Consolacion for di “e Dios di Tur Consuelo”

“Bendicioná sea e Dios i Tata di nos Señor Jesucristo, e Tata di tierno misericordia i e Dios di tur consuelo, kende ta consolá nos den tur nos tribulacion.”—2 CORINTIONAN 1:3, 4.

1, 2. Ki clase di consuelo hende cu ta pena mester?

HENDE cu ta pena mester di berdadero consuelo—no expresionnan comun i coriente. Nos tur a yega di tende e dicho cu ‘tempu ta cura tur herida,’ pero den e promé dianan despues dje pérdida di un ser kerí, ki consuelo e pensamentu ei por duna un hende cu ta den tristesa? Cristiannan sa cu Dios a primintí un resureccion, pero esei no ta prevení e dolor profundo i trauma di un pérdida repentino. I siguramente si bo a perde un yu, e otro yunan cu ta na bida no por reemplasá e precioso yu ei.

² Ora nos perde un ser kerí, nos ta ser yudá mas mihó dor di berdadero consuelo, consuelo cu tin un base sólido den e promesanan di Dios. Tambe nos mester di empatia. Esaki siguramente a resultá di ta e caso p’e pueblo di Ruanda, i specialmente pa e cientos di famianan di Testigo di Jehova aya cu a perde sernan kerí den e masacre étnico diabólico ei. For di ken tur esnan cu ta pena por haña consuelo?

Jehova—E Dios di Consuelo

3. Con Jehova a pone e ehempel den dunamentu di consuelo?

³ Jehova a pone e ehempel dunando nos tur consuelo. El a manda su Yu unigénito, Jesucristo, na tera pa duna nos consuelo eterno i speransa. Jesus a siña: “Dios a stima e mundu asina tantu cu el a manda su Yu unigénito, pa tur cu ehercé fe den dje no ser destruí sino haña bida eterno.” (Juan 3:16) Tambe el a bisa su siguidornan: “Ningun hende tin mayor amor cu esaki, cu un hende ta entregá su alma na fabor di su amigunan.” (Juan 15:13) Na un otro ocasion el a bisa: “E Yu di hende a bini, no pa ser sirbí, sino pa sirbi i pa duna su alma como rescate en cambio pa hopi.” (Mateo 20:28) I Pablo a declará: “Dios ta recomendá su propio amor na nos den e echo cu, miéntras nos tabata pecador ainda, Cristo a muri pa nos.” (Romanonan 5:8) Pa medio dje textonan aki i hopi otro mas, nos ta percibí e amor di Dios i di Cristo Jesus.

4. Pakico apostel Pablo tabata specialmente agradecidu na Jehova?

⁴ Apostel Pablo tabata specialmente conciente di Jehova su bondad inmerecí. El a ser librá for di un condicion spiritualmente morto, for di ser un persiguidor fanático di siguidornan di Cristo pa ser un cristian persiguí e mes. (Efesionan 2:1-5) E ta describí su experencia: “Mi ta esun menor dje apostelnan, i mi no ta digno di ser yamá un apostel, pasobra mi a persiguí e congregacion di Dios. Pero pa medio dje bondad inmerecí di Dios mi ta loke mi ta. I su bondad inmerecí cu tabata pa cu mi no a resultá di ser en bano, pero mi a traha hopi mas cu nan tur, pero no ta ami sino e bondad inmerecí di Dios cu ta cu mi.”—1 Corintionan 15:9, 10.

5. Kico Pablo a skirbi tocante consuelo for di Dios?

⁵ Apropiadamente anto, Pablo a skirbi: “Bendicioná sea e Dios i Tata di nos Señor Jesucristo, e Tata di tierno misericordia i e Dios di tur consuelo, cu ta consolá nos den tur nos tribulacion, pa nos por consolá esnan cu ta den cualkier clase di tribulacion mediante e consuelo cu cua nos mes ta ser consolá dor di Dios. Pasobra mescos cu e sufrimentu pa Cristo ta abundá den nos, asina e consuelo cu nos ta haña tambe ta abundá mediante Cristo. Awor sea cu nos ta den tribulacion, esei ta pa boso consuelo i salbacion; of sea cu nos ta ser consolá, esei ta pa boso consuelo cua ta obra pa haci boso wanta e mésun sufrimentu cu nos tambe ta sufri. I di manera cu nos speransa pa boso ta invariabel, ya cu nos sa cu, mescos cu boso ta participante dje sufrimentunan, den e mésun manera tambe boso lo participá dje consuelo.”—2 Corintionan 1:3-7.

