Pronto, Ningun Hende Lo Ta Pober!

“NO TENE miedu, pasobra, mira! mi ta declará na boso bon nobo di un gran goso cu tur pueblo lo haña.” (Lucas 2:10) Wardadornan asombrá cerca di Betlehem a tende e palabranan animador aki riba e anochi cu Jesus a nace. Na armonia cu e declaracion ei, Jesus a pone hopi énfasis riba “bon nobo” durante su ministerio terenal. Awendia cu nos ta dependé asina tantu riba placa pa percurá pa nos necesidadnan, con e bon nobo tocante Jesus por beneficiá nos?

Jesucristo a declará e “bon nobo na hende pober.” (Lucas 4:18) Segun Mateo 9:35, “Jesus a cuminsá haci un recorido di tur e stad i pueblonan, siñando den nan snoanan i predicando e bon nobo di reino.” Su mensahe tabata specialmente animador pa esnan cu a ser afligí pa pobresa. “Ora el a mira e multitudnan el a compadecé di nan, pasobra nan tabata soyá i plamá manera carné sin wardador.” (Mateo 9:36) Ta cierto cu Jesus a bisa, “Boso tin hende pober semper cu boso,” pero nos no mester concluí for dje palabranan aki cu no tin speransa pa esnan den necesidad. (Juan 12:8) Tanten cu e sistema malbado aki dura, lo tin hende pober, sin importá kico por ta e causa di nan miseria. E Palabra di Dios no ta ignorá e realidad di pobresa, pero e no ta enfatisá e aspectonan negativo. Mas bien, e ta ofrecé hende pober yudansa pa enfrentá e ansiedadnan di bida.

Yudansa pa Hende Pober

Notablemente, hende a yega di bisa: “Un individuo no por tin un carga mas grandi cu di sa cu ningun hende ta interesá of comprendé.” Tog, apesar di falta di compasion di parti dje mayoria, ainda tin bon nobo pa hende pober—tantu pa awor como pa futuro.

Lamentablemente, hopi hende tin poco interes pa yuda hende pober. Segun The World Book Encyclopedia, algun ta kere cu “hende den sociedad ta competí pa sobrebibencia i . . . individuonan superior ta bira poderoso i ricu.” Esnan cu ta kere e teoria aki, yamá darwinismo social, por mira e pobernan como simplemente hende floho of malgastadó di placa. Sin embargo, trahadornan di cunucu, trahadornan cu ta move di un caminda pa otro en busca di trabou i otronan, apesar cu nan ta mal pagá, hopi biaha ta traha masha duru pa alimentá nan famianan.

Den hopi pais pobresa ta bastante comun. P’esei, hende pober—e mayoria—no mester sinti cu nan ta un fracaso. No obstante, na paisnan asina tin hende cu ta biba den gran luho meimei dje pobresa. Casnan confortabel i luhoso ta para banda di krotnan insaludabel i pertá cu hende. Hombernan bon pagá ta manehá autonan costoso den cayanan colmá cu hende den necesidad i desempleá. Den paisnan asina hende pober ta penosamente conciente di nan miseria. Realmente, “hende pober ta sufri no solamente di malnutricion, bibienda deplorabel i cuido médico inadecuá, sino tambe di ansiedad constante tocante nan condicion,” segun The World Book Encyclopedia. “Incapas pa haña i mantené un bon trabou, nan ta perde tur sentido di dignidad i respet propio.” Con, anto, algun hende masha pober ta enfrentá nan situacion? Kico e bon nobo tocante Jesus tin di haber cu enfrentá situacionnan asina?

Primeramente, corda cu pobresa por bira pió dor di bicionan imprudente. Considerá algun ehempel. Valdecir ta admití cu miéntras su esposa i yunan chikitu tabatin poco pa come, e tabata dispidí placa hibando un estilo di bida inmoral. E ta bisa: “Aunke mi tabatin trabou, nunca mi tabatin placa, pero semper mi tabatin vários repi di briyechi den mi sacu.” Milton, debí na bebementu pisá i humamentu, a perde un negoshi cu 23 empleado. E ta bisa: “Mi a pasa anochinan riba caya, sin por a bai cas, i mi famia a sufri masha tantu pa mi via.”

