E Mihor Cos Pa Haci Cu Mi Bida

MANERA BOB ANDERSON A CONT’E

Rond di dies aña pasá, algun amigu a puntrá mi: “Bob, pakico bo a sigui traha pionero pa asina tantu tempu?” “Wel,” mi a sonreí i a bisa, “boso por pensa di algu mas mihor pa haci cu traha pionero?”

MI TABATIN 23 aña di edad na 1931 ora mi a drenta e sirbishi di pionero. Awor mi tin 87 aña i trahando pionero ainda. Mi sa cu mi no por a haci nada mas mihor cu mi bida. Lagá mi splica pakico.

Na 1914 un tratado a ser lagá na nos cas. El a ser publicá dor di e Studiantenan Internacional di Bijbel, manera Testigonan di Jehova tabata ser yamá n’e tempu ei. Ora e Testigo a regresá, mi mama a puntr’é detayadamente tocante candela di fiernu. El a ser lantá como un metodista estricto siguidor di Wesley, pero nunca por a reconciliá e doctrina aki di tormento eterno cu un Dios di amor. Tan pronto cu el a siña e berdad dje asuntu, el a bisa: “Mi ta sinti mi mas felis cu hamas mi a yega di sinti den mi bida!”

Inmediatamente mi mama a stop di instruí n’e ‘zondagschool’ metodista i a uni cu e grupo chikitu di Studiantenan di Bijbel. El a cuminsá predicá den nos pueblo di Birkenhead, cu ta enfrente dje haf di Liverpool n’e otro banda di Riu Mersey, i pronto tabata bishitando regularmente hopi pueblo bisiña riba baiskel. El a duna testimonio den e teritorio extenso aki p’e resto di su bida i a bira masha bon conocí, poniendo un ehempel excelente pa su yunan. El a muri na 1971 n’e edad avansá di 97 aña, un Testigo activo te na final.

Ami i mi ruman muher, Kathleen, a ser kitá for dje ‘zondagschool’ metodista pa compañá Mama na su reunionnan cu e Studiantenan di Bijbel. Mas despues, ora mi tata tambe a cuminsá bai huntu cu nos, mi mayornan a haci areglo pa un studio bíblico regular di famia for dje buki The Harp of God. Un studio asina tabata un novedad den e tempu ei, pero e instruccion trempan aki den berdadnan básico di Bijbel tabata masha recompensador, ya cu tantu ami como mi ruman muher a drenta e sirbishi di pionero cu transcurso di tempu.

Mama tabata di opinion cu e miramentu dje “Foto-Drama di Creacion” na Liverpool na 1920 tabata e punto crucial den sentido spiritual pa nos como mucha, i e tabatin rason. Hóben manera mi tabata, e Foto-Drama a laga un impresion bibu riba mi mente. Ainda mi ta corda e seccion cu a describí e bida di Jesus, specialmente unda el a mustr’é bayendo pa su morto. Henter e experencia a yudá mi concentrá riba e trabou mas importante den bida​—⁠predicacion!

Na cuminsamentu di añanan 1920, mi a cuminsá parti tratado huntu cu mi mama riba diadomingo atardi. Na principio nos a ser instruí pa laga nan n’e casnan; despues nos a ser bisá pa entregá nan n’e doñonan di cas i despues bishitá atrobe esnan cu tabata interesá. Mi semper a mira esaki como un fundeshi trempan pa nos actividad di rebishita i studio di Bijbel, cua ta asina productivo awe.

Drentando e Sirbishi di Pionero!

Ami cu Kathleen a ser bautisá na 1927. Mi tabata trahando como kímico analítico na Liverpool ora, na 1931, mi a tende e resolucion pa aceptá e nomber Testigonan di Jehova. Hopi biaha mi a mira e colporteurnan dje Sociedad (awor yamá pioneronan) trahando e teritorionan di negoshi den Liverpool, i nan ehempel a impresioná mi masha tantu. Cuantu mi a anhelá pa ta liber di asociacion mundano, pa dedicá mi bida den Jehova su sirbishi!

