Un Tesoro Preciosisimo Pa Comparti

MANERA GLORIA MALASPINA A CONT’E

Ora e costa di Sicilia a disparcé for di nos bista, ami i mi esposo a cuminsá enfocá nos atencion riba nos destinacion, e isla mediteráneo di Malta. Ki un prospecto emocionante! Segun cu e boto a crusa laman, nos a pensa di apostel Pablo su experencia na Malta durante e promé siglo.​—⁠ECHO 28:​1-10.

TABATA aña 1953, i e tempu ei Malta no tabata reconocé legalmente e actividad di predicacion di Testigonan di Jehova. E aña promé, nos a gradua for dje Scol Bíblico di Galad di Watchtower i a ser asigná na Italia. Despues di a studia italiano pa solamente un tempu corticu, nos tabata ansioso pa mira loke a warda nos na Malta.

Con ami, un muher yong, a yega di bira un misionero stranhero? Lagá mi splica.

Mama Su Ehempel Inspirador

Na 1926, ora nos famia tabata biba na Fort Frances, Ontario, Cánada, mi mama a aceptá e foyeto Millions Now Living Will Never Die for di un Studiante di Bijbel (manera Testigonan di Jehova tabata conocí e tempu ei). El a les’é cu sumo interes, i e mésun siman ei el a asistí na un studio di Bijbel den grupo, usando e revista Toren di Vigilancia. Mama tabata un lector ardiente di Bijbel, i el a aceptá e mensahe tocante e Reino di Dios como e tesoro cu e tabata buscando. (Mateo 6:33; 13:44) Apesar di oposicion violento for di Tata, i aunke e tabatin tres yu muher chikitu pa soru p’e, el a tuma su posicion pa loke e tabata siñando.

Mama su fe firme durante e siguiente 20 añanan a tene ami i mi dos ruman muhernan mas grandi, Thelma i Viola, conciente dje maraviyoso speransa di bida eterno den un mundu di husticia. (2 Pedro 3:13) El a enfrentá hopi prueba difícil, pero nos nunca a duda cu e curso cu el a scoge tabata corecto.

Na 1931, ora mi tabatin solamente dies aña, nos a muda pa un cunucu den parti nort di Minnesota, Merca. Ei nos a ser cortá for di asociacion regular cu Testigonan di Jehova pero no for di instruccion bíblico di Mama. Su sirbishi deboto como un colporteur, of minister di tempu completo, a inspirá mi pa deseá di uni cuné den e trabou ei. Na 1938 ami i mi dos ruman muhernan a simbolisá nos dedicacion na Jehova dor di ser bautisá na un asamblea na Duluth, Minnesota.

Despues cu mi a gradua for di scol secundario na 1938, Mama a animá mi pa mi inscribí pa un curso di comercio di manera cu mi por a sostené mi mes financieramente como un pionero (e nomber nobo pa colporteur). Esaki a resultá di ta un bon conseho, specialmente ya cu Tata a dicidí di sigui su mes caminda i a laga nos pa nos cuenta.

Compartiendo Nos Tesoro Tempu Completo

Cu tempu mi a muda pa California, i na 1947, mi a cuminsá den e trabou di pionero na San Francisco. Miéntras mi tabata participá den e trabounan di preparacion p’e Asamblea “Expansion di Tur Nacion” na Los Angeles, mi a topa Francis Malaspina. Nos meta comun di trabou di misionero a hiba n’e comienso di un relacion amoroso. Nos a casa na 1949.

Na september 1951, ami i Francis a ser invitá n’e di 18 klas di Galad. Riba e dia di graduacion, 10 di februari, 1952, despues di cincu luna di entrenamentu intensivo, e paisnan na cua nos lo a ser mandá a ser anunciá den órden alfabético dor di e presidente dje scol, Nathan H. Knorr. Ora el a bisa, “Italia, Rumannan Malaspina,” ya nos tabata imaginando e biahe!

Algun siman despues, nos a abordá e barcu na New York p’e biahe di dies dia pa Génova, Italia. Giovanni DeCecca i Max Larson, dje personal dje sede di Brooklyn, tabata riba waf pa despedí di nos. Na Génova nos a ser ricibí dor di misioneronan cu tabata conocé e proceduranan complicá di imigracion.

Entusiasmá cu tur loke tabata rond di nos, nos a abordá un trein pa Bolonia. Nos bista na yegada tabata di un stad desfigurá ainda dor dje bombardeonan di Guera Mundial II. Pero tabatin tambe hopi cos agradabel, manera e aroma iresistibel di bonchi di cofi hasando cu a yena e aire di mainta i e holó picante di sausnan excelente cu tabata ser prepará pa tur sorto di pasta italiano.

Cumpliendo cu un Meta

Nos a cuminsá den e ministerio cu un presentacion memorisá, i nos a ripiti’é te ora e mensahe a ser aceptá of e porta a ser cerá. E deseo pa expresá nos mes a motivá nos pa studia e idioma diligentemente. Despues di cuater luna, nos a ser asigná na un cas di misionero nobo na Nápoli.