João tambe a dispidí su salario cu bicionan. “Mi tabata pasa anochinan for di cas. Tur loke mi tabata gana no tabata suficiente pa mi bicionan i aventuranan inmoral. E situacion a bira insoportabel, i mi esposa tabata kier un separacion.” Ademas di su problemanan financiero i matrimonial, tabatin otronan mas. E ta bisa: “Mi a causa problema cu famia i bisiñanan, i mi tabatin problema specialmente na trabou. Como resultado, mi tabata constantemente sin trabou.” Júlio tabata un drogadicto. Sin embargo, e ta splica: “Ya cu mi salario nunca tabata suficiente pa sostené mi bicio di droga, mi a cuminsá bende droga pa no tabatin cu cumpra droga.”

Criá den un famia pober di ocho yu, José tabata kier tin algu pa su mes. Pensando cu e no tabatin nada di perde, huntu cu otro hóbennan el a cuminsá horta hende. Den desesperacion, un otro hóben a bira miembro di un geng yamá ‘Bati Cabes.’ E ta splica: “Ya cu mayoria di nos tabata masha pober, nos tabata haña un cierto satisfaccion den kibra cosnan i atacá hende.”

Sin embargo, awe e hombernan aki i nan famia no ta sufri mas di miseria profundo of di sintimentu di amargura i rencor. Nan no ta desampará of desesperá mas. Pakico no? Pasobra nan a studia e bon nobo cu Jesus a predicá. Nan a aplicá e conseho di Bijbel i a asociá cu individuonan cu ta pensa mescos den congregacionnan di Testigonan di Jehova. I nan a siña algun cos masha importante tocante rikesa i pobresa.

Yudansa pa Enfrentá Pobresa

Di promé, nan a siña cu si principionan di Bijbel ser aplicá, e mal efectonan di pobresa por ser suavisá. Bijbel ta condená inmoralidad, buracheria, wega di placa i abusu di droga. (1 Corintionan 6:9, 10) E cosnan ei ta masha costoso. Nan por haci un homber ricu pober, i un homber pober asta mas pober. Bandonando e bicionan aki i otronan manera nan, ta contribuí hopi pa mehorá e situacion económico di un famia.

Di dos, nan a haña cu tin cosnan mas importante den bida cu rikesa. Un punto di bista balansá ta ser expresá den e palabranan inspirá aki: “Sabiduria ta pa un proteccion mescos cu placa ta pa un proteccion; pero e bentaha di conocimentu ta cu sabiduria mes ta conserbá bibu su doñonan.” (Eclesiástes 7:12) Sí, placa ta necesario. Pero sabiduria basá riba Bijbel i conocimentu dje propósitonan di Dios ta muchu mas probechoso. En berdad, pa un hende cu falta sabiduria, teniendo muchu hopi placa por ta mes problemático cu teniendo muchu poco placa. E escritor bíblico sabiamente a pidi den oracion: “No duná mi ni pobresa ni rikesa. Lagá mi devorá e alimento prescribí pa mi, pa mi no bira satisfecho i realmente nengá bo i bisa: ‘Ken ta Jehova?’ i pa mi no cai den pobresa i realmente horta i asaltá e nomber di mi Dios.”—Proverbionan 30:8, 9.

Di tres, nan a descubrí cu si un persona biba segun e bon nobo cu Jesus a predicá, nunca e tin nodi sinti su mes bandoná. E bon nobo tin di haber cu e Reino di Dios. E mensahe ta ser yamá e “bon nobo dje reino,” i den nos dia e ta ser predicá den tur e tera habitá. (Mateo 24:14) Jesus a bisa nos cu nos lo ser apoyá si nos pone nos speransa den e Reino ei. El a bisa: “Sigui, anto, buscando promé e reino i [Dios] Su husticia, i tur e otro cosnan aki lo ser agregá na boso.” (Mateo 6:33) Dios no ta primintí auto bunita ni cas luhoso. Jesus tabata papiando dje necesidadnan di bida, cosnan manera alimento i paña. (Mateo 6:31) Pero miyones di hende awe por duna prueba cu Jesus su promesa ta confiabel. Un individuo, asta unu masha pober, no ta ser bandoná henteramente si e pone e Reino na promé lugá.