6. Kico e palabra griego traducí como “consuelo” ta implicá?

⁶ Ki palabranan inspirador! E palabra griego aki traducí como “consuelo” ta ligá cu “un invitacion pa ta na bo lado.” P’esei, “e ta e paramentu na lado di un persona pa anim’é ora e ta pasando den un prueba severo.” (A Linguistic Key to the Greek New Testament) Un escolástico bíblico a skirbi: “E palabra . . . semper ta nificá muchu mas cu compasion calmante. . . . Consuelo cristian ta e consuelo cu ta duna ánimo, e consuelo cu ta permití un homber enfrentá tur e dificultadnan di bida cu éxito.” E ta incluí tambe e palabranan consolador cu ta basá riba un promesa i speransa sólido—esta e resureccion dje mortonan.

Jesus i Pablo—Consoladornan Compasivo

7. Di ki manera Pablo duna consuelo na su rumannan cristian?

⁷ Ki un ehempel maraviyoso Pablo tabata den dunamentu di consuelo! E por a skirbi n’e rumannan na Tesalónica: “Nos a bira amabel meimei di boso, manera ora un mama dunando pechu ta cariciá su mes yunan. Pues, teniendo un tierno cariño pa boso, cu muchu gustu nos a compartí cu boso, no solamente e bon nobo di Dios, sino tambe nos propio alma, pasobra boso a bira nos stimánan. Na armonia cu esei, boso wel sa con, manera un tata ta haci cu su yunan, nos a sigui urgi cada un di boso, i consolá i duna testimonio na boso.” Mescos cu mayornan amoroso i interesá, asina nos tur por compartí nos calor i comprension cu otronan den nan tempu di necesidad.—1 Tesalonicensenan 2:7, 8, 11.

8. Pakico Jesus su siñansa ta un consuelo pa esnan cu ta pena?

⁸ Mustrando tal interes i bondad, Pablo tabata solamente imitando su gran Modelo, Jesus. Corda e invitacion compasivo cu Jesus ta extendé na tur persona manera tin skirbí na Mateo 11:28-30: “Bini cerca mi, boso tur cu ta afaná i cargá, i lo mi refrescá boso. Tuma mi yugo riba boso i siña di mi, pasobra mi ta di genio suave i humilde di curason, i boso lo haña refrescamentu pa boso alma. Pasobra mi yugo ta suave i mi carga ta leve.” Sí, Jesus su siñansa ta refrescante pasobra e ta ofrecé speransa i un promesa—e promesa dje resureccion. Esaki ta e speransa i e promesa cu nos ta ofreciendo na hende, por ehempel, ora nos laga nan cu e foyeto Ora un Persona Stimá Muri. E speransa aki por yuda nos tur, asta si nos ta pena pa un tempu largu.

Con pa Consolá Esnan cu Ta Tristu

9. Pakico nos no mester perde pacenshi cu hende cu ta pena?

⁹ Tristesa no ta limitá na un cierto periodo di tempu inmediatamente despues di morto dje ser kerí. Algun hende ta carga e peso di nan pena durante henter nan bida, specialmente esnan cu a perde yunan. Un fiel pareha cristian na Spaña a perde nan yu homber di 11 aña di edad na 1963 pa motibu di meningitis. Te n’e dia djawe, ainda nan ta drama un lágrima ora nan ta papia tocante nan yu Paquito. Aniversario, potret i souvenir por trece bek recuerdonan penoso. P’esei, nunca nos mester ta impaciente i pensa cu pa awor aki otronan lo mester a recuperá caba dje pená causá dor di nan pérdida. Un autoridad médico ta admití: “Depresion i cambionan emocional por dura pa vários aña.” P’esei, corda cu mescos cu cicatris físico riba e curpa por permanecé pa bida largu, asina por sosodé cu hopi cicatris emocional.

