Predicando den Tempu Dificultoso

Informe Di Proclamadornan Di Reino

APOSTEL Pablo a pronosticá cu “den e último dianan lo presentá tempu crítico, duru pa trata cuné.” (2 Timoteo 3:1) Ki exacto e palabranan ei a resultá di ta! E pueblo di El Salvador den América Central pa hopi tempu a experenciá e realidad amargo aki. Pa mas cu un década, e pais ei tabata hincá den un guera civil cu a trece miseria i morto pa miles di hende. Awor e guera a pasa, pero miseria ainda t’ei. Crímen a aumentá drásticamente despues dje guera. Un comentarista local di television a declará recientemente: “Violencia i hortamentu awor ta constituí nos pan di cada dia.”

Testigonan di Jehova no a scapa dje ola aki di crímen. Ladronnan a kibra drenta den hopi Salon di Reino i a horta ekipo di zonido. Na vários ocasion grupo di hóbennan armá a basha drenta den Salonnan di Reino durante di reunionnan cristian, hortando placa, oloshi i otro cosnan di balor for di esnan presente. Haciendo nan actividadnan diario, algun Testigo asta a ser asesiná dor di ladronnan.

Apesar dje obstáculonan aki, Testigonan di Jehova den El Salvador ta sigui traha duru predicando e bon nobo. Nan ta haci esaki den obedencia dje mandamentu bíblico: “E bon nobo tin cu ser predicá den tur nacion promé.” (Marco 13:10) Ainda tin hopi hende den e pais aki cu ta anhelá p’e speransa di Reino cu e Bijbel ta ofrecé, i Testigonan ta haciendo esfuerso pa alcansá cada un di nan. Testimonio informal ta resultando di ta un método di predicá eficas.

Miéntras e tabata ricibiendo tratamentu médico na un hospital, un Testigo a usa tur oportunidad pa papia cu otro pashentnan tocante Dios su promesanan p’e futuro, manera nan ta ser hañá den Bijbel. Un pashent gravemente malu cu tristesa a lamentá: “Pronto mi ta bai muri!” Pero e Testigo no a laga e perspectiva tristu dje pashent desanim’é pa compartí e bon nobo di Dios su Reino. Mas bien, el a lesa p’e homber na bos haltu for dje buki Bo por biba pa semper den Paradijs riba tera, publicá dor di Testigonan di Jehova. Algun dia despues, e Testigo a sali for di hospital, pensando tristemente cu e homber tabata riba su cama di morto.

Cuater aña despues e Testigo mester a ricibí tratamentu médico na un otro hospital. Miéntras cu e tabata ei, un pashent a acerk’é i a bisa: “Bo ta cordá mi?” Tabata e homber cu el a topa cuater aña pasá, e homber cu supuestamente tabata muriendo! Ki un sorpresa gososo ora e homber a dun’é un abraso i a agregá: “Awor mi tambe ta un Testigo di Jehova!” E homber a aceptá e speransa bíblico p’e futuro, a studia e Bijbel cu Testigonan di Jehova i a dedicá su bida na Jehova. No solamente e tabata un Testigo sino pa mas of ménos dos aña e tabata participando den e ministerio di tempu completo como un pionero regular.

Den e caso aki, e simianan dje berdad cu a ser sembrá den un marco di circunstancia informal a alcansá un curason sensibel. E privilegio aki di yuda hende yega na un conocimentu dje berdad ta impulsá cristiannan berdadero pa continuá cu e trabou di predicá apesar dje “tempu crítico [aki], duru pa trata cuné.”