Oracionnan den Bijbel Ta Bal un Examinacion Mas di Acerca

UN MUHER angustiá, un rey i e propio Yu di Dios a pronunciá e oracionnan cu nos lo examiná mas di acerca awor. Cada oracion a ser motivá pa circunstancianan diferente. Sin embargo, situacionnan asina por afectá nos awe. Kico nos por siña for dje ehempelnan aki?

‘Mira e Afliccion di Bo Esclaba’

Bo ta luchando cu un problema persistente? Of bo a bira cargá cu ansiedad? Anto bo ta den un situacion masha parecido cu esun di Ana promé cu el a duna lus na su promé yu, Samuel. E no tabatin yu i a ser ridiculisá dor di un otro muher. Realmente, Ana su situacion a preocup’é asina tantu cu e no por a come. (1 Samuel 1:2-8, 15, 16) El a haci un peticion sincero na Jehova i a ofrecé e siguiente súplica:

“O Jehova di ehércitonan, si bo mira sin falta e afliccion di bo esclaba i realmente corda riba mi, i bo no lubidá bo esclaba i realmente duna bo esclaba un yu homber, lo mi dun’é na Jehova tur e dianan di su bida, i nabaha lo no bini riba su cabes.”—1 Samuel 1:11.

Nota cu Ana no a papia den términonan general. El a dirigí su mes na Jehova cu un peticion specífico (pa un yu homber) i a combiná esaki cu un determinacion definitivo (pa pon’é na disposicion di Dios). Kico e oracion aki ta siña nos?

Ora bo hañá bo cu contratempu, sea specífico den oracion. Sin importá kico bo problema ta—sea ta den bo situacion na cas, soledad of kebranto di salú—haci oracion na Jehova tocante dje. Describi’é e caracter exacto di bo dificultad i con bo ta sinti. “Tur mainta mi ta confia Jehova tur mi problemanan,” un biuda yamá Louise ta bisa. “Tin biaha tin bastante dificultad, pero mi ta mencioná cada un claramente.”

Papiando cu Jehova den términonan specífico ta trece beneficionan. Haciendo esei ta yuda nos definí nos problema, cua por parce e ora ei ménos spantoso. Bisando oracionnan specífico ta aliviá nos di ansiedad. Asta promé cu su oracion a ser contestá, Ana a sinti su mes trankilisá, i “su cara no a bolbe mustra preocupacion.” (1 Samuel 1:18) Ademas, siendo specífico ta haci nos alerto pa identificá e contesta riba nos oracion. “Mas specíficamente mi formulá mi oracionnan,” segun Bernard, un cristian na Alemania, “mas claro e contestanan ta.”

“Mi Ta Solamente un Mucha Chikitu”

Sin embargo, un persona por sinti un otro clase di preocupacion si e ricibí un asignacion pa cua e no ta sinti su mes cualificá. Sa sosodé cu bo ta aplastá dor dje responsabilidad cu Jehova a otorgá bo? Of algun hende ta considerá bo como incapas pa bo asignacion? Hóben Sálomon tabata den e situacion ei ora el a ser ungí como rey di Israel. Cierto hombernan prominente a preferá pa un otro hende sinta riba e trono. (1 Reynan 1:5-7, 41-46; 2:13-22) Na cuminsamentu di su reinado, Sálomon a haci un peticion den oracion:

“Jehova mi Dios, bo mes a haci bo sirbidor rey . . . Mi ta solamente un mucha chikitu. Mi no sa con pa sali ni con pa drenta. . . . Duna bo sirbidor un curason obediente pa husga bo pueblo, pa dicerní entre bon i malu.”—1 Reynan 3:7-9.

Sálomon a enfocá su oracion riba su relacion cu Jehova, riba e privilegio cu el a ser duná i riba su abilidad pa cumpli cu e asignacion. Den un manera similar, ki ora cu nos ser duná responsabilidad cu nos ta sinti ta mas ayá di nos abilidad, nos mester suplicá Dios p’e ekipá nos pa haci e trabou. Considerá e siguiente experencianan:

“Ora mi a ser puntrá pa percurá pa mayor responsabilidad n’e oficina di sucursal di Watch Tower Society,” Eugene ta splica, “mi a sintí mi completamente incapas. Tabatin otro hende cu tabata mihor cualificá i tabatin muchu mas experencia. Mi a drumi masha poco p’e siguiente dos anochinan, dedicando mayor parti dje tempu na oracion, locual a duná mi fortalesa i e siguransa necesario.”

Roy a ser puntrá pa duna un discurso di entiero despues dje morto repentino i trágico di un ruman hóben kende tabata masha popular. Cientos di persona siguramente lo a asistí. Kico Roy a haci? “Masha poco biaha mi a resa asina tantu pa fortalesa i p’e abilidad di haña palabranan apropiado pa expresá pensamentunan edificante i pa duna consuelo.”

Segun cu e Creador ‘ta acelerá cosnan’ i segun cu su organisacion ta expandé, un consecuencia natural ta cu mas di su sirbidornan ta ser confiá cu responsabilidad. (Isaías 60:22) Si bo ser pidí pa tene un parti mas grandi, sea sigur cu Jehova por compensá cualkier falta den experencia, entrenamentu of abilidad di bo parti. Acercá Dios den e mésun manera cu Sálomon a haci, i lo E ekipá bo pa cumpli cu e asignacion.

“Pa Nan Tur Por Ta Unu”

Un di tres situacion cu ta surgi awe ta ora nos ser rekerí pa representá un grupo den oracion. Ora nos ser pidí pa haci un oracion na fabor di otronan, kico nos mester pidi? Considerá Jesus su oracion registrá na Juan capítulo 17. El a haci e oracion aki den e presencia di su disipelnan riba su último anochi como hende. Ki sorto di peticion el a dirigí na su Tata celestial?

