Pakico Ta Tempu pa Dicidí?

DEN siglo 16 P.E.C., Dios a scoge e israelitanan como su “propiedad special for di tur otro pueblo, . . . un nacion santu.” (Exodo 19:5, 6) Pronto nan a perde nan santidad, nan puresa religioso, permitiendo nan mes ser contaminá dor dje idolatria i prácticanan corumpí dje nacionnan bisiña. Asina nan a revelá nan mes como “un pueblo cabesura.” (Deuteronomio 9:6, 13; 10:16; 1 Corintio 10:7-11) Durante un periodo di mas cu trescien aña despues dje morto di Hosué, Jehova a lanta huesnan, guianan fiel cu mester a guia e israelitanan bek na adoracion berdadero. Sin embargo, e pueblo, “no a abstené di nan prácticanan i nan conducta terco.”—Hues 2:17-19.

Despues di esei, Dios a lanta fiel reynan i profetanan pa inducí e pueblo pa bolbe na adoracion berdadero. Profeta Azarías a animá Rey Asa i su co-paisanonan pa busca Jehova: “Si boso busk’é, lo e laga su mes ser hañá pa boso, pero si boso bandon’é lo e bandoná boso.” Asa a implementá reforma religioso den e reino di Huda. (2 Crónica 15:1-16) Siguientemente, Dios tabatin cu haci e invitacion di nobo mediante su profeta Joël. (Joël 2:12, 13) Mas despues atrobe, Sofonías a exhortá e habitantenan di Huda pa “busca Jehova.” E hóben rey Hosías a haci esei den un campaña di reforma pa eliminá idolatria i corupcion.—Sofonías 2:3; 2 Crónica 34:3-7.

Apesar di tal episodionan di repentimentu, e condicion religioso dje pueblo tabata birando mas i mas crítico. (Jeremías 2:13; 44:4, 5) Jeremías a denunciá e sistema religioso contaminá cu prácticanan idólatra, describiend’e como ireformabel: “Un cusita por cambia su cueru? of un leopardo su manchanan? Boso mes tambe cu ta personanan cu a ser siñá pa haci loke ta malu, por haci loke ta bon.” (Jeremías 13:23) P’e motibu aki, Dios a imponé un castigu pisá riba e reino di Huda. Jerusalem i su tempel a ser destruí na 607 P.E.C. i e sobrebibientenan a ser deportá como catibu pa Babilonia, unda nan a permanecé pa 70 aña.

Ora e periodo di tempu ei a pasa, Dios a mustra misericordia. El a inducí Rey Ciro pa libra e israelitanan, di cua un resto a regresá Jerusalem pa reconstruí e tempel. En bes di siña un les for di tur esaki, nan a desviá for dje adoracion berdadero un biaha mas, causando Jehova Dios pa haci su invitacion di nobo: “Bolbe bek na mi, i ami lo bolbe bek na boso.”—Malaquías 3:7.

Pakico Israel A Ser Rechasá

Kico tabata e condicion religioso dje israelitanan den tempu di Jesus? E lidernan religioso hipócrita tabata “guianan ciegu” siñando “mandamentu di hende como doctrina.” ‘Nan tabata violando e mandamentu di Dios pa causa di nan tradicion.’ E pueblo a onra Dios “cu nan lipnan,” pero nan curason tabata hopi leu for di dje. (Mateo 15:3, 4, 8, 9, 14) Nan mester a ricibí como nacion atrobe un otro oportunidad pa repentí? No. Jesus a bisa: “E reino di Dios lo ser kitá for di boso i duná na un nacion cu ta producí su frutanan.” El a bisa mas aleu: “Boso cas,” e tempel den Jerusalem, “ta ser bandoná na boso.” (Mateo 21:43; 23:38) Nan eror tabata muchu grandi. Nan a rechasá Jesus como Mesías i a laga mat’é, scogiendo e César romano opresivo como nan rey.—Mateo 27:25; Juan 19:15.

E israelitanan no kier a comprendé cu e periodo den cua Jesus a efectuá su ministerio tabata un tempu di huicio. P’e habitantenan infiel di Jerusalem, Jesus a bisa: “Bo no a distinguí e tempu cu bo a ser inspeccioná.”—Lucas 19:44.

Na Pentecoste di 33 E.C., Dios a forma un nacion of pueblo nobo, e disipelnan di su Yu, Jesucristo, ungí cu spiritu, kendenan lo ta scogí di tur rasa i nacion. (Echo 10:34, 35; 15:14) Tabatin cualkier speransa cu e sistema religioso hudiu finalmente lo a ser reformá? E legionnan romano a proveé e contesta na 70 E.C., rosando Jerusalem pareu cu suela. Dios a rechasá totalmente e sistema religioso ei.—Lucas 21:5, 6.