Durante zomer dje mésun aña ei, mi amigu Gerry Garrard a bisá mi cu el a aceptá un asignacion dje segundo presidente di Watch Tower Society, Joseph F. Rutherford, pa predicá na India. Djis promé cu el a haci e biahe riba laman, el a bishitá mi i a papia tocante e privilegio di sirbishi di tempu completo. Segun cu el a despidí di mi, el a sigui animá mi bisando, “Mi ta sigur cu pronto lo bo ta un pionero, Bob.” I esei ta loke a sosodé. Mi a inscribí e october ei. Ki goso, ki libertad, pasando cu baiskel dor dje camindanan di cunucu, predicando na comunidadnan isolá! Mi tabata sa e tempu ei cu mi tabata cuminsando e trabou di mas importante cu lo mi por a haci.

Mi promé asignacion como pionero tabata na South Wales unda mi a traha cu Cyril Stentiford. Despues Cyril a casa cu Kathleen, i nan a traha pionero huntu pa vários aña. Nan yu muher, Ruth, mas despues tambe a drenta e sirbishi di pionero. Pa 1937, mi tabata na Fleetwood, Lancashire​—⁠partner di pionero di Eric Cooke. Te n’e tempu ei, pioneronan a traha solamente den e áreanan di cunucu di Inglatera, pafó dje teritorio di congregacion. Pero Albert D. Schroeder, kende e tempu ei tabata responsabel p’e trabou dje oficina di sucursal dje Sociedad na Londen, a tuma e decision pa muda nos n’e stad di Bradford, Yorkshire. Esaki tabata e promé biaha cu pioneronan na Inglatera a ser asigná pa yuda un congregacion specífico.

Na 1946, Eric a bai n’e Scol Bíblico di Galad di Watchtower i a ser asigná na Sur Rodesia, awor Zimbabwe, i e huntu cu su esposa ta sirbiendo fielmente ainda como misionero na Durban, Sur Africa.

Na aña 1938 mi tabata den un otro asignacion, e biaha aki como sirbidor di zona (yamá awor superintendente di circuito) pa nortwest di Lancashire i e bunita área di Lake District. Aya mi a topa cu Olive Duckett, i despues cu nos a casa, el a compañá mi mesora den e trabou di circuito.

Irlanda Durante e Añanan di Guera

Pronto despues cu Inglatera a declará guera contra Alemania na september 1939, mi asignacion a ser cambiá pa Irlanda. Reclutamentu p’e ehército a start na Inglatera pero no n’e República di Irlanda parti sur, cua a keda un pais neutral durante e guera. E República di Irlanda i Nort Irlanda mester a bira un solo circuito. Sin embargo, tabatin restriccionnan na vigor i tabata necesario pa obtené permit di biahe pa bandoná Inglatera pa bai cualkier parti di Irlanda. E autoridadnan a bisá mi cu mi por a bai, pero lo mi mester a bai di acuerdo pa regresá Inglatera inmediatamente ora mi yega mi edad pa reclutacion. Mi a bai di acuerdo verbalmente, pero pa mi sorpresa, ora mi permit a ser procesá i emití, no tabatin absolutamente ningun condicion pegá na dje!

N’e tempu ei, tabatin solamente algu mas cu 100 Testigo den henter Irlanda. Na nos yegada na Dublin na november 1939, Jack Corr, un pionero di hopi tempu, a topa cu nos. El a bisa nos cu tabatin dos pionero mas den un pueblo cercano i algun persona interesá na Dublin, mas o ménos 20 hende na tur. Jack a huur un cuarto na Dublin pa un reunion na cua tur ruman a bai di acuerdo pa reuní regularmente tur diadomingo. E areglo aki a continuá te ora e congregacion a ser establecé na 1940.

