Con Bo Por Sobrebibí den un Becindario Peligroso?

“MI TABATIN miedu tur ora. Mi tabatin miedu den lift. Mi tabatin miedu den mi auto. Mi tabatin miedu den mi apartamento. Tabatin crímen tur caminda. Constantemente hende tabata ser hortá,” Maria ta bisa. Bo ta sinti manera e señora brazilero aki, sintiendo miedu den bo becindario, specialmente den e scuridad di anochi?

Pa lesa bukinan di detective por ta excitante, pero den bida real hopi bes no tin un final felis. Un crímen por keda sin ser resolvé. Of den casonan di homicidio, un persona mester sigui biba sin un esposo, tata of yu homber, sin un esposa, mama of yu muher. Crímen violento ta aumentando den bo área? Bo ta anhelá pa un lugá ketu caminda bo famia lo por ta a salbo? Of, si bo ta obligá di cria bo yunan den un área pestá cu crímen, kico bo por haci pa sobrebibí?

Ta berdad cu ainda tin ciudadnan caminda no tin asina tantu crímen. Den hopi pais, hende ainda ta biba den trankilidad di cunucu of den pueblitonan agradabel. Pero cosnan ta cambiando rápidamente asta den áreanan cu anteriormente a ser considerá di ta liber di crímen. Por ehempel, na Brazil 50 aña pasá, 70 porciento dje poblacion tabata biba den cunucu. Awor 70 porciento ta biba den e ciudadnan. Huntu cu oportunidadnan di trabou a bini un aumento den problemanan urbano, tal como crímen i violencia. Sea cu bo ta bibando den un área peligroso of no, tog bo mester bai trabou of scol i haci cantidad di actividad pafó di cas.

Reconociendo e prevaleciente “síndrome di pánico,” un hefe di polis di Rio de Janeiro ta mencioná inhusticia social i crímen organisá como factornan cu a contribuí na esei. Tambe e ta di opinion cu e medionan di comunicacion ta contribuí na e miedu cu ta reina, “desanimando e público cu noticianan trágico.” Adiccion na droga, kiebro di famia i educacion religioso deficiente tambe ta contribuí na e creciente maldad. I kico e futuro lo trece? E suministro constante di esenanan violento, minimisá den buki i películanan como entretenimentu, lo pone hende bira sin heful pa cu otronan? Areanan considerá como liber di crímen tambe lo bira peligroso?

Siendo cu violencia no ta nada pret pa e víctima, nos tin un deseo fuerte pa ta a salbo. Nada straño cu ciudadanonan preocupá ta exigí mas oficialnan di polis riba caya i castigunan di prizon mas pisá of asta pena di morto! Apesar dje rísiconan, algun ta cumpra arma di candela pa defensa propio. Otronan kier pa autoridadnan restringí e benta di armanan di candela. Pero apesar dje mal noticia cu crímen ta abundá, no tin nodi di desesperá. En realidad, hopi habitante di ciudadnan grandi manera Johannesburg, México City, New York, Rio de Janeiro, i São Paulo nunca a ser hortá. Laga nos examiná con hende por enfrentá crímen den un becindario peligroso exitosamente.

Manteniendo un Actitud Positivo

Relacioná cu un área pestá cu crímen, un escritor ta comentá riba “e ingeniosidad i perseverancia di miles di brazilero kendenan a logra biba cu un grado di dignidad i decencia apesar di condicionnan di bida cu ainda ta duru.” Despues di 38 aña bibando den Rio de Janeiro, Jorge ta bisa: “Mi ta evitá cierto cayanan i áreanan i no ta mustra ningun curiosidad den actividadnan riba caya. Tambe mi ta evitá di cana riba caya anochi lat i no ta demostrá demasiado miedu. Aunke mi ta cauteloso, mi ta wak hende como si fuera nan ta onesto, tratando nan cu dignidad i respet.”

Sí, evitá problema innecesario. No bai mete den asuntunan di otro hende. Nunca minimisá e echo cu temor aplastante por afectá bo sistema nervioso, haciendo asta hende di bon comportacion actua di manera iracional. Relacioná cu su trabou den un área peligroso, Odair ta comentá: “Mi ta trata di ser positivo, mi no ta alimentá mi mente cu miedu di cosnan malu cu kisas por sosodé, pasobra esaki ta causa tension i pánico innecesario. Mi ta trata na mustra respet na tur hende.” Ademas di ser alerto i mantené distancia for di personanan cu ta parce sospechoso, e ta agregá un otro yudansa pa controlá emocionnan: “Mas cu tur cos, mi ta cultivá confiansa den Jehova Dios, cordando cu nada no ta scapa su bista i cu kico cu sosodé ta pasobra e ta permiti’é.”

Tog, ningun hende ta gusta biba constantemente den miedu. Ademas, ken lo nenga cu demasiado miedu i stres ta perhudicial pa salú emocional i físico? P’esei, ki speransa tin pa esnan cu ta teme cu nan lo por ser atacá na cualkier momento? Siendo cu hopi hende tin miedu cu lo peor pa loke ta crímen tin cu bini ainda, nos lo mira e fin di violencia un dia? Nos ta invitá bo pa lesa e siguiente artículo, “Na ki Tempu Miedu Lo Caba?”