Cristiandad Su Gran Apostasia

Cristiannan ungí cu spiritu tambe a forma “un nacion santu, un pueblo pa posesion special.” (1 Pedro 2:9; Galatio 6:16) Pero ni sikiera e congregacion cristian primitivo a preservá su puresa religioso pa hopi tempu.

E Scritura a profetisá di un gran apostasia, of caimentu for dje fe berdadero. E mal yerba simbólico di Jesus su comparacion, esta, cristiannan falsu, lo a purba hoga e trigu simbólico, of cristiannan berdadero, esnan ungí cu e spiritu di Dios. E comparacion ta revelá cu e plamamentu di cristianismo falsu, promové dor di Dios su enemigu principal, e Diabel, tabata cerca di cuminsá, “miéntras hende tabata durmiendo.” Esaki a tuma lugá despues dje morto di Cristo su fiel apostelnan, durante un periodo di cabishamentu spiritual cu a sigui. (Mateo 13:24-30, 36-43; 2 Tesalonicense 2:6-8) Manera e apostelnan a profetisá, hopi cristian falsu a penetrá drenta den e tou. (Echo 20:29, 30; 1 Timoteo 4:1-3; 2 Timoteo 2:16-18; 2 Pedro 2:1-3) Juan tabata e último dje apostelnan pa muri. Pa rond di aña 98 E.C., el a skirbi cu “e último ora,” e parti final dje periodo apostólico, a cuminsá caba.—1 Juan 2:18, 19.

Cu e aliansa di religion i poder político ratificá dor di emperador romano Constantino, e condicion spiritual, doctrinal i moral di cristiandad a empeorá dramáticamente. Hopi historiador ta di acuerdo cu “e triunfo dje Iglesia durante siglo cuater” tabata, for dje punto di bista cristian, “un desaster.” ‘Cristiandad a perde su nivel moral haltu’ i a aceptá hopi práctica i filosofianan for di paganismo, manera “e culto di Maria” i e adoracion di “santunan,” i tambe e concepto di Trinidad.

Despues di su triunfo falsu, e condicion di cristiandad a deteriorá. Decretonan i definicionnan doctrinal dor di papanan i concilionan, pa no papia mes dje Inkisicion, Crusada i gueranan “santu” entre católico i protestant, a producí un sistema religioso ireformabel.

Den su buki A World Lit Only by Fire, William Manchester ta skirbi: “E papanan den siglo 15 i 16 a biba mescos cu emperadornan romano. Nan tabata e hombernan mas ricu di mundu, i nan huntu cu nan cardinalnan a enrikesé nan mes mas ainda bendiendo puestonan santu.” Durante e gran apostasia, gruponan chikitu of individuonan solitario a busca pa redescubrí berdadero cristianismo, manifestando e característicanan dje trigu simbólico. Hopi biaha nan a paga un prijs haltu. E mésun buki ta bisa: “Tabatin bes cu a parce cu e berdadero santunan di cristianismo, tantu protestant como católico, a bira mártirnan hací pretu dor cu nan a ser kimá den candela.” Otronan, asina yamá reformistanan manera Martin Luther i Johannes Calvijn, a logra crea sistemanan religioso duradero cu tabata separá for dje Iglesia Católico pero cu ainda a compartí su doctrinanan básico. Tambe nan tabata profundamente enbolbí den asuntunan político.

Den e campo protestant, esfuersonan a ser haci pa efectuá un asina yamá rebibamentu religioso. Durante siglonan 18 i 19, por ehempel, e esfuersonan aki a resultá den actividad vigoroso di misionero den estranheria. Sin embargo, manera e wardadornan religioso mes ta admití, awe e condicion spiritual dje tou protestant ta leu di ta animador. E teólogo protestant Oscar Cullmann recientemente a admití cu “den e iglesianan mes, tin un crísis di fe.”

Reformanan i contrareformanan tambe a ser promové den Iglesia Católico mes. For di siglo 11 te cu 13, apesar dje corupcion plamá i inmenso rikesa dje cleronan, órdennan monástico cu a sigui estrictamente e voto di pobresa a ser formá. Pero nan a ser vigilá di acerca i, segun escolásticonan, nan a ser reprimí dor di mando di iglesia. Despues a bini e Contra-Reformacion di siglo 16, promové dor dje Concilio di Trent i grandemente dirigí riba combatimentu dje Reformacion Protestant.

Den e promé mitar di siglo 19, durante e periodo di restoracion eclesiástico, Iglesia Católico a asumí un actitud autoritario i conservativo. Sin embargo, no por ser bisá cu algun berdadero reforma a ser hací pa restorá cristianismo berdadero. Mas bien, esakinan tabata simpel esfuersonan pa consolidá e autoridad dje clero siendo enfrentá cu cambio dje mundu religioso, político i social.