Nort Irlanda, como parti dje Reino Uní, tabata den guera cu Alemania, pues ora nos a muda den direccion nort pa Belfast, nos a haña nos cu buki di cupon pa obtené cuminda i ‘blackout’ parti anochi. Aunke avionnan Nazi tabatin cu bula hopi mas cu 1.600 kilometer pa yega Belfast i bai bek pa nan base na Europa, nan a logra bombardeá e stad efectivamente. Durante e promé bombardeo, nos Salon di Reino a ser dañá i nos apartamento a ser destruí miéntras nos tabata bishitando rumannan na un otro parti dje stad, scapando asina notablemente. E mésun anochi ei, un famia Testigo a core bai na un bunker público. Ora nan e yega aya, nan a hañ’é yen yen di hende i tabatin cu regresá nan cas. Un bom a cai directamente riba e bunker, i tur hende den dje a ser matá, pero nos rumannan a sobrebibí cu algun cortá i blousá. Durante e añanan difícil di guera aki, ningun di nos rumannan a ser heridá seriamente, pa cua nos a gradicí Jehova.

Suministro di Alimento Spiritual

Segun cu e guera tabata avansando, restriccionnan a bira mas severo, i cu tempu nan a imponé censura riba post. Esaki a nificá cu E Toren di Vigilancia tabata ser interceptá i no tabata permití pa drenta e pais. Aunke nos a puntra nos mes kico nos lo por haci, Jehova su man no tabata corticu. Un mainta mi a ricibí un carta di un “primu” na Cánada kende tabata skirbiendo mi tocante asuntunan di famia. Mi no tabatin un idea ken e tabata, pero den un nota na final el a bisa cu e tabata mandando athunto “un artículo interesante di Bijbel” pa mi lesa. Tabata un copia di E Toren di Vigilancia, pero dor cu e tabata den un kaft lisu, e no a ser sacá dor di esun cu tabata controlá post.

Inmediatamente ami i mi casá, cu e yudansa di Testigonan local, incluyendo Maggie Cooper kende tabata den e trabou di “Foto-Drama,” a cuminsá duplicá e artículonan. Pronto nos a organisá nos mes pa despachá 120 copia rond e pais, segun cu revistanan Toren di Vigilancia kaft lisu tabata yega regularmente for di hopi amigu nobo na Cánada, Australia i Merca. Gracias na nan diligencia i bondad, nos nunca a falta un edicion durante henter e periodo di guera.

Nos tabata capas pa tene asambleanan tambe. Sobresaliente tabata e congreso di 1941 ora e publicacion nobo Children a ser presentá. A parce cu esun cu tabata controlá post no tabatin obhecion contra un buki cu el a kere ta bai over di muchanan, pues nos a logra haña nos suministro den e pais sin ningun problema! Na un otro ocasion, nos a laga imprimí e foyeto Peace​—⁠Can It Last? localmente pasobra tabata imposibel pa importá copianan for di Londen. Apesar di tur e restriccionnan imponé riba nos, spiritualmente Jehova a percurá tremendamente pa nos.

Venciendo Oposicion

Un clero cu tabata keda den un cas di cuido na Belfast manehá dor di un Testigo di Jehova a manda un copia dje buki Riches pa su esposa na Inglatera. E esposa tabata contra e berdad, i den su contesta el a haci e punto ei cla. Tambe el a declará cu nos tabata “un organisacion anti-patriótico.” E persona cu tabata controlá post a nota esaki i a informá e asuntu n’e Departamento di Investigacion Criminal. Como resultado, mi a ser pidí pa bai n’e kazerne di polis pa duna un splicacion i nan a pidí mi pa trece un copia dje buki Riches. Interesantemente, ora finalmente e buki a ser mandá bek, mi a ripará cu tur e partinan subrayá tabata tocante Iglesia Católico Romano. Mi a pensa cu esaki tabata significante, siendo cu mi tabata sa cu e polisnan tabata alerto contra actividad di IRA (Ehército di República Irlandes).

