Scomulgacion—Un Provision Amoroso?

“SANTU, santu, santu ta Jehova Dios, e Todopoderoso.” (Revelacion 4:8) Di acuerdo cu e descripcion ei, Jehova ta e Fuente di normanan santu. Esakinan ta describí den “e scritura santu,” i cristiannan ta obligá pa sigui e direccionnan aki. En berdad, nan mester evitá cualkier cos impuru den bista di Jehova.—2 Timoteo 3:15; Isaías 52:11.

Bijbel ta manda claramente: “Di acuerdo cu e Santu cu a yama boso, boso tambe bira santu den tur boso conducta, pasobra ta pará skirbí: ‘Boso mester ta santu, pasobra ami ta santu.’ ” (1 Pedro 1:15, 16) Desde cu e congregacion cristian a haña su comienso 19 siglo pasá, cristiannan berdadero a lucha duru pa proteh’é contra impuresa spiritual i moral.—Hudas 3.

Pakico Proteccion Ta Necesario

Tur sirbidor di Dios ta enfrentá e desafio di keda moralmente i spiritualmente limpi. Cu e propósito ei, tres enemigu poderoso mester ser resistí—Satanas, su mundu i nos inclinacionnan carnal pecaminoso. (Romanonan 5:12; 2 Corintionan 2:11; 1 Juan 5:19) Satanas su mundu lo tentá bo pa ser inmoral, lo desafiá bo pa adoptá su manera di haci cosnan, i lo ofrecé bo rikesa material, fama, posicion, prominencia i poder. Pero esnan cu ta determiná pa sigui tras di adoracion berdadero ta resistí loke Satanas ta ofrecé i ta permanecé “sin mancha dje mundu.” Pakico? Pasobra nan kier keda bou dje cuido protectivo i amoroso di Jehova su organisacion limpi.—Santiago 1:27; 1 Juan 2:15-17.

Jehova a percurá yudansa pa cualkier miembro dje congregacion cristian cu ta sucumbí p’e tentacionnan di Satanas debí na debilidad humano. Ancianonan spiritualmente cualificá a ser nombrá pa protehá e congregacion i yuda amorosamente esnan cu ta faya pa repentí di nan picá i haci e ahustenan necesario pa recuperacion. Cualkier cristian cu haña su mes enbolbí den malecho mester ser yudá cu pacenshi pa repentí i cambia su maneranan.—Galationan 6:1, 2; Santiago 5:13-16.

Di ki Manera Scomulgacion Ta Amoroso

Sirbidornan bautisá di Jehova cu deliberadamente ta sigui un curso malbado i ta nenga di cambia mester ser mirá como no-repentí i pues inapropiado pa compañerismo cristian. (Compará cu 1 Juan 2:19.) Tal individuonan no por ser permití pa permanecé den e congregacion cristian limpi i contamin’é den e manera ei. Nan mester ser expulsá.

E echo cu ta apropiado pa expulsá esnan cu ta practicá obranan malbado por ser ilustrá dor dje siguiente situacion: Debí n’e aumento di atraco i crímennan violento contra studiantenan, algun scol a adoptá un sistema cu ta “exigí suspension pa bida largu pa studiantenan cu ta usa of menasá di usa arma,” The Globe and Mail, un corant na Toronto, Cánada, ta informá. E expulsion ta ser hací pa protehá e studiantenan cu kier beneficiá for dje programa educacional sin ser sometí na actonan violento.

Pakico ta amoroso pa expulsá un malechor no-repentí for dje congregacion? Haciendo esei ta un expresion di amor pa Jehova i su camindanan. (Salmo 97:10) E accion aki ta mustra amor pa esnan cu ta sigui tras di un curso hustu pasobra e ta kita for di meimei di nan un persona cu por ehercé un mal influencia riba nan. Tambe e ta protehá e puresa dje congregacion. (1 Corintionan 5:1-13) Si inmoralidad grave of impuresa spiritual tabata permití pa permanecé den e congregacion, lo e bira contaminá i lo ta inapropiado pa rindi sirbishi sagrado na Jehova, kende ta santu. Ademas, e expulsion dje malechor lo por yud’é mira e seriedad di su curso desobediente, repentí i haci cambionan necesario i asina ser aceptá bek den e congregacion.

E Efecto Riba Otronan

Ora un miembro dje congregacion cometé un picá serio, manera adulterio, e no ta haci Jehova su curason alegrá. (Proverbionan 27:11) Cualkier cristian cu ta sucumbí pa inmoralidad sexual siguramente no ta pensando mescos cu Josef ora e esposa di Pótifar a purba gar’é pa tene relacion sexual cuné. E reaccion di Josef tabata: “Con mi por cometé e gran maldad aki i realmente peca contra Dios?” (Génesis 39:6-12) Josef a respetá Jehova su normanan santu i a hui for dje situacion di tentacion. N’e otro banda, un adúltero aparentemente ta falta suficiente amor pa Dios pa frena su mes di satisfacé su pasion carnal.—Galationan 5:19-21.

Un persona bautisá cu ta violá e mandamentunan di Dios no ta mustra cu e ta preocupá p’e daño i dolor cu lo e causa su famianan creyente. E impacto emocional ta mas grandi cu algun por soportá. Despues di a descubrí cu su yu homber tabata inmoral, un señora cristian a lamentá: “Masha poco ruman homber of muher, si tin mes, ta parce di comprendé con heridá i desolá nos ta. . . . Nos curason ta kibrá.” E bon nomber di henter un famia por ser cuestioná. Depresion i un midí di culpa por afligí e miembronan fiel dje famia. Asina e curso malbado dje malechor ta trece dolor di curason p’e famia.

