Lesnan For dje Milagernan di Jesus

“AWOR riba e di tres dia un fiesta di casamentu a tuma lugá na Cana di Galilea . . . Jesus i su disipelnan tambe tabata invitá n’e fiesta di casamentu. Ora e biña a caba, e mama di Jesus a bis’é: ‘Nan no tin biña.’ ” E incidente aki a prepará e esena pa e promé milager di Jesus.​—⁠Juan 2:​1-3.

Un problema asina no tabata muchu insignificante, di muchu poco balor pa hala Jesus su atencion riba dje? Un escolástico bíblico ta splica: “Hospitalidad den Oriente tabata un deber sagrado . . . Berdadero hospitalidad, specialmente na un fiesta di casamentu, a encerá un sobreabundancia di cuminda i bibida. Si e suministro a [caba] na un fiesta di casamentu, e reputacion dje famia i e pareha hóben lo a keda pa semper manchá cu e bergwensa aki.”

P’esei Jesus a actua. El a ripará “cu tabatin poní ei seis tinashi di piedra pa awa segun loke e reglanan di purificacion dje hudiunan a rekerí.” Labamentu ritual di man promé cu come tabata un custumber entre e hudiunan, i un gran cantidad di awa tabata rekerí pa sirbi e necesidadnan di esnan presente. “Yena e tinashinan di awa cu awa,” Jesus a ordená esnan cu tabata sirbi e invitadonan. Jesus no tabata “e director dje fiesta,” pero el a papia directamente i cu autoridad. E relato ta bisa: “Awor, ora e director dje fiesta a purba e awa, [el] a ser combertí den biña.”​—⁠Juan 2:​6-9; Marco 7:⁠3.

Kisas ta parce straño cu algu asina comun i coriente manera un casamentu por tabata e esena pa Jesus su promé milager, pero e incidente ta revelá hopi cos tocante Jesus. E tabata un homber soltero, i na ocasionnan mas despues el a considerá e bentahanan di solteria cu su disipelnan. (Mateo 19:12) Sin embargo, su presencia na un fiesta di casamentu a revelá cu e siguramente no tabata contra matrimonio. E tabata balansá i a apoyá e areglo matrimonial; el a mir’é como algu onorabel den bista di Dios.​—⁠Compará cu Hebreonan 13:⁠4.

Jesus no tabata e persona austero i friu cu artistanan di iglesia despues a traha di dje. E claramente a disfrutá di ta den compania di hende i no tabata contra pa socialisá. (Compará cu Lucas 5:29.) Asina su accionnan a pone un precedente pa su siguidornan. Jesus a demostrá personalmente cu nan no mester tabata innecesariamente serio i di mal humor​—⁠como si rectitud a nificá falta di goso. Al contrario, cristiannan a ser mandá despues: “Semper alegrá den Señor.” (Filipensenan 4:⁠4) Awe cristiannan ta paga tinu pa tene recreo den límitenan razonabel. Nan ta haña nan goso den sirbishi di Dios, pero siguiendo Jesus su ehempel, na cierto ocasion nan ta haña tempu pa disfrutá di otro su compania den un esfera social.

Ripará tambe e ternura di Jesus su emocionnan. E no tabata obligá pa haci un milager. No tabatin ningun profecia relacioná cu esaki cu mester a ser cumplí. Claramente, Jesus simplemente a ser conmoví dor di e preocupacion di su mama i e situacion pertá dje pareha casando. E tabata interesá den nan sintimentunan i a deseá pa spar nan di bergwensa. Esei no ta edificá bo confiansa cu Cristo tin un berdadero interes den bo​—⁠asta den bo problemanan comun i coriente?​—⁠Compará cu Hebreonan 4:​14-16.

Siendo cu cada tinashi ‘por a contené dos of tres midí líkido’ di awa, e milager di Jesus a enbolbé un cantidad grandi di biña​—⁠tal bes 390 liter (105 galon)! (Juan 2:⁠6) Pakico un cantidad asina enorme? Jesus no tabata promoviendo buracheria, algu cu Dios ta condená. (Efesionan 5:18) Mas bien, e tabata demostrando generosidad divino na imitacion di Dios. Siendo cu biña tabata un bibida comun, cualkier cantidad restante por a ser usá na otro ocasionnan.​—⁠Compará cu Mateo 14:​14-20; 15:​32-37.

E cristiannan di promé a imitá Jesus su ehempel di generosidad. (Compará cu Echonan 4:​34, 35.) I Jehova su pueblo awe di igual manera ta ser animá pa “practicá dunamentu.” (Lucas 6:38) Sin embargo, Jesus su promé milager tambe tin un nificacion profético. E ta señalá na un tempu den futuro ora Dios generosamente lo percurá “un bankete di plato yen di zeta, un bankete di biña mantené riba sedimentu” i asina eliminá hamber completamente.​—⁠Isaías 25:⁠6.