Di cuater, nan a siña cu un hende cu ta pone e Reino di Dios na promé lugá no ta ser amargá pa dificultad económico. Sí, un homber pober tin cu traha duru. Pero si e ta sirbi Dios, e tin un relacion privilegiá cu su Creador, di kende Bijbel ta bisa: “E no a ni despreciá ni mira cu asco e afliccion di esun afligí; i e no a sconde su cara for di dje, i ora el a sclama na dje pa yudansa el a tende.” (Salmo 22:24) Ademas, un persona pober ta haña yudansa pa enfrentá e problemanan di bida. E ta disfrutá di compañerismo caluroso cu compañeronan cristian i e tin un conocimentu di i confiansa den Jehova su boluntad revelá. Cosnan manera esakinan “mester ser deseá mas cu oro, sí, cu hopi oro refiná.”—Salmo 19:10.

Por Fin, No Mas Pobresa!

Finalmente, individuonan cu ta haci caso dje bon nobo ta siña cu Jehova Dios a proponé pa resolvé e problema di pobresa di una bes pa semper pa medio di su Reino. Bijbel ta primintí: “No semper e hende pober lo ser lubidá, tampoco e speransa dje mansunan lo perecé hamas.” (Salmo 9:18) E Reino ta un berdadero gobiernu, establecí den cielu cu Jesucristo como Gobernante. Pronto, e Reino ei lo reemplasá gobiernunan humano den e administracion di asuntunan humano. (Daniel 2:44) E ora ei, como Rey entronisá, Jesus “lo sinti duele di esun di condicion humilde i di esun cu ta pober, i e almanan di esnan cu ta pober lo e salba. For di opresion i di violencia lo e libra nan alma, i nan sanger lo ta precioso den su bista.”—Salmo 72:13, 14.

Mirando padilanti n’e tempu ei, Mikéas 4:3, 4 ta bisa: “Nan realmente lo sinta, cada un bou di su palu di druif i bou di su palu di figu, i lo no tin ningun hende cu ta haci nan tembla; pasobra e boca mes di Jehova di ehército a papia esei.” Di ken e ta papia aki? Wel, tur esnan cu ta someté nan n’e Reino di Dios. E Reino ei lo resolvé tur e problemanan cu ta afligí humanidad—asta e problema di malesa i morto. “E realmente lo traga morto pa semper, i e Señor Soberano Jehova siguramente lo seca e lágrimanan di tur cara.” (Isaías 25:8; 33:24) Ki un mundu diferente esei lo ta! I corda, nos por kere e promesanan aki pasobra nan a ser inspirá dor di Dios mes. E ta bisa: “Mi pueblo tin cu biba den un lugá di habitacion pacífico i den residencianan di pleno confiansa i den lugánan trankil di descanso.”—Isaías 32:18.

Confiansa den e Reino di Dios ta vence e falta di respet propio causá hopi biaha pa pobresa. Un cristian pober sa cu e ta exactamente mes importante den bista di Dios cu un cristian cu ta ricu. Dios ta stima tur dos mes tantu, i tur dos tin e mésun speransa. Tur dos ta mira ansiosamente padilanti n’e tempu ora, bou dje Reino di Dios, pobresa lo ta un cos di pasado. Ki un tempu glorioso esei lo ta! Por fin, ningun hende lo ta pober!

[Plachi na página 5]

Pakico dispidí recursonan na wega di placa, humamentu, bebementu pisá, abusu di droga of un estilo di bida inmoral?

[Plachi na página 7]

Jehova Dios lo resolvé e problemanan di pobresa humano pa medio di su Reino