10. Kico nos mester haci pa yuda esnan cu ta pena?

¹⁰ Kico ta algun cos práctico cu nos por haci pa consolá esnan cu ta na pena den e congregacion cristian? Cu tur sinceridad nos por bisa un ruman den necesidad di consuelo, “Si tin cualkier cos cu mi por haci pa yuda, djis lagá mi sa.” Pero cuantu biaha realmente un persona cu a perde un ser kerí ta yama nos pa bisa, “Mi a pensa di algu cu bo por haci pa yudá mi”? Obviamente, nos mester tuma e iniciativa apropiado si nos kier consolá e persona na luto. Pues, kico nos por haci den un manera útil? Ata aki un par di sugerencia práctico.

11. Con nos scuchamentu por ta un consuelo pa otronan?

¹¹ Scucha: Un dje cosnan di mas útil cu bo por haci ta di compartí e dolor dje persona na luto dor di scucha. Bo por puntra, “Bo kier papia tocante e asuntu?” Laga e persona dicidí. Un cristian ta corda tempu su tata a muri: “Tabata un berdadero yudansa pa mi ora otronan a puntra loke a sosodé i despues berdaderamente a scucha.” Manera Santiago a consehá, sea lihé pa scucha. (Santiago 1:19) Scucha cu pacenshi i cu compasion. “Yora cu hende cu ta yora,” Bijbel ta recomendá na Romanonan 12:15. Corda cu Jesus a yora cu Marta i Maria.—Juan 11:35.

12. Ki clase di pensamentunan trankilisante nos por ofrecé esnan cu ta lamentá?

¹² Trankilisá e persona: Tene na mente cu e persona cu a perde un ser kerí kisas na promé instante ta sinti su mes culpabel, pensando cu tal bes lo e por a haci algu mas pa prevení. Sigurá e persona cu probablemente el a haci tur loke tabata na su alcance (of cualkier otro cos cu bo sa ta cierto i positivo). Trankilis’é cu loke e ta sinti di ningun manera ta algu straño. Cont’é di otronan cu abo sa a recuperá exitosamente for di un pérdida similar. Cu otro palabra, sea sensitivo i compasivo. Nos yudansa bondadoso por nificá masha hopi! Sálomon a skirbi: “Manera apel di oro den obra grabá di plata ta un palabra papiá n’e tempu apropiado p’e.”—Proverbionan 16:24; 25:11; 1 Tesalonicensenan 5:11, 14.

13. Si nos haci nos mes disponibel, con esei por yuda?

¹³ Sea disponibel: Haci bo mes disponibel no solamente p’e promé par di dianan ora hopi amigu i famia ta presente, pero pa lunanan despues si ta necesario, ora otronan a regresá na nan rutina diario. E periodo di pena por varia mashá, dependiendo dje individuo. Nos interes i compasion cristian por nificá asina tantu den cualkier tempu di necesidad. Bijbel ta bisa cu “ta existí un amigu mas pegá cu un ruman.” Pues, e dicho, “Un amigu den necesidad ta un berdadero amigu,” ta un berdad obvio cu nos mester pone na práctica.—Proverbionan 18:24; compará cu Echonan 28:15.

14. Di kico nos por papia pa consolá esnan na luto?

¹⁴ Papia tocante e bon cualidadnan dje defuntu: Esaki ta un otro gran yudansa ora e ser ofrecé n’e momento apropiado. Compartí anécdotanan positivo [incidentenan interesante] cu bo ta corda tocante e individuo. No tene miedu di usa e defuntu su nomber. No actua como si fuera e ser kerí cu a muri nunca a existí of cu e tabata no-existente. Ta un consuelo pa sa cu un publicacion for dje Scol Médico di Harvard a declará: “Un tipo di recuperacion ta ser lográ ora e hende cu a perde un ser kerí por finalmente pensa dje persona defuntu sin tristesa aplastante . . . Segun cu e ta reconocé i asimilá e realidad nobo, pena ta combertí su mes gradualmente den recuerdonan agradabel.” “Recuerdonan agradabel”—ki consolador ta pa corda e momentonan precioso ei cu a pasa huntu cu un ser kerí! Un Testigo kende a perde su tata algun aña pasá a bisa: “Un recuerdo special pa mi ta lesamentu di Bijbel huntu cu Tata djis despues cu el a cuminsá studia e berdad. I tambe e recuerdo special di relahá huntu cantu di riu i papia riba algun di mi problemanan. Mi tabata mir’é solamente cada tres of cuater aña, di manera cu e ocasionnan ei tabata precioso.”

