manera Jesus a bisa: “Tin mas felicidad den duna cu tin den ricibí.”​—⁠Echo 20:35; Lucas 11:​27, 28.

Cristiannan cu tin un interes genuino den otro no tin dificultad pa expresá spontáneamente nan amor na cualkier tempu di aña. (Filipense 2:​3, 4) Como un simpel ehempel, ki emocionante ta pa ricibí un pintura for di un hobencito cristian kende, despues di a scucha un discurso bíblico, a pint’é como un expresion di gratitud! Igualmente animador ta e regalo inesperá di un famia como muestra di su amor. Di mes manera, mayornan cristian ta haña hopi goso ora nan ta scoge ocasionnan apropiado atrabes dje aña pa duna regalo na nan yunan. E clase di generosidad cristian aki no ta manchá cu un sintimentu di obligacion pa duna regalo riba dianan di celebracion of di tradicion pagano.

Consecuentemente, awe mas cu cuater miyon i mei cristian di tur nacion no ta celebrá Pascu. Esakinan ta Testigonan di Jehova, kendenan ta ocupá nan mes regularmente cu dunamentu di un testimonio tocante e bon nobo dje Reino di Dios na nan próhimo. (Mateo 24:14) Probablemente bo por topa nan ora nan ta bishitá bo cas, talbes pronto. Laga bo recepcion ansioso di loke nan ta trece pa bo guia bo famia na gran goso, segun cu bo ta siña con pa alabá Jehova Dios tur dia di aña.​—⁠Salmo 145:​1, 2.

[Caption on page 4]

Culver Pictures

[Caption on page 7]

Cristiannan ta duna nan próhimo un dje mayor regalonan ​—⁠e comprendimentu dje propósito di Dios cu ta hiba na bida eterno