Con Bo Por Enrikesé Bo Oracionnan?

ENTRE e provisionnan amoroso di Jehova Dios, oracion ta excepcional. Opositornan por confiscá bo Bijbel of prevení bo di reuní cu co-adoradornan, pero ningun persona por privá bo di oracion. Ta imposibel pa exagerá e balor di oracion. Ta ki importante, anto, pa cada un di nos atesorá i haci pleno uso dje privilegio aki. Kico por yudá bo enrikesé bo oracionnan?

Bijbel no ta un buki di oracion. Tog, e por ser describí como e buki di texto principal di humanidad riba oracion. E Scritura Hebreo so ta contené riba 150 oracion. Algun ta corticu; otronan ta largu. Nan a ser pronunciá den público of den privá, dor di reynan of dor di prezunan, den triunfo of den tribulacion. Manera David a canta den Salmo 65:2, “hende di tur carni” ta acudí na Jehova, e “Tendedor di oracion.” Pakico Dios a inspirá escritornan di Bijbel pa registrá un seleccion asina amplio di oracion?

Pa contestá e pregunta ei, considerá 2 Timoteo 3:16. E ta bisa: “Tur Scritura ta inspirá di Dios i ta beneficioso.” Pues, oracionnan bíblico tei pa guia nos, mescos cu profecia, principio i historia bíblico. Con e oracionnan aki por beneficiá nos?

Dor di examiná oracionnan bíblico atentamente, nos por identificá loke otronan a bisa den situacionnan similar cu esnan di nos. Nos por siña con oracionnan ta varia den propósito i circunstancia. Ademas, nos lo descubrí expresionnan nobo di alabansa i gradicimentu i lo haña palabranan frescu pa nos peticion i súplicanan. Den poco palabra, oracionnan bíblico por yuda nos enrikesé nos mes oracionnan.

Maria, kende a bira mama di Jesus, tabata un persona cu aparentemente a beneficiá for di expresionnan usá den un oracion registrá den Bijbel. El a bishitá su famia Elisabet despues cu nan cada un a concibí un yu cu yudansa divino. Maria a ofrecé alabansa i gradicimentu na Dios, i algun di su palabranan ta remarcablemente similar cu esnan cu un oracion den e Scritura Hebreo ta contené. Ta parce probabel cu Maria tabata conocé e oracion cu Ana, mama di Samuel e profeta, a expresá. Ana tambe a concibí un yu cu yudansa di Dios, mas cu 1.000 aña promé. Kisas Maria a meditá riba e oracion aki debí cu el a reflehá su propio sintimentunan?—1 Samuel 2:1-10; Lucas 1:46-55.

Kico di abo? Bo por corda un oracion bíblico cu a ser expresá bou di circunstancianan similar na esun di bo? Hañando, lesando i meditando riba tal oracionnan lo yudá bo enrikesé bo propio comunicacion cu Dios. Den e siguiente artículo, nos ta invitá bo pa examiná tres oracion for dje Scritura Santu. Nan a ser expresá bou di circunstancianan diferente, tal bes similar cu esnan di bo.