Yudansa Amoroso pa Miembronan di Famia

Fiel parientenan cristian di individuonan expulsá mester corda cu scomulgacion ta tantu amoroso como protectivo. Tur esfuerso posibel ta ser hací pa yuda e malechor. Pero si e resultá di ta desobediente na Dios i obstinadamente no ta repentí, e congregacion mester ser protehá i no tin alternativa sino di actua manera e Palabra di Dios ta manda: “Saca e homber malbado for di entre boso.” (1 Corintionan 5:13) Manera un Testigo a bisa, “scomulgacion ta un asuntu di lealtad na Jehova.”

Ora un miembro di famia ser scomulgá, famianan cristian ta experenciá dolor. P’esei ancianonan nombrá mester haci nan best pa ta spiritualmente refrescante pa nan. (1 Tesalonicensenan 5:14) Ancianonan por haci oracion pa nan i cu nan. Hopi biaha ta posibel pa bishitá e cristiannan fiel aki pa considerá pensamentunan bíblico edificante. Wardadornan dje tou mester usa tur oportunidad pa fortalecé esnan kerí aki spiritualmente promé i despues di reunionnan cristian. Animacion adicional por ser duná dor di compañá nan den e ministerio di veld. (Romanonan 1:11, 12) Wardadornan spiritual mester mustra e fiel sirbidornan di Jehova aki e amor i atencion cu nan ta merecé.—1 Tesalonicensenan 2:7, 8.

E curso pecaminoso di un persona no ta motibu pa esnan den e congregacion ignorá ningun di su famianan cu ta permanecé fiel na Jehova. E Rey malbado di Israel, Saul, a ser rechasá dor di Dios, pero David no a permití esaki interferí cu su mes cariño p’e yu homber di Saul, Jonatan. Realmente, e laso entre David i Jonatan a bira masha fuerte. (1 Samuel 15:22, 23; 18:1-3; 20:41) Pues tur persona den e congregacion mester apoyá i ser amoroso cu cristiannan kende nan miembro di famia ta peca contra Jehova.

Lo ta ki un falta di amor pa ignorá of falta bondad cu esnan fiel asina! Parientenan leal tin un necesidad special pa animacion. Nan por sinti nan so i nan por haña nan situacion masha difícil. Tal bes bo por compartí un hoya spiritual of un experencia edificante cu nan via telefon. Si e persona expulsá contestá e telefon, simplemente pidi pa papia cu e famia cristian. Kisas bo por invitá e miembronan fiel den un famia asina pa un reunimentu social of un comementu na bo cas. Si bo topa nan ora bo ta haciendo cómpras, bo por usa e ocasion ei pa algun asociacion edificante. Corda, cristiannan leal cu tin miembronan di famia scomulgá ainda ta parti di Jehova su organisacion limpi. Nan fácilmente por bira isolá i desanimá. P’esei, sea alerto pa mustra nan bondad i amor. Sigui haci bon ‘pa cu tur esnan relacioná cu bo den e fe.’—Galationan 6:10.

Apreciá Jehova Su Provision

Ki gradicidu nos por ta cu Jehova Dios ta mustra tierno interes den cada un dje famia mundial di su adoradornan. Mediante su organisacion el a percurá amorosamente pa un areglo pa yuda nos cana dilanti dje den un caminda hustu. Asta ora un miembro di famia deliberadamente ta practicá picá i mester ser expulsá for dje congregacion, tin un caminda pa bolbe bek si e ta berdaderamente repentí. Esaki ta ser ilustrá dor dje siguiente ehempel:

Ancianonan a purba yuda un persona cu nos lo yama Anna, pero el a cai den humamentu, bebementu i droga. E no tabata repentí i no a permanecé den e congregacion. Sin embargo, pronto, Anna a cuminsá sinti falta dje compañerismo amoroso di Jehova su congregacion limpi i a resa na dje pa yudansa. E ta admití cu e no tabata plenamente conciente cuantu e ancianonan a preocupá pa esnan cu ta desviá. Anna a cuminsá asistí n’e reunionnan atrobe, i esaki a hiba na repentimentu. Despues di esei, el a ser aceptá bek den e congregacion amoroso i protectivo. Un biaha mas, Anna ta sosteniendo Jehova su norma haltu di moralidad. E ta gradicidu p’e amor cu e ancianonan ta demostrá i ta comentá tambe: “Bo no por imaginá di cuantu yudansa publicacionnan cristian tabata pa mi. Jehova siguramente ta percurá bon pa nos necesidadnan.”

Sí, Dios a percurá un caminda di bolbe bek pa esnan cu a ser expulsá for dje congregacion pero cu despues ta repentí. Nos a mira cu asta scomulgacion mes ta un provision amoroso. Pero ta cuantu mas mihó pa evitá e experencia lamentabel aki dor di semper pega n’e camindanan hustu di nos Dios santu! Laga nos semper sea gradicidu p’e privilegio di alabá Jehova como parti di su organisacion limpi, amoroso i protectivo.

[Plachi na página 26]

Bo ta mustrando amor na parientenan fiel di esnan expulsá for dje congregacion?