Pregunta di Lector

Dios tabata parcial ora el a scoge p’e cuerpo gobernante di promé siglo hombernan cu tabatin e mésun antecedencia racial i nacional—siendo cu tur tabata hudiu?

No, siguramente cu no. Tur esnan cu Jesus a yama promé como su disipelnan tabata hudiu. Anto, na Pentecoste di 33 E.C., hudiu i prosélitonan hudiu tabata e proménan cu a ser ungí cu spiritu santu i asina a cualificá pa reina cu Cristo den cielu. Solamente mas despues samaritanonan i gentilnan incircuncidá cu a combertí a ser incluí. P’esei, ta comprendibel cu e cuerpo gobernante den e periodo ei tabata componí di hudiu, “apostelnan i ancianonan den Jerusalem,” manera ta ser mencioná na Echonan 15:2. Esakinan tabata hombernan cu tabatin un base mas amplio di conocimentu bíblico i añanan di experencia den adoracion berdadero, i nan tabatin mas tempu pa desaroyá den ancianonan cristian maduro.—Compará cu Romanonan 3:1, 2.

P’e tempu dje reunion dje cuerpo gobernante relatá den Echonan capítulo 15, hopi gentil a bira cristian. Esakinan a incluí africano, europeo i hende for di otro region. Sin embargo, no tin ningun registro cu cualkier dje gentilnan aki a ser agregá n’e cuerpo gobernante pa haci cristianismo atractivo pa hende no-hudiu. Aunke e cristiannan gentil recien combertí aki tabata miembronan igual den “e Israel di Dios,” nan lo a respetá e madures i mayor experencia dje cristiannan hudiu, manera e apostelnan, kendenan tabata parti dje cuerpo gobernante den e tempu ei. (Galationan 6:16) Nota na Echonan 1:21, 22 con altamente respetá experencia asina tabata.—Hebreonan 2:3; 2 Pedro 1:18; 1 Juan 1:1-3.

Pa hopi siglo Dios a trata den un manera special cu e nacion di Israel, for di cua Jesus a selectá su apostelnan. No tabata un eror of inhusticia cu ningun apostel a bini for di loke awor ta Sur América of Africa of Lehano Oriente. Cu tempu hende homber i muher for dje lugánan ei lo haña oportunidad pa logra privilegionan muchu mas magnífico cu ser un apostel riba tera, siendo un miembro dje cuerpo gobernante dje promé siglo, of teniendo cualkier otro nombramentu entre e pueblo di Dios awe.—Galationan 3:27-29.

Un apostel a sinti su mes impulsá pa declará cu “Dios no ta parcial, sino cu den tur nacion esun cu ta tem’é i ta obra husticia ta aceptabel p’e.” (Echonan 10:34, 35) Sí, e beneficionan dje rescate di Cristo ta disponibel pa tur hende, sin parcialidad. I individuonan for di tur tribu i lenga i nacion lo ser incluí den e Reino celestial i den e multitud grandi cu lo biba pa semper riba tera.

Hopi hende ta bira sensitivo en cuanto antecedencia racial, lingwístico of nacional. Esaki ta ser ilustrá dor di loke nos ta lesa na Echonan 6:1 tocante un asuntu cu a causa murmuramentu entre e cristiannan di abla griego i esnan cu tabata di abla hebreo. Kisas nos a ser lantá cu of nos a adoptá un actitud hipersensitivo tocante idioma, rasa, antecedencia étnico, of sexo. En bista dje posibilidad masha real ei, ta bon pa nos haci esfuerso determiná pa permití nos sintimentu i reaccionnan ser ahustá dor dje punto di bista di Dios, esta, cu tur hende ta igual dilanti dje, sin importá nos aparencia exterior. Ora Dios a laga registrá e cualificacionnan pa anciano i sirbidor ministerial, e no a haci mencion di rasa i antecedencia nacional. No, el a enfocá riba e cualificacionnan spiritual di esnan cu por ta disponibel pa sirbi. Esaki ta e caso cu ancianonan local, superintendentenan biahero i personal di sucursal awe, mescos cu tabata e caso dje cuerpo gobernante den e promé siglo.