15. Con bo por tuma e iniciativa pa yuda?

¹⁵ Tuma e iniciativa ora ta apropiado: Algun hende cu ta pena por enfrentá nan situacion mihó cu otronan. Pues, dependiendo dje circunstancianan, dal pasonan práctico pa yuda. Un muher cristian na pena a corda: “Hopi persona den e congregacion a bisa, ‘Si tin cualkier cos cu mi por haci, laga mi sa.’ Pero un ruman muher cristian no a puntra. El a bai derechito den e kamber, a kita e lakennan sushi for dje cama i a laba nan. Un otro a coge un ember cu awa i artículonan di limpiesa i a frega e tapijt caminda mi esposo a saca. Esakinan tabata berdadero amigunan, i lo mi no lubidá nan nunca.” Caminda tin un necesidad bisto pa yudansa, tuma e iniciativa—tal bes preparando un cuminda, yudando cu e limpiesa, of haciendo rospondi. Naturalmente, nos mester tene cuidou pa no ser un intruso ora e persona cu a perde un ser kerí kier privacidad. Pues, nos mester tuma na pechu Pablo su palabranan: “P’esei, como scogínan di Dios, santu i stimá, bisti boso mes cu e tierno cariño di compasion, bondad, humildad di mente, suavedad, i gran pacenshi.” Bondad, pacenshi i amor no ta faya nunca.—Colosensenan 3:12; 1 Corintionan 13:4-8.

16. Pakico un carta of un tarheta por duna consuelo?

¹⁶ Skirbi un carta of manda un tarheta consolador: Hopi biaha e balor di un carta of di un bunita tarheta di condolencia ta ser pasá por haltu. Kico ta su bentaha? E por ser lesá mas cu un biaha. Un carta asina no mester ta largu, pero e mester mustra bo compasion. Tambe e mester reflehá un tono spiritual pero sin duna sermon. Djis e mensahe básico “Nos ta aki pa sostené bo” por ta un consolacion.

17. Con oracion por duna consuelo?

¹⁷ Haci oracion cu nan: No balotá bo oracionnan cu i pa compañénan cristian na luto. Bijbel ta bisa na Santiago 5:16: “E súplica di un hende hustu . . . tin hopi forsa.” Por ehempel, ora hende cu ta pena ta tende nos haci oracion na nan fabor, e ta yuda nan kita un banda un sintimentu negativo manera culpa. Den nos momentonan di debilidad, di desanimacion, Satanas ta purba ruiná nos cu su “trikinan,” of “obranan mañoso.” Esaki ta ora cu nos mester dje consuelo i sosten di oracion, manera Pablo a declará: ‘Cu tur forma di oracion i súplica boso haci oracion na tur ocasion den spiritu. I cu mira riba esei, keda lantá cu tur constancia i cu súplica na fabor di tur e santunan.’—Efesionan 6:11, 18, Kingdom Interlinear; compará cu Santiago 5:13-15.

Kico pa Evitá

18, 19. Con nos por mustra tacto den nos combersacionnan?