Pero, kico dje hopi milagernan cu Jesus a haci cu a enbolbé curacion físico? Kico nos por siña for di nan?

Haciendo Bon riba Sabat

“Lanta ariba, coge bo cot i cana.” Jesus a papia e palabranan aki cu un homber cu tabata malu pa 38 aña. E relato dje Evangelio ta continuá: “Cu esei e homber inmediatamente a bira sano di salú, i a coge su cot i a cuminsá cana.” Sorprendentemente, no ta tur hende a keda contentu cu e cambio di situacion aki. E relato ta bisa: “E hudiunan a cuminsá persiguí Jesus, pasobra e tabata haci e cosnan aki durante Sabat.”​—⁠Juan 5:​1-9, 16.

Sabat tabata intencioná pa ta un dia di sosiegu i alegria pa tur hende. (Exodo 20:​8-11) Sin embargo, p’e tempu di Jesus, el a bira un laberinto di reglanan opresivo trahá dor di hende. Escolástico Alfred Edersheim a skirbi cu den e seccionnan extenso di ley di Sabat dje Talmud, “asuntunan ta ser considerá seriamente como di vital importancia religioso, asuntunan cu apénas bo por imaginá un persona cu un intelecto sano lo considerá seriamente.” (The Life and Times of Jesus the Messiah) E rabinan a atribuí importancia di bida-i-morto na reglanan ridículamente arbitrario cu a regulá prácticamente tur aspecto dje bida di un hudiu​—⁠hopi biaha cu falta di consideracion sin heful pa sintimentu humano. Un regla di Sabat a decretá: “Si un edificio a cai den otro riba un homber i tin duda si e ta ei of no, of si e ta bibu of morto, of si e ta un gentil of un israelita, nan por kita e ruina for di riba dje. Si nan hañ’é bibu nan por kita mas ainda for di riba dje; pero si [e ta] morto, nan ta lagu’é.”​—⁠Tésis Yoma 8:​7, The Mishnah, traducí dor di Herbert Danby.

Con Jesus a mira tal pikiment’i pieu riba pegamentu estricto i excesivo na reglanan? Ora el a ser criticá debí cu el a haci curacion riba Sabat, el a bisa: “Mi Tata a sigui traha te awor, i ami ta sigui traha.” (Juan 5:17) Jesus no tabata efectuando trabou seglar afin di enrikesé su mes. Mas bien, e tabata haciendo e boluntad di Dios. Mescos cu e levitanan a ser permití pa sigui cu nan sirbishi sagrado riba Sabat, Jesus corectamente por a efectuá su debernan asigná dor di Dios como e Mesías sin violá e Ley di Dios.​—⁠Mateo 12:⁠5.

E curacionnan di Jesus riba dia di Sabat tambe a desenmascará e escriba i fariseonan hudiu como “demasiado hustu”​—⁠rígido i desbalansá den nan manera di pensa. (Eclesiastes 7:16) Siguramente, no tabata e boluntad di Dios pa bon obranan ser restringuí na cierto dianan di siman; tampoco tabata e intencion di Dios pa Sabat ser un procedura bano di pegamentu estricto i excesivo na regla. Jesus a bisa na Marco 2:27: “Sabat a yega di existí pa causa di hende, i no hende pa causa di sabat.” Jesus a stima hende, no reglanan arbitrario.

Pues ta bon pa cristiannan awe no ser muchu rígido of orientá riba regla den nan manera di pensa. Esnan den posicion di autoridad den e congregacion ta evitá di carga otronan cu reglanan i proceduranan excesivo trahá dor di hende. Jesus su ehempel tambe ta animá nos pa busca oportunidad pa haci bon. Por ehempel, nunca un cristian lo razoná cu lo e compartí berdadnan bíblico solamente ora e ta participando formalmente den e ministerio di cas-pa-cas of ora e ta dunando un discurso. Apostel Pedro ta bisa cu e cristian mester ta “semper cla pa haci un defensa dilanti tur hende cu ta exigí di boso un motibu pa e speransa den boso.” (1 Pedro 3:15) E hacimentu di bon no tin restriccion di tempu.

