Bo Religion Un Barcu Cu Nunca Mester Ser Bandoná?

UN BARCU ta meimei di un tempestad. E tripulacion, cu ta luchando desesperadamente pa scapa nan barcu, ta enfrentá un decision dramático: sea pa keda na bordo of pa bandoná e barcu i scapa nan curpa. Bo tabata sa cu e senario spantoso aki ta ser usá como un ilustracion teológico?

Teólogonan, specialmente escolásticonan católico, hopi biaha ta compará nan iglesia cu un barcu cu ta pasando den un mal tempu. Nan ta bisa cu e barcu aki, cu Jesus of Pedro na timon, ta representá e único medio di salbacion. E posicion dje cleronan ta, ‘Nunca bandoná e barcu. E iglesia a experenciá crísisnan serio anteriormente, pero e ta un barcu cu a pasa dor di tur e tempestadnan di historia.’ Algun ta bisa, ‘Pakico bandon’é? Ki alternativa tin? Pakico no keda i yuda hib’é den awanan mas calmu?’

Na armonia cu e idioma figurativo aki, hopi hende, cu ta pertenecé na tur tipo di religion, ta razoná, ‘Mi sa cu mi religion ta robes den hopi cos, pero mi ta spera cu lo e cambia. Mi no kier bandon’é. Lo mi tin gana di tin un parti den yud’é vence su dificultadnan.’ E clase di razonamentu aki por ser dominá dor di afecto sincero p’e religion di bo antepasadonan of asta dor di e temor di “traicion’é.”

Un ehempel al caso ta esun di Hans Küng, un teólogo disidente católico bon conocí, kende a pensa: “Mi mester bandoná e boto durante e mal tempu, lagando esnan cu ken mi a nabegá te awor pa enfrentá e bientu, chica e awa i talbes lucha pa sobrebibencia?” El a contestá: “Lo mi no entregá mi efectividad dentro dje iglesia.” Un otro alternativa lo ta di “kibra cu e iglesia aki, pa motibu di su defecto, a cambio p’e amor di balornan mas haltu, i talbes, pa ta cristiannan mas auténtico.”—Die Hoffnung bewahren.

Pero un persona por keda na bordo dje boto di su mes iglesia den e speransa cu Dios, den su misericordia, lo permití tur religion un periodo di tempu ilimitá pa reformá? Esei ta un pregunta serio. Manera e ilustracion ta indicá, bandonando den purá un barcu den peliger dor di subi botonan salbabida cu ta insigur, lo ta mes peligroso cu keda na bordo di un barcu cu ta hundiendo. Ta sabí pa keda den un iglesia a todo costo, sin importá su condicion? Ki prospectonan di reforma religionnan djawe ta ofrecé? Pa cuantu tempu Dios lo permití nan traha contra su boluntad?

[Plachi Rekonosementu na página 3]

Chesnot/Sipa Press