Informe di Proclamadornan di Reino

Jehova Ta Mas Fuerte Cu Su Enemigunan

E DIABEL i su demoñonan pa hopi tempu a purba stroba e predicacion dje bon nobo pa medio di religion falsu i spiritismo. Bijbel ta papia tocante Satanas su intencion maligno na 2 Corintio 4:4 caminda e ta declará cu “e dios dje sistema di cosnan aki a ciega mente dje incrédulonan, p’e iluminacion dje glorioso bon nobo tocante Cristo, cu ta e imágen di Dios, no yega na nan.”

Pero Jehova Dios ta mas fuerte cu Satanas. No tin nada cu Jehova su enemigunan por haci pa stop e cumplimentu di su boluntad divino, cua ta pa “tur sorto di hende ser salbá i yega na un conocimentu exacto dje berdad.” (1 Timoteo 2:⁠4) E siguiente informenan for di proclamadornan di Reino na Australia ta resaltá esaki.

◻ Despues di un kiebro cu religion pa 20 aña largu, un señora a cuminsá lesa e Bijbel atrobe. E interes renobá aki den Bijbel a pon’é haña un cantidad di pregunta, pues el a resa na Dios pa yudansa p’e haña e contestanan. E kier a busca e berdad, pero e tabata sa cu bayendo bek na su religion bieu lo no a resolvé su problema. En bes di esei, el a cuminsá su búskeda dor di bishitá un tienda di buki segunda mano i puntra si nan tabatin cualkier buki tocante religion.

E doño dje tienda a corda cu e tabatin un buki religioso, no den e tienda, sino na cas. E título dje buki tabata Bo por biba pa semper den Paradijs riba tera, publicá dor di Testigonan di Jehova. E señora a lesa e buki ansiosamente i a haña contesta riba hopi di su preguntanan di Bijbel. Despues di busca Testigonan di Jehova den buki di telefon, finalmente el a tuma contacto cu nan i a cuminsá un studio regular di Bijbel.

◻ Un muher hóben a contratá e servicionan di un corant local pa pone aviso di benta di un amuleto. E aviso a referí na dje como un ‘amuleto medieval cu ta masha poderoso.’ Un Testigo di Jehova a mira e aviso. El a dicidí na yama e number di telefon duná i papia cu e muher tocante e fuente dje supuesto poder dje amuleto. A sigui un consideracion riba e punto di bista di Bijbel tocante actividad di demoño. E muher hóben cu tabatin e amuleto a revelá cu net un dia promé, el a resa na Dios pa yudansa cu su problemanan cu demoño. E Testigo a haci areglo pa un otro consideracion na telefon.

Ora el a yama, e muher hóben no tabata na cas. E mama a contestá e telefon i a bisa: “Mi no sa kico bo a bisa mi yu muher, pero loke a sosodé ta un milager!” El a conta cu despues dje yamada inicial, su yu muher a tira afó tur su potretnan i bukinan satánico i a cuminsá lesa e Bijbel.

Pronto despues, areglonan a ser hací pa un bishita personal n’e muher hóben. Mesora el a aceptá un studio regular di Bijbel cu Testigonan di Jehova. Tambe el a cuminsá asociá cu e Testigonan dor di asistí na nan reunionnan cristian. Atrobe, Jehova a derotá e demoñonan dor di laga e conocimentu exacto di berdadnan bíblico lusa.