E stad inmenso aki ta notabel pa su bistanan maraviyoso. Nos a disfrutá di nos sirbishi ei, pero despues di cuater luna atrobe, mi esposo a ser asigná n’e trabou di circuito, of biahero, bishitando congregacionnan for di Roma te Sicilia. Cu tempu, tambe nos a bishitá Malta i asta Líbia na Nort Africa.

E biahenan di trein for di Nápoli pa Sicilia durante e añanan ei tabata un prueba di awante físico. Nos tabata subi treinnan cargá i para den gangnan yen yen di pasahero, tin biaha pa seis te ocho ora. Sin embargo, el a duna nos un oportunidad excelente pa observá i analisá e hendenan rond di nos. Hopi biaha un tinashi grandi di biña trahá na cas a sirbi como asiento pa su doño, kende ocasionalmente a usa su contenido pa satisfacé su sed durante e biahe largu. Pasaheronan amigabel hopi biaha a ofrecé pa compartí nan pan cu salami cu nos, un gesto hospitalario i conmovedor cu nos a apreciá.

Na Sicilia nos tabata topa rumannan kendenan a carga nos maletanan subiendo e ceru pa tres ora i mei largu rumbo p’e top unda e congregacion a reuní. E bon biní caluroso di nos rumannan cristian tabata haci nos lubidá nos cansancio. Algun biaha nos a core riba mulanan cu pata firme, pero nos nunca a mira n’e profundidadnan abou unda un solo stap robes dje mula lo a causa nos caida. E posicion firme di nos rumannan p’e berdad di Bijbel apesar di nan dificultadnan a fortalecé nos, i e amor cu a ser mustrá na nos a haci nos gradicidu pa ta cu nan.

Malta i Líbia

Yená cu recuerdonan di nos rumannan di Sicilia, nos a nabegá pa Malta. Apostel Pablo a haña hende cariñoso ei, i nos tambe a haña. Un tempestad den Bahia di San Pablo a haci nos realisá e peliger cu barcunan chikitu a enfrentá den e promé siglo. (Echo 27:​39–28:10) Nos siguiente bishita tabata Líbia. Con lo a bai cu nos den e pais africano aki unda nos trabou tabata bou di prohibicion?

Un biaha mas nos a experenciá un cultura totalmente diferente. E bistanan i zonidunan dje stad di Trípoli a capta mi atencion segun cu nos a cana dor dje cayanan cu rij di columna den e área di centro di stad. E hombernan tabata bisti paña cosé di laná di camel pa protegá nan mes for dje calor ardiente dje Desierto di Sahara durante dia i for dje frialdad di anochi. Nos a siña comprendé i respetá e manera cu hende ta adaptá na condicionnan dje clima unda nan ta biba.

E celo cauteloso dje rumannan a siña nos hopi tocante dependencia completo riba Jehova i siguimentu dje instruccionnan di esnan cu sa mas tocante predicacion bou di circunstancianan asina. Nos rumannan cristian tabata di hopi nacionalidad; tog nan a traha armoniosamente den nan sirbishi na Jehova.

Un Asignacion Nobo

Debí na oposicion na nos trabou di predicá, nos tabatin cu bandoná Italia, pero felismente nos a aceptá un asignacion nobo di predicá na Brazil na 1957. Ami i Francis a adaptá n’e bida i custumbernan, i despues di ocho luna, Francis a ser invitá pa haci e trabou di circuito. Nos a biaha cu bus, cu avion i na pia. Biahando den e pais inmenso i bunita aki tabata manera hañamentu di les den geografia.

Nos promé circuito a incluí dies congregacion den e stad di São Paulo, i tambe dies pueblo chikitu den e interior i alolargu dje área sur di costa dje estado di São Paulo. No tabatin congregacion den e pueblonan aki n’e tempu ei. Nos tabata busca un lugá pa keda, i despues di establecé nos mes, nos tabata pasa di cas pa cas cu e mensahe di Reino. Tambe nos tabata laga pamfleta di invitacion pa bin mira un dje películanan educativo di Watch Tower Society.

Drentando un bus cu película, proyector, transformater, archivo, literatura, pamfleta di invitacion i ekipo pa stempel e sitio di pasamentu dje película riba e pamfletanan di invitacion, no tabata un tarea fácil. Na comparacion, nos maleta chikitu di paña no tabata un artículo grandi. E proyector mester a ser poné den nos scochi p’e no sagudí i plama for di otro dor di biahamentu riba mal caminda.

Despues di a localisá un lugá pa pasa e película, nos tabata bai di porta pa porta i laga pamfletanan di invitacion p’e pasamentu dje película. Algun biaha nos a haña permit pa pasa e película den un restaurant of un hotel. Otro biaha nos tabata span un laken entre dos staca na aire liber. E auditorio apreciativo, di ken hopi nunca a yega di mira un cine, tabata para i scucha atentamente segun cu Francis tabata lesa e naracion. Despues, nos tabata plama literatura bíblico.