¹⁸ Ora un persona ta pena, tin cosnan tambe cu nos no mester haci of bisa. Proverbionan 12:18 ta spierta: “Ta existí esun cu ta papia sin pensa manera cu e hincánan di un spada, pero e lenga dje sabínan ta un curacion.” Tin biaha, sin realisá esei, nos no ta mustra tacto. Por ehempel, nos por bisa, “Mi sa con bo ta sinti.” Pero esei realmente ta e caso? Bo a sufri exactamente e mésun pérdida? Asta e ora ei tambe, hende ta reaccioná den diferente manera. Bo reaccionnan kisas no tabata idéntico na esnan dje persona cu ta pena. Kisas lo bo mustra mas consideracion si bo bisa, “Realmente mi ta sinti pa bo pasobra mi a pasa dor di un pérdida similar ora mi . . . a muri algun tempu pasá.”

¹⁹ Mustrando consideracion pa otro su sintimentunan ta encerá tambe evitá di comentá tocante si e defuntu lo ser resucitá of no. Algun ruman a ser ofendé profundamente dor di opinionnan expresá en cuanto e futuro posibilidadnan pa un casá incrédulo cu ta morto. Nos no ta hues di ken si i ken lo no ser resucitá. Nos por tin e consuelo cu Jehova, kende ta mira curason, lo ta muchu mas misericordioso cu mayoria di nos hamas lo por ta.—Salmo 86:15; Lucas 6:35-37.

Textonan cu Ta Consolá

20, 21. Cua ta algun texto cu por consolá esnan cu a perde un ser kerí?

²⁰ Un dje mayor fuentenan di alivio, ora e ser ofrecé n’e tempu apropiado, ta un consideracion di Jehova su promesanan p’e mortonan. E pensamentunan bíblico aki lo ta probechoso sea e persona cu a perde un ser kerí ta un Testigo caba of e ta un hende cu nos a encontrá den e ministerio. Cua ta algun dje textonan aki? Nos sa cu Jehova ta e Dios di tur consuelo, pasobra el a bisa: “Ami—ami mes ta Esun cu ta consolando boso.” Tambe el a bisa: “Manera un homber kende su propio mama ta sigui consolá, asina ami mes lo sigui consolá boso.”—Isaías 51:12; 66:13.

²¹ E salmista a skirbi: “Esaki ta mi consuelo den mi afliccion, pasobra bo propio dicho a conserbá mi bibu. Mi a corda bo decisionnan hudicial desde tempu indefiní, O Jehova, i mi ta haña consuelo pa mi mes. Laga bo bondad amoroso sirbi, por fabor, pa consolá mi, segun bo dicho na bo sirbidor.” Ripará cu e palabra “consuelo” ta ser usá bes tras bes den e pasashinan ei. Sí, nos por haña berdadero consuelo pa nos mes i pa otronan dor di acudí n’e Palabra di Jehova den nos tempu di afliccion. Esaki, combiná cu e amor i compasion dje rumannan, por yuda nos wanta cu éxito e dolor causá dor di nos pérdida i yena nos bida atrobe cu actividad gososo den e ministerio cristian.—Salmo 119:50, 52, 76.

22. Ki prospecto tin nos dilanti?

²² Tambe nos por vence nos pena te na un cierto grado dor di keda ocupá yudando otronan den nan angustia. Segun cu nos ta dirigí nos atencion na otronan den necesidad di consuelo, nos tambe ta haña e berdadero felicidad di duna den un sentido spiritual. (Echonan 20:35) Laga nos compartí cu nan e vision dje dia di resureccion ora hende di tur nacion di pasado, generacion tras generacion, lo ta yamando nan sernan kerí cu a muri bon biní for di morto den un mundu nobo. Ki un prospecto! Ki lágrimanan di goso lo ser dramá e tempu ei ora nos corda cu Jehova en berdad ta e Dios “cu ta consolá esnan abatí”!—2 Corintionan 7:6.

Bo Ta Corda?

◻ Den ki sentido Jehova ta “e Dios di tur consuelo?”

◻ Con Jesus i Pablo a consolá esnan cu tabata pena?

◻ Kico ta algun cos cu nos por haci pa consolá esnan cu ta pena?

◻ Kico nos mester evitá ora nos ta trata cu esnan cu a perde un ser kerí?

◻ Cua ta bo textonan faborito pa duna consuelo den tempu di pérdida?

[Plachi na página 15]

Usa tacto pa tuma iniciativa pa yuda esnan cu ta pena