Jesus a enfatisá e metanan comun i e speransa cu esnan presente ei a compartí. El a mencioná e glorificacion dje nomber di Jehova Dios i e proclamacion dje Reino. Jesus a enfatisá e balor di un relacion personal cu e Tata i e Yu, basá riba conocimentu dje Scritura. El a papia di nan separacion for dje mundu, locual a prepará su siguidornan pa oposicion. Tambe Cristo a pidi su Tata pa protegá e disipelnan i pa uni nan den adoracion berdadero.

Sí, Jesus a enfatisá unidad. (Juan 17:20, 21) Mas promé riba e anochi ei, e disipelnan tabata enbolbí den algun discusion inmaduro. (Lucas 22:24-27) Sin embargo, den oracion, Cristo a pidi no pa censurá sino pa uni. Den e mésun manera, oracionnan di famia i di congregacion mester promové amor i pidi pa vence friccion entre individuonan. Esnan cu ta ser representá mester ser atraé na otro den unidad.—Salmo 133:1-3.

E unidad aki ta ser manifestá ora esnan cu ta scucha bisa, “Amen,” of “Sea asina,” na conclusion. Pa esaki ta posibel, nan mester comprendé i ser di acuerdo cu tur loke ta ser bisá. P’esei, lo ta inapropiado pa mencioná den oracion un tópico cu ta desconocí pa esnan presente. Por ehempel, un anciano kende ta representando un congregacion den oracion lo por pidi Jehova su bendicion riba un ruman spiritual cu ta seriamente malu. Pero generalmente lo ta mihor si e haci esei solamente si un gran mayoria di esnan cu e ta representando conocé e persona i a tende tocante e malesa.

Ripará tambe, cu Jesus no a specificá e necesidadnan personal di cada miembro dje grupo. Haciendo esei lo a enbolbé mencion di asuntunan personal conocí solamente pa cierto individuonan. Preocupacionnan personal ta un tópico cu ta pas pa oracion privá, cu por ta mes largu i íntimo cu e persona ta deseá.

Con un persona mester prepará su mes pa representá un reunion grandi di adoradornan den oracion? Un cristian experenciá ta splica: “Mi ta considerá di antemano kico pa duna gradicimentu p’e, ki peticionnan e rumannan lo por tin i ki súplicanan lo mi por mencioná na fabor di nan. Mi ta pone mi ideanan, incluyendo expresionnan di alabansa, den e órden corecto den mi mente. Promé cu mi haci e oracion den público, mi ta haci un oracion den mi mes, pidiendo yudansa pa representá e rumannan den un manera digno.”

Sea cual sea bo circunstancianan, probablemente lo bo haña un oracion den Bijbel cu a ser hací dor di un hende den un situacion parecido na esun di bo. E variedad amplio di oracion den e Scritura ta evidencia di Dios su bondad amoroso. Lesando e oracionnan aki i meditando riba nan lo yudá bo enrikesé bo oracionnan.

[Kuadro na página 5]

ORACIONNAN NOTABEL DEN BIJBEL

Jehova su sirbidornan a ofrecé oracion bou di un gran cantidad di circunstancia.

Bo por relacioná bo mes cu un of mas dje siguiente situacionnan?

Bo tin mester di guia for di Dios, manera Eliezer?​—⁠Génesis 24:​12-14.

Bo ta den peliger inminente, manera Jacob tabata?​—⁠Génesis 32:​9-12.

Bo kier conocé Dios mihó, manera Moises?​—⁠Exodo 33:​12-17.

Bo ta hañá bo confrontá cu opositornan, manera Elías?​—⁠1 Reynan 18:​36, 37.

Predicacion ta difícil pa bo, manera e tabata pa Jeremías?​—⁠Jeremías 20:​7-12.

Bo tin cu confesá picánan i busca pordon, ­manera Daniel?​—⁠Daniel 9:​3-19.

Bo ta enfrentá persecucion, manera Jesus su disipelnan?​—⁠Echonan 4:​24-31.

Mira tambe Mateo 6:​9-13; Juan 17:​1-26; Filipensenan 4:​6, 7; Santiago 5:⁠16.

[Kuadro na página 6]

KICO PA PIDI P’E ORA BO TA LUCHANDO CU UN CUSTUMBER CU RAIS PROFUNDO

Bo ta luchando contra un debilidad cu ta bini bek cada bes? Con oracionnan registrá den Bijbel por ta beneficioso? Siña for di David, kende a haci oracion na vários ocasion en cuanto su mes debilidadnan.

David a canta: “Scudriñá mi completamente, O Dios, i conocé mi curason. Examiná mi, i conocé mi pensamentunan inkietante.” (Salmo 139:23) Tabata David su deseo pa Jehova Dios revelá deseo, emocion of motivacionnan inapropiado. Cu otro palabra, David a busca Jehova su yudansa pa evitá picá.

Pero David su debilidadnan a venc’é, i el a peca gravemente. Aki atrobe, oracion a yud’é​—⁠e biaha aki pa restorá su relacion cu Dios. Segun Salmo 51:​2, David a suplicá: “Labá mi cabalmente di mi eror, i limpiá mi asta di mi picá.”

Nos tambe por pidi humildemente den oracion pa Jehova su yudansa afin di frena inclinacionnan incorecto. Esaki lo fortalecé nos pa vence un debilidad cu rais profundo i por yuda nos evitá picá. Si un recaida tuma lugá, nos mester acercá Jehova atrobe cu peticionnan p’e yuda nos sigui lucha.

[Plachi na página 7]

Oracionnan hací na fabor di un grupo mester enfatisá speransanan bíblico i metanan spiritual comun