Mas recientemente, den añanan 60, a parce cu Iglesia Católico kier a lansa un proceso di cambio profundo cu e concilio ecuménico Vaticano II. Sin embargo, un paro abrupto n’e asina yamá renobacion conciliar a ser imponé dor dje papa dje tempu ei pa frena e spiritu di miembronan progresivo dje iglesia. E fase aki, cu algun hende ta yama e restoracion di Wojtyła, a ser definí dor di un grupo católico como “un forma nobo di constantinismo.” Manera a ser mencioná specíficamente den e revista jesuita La Civiltà Cattolica, Iglesia Católico, mescos cu otro religionnan, ta enfrentando “un crísis radical i global: radical pasobra e ta enbolbé e raisnan mes di fe i bida cristian; global pasobra e ta enbolbé tur faceta di cristianismo.”

E religionnan di cristiandad realmente no a pasa den un proceso di reformacion, ni nan lo tabata por a haci esaki, ya cu cristianismo berdadero lo a ser restorá solamente n’e tempu dje “cosecha,” cu e recogementu dje trigu simbólico den un solo congregacion puru. (Mateo 13:30, 39) E lista largu di crímen i delitunan cometí den nomber di religion, sea nan ta pretendé di ta cristian of no, ta haci e pregunta lanta, Ta realístico pa spera berdadero reforma for di cristiandad?

Reforma Ta Imposibel?

E buki di Revelacion, of Apocalípsis, ta papia di un gran muher di mal bida simbólico cu ta carga e nomber misterioso “Babilonia e Grandi.” (Revelacion 17:1, 5) Pa siglonan lectornan di Bijbel a busca pa splica e misterio dje símbolo aki. Hopi hende tabata disgustá dor dje rikesa i corupcion dje cleronan. Algun a pensa cu Babilonia e Grandi a representá e mando di iglesia. Entre nan tabatin Jan Hus, un pastor católico bohemio kende a ser kimá bibu na 1415, i Aonio Paleario, un humanista italiano kende a ser cologá i kimá na 1570. Tur dos a intentá sin éxito pa reformá Iglesia Católico den e speransa cu lo el a bolbe na “su dignidad original.”

Na contraste, capítulo 17 i 18 di Revelacion ta indicá cu Babilonia e Grandi ta representá e imperio mundial di tur religion falsu.a E “gran muher di mal bida” componí aki ta ireformabel pasobra “su picánan a montoná huntu te na cielu.” Realmente, den e siglo 20 aki, prácticamente tur religion, no solamente esnan di cristiandad, ta responsabel pa gueranan cu ta sigui drama hopi sanger i p’e degradacion moral severo cu ta asotá humanidad. Consecuentemente, Dios a decretá e destruccion di “Babilonia.”—Revelacion 18:5, 8.

Awor Ta e Tempu pa “Sali For di Dje”

Cumplimentu di profecianan bíblico ta revelá cu nos tempu ta cuadra cu “e conclusion” dje mal “sistema di cosnan” aki. (Mateo 24:3) Ken cu sinceramente kier adorá Dios no por permití su mes di sigui su propio idea i preferencianan. E mester ‘busca Jehova miéntras e por ser hañá,’ sí, awor mes, pasobra e “tribulacion grandi” cu Jesus a pronosticá ta cerca. (Isaías 55:6; Mateo 24:21) Mescos cu tabata cierto den e caso dje pueblo di Israel, Dios lo no tolerá corupcion di un religion djis pasobra e ta gaba di su antigwedad. En bes di purba drecha un barcu cu ta destiná pa sink, tur esnan cu ta deseá Dios su aprobacion i salbacion sin tarda mester obedecé e mandamentu inspirá di Revelacion 18:4: “Sali for di [Babilonia e Grandi], mi pueblo, si boso no kier participá cuné den su picánan, i si boso no kier ricibí parti di su plaganan.”

Pero “sali” pa bai unda? Unda otro salbacion ta ser hañá? No tin e peliger di busca refugio den e lugá robes? Con e único religion cu tin e aprobacion di Dios por ser identificá? E único contestanan confiabel por ser hañá den e Palabra di Dios. (2 Timoteo 3:16, 17) Testigonan di Jehova ta invitá bo pa examiná e Bijbel mas atentamente. Lo bo por comprendé ken ta esnan cu Dios a scoge como “un pueblo pa su nomber,” kendenan lo e protegá durante e inminente dia di su rabia.—Echo 15:14; Sofonías 2:3; Revelacion 16:14-16.

[Notanan]

[Plachi na página 7]

Si bo barcu religioso ta hundiendo, acudí n’e barcu salbabida di cristianismo berdadero