Con Cristiannan Ta Reacciona Na Reproche Publico

CON bo ta sinti ora un persona reprochá bo of ta plama mentiranan tocante bo? Naturalmente bo ta sintí bo profundamente heridá. Testigonan di Jehova ta experenciá algu similar cada bes cu nan bira e blanco di informacion incorecto of trocí den medionan di comunicacion. Pero manera Jesus a bisa na Mateo 5:11, 12, tog nan tin motibu pa ta gososo.

Por ehempel, un publicacion católico na Alemania a bisa cu “cada Testigo ta obligá di duna entre 17 pa 28 porciento di su entrada n’e oficinanan central dje secta.” Sin embargo, Testigonan di Jehova no ta forma un secta i nan trabou ta ser financiá completamente mediante contribucionnan boluntario. Hopi lector a ser hibá na conclusionnan eróneo dor dje informacion falsu aki, locual Testigonan di Jehova ta haña lamentabel. Pero con cristiannan berdadero mester reaccioná na reproche den medionan di comunicacion?

Un Ehempel pa Cristiannan Sigui

Mateo capítulo 23 ta describí enérgicamente con Jesus a denunciá su opositornan religioso pa nan hipocresia i nan engaño. Esaki ta proveé un patronchi pa cristiannan awe en cuanto con pa trata cu críticonan? No realmente. E Yu di Dios a denunciá su opositornan religioso riba base dje autoridad i comprendimentu penetrante único cu e tabata poseé, haciendo esaki p’e beneficio dje multitudnan cu tabata scuchando.

Mateo 15:1-11 ta relatá cu Jesus a ser criticá pasobra cu su disipelnan supuestamente a violá tradicion hudiu. Con Jesus a reaccioná? El a para firme. De bes en cuando, Jesus a discutí francamente cu su críticonan, refutando nan puntonan di bista robes. En general, cristiannan awe no ta robes tratando di coregí malinterpretacion di nan obra of siñansanan, tratando na clarificá e situacion treciendo echonan padilanti i usando lógica. Nan ta haci esaki pa yuda hende sincero reconocé cu e crítica riba Testigonan di Jehova ta inhustificá i difamatorio.

Pero tuma nota con Jesus a reaccioná poco tempu despues ora su disipelnan a indicá: “Bo sa cu e fariseonan a trompecá ora nan a tende loke bo a bisa?” E fariseonan aki a “trompecá”—nan no simplemente tabata confundí, sino a bira opositornan incoregibel kende Jesus a rechasá. P’esei el a contestá: “Laga nan. Guia ciegu ta loke nan ta.” Sigui discutí cu oponentenan asina no tabatin sentido, lo no tabata n’e beneficio di ningun hende i lo a hiba solamente na argumentacion infructífero. (Mateo 7:6; 15:12-14; compará cu 27:11-14.) E contestanan cu Jesus a duna ta mustra cu tin “un tempu pa keda ketu i un tempu pa papia.”—Eclesiastes 3:7.

Testigonan di Jehova no ta spera cu tur hende lo papia bon di nan. Nan ta tene na mente Jesus su palabranan: “Ai, ki ora cu tur hende ta papia bon di boso, pasobra cosnan manera esaki ta loke nan antepasadonan a haci cu e profetanan falsu.” (Lucas 6:26) C. T. Russell, e promé presidente dje Sociedad Watch Tower, un biaha a ser puntrá pakico e no ta defendé su mes contra reproche. El a contestá: “Si bo para pa skop tur cachó cu ta ladrá bo, nunca lo bo yega masha leu.”

Pues nos no mester laga remarkenan di opositornan determiná distraí nos for di nos sirbishi na Dios. (Salmo 119:69) Laga nos concentrá riba e obra di cristiannan berdadero, esta, evangelisá. Como consecuencia natural, nos lo tin oportunidadnan pa contestá preguntanan i pa splica e esencia di nos obra, cu ta pa elevá un persona su moralnan i instruy’é den Dios su Palabra.—Mateo 24:14; 28:19, 20.

Mester Reaccioná na Crítica?

Jesus a bisa di su siguidornan: “Boso no ta parti dje mundu . . . P’e motibu aki e mundu ta odia boso.” (Juan 15:19) Hopi informe di prensa cu ta montoná reproche riba Testigonan di Jehova ta un expresion dje odio aki, i tal informe mester ser ignorá. Sin embargo, e medionan di comunicacion tin biaha por presentá informacion cu ta indicá un falta di conocimentu tocante e Testigonan of cu ta troce i malinterpretá cierto echonan. Algun periodista kisas ta saca informacion for di fuentenan cu tin prehuicio. Sea cu nos ta ignorá informacion falsu den e medionan di comunicacion of ta defendé e berdad via métodonan apropiado, ta dependé dje circunstancianan, e instigador dje crítica i su meta.

Tin biaha e echonan por ser coregí dor di un carta corectamente skirbí n’e redactor si e carta completo ta ser publicá. Pero un carta asina por logra net lo contrario pa cua e ta intencioná. Con? E mentira inicial por haña asta mas publicidad asina, of opositornan por haña mas oportunidad pa trece engaño i insulto den publicidad. Den mayoria caso ta sabí pa laga e asuntu di skirbi carta n’e redactor pa e ancianonan concerní. Si un informe di prensa negativo lanta prehuicio, e sucursal dje Sociedad Watch Tower por informá e congregacionnan den e pais ei dje echonan, permitiendo asina pa tur publicador duna un splicacion satisfactorio na esnan cu haci pregunta.