Pa alcansá e pueblonan, nos tabata biaha cu bus. Algun dje riunan no tabatin brug ta pasa ariba, pues e bus tabata ser poné riba un vlot grandi i flotá p’e otro banda. Nos tabata ser consehá pa sali for dje bus i, si nos a mira e bus slip bai cai den e riu, pa bula afó n’e otro banda dje vlot pa evitá di ser halá abou dor dje awa. Gradicidamente, nunca nos bus a cai den riu​—⁠afortunadamente, specialmente ya cu e riu tabata conocí pa su pirañanan comedó di carni!

Despues di a asistí n’e congreso internacional na New York na 1958, nos a regresá Brazil, unda pronto despues nos tabata den e trabou biahero atrobe. Nos distrito a hiba nos n’e frontera uruguayo n’e parti sur, cu Paraguay n’e parti west, e estado di Pernambuco den e parti nort, i Oceano Atlántico n’e banda oost di Brazil.

E Colonia di Leproso

Meimei di añanan 60, nos a aceptá un invitacion pa pasa un dje películanan dje Sociedad den un colonia di leproso. Mi tin cu admití cu mi tabata un tiki spantá. Nos tabatin poco conocimentu di lepra, cu excepcion di loke nos a lesa tocante dje den Bijbel. Ora nos a drenta e tereno cerá cu casnan aden, cu tabata di ferf blancu, nos a ser dirigí pa un sala grandi. Un seccion a ser separá dor di cabuya den e parti meimei pa nos i nos ekipo.

E electrishen cu a yuda nos tabata un residente dje colonia di 40 aña di edad. El a perde su mannan te n’e polsnan i tambe algun otro parti di su curpa, desfigurand’e malamente. Mi tabata turdí na promé instante, pero su manera alegre i su abilidad den atendé su trabou a trankilisá mi. Pronto nos tabata combersando riba hopi cos segun cu nos a completá e preparacionnan necesario. Dje mil personanan enfermo cu ta keda den e facilidad, mas cu dos cien a asistí. Segun cu nan a cocochá drenta, nos a nota hopi diferente etapa dje enfermedad cu nan tabata sufri di dje. Ki un experencia conmovedor i emocionante pa nos!

Nos a pensa riba loke Jesus a bisa n’e leproso kende a roga, “Señor, si bo solamente kier, bo por hací mi limpi.” Tocando e homber, Jesus a sigur’é, “Mi kier. Sea limpi.” (Mateo 8:​2, 3) Despues cu e programa a terminá, hopi a acercá nos pa gradicí nos cu nos a bini. Nan curpa dañá tabata un testimonio bibu di humanidad su gran sufrimentu. Despues, Testigonan local a studia Bijbel cu esnan deseoso di siña mas.

Na 1967 nos a regresá Merca pa atendé algun problema serio cu salú. Segun cu nos a sigui trata cu esakinan, atrobe nos tabatin e privilegio pa sirbi den e trabou di circuito. P’e siguiente 20 añanan, mi a participá cu Francis den e trabou biahero na Merca. Durante e tempu aki tambe el a duna instruccion n’e Scol di Ministerio di Reino.

Ki un fuente di animacion tabata pa mi di por tin un esposo amoroso i fiel compañé kende a cumpli cu cualkier asignacion cu el a ricibí! Huntu nos tabatin e privilegio di compartí e tesoro dje berdad bíblico na partinan di cuater continente.

Sostení dor dje Tesoro

Aya na 1950, Mama a casa cu David Easter, un ruman fiel kende a ser bautisá na 1924. Nan a sirbi huntu pa hopi aña den e ministerio di tempu completo. Sin embargo, durante e parti final di Mama su bida, e malesa di Alzheimer [verkalking] a cuminsá manifestá su mes. El a rekerí hopi atencion segun cu e malesa a disminuí su abilidad di razoná. Mi ruman muhernan dispuesto pa yuda i David a asumí e responsabilidad pisá di percurá p’e, ya cu nan no tabata kier pa nos bandoná nos privilegionan special di sirbishi di tempu completo. Mama su ehempel fiel te na su morto na 1987 a contribuí hopi pa yuda nos planea nos curso den bida, i e speransa di un recompensa celestial cu el a atesorá a consolá nos.

Pa 1989, mi por a sinti cu Francis no tabata mes enérgico mas manera e tabata promé. Nos no tabata conciente cu ‘kentura di slak,’ un malesa bon conocí na hopi parti di mundu, tabata teniendo un efecto perhudicial riba dje. Na 1990, e enemigu implacabel aki a venc’é, i mi a perde mi partner stimá cu kende mi a compartí mas cu 40 aña den Jehova su sirbishi.

Ahustenan ta un parti di bida. Algun ta fácil, i algun ta difícil. Pero Jehova, e Dunador dje tesoro preciosísimo dje berdad bíblico, a sostené mi mediante su organisacion i e amor i animacion di mi famia. Ainda mi ta hañando contentamentu segun cu mi ta anticipá ansiosamente e cumplimentu di tur Jehova su promesanan infalibel.

[Plachi na página 23]

Ora ami i mi esposo tabata misionero na Italia