Mi a ser interogá detayadamente tocante nos neutralidad den tempu di guera, pasobra e polisnan a haña ta difícil pa comprendé nos posicion. Pero e autoridadnan nunca a tuma ningun accion contra nos. Mas despues, ora mi a busca permit pa tene un asamblea, e polisnan a insistí pa manda dos reportero di polis. Mi a bisa, “Nos lo duna nan un bon biní!” Pues nan a bini i a asistí n’e reunion di atardi, tumando notanan na steno. Na fin dje sesion, nan a puntra, “Pakico nos a ser mandá aki? Nos ta disfrutando completamente di dje!” Nan a bini atrobe e siguiente dia i gustosamente a aceptá un copia grátis di nos foyeto Peace​—⁠Can It Last? E resto dje asamblea a transcurí sin incidente.

Asina cu e guera a terminá i restriccionnan di biahe a suavisá, Pryce Hughes di Betel di Londen a bini Belfast. E tabata compañá pa Harold King, kende mas despues a ser asigná na China como misionero. Despues di seis aña di isolacion for dje oficina di sucursal di Londen, nos tur a ser animá masha tantu dor dje discursonan cu e rumannan aki a duna. Djis despues di esei, Harold Duerden, un otro fiel pionero, a ser mandá for di Inglatera pa fortalecé e trabou di Reino na Belfast.

Regreso pa Inglatera

Nos a desaroyá un cariño profundo p’e rumannan irlandes, i tabata duru pa regresá Inglatera. Pero ami i mi esposa a ser asigná bek na Manchester i despues nos a muda pa Newton-le-Willows, un otro pueblo di Lancashire unda e necesidad tabata mas grandi. Lois, nos yu muher, a nace na 1953, i tabata un animacion pa mir’é drenta e ministerio di pionero cu 16 aña di edad. Despues di su matrimonio cu e pionero David Parkinson, nan a sigui nan sirbishi di tempu completo na Nort Irlanda, den hopi manera siguiendo e pasonan cu ami i Olive a tuma. Awor, huntu cu nan yunan, nan ta bek na Inglatera, i nos tur ta sirbiendo den e mésun congregacion.

Apesar di cambio den nos circunstancianan, nunca mi a stop di traha pionero​—⁠Olive nunca tabata kier esei, ni ami. Semper mi a sinti cu mi registro di pionero mester ser atribuí no solamente na mi mes sino tambe na mi esposa pasobra sin su constante apoyo amoroso, hamas lo mi por a sigui den sirbishi di tempu completo. Nos tur dos ta cansa mas lihé awor, naturalmente, pero dunamentu di testimonio ainda ta un goso, specialmente ora nos ta huntu, conduciendo studionan bíblico cu nos próhimo. Atrabes dje añanan, nos tabatin e privilegio pa yuda rond di cien individuo bira sirbidornan dedicá i bautisá di Jehova. Ki un goso esei tabata! I mi ta suponé cu e cantidad aki mester ser multiplicá pa awor aki cu hopi biaha mas ya cu famianan extendiendo p’e di tres i di cuater generacion tambe a bira Testigo.

Ami cu Olive ta papia hopi biaha riba nos hopi privilegio i experencianan durante e añanan. Ki añanan felis eseinan tabata, i ki lihé nan a bula! Mi sa cu mi no por a haña nada mas mihor di haci cu mi bida cu sirbi mi Dios, Jehova, como pionero tur e añanan aki. Awor, sea mirando bek cu gratitud of mirando padilanti cu anticipacion, mi ta haña cu Jeremías su palabranan tin hopi nificacion: “Ta e echonan di bondad amoroso di Jehova cu nos no a yega na nos final, pasobra su misericordianan siguramente lo no terminá. Nan ta nobo cada mainta. . . . ‘P’esei lo mi mustra un actitud di spera riba dje.’ ”​—⁠Lamentacionnan 3:​22-24.

[Plachi na página 26]

Bob i Olive Anderson