Ta berdaderamente necesario pa bo hañá bo personalmente enbolbí den tal argumentacionnan trocí? Jesus su conseho pa “laga nan,” ignorá nan, claramente ta aplicá n’e grupo aki di adversario. Cristiannan leal tin motibunan bíblico pa evitá personanan apóstata i nan punto di bista. (1 Corintionan 5:11-13; Tito 3:10, 11; 1 Juan 2:19; 2 Juan 10, 11) Si un persona ta sinceramente interesá pa sa si crítica riba Testigonan ta cierto of falsu, bo mes conocimentu bon fundá generalmente ta suficiente pa proveé un contesta.—Mira La Atalaya di 15 di mart, 1986, página 13 i 14.

Si bo ta ser confrontá cu informacion trocí den prensa, tuma na pechu e conseho di Proverbionan 14:15: “Cualkier persona cu ta inexperto ta pone fe den cada palabra, pero esun prudente ta considerá su pasonan.” Na Suisa hopi hende tabata indigná ora un informe emocional den prensa a declará cu un hobencita Testigo a muri pa motibu cu su mayornan a nenga di permití e staf médico pa administrá transfusion di sanger. Pero, esei realmente tabata e caso? No. E pashent a nenga un transfusion di sanger pa motibunan religioso, pero el a bai di acuerdo pa aceptá tratamentu médico alternativo sin uso di sanger. Esaki por a ser iniciá sin mas conmocion i probablemente lo a salba su bida. Sin embargo, e hospital a tarda asuntunan innecesariamente te ora tabata muchu lat. E informe di prensa no a mencioná e echonan aki.

P’esei, evaluá cuidadosamente cuantu berdad tin den un informe asina. Nos por splica esnan cu haci pregunta cu ancianonan local ta atendé na casonan asina den un manera amoroso i di acuerdo cu normanan bíblico. Pegando na principionan ora di duna contesta ta prevení nos di saca conclusionnan muchu purá.—Proverbionan 18:13.

Informacion Directo Ta Vital

Den e promé siglo, hende a plama mentira tocante Jesucristo afin di daña su reputacion, algun asta representand’e como un traidor. (Lucas 7:34; 23:2; compará cu Mateo 22:21.) Mas despues, e congregacion cristian recien formá a encontrá cu oposicion na tur parti for di tantu elementonan religioso como di elementonan seglar. Ya cu “Dios a scoge e cosnan bobo di mundu,” hopi hende a menospreciá su sirbidornan. (1 Corintionan 1:22-29) Cristiannan berdadero awe mester tene cuenta cu reproche, cual ta un forma di persecucion.—Juan 15:20.

Sin embargo, Testigonan di Jehova ta apreciá ora cu e persona cu nan ta combersá cuné ta imparcial i ta desplegá e mésun actitud cu algun di Pablo su bishitantenan den Roma, kendenan a declará: “Nos ta kere cu ta apropiado pa tende di bo loke bo pensamentunan ta, pasobra berdaderamente en cuanto e secta aki ta conocí na nos cu na tur parti hende ta papia contra dje.”—Echonan 28:22.

Ofrecé personanan malinformá un splicacion, haciendo esaki cu suavedad. (Romanonan 12:14; compará cu 2 Timoteo 2:25.) Invitá nan pa haña informacion directo tocante Testigonan di Jehova, locual lo permití nan mira claramente cu acusacionnan ta falsu. Lo bo por usa tambe splicacionnan publicá dor dje Sociedad Watch Tower cu ta duna detayenan en cuanto e organisacion, su historia i su siñansanan.a Un biaha Felipe a contestá Natanael simplemente dor di bisa: “Bin i mira.” (Juan 1:46) Nos por haci mescos. Cualkier persona cu ta deseá ta calurosamente bon biní pa bishitá e Salon di Reino local afin di observá pa su mes ki clase di hende Testigonan di Jehova ta i loke nan ta kere.

No Sea Spantá dor di Opositornan

Ki animador pa sa cu reproche no ta stroba hende di bira Testigo! Durante un charla na television na Alemania, apóstatanan a presentá un cantidad di mentira tocante e Testigonan. Un televidente a reconocé cu e exageracionnan apóstata tabata un fantasia i a ser motivá pa reanudá su studio di Bijbel cu e Testigonan. Sí, reproche público algun biaha ta hiba na resultadonan positivo!—Compará cu Filipensenan 1:12, 13.

Apostel Pablo tabata sa cu algun hende lo presta mas atencion na “cuentanan falsu” cu na e berdad. P’esei el a skirbi: “Mantené bo huicio den tur cos, sufri maldad, haci e trabou di un evangelisador, cumpli cu bo ministerio plenamente.” (2 Timoteo 4:3-5) Pues no permití pa bo ser distraí i ‘den ningun sentido sea spantá dor’ di bo opositornan. (Filipensenan 1:28) Mantené bo calma i ekilibrio i predicá e bon nobo gososamente i lo bo enfrentá reproche público cu determinacion. Sí, corda Jesus su promesa: “Felis boso ta ora hende ta reprochá boso i ta persiguí boso i cu mentira ta papia tur sorto di cos malu contra boso pa mi causa. Alegrá i salta di goso, ya cu boso recompensa ta grandi den cielu; pasobra dje manera ei nan a persiguí e profetanan promé cu boso.”—Mateo 5:11, 12.

[Notanan]

[Komentario na página 27]

Ora el a ser confrontá cu opositor, Jesus a bisa su disipelnan: “Laga nan.” Kico e tabata kier men?

[Komentario na página 29]

“Felis boso ta ora hende ta reprochá boso i ta persiguí boso i cu mentira ta papia tur sorto di cos malu contra boso pa mi causa.”—Mateo 5:11