Un Les den Compasion

Un otro milager sobresaliente ta registrá na Lucas 7:​11-17. Segun e relato, Jesus “a biaha pa un stad yamá Nain, i su disipelnan i un multitud grandi tabata biahando cuné.” Te awe, bo por mira grafnan n’e parti zuidoost dje pueblo arabir moderno di Nein. “Yegando cerca n’e porta dje stad,” el encontrá un esena ruidoso. “Pues mira! nan tabata sacando un homber morto, e único yu di su mama. Ademas, e tabata biuda. Un multitud considerabel dje stad tambe tabata cuné.” H. B. Tristram a skirbi cu “e moda di conducí un entiero no a cambia” for di tempu antiguo, agregando: “Mi a mira e muhernan bai dilanti e cama di morto, guiá p’e muhernan profesional cu ta yora morto. Nan ta tira nan brasanan na laira, ta ranca nan cabei, cu e hacimentu di gesto di tristesa di mas extravagante, i gritamentu di nomber dje defuntu.”​—⁠Eastern Customs in Bible Lands.[6]

Meimei di un cáos ruidoso asina tabata cana un biuda penando kende su aparencia so caba mester a reflehá dolor profundo. Despues cu ya el a perde su esposo, el a considerá su yu homber como, segun e palabranan di autor Herbert Lockyer, “e garoti di su behes, i e consuelo di su soledad​—⁠e sosten i pilar dje cas. Den e pérdida di su único yu, e último sosten cu a keda a ser eliminá.” (All the Miracles of the Bible) Con Jesus a reaccioná? Den Lucas su palabranan elocuente, “ora e Señor a haña bista di dje, el a ser conmoví cu duele p’e, i a bis’é: ‘Stop di yora.’ ” E expresion “conmoví cu duele” ta derivá for di un palabra griego cu literalmente kier men “mondongonan.” E ta nificá “ser conmoví te den bo partinan interior.” (Vine’s Expository Dictionary of Old and New Testament Words) Sí, Jesus tabata conmoví te den profundidad di su propio ser.

Jesus su mes mama probablemente tabata biuda n’e tempu aki, pues probablemente e tabata sa dje dolor di afliccion den e pérdida di su tata di criansa, José. (Compará cu Juan 19:​25-27.) E biuda no tabatin nodi roga Jesus. Spontáneamente, “el a yega cerca i a mishi cu e cama di morto,” apesar dje echo cu bou dje Ley di Moises mishimentu cu un cadaver a haci un persona impuru. (Númeronan 19:11) Mediante su podernan milagroso, Jesus por a kita e fuente mes di impuresa! “El a bisa: ‘Hóben, mi ta bisá bo, Lanta ariba!’ I e homber morto a lanta sinta i a cuminsá papia, i el a dun’é na su mama.”

Ki un les conmovedor den compasion! Cristiannan no mester imitá e actitud sin amor i friu cu ta ser manifestá durante e “último dianan” aki. (2 Timoteo 3:​1-5) Al contrario, 1 Pedro 3:8 ta spierta: “Finalmente, boso tur ser dje mésun ánimo i parecer, compartiendo sintimentu como compañero, teniendo cariño fraternal, siendo tiernamente compasivo.” Ora un miembro di famia di un conocí di nos muri of ta seriamente malu, nos no por efectuá un resureccion of cura e persona enfermo. Pero nos por ofrecé yudansa práctico i consuelo, tal bes simplemente dor di tei presente i yora cu nan.​—⁠Romanonan 12:⁠15.

E resureccion dramático aki efectuá dor di Jesus tambe ta señalá n’e futuro​—⁠un tempu ora “tur esnan den e grafnan memorial lo tende su bos i lo sali”! (Juan 5:​28, 29) Rond e tera, esnan cu a perde un ser stimá lo experenciá personalmente e compasion di Jesus ora mama, tata, yu i amigu defuntu lo regresá for di graf!

E Lesnan dje Milagernan

Claramente, anto, e milagernan di Jesus tabata mas cu manifestacionnan emocionante di poder. Nan a glorificá Dios, poniendo un patronchi pa cristiannan kendenan ta ser instá pa ‘glorificá Dios.’ (Romanonan 15:⁠6) Nan a animá e hacimentu di loke ta bon, e mustramentu di generosidad, e manifestacion di compasion. Mas importante, nan a sirbi como un bistaso di antemano dje obranan poderoso cu lo ser efectuá durante Cristo su Reinado di Mil Aña.

Tempu cu Jesus tabata riba tera, el a efectuá su obranan poderoso den un área geográfico relativamente chikitu. (Mateo 15:24) Como Rey glorificá, su hurisdiccion lo extendé rond e tera! (Salmo 72:⁠8) E tempu ayá, esnan cu a ricibí su curacion i resureccionnan milagroso cu tempu a muri. Bou di su reinado celestial, picá i morto lo ser kitá completamente, habriendo e caminda pa bida eterno. (Romanonan 6:23; Revelacion 21:​3, 4) Sí, e milagernan di Jesus ta indicá e binimentu di un futuro glorioso. Testigonan di Jehova a yuda miyones di hende desaroyá un berdadero speransa pa ser un parti di dje. Miéntras e tempu ei no yega ainda, ki un anticipacion maraviyoso di loke lo tuma lugá pronto ta ser percurá dor dje milagernan di Jesucristo!

[Plachi na página 7]

Jesus ta cambia awa den biña