Ki Ora Nan Ta Les’é I Con Nan Ta Saca Beneficio

Mainta Trempan:

Un pareha casá, di cua tur dos ta traha pafó di nan cas, a dicidí pa lanta solamente dies minuut mas trempan tur mainta i pa usa e tempu ei pa lesa Bijbel huntu promé cu nan sali cas purá. Loke nan ta lesa ta proveé un base pa combersacion saludabel despues cu nan sali for di cas.

Un anciano na Nigeria ta usa e programa describí p’e Scol di Ministerio Teocrático como e base p’e lesamentu di Bijbel como famia na su cas. Nan ta lesa un porcion di dje tur dia despues di nan consideracion dje texto di dia, generalmente parti mainta. Ta pidi e muchanan pa lesa beurt pa beurt algun texto dje seccion asigná. Despues ta invitá nan pa haci pregunta riba e versículonan cu a ser lesá.

Un ama di cas na Hapon a lesa henter e Bijbel un biaha pa aña desde 1985. Su programa ta pa lesa 20 pa 30 minuut cuminsando 5:00 a.m. tur dia. Relacioná cu e beneficionan, e ta bisa: “Mi fe a ser fortalecí. E ta yudá mi lubidá mi enfermedad i concentrá riba e speransa di Paradijs.”

Un ruman muher kende ta un pionero pa 30 aña pero kende su esposo no ta un Testigo ta lanta cinc’or tur mainta pa haci su lesamentu di Bijbel. Su programa ta rekerí p’e lesa rond di cuater página for dje Scritura Hebreo, un capítulo for dje Scritura Griego Cristian i un versículo for di Proverbionan. El a lesa henter e Bijbel cada aña desde 1959. E ta bisa: “Como resultado di mi lesamentu, mi ta sintí mi stimá pa Jehova . . . Mi ta ricibí animacion, consuelo i coreccion.” E ta agregá: “Lesando e Bijbel ta manera laga Jehova drei e cuerde di mi bida tur dia.”

Un ruman muher kende a siña e berdad na un pais unda e actividad di Testigonan di Jehova tabata prohibí tambe tin un esposo kende ta oponé su creencianan. E por haci su lesamentu di Bijbel for di dialuna pa diabierne, entre 6:00 pa 7:00 a.m. Esaki a dun’é fortalesa interno. Refleccionando riba con su lesamentu a afect’é, e ta bisa: “Nos ta siña stima Jehova i Jesus i pa biba felismente, asta cu problema i dificultadnan, sabiendo cu Jehova su promesanan no ta faya.”

Un ruman muher kende a asistí n’e Scol di Sirbishi di Pionero tabata determiná pa actua na armonia cu e conseho cu a ser duná ei pa haci lesamentu di Bijbel un custumber diario. Den principio, e tabata por a haci esei entre 5:00 pa 6:00 a.m. Ora un cambio di trabou a interferí cu esei, el a cambi’é pa entre 9:00 pa 10:00 p.m. Ora otro situacionnan desafiador a presentá, e ta bisa, “Mi a sigui ahustá mi programa segun e circunstancianan.”

Mas Lat den Dia:

Dos ruman muher carnal cu ta miembro dje famia di Betel di Brazil tin e custumber di lesa Bijbel huntu pa rond di 20 minuut tur dia despues dje cuminda di merdia. Nan a lesa henter e Bijbel rond di 25 biaha; tog nan ta skirbi: “Semper nos ta haña algu nobo, pues lesamentu di Bijbel nunca ta bira monótono.”

Un ruman muher soltero na Hapon a realisá cu aunke el a ser lantá como un Testigo, e no tabata conocé e Scritura bon; ora el a bira un pionero, el a determiná pa lesa e Bijbel regularmente. Awor e ta haci su lesamentu p’e Scol di Ministerio Teocrático miéntras e ta biaha pa hospital pa tratamentu un dia pa siman. Despues, na cas, e ta haci investigacion adicional. Pa fin dje siman, e ta haci mas lesamentu di Bijbel, selectando bukinan segun e órden den cua nan a ser skirbí.

Un hobencito di 13 aña di edad kende ya a lesa henter e Bijbel tres biaha actualmente ta lesando un capítulo tur dia ora e yega cas for di scol. E ta bisa cu esaki a yud’é “sinti mas amor pa Jehova.”

Un Testigo kende tin un programa hopi ocupá como empleado, anciano, esposo i tata ta scucha casetnan di Bijbel ora e ta biaha pa trabou cu trein. Anto ora e ta na cas e ta haci su lesamentu personal dje mésun material.

Ademas di su lesamentu personal, un pionero na Francia ta scucha casetnan di Bijbel ora e ta prepará cuminda, ora e ta core auto, ora e ta pasa dor di tempunan difícil, of djis pa placer.

Un pionero di 21 aña di edad na Hapon ta corda cu su mama tabata insistí p’e tuma algu di alimentacion spiritual tur dia, i el a bin ta lesa Bijbel diariamente, aunke no semper n’e mésun ora, desde cu e tabatin tres aña di edad. Despues cu e lesa e porcion cu el a selectá p’e dia, e ta haci sigur pa bolbe lesa e versículonan clave, i despues e ta tuma un par di minuut pa repasá mentalmente loke el a lesa.

Un otro Testigo, un pionero, a lesa henter e Bijbel rond di dies biaha den e último 12 añanan. Su esposo ta un incrédulo, pues e ta programá su lesamentu pa tra’i merdia.

Anochi:

Un anciano i pionero regular na Hapon kende ta lesa for di su Bijbel tur anochi promé cu e subi cama a haci esaki p’e último ocho añanan. E ta bisa: “Particularmente, mi ta gusta e textonan cu ta indicá con Jehova ta pensa, con e ta sinti tocante asuntunan i con e ta atendé situacionnan. Dor di meditá riba e textonan aki, mi a ser yudá pa haci Jehova su pensamentu di mi i pa yuda mi rumannan cristian i mi miembronan di famia.”

Un anciano na Francia a bin ta lesa Bijbel pa un ora tur anochi desde 1979. Hopi biaha e tin cincu of seis traduccion poní dilanti dje pa comparacion. E ta bisa cu su lesamentu cuidadoso a yud’é dicerní “con pa aplicá conocimentu bíblico den situacionnan di tur dia.” Esaki tambe a permiti’é ser mas eficas ora di duna conseho for dje Scritura.

P’e último 28 añanan, un ruman homber na Nigeria a haci’é un custumber pa lesa parti anochi e texto bíblico proveé den Examinando e Scritura Diariamente pa consideracion e siguiente mainta. Huntu cu esei, e ta lesa henter e capítulo den Bijbel for di cua e texto ta ser tumá. Despues cu el a casa, el a sigui cu e custumber aki, lesando i considerando e material cu su esposa.

Un tiener kende su mayornan no ta Testigo a haci’é un custumber pa lesa cincu pa dies minuut tur anochi promé cu e bai drumi. Eseinan ta minuutnan precioso p’e, i e ta haci oracion tantu promé como despues dje lesamentu. Su meta ta pa conocé e mensahe cu Jehova a manda cada un dje escritornan di Bijbel skirbi.

Un ruman homber casá, den sirbishi di Betel, ta bisa cu el a lesa Bijbel un biaha pa aña p’e último ocho añanan. E ta lesa 20 pa 30 minuut promé cu e bai drumi anochi. Asta ora e ta hopi cansá, e ta haña cu si e subi cama sin haci e lesamentu, e no por drumi. E tin cu lanta i percurá p’e necesidad spiritual ei.