Dudanan Tocante Jesus Ta Hustificá?

DI BERDAD Jesus di Názaret a haci milager? El a ser resucitá for di morto, manera su disipelnan a proclamá? El a biba mes? Den nos era moderno, ta parce cu hopi hende no por contestá tal preguntanan cu siguridad. Pakico? Pasobra nan tin dudanan tocante Jesus i duda ta sintimentu di insiguridad, no sabiendo si algu ta cierto of posibel. Pero sintimentunan di duda relacioná cu Jesus ta hustificá? Laga nos wak.

Con Dudanan Tocante Jesus A Ser Sembrá

Cierto teólogonan aleman di final di siglo 19 i principio di siglo 20 a describí Jesus como “un personahe ficticio dje Iglesia di antigua.” Nan ponementu na duda di Jesus su autenticidad histórico a hiba na un controversia entre escolásticonan na principio dje siglo aki cu a alcansá e público na e tempu ei i te ainda tin un influencia awe. Por ehempel, un studio recien na Alemania a revelá cu 3 porciento di esnan entrevistá ta kere cu Jesus “no a biba nunca” i cu “e apostelnan a invent’é.” Sí, e simianan di duda tocante Jesus cu a ser sembrá na principio dje siglo aki ta haña tereno fértil den curason di hende asta awor.

Pakico e conclusion cu Jesus a ser “inventá” simplemente no ta hustificá? Escolástico bíblico Wolfgang Trilling ta comentá: “E controversia cu si Jesus a yega di biba of no, cu otro palabra, cu si e tabata un personahe histórico of un mito, a ser resolvé. E cuestion a ser resolvé den un manera escolástico, por lo ménos di tal manera cu hende di disposicion serio no ta wak e problema mas como un cuestion teorético.” No obstante, algun hende ainda ta duda si Jesus a yega di existí. Consecuentemente, laga nos investigá con un persona por establecé e autenticidad histórico di Jesus como tambe kita otro dudanan relacioná cu Jesus.

Testimonionan cu Ta Core cu Duda

E ehecucion bergonsoso di Jesus como un criminal despreciabel ta percurá “e argumento mas convincente contra oponentenan di e autenticidad histórico di Jesus,” segun declaracion di Trilling. Pakico? Pasobra e ehecucion “a impedí, asta a stroba, e plamamentu dje fe nobo entre e hudiu i no-hudiunan.” (Compará cu 1 Corintionan 1:23.) Si e ehecucion di Jesus e Mesías tabata asina un insulto enorme pa tantu hudiu como gentil, siguramente esei lo no tabata un invento di e apostelnan! Mas ainda, Jesus su morto ta ser certificá como un suceso histórico no solamente dor dje cuater Evangelionan sino tambe dor dje escritor romano Tácito i dor dje Talmud hudiu.a

Otro sucesonan durante e bida di Jesus tambe ta ser considerá como evidencia interno dje credibilidad dje Evangelionan, debí na loke nan ta conta nos tocante di Jesus. Por ehempel, Jesus su siguidornan lo a inventá cu el a bini for di Názaret, un lugá aparentemente insignificante? Of ta probabel cu nan lo a inventá su traicion na man di Hudas, un compañero di confiansa? Ta parce realístico pa pensa cu nan lo a inventá un relato tocante con e disipelnan a bandoná Jesus di un forma asina cobarde? Siguramente ta ilógico cu e disipelnan lo a inventá detayenan di un naturalesa asina perhudicial i despues a proclamá nan den tur skina! Ademas, e arte di siña cu Jesus a usa a ser caracterisá dor di un estilo único. Literatura hudiu dje promé siglo no ta contené nada comparabel cu su ilustracionnan. Cua persona anónimo hamas lo por a “inventá” un obra maestro asina manera e Sermon riba Ceru? E argumentonan aki tur ta incliná na confirmá e confiabilidad dje Evangelionan como informenan di Jesus su bida.

Tambe tin evidencia externo pa e autenticidad histórico di Jesus. E cuater Evangelionan ta describí su antecedente histórico di un manera specífico, exacto i detayá. Lugánan, manera Betlehem i Galilea; individuonan i gruponan prominente, manera Poncio Pilato i e fariseonan; como tambe e custumbernan hudiu i otro particularidadnan simplemente no a ser inventá. Nan a forma parti di un structura di bida den e promé siglo i nan a ser confirmá dor di fuentenan no-bíblico i dor di descubrimentunan arkeológico.

Pues, tin evidencia convincente, tantu interno como externo, cu Jesus ta un persona histórico.

Sin embargo, un cantidad basta grandi di hende tin duda tocante milagernan relacioná cuné. En berdad, segun e encuesta citá ariba, solamente un minoria di baidónan di misa aleman ta kere firmemente cu Jesus su milagernan i su resureccion “realmente a sosodé.” Dudanan tocante e milagernan i resureccion di Jesus ta hustificá?

Pakico Algun Hende Ta Duda dje Milagernan di Jesus

Mateo 9:​18-36 ta informá cu Jesus milagrosamente a cura esnan enfermo, a resucitá e mortonan i a saca demoño. Profesor Hugo Staudinger, un historiador, ta comentá: “Ta simplemente increibel, i desde e punto di bista di historia imposibel, cu e informenan extraordinario aki ta producto di un imaginacion bibu.” Pakico? Pasobra ta parce cu e Evangelionan di mas promé a ser skirbí na un tempu ora cu mayoria dje testigonan ocular dje milagernan aki tabata na bida ainda! Mas confirmacion ta ser hañá den e echo cu, manera Staudinger ta sigui bisa, e opositornan hudiu “nunca a nenga cu Jesus a efectuá obranan extraordinario.” Ignorando tur otro prueba i basando nos criterio solamente riba e evidencia externo aki, nos ta haña cu e milagernan di Jesus definitivamente ta digno di nos creencia.​—⁠2 Timoteo 3:⁠16.

Aunke “e mayoria di alemannan ta convencí cu Jesus a cura hende enfermo,” hopi di nan ta duda dje poder tras dje curacionnan aki. Por ehempel, un teólogo aleman renombrá a declará públicamente cu curacionnan efectuá dor di Jesus tabata e resultado dje poder di sugerencia, influenciando hende cu tabata sufriendo di angustia mental. Esaki ta un splicacion sólido?

Considerá e ehempelnan aki. Marco 3:​3-5 ta informá cu Jesus a cura un homber cu man secu. Pero un man secu ta e resultado di angustia mental? Definitivamente cu no. Consecuentemente, e curacion aki no por a ser atribuí na e poder di sugerencia. Pues kico a capacitá Jesus pa haci milager? Profesor Staudinger ta admití: “Si no tin leynan cu ta absolutamente bálido i si un persona no ta nenga existencia di Dios completamente, anto fundamentalmente un persona no por excluí e posibilidad cu Dios, kende su poder ta surpasá e poder di hende, ta capas pa efectuá cosnan cu ta extraordinario.” Sí, en berdad, cu yudansa dje “poder di Dios,” Jesus literalmente a cura hende cu tabata malu. Pues no tin ningun motibu pa duda e autenticidad di su milagernan.​—⁠Lucas 9:43; Mateo 12:⁠28.

Manera The American Peoples Encyclopedia ta bis’é, si e mas grandi di tur milager​—⁠Jesus su resureccion​—⁠a tuma lugá, tur e otro milagernan raportá den e Evangelionan “ta posibel.” Jesus realmente a ser lantá for di morto?

Dudanan Tocante Jesus Su Resureccion Ta Hustificá?

Considerá promé un prueba fuerte di evidencia circunstancial cu ta apoyá e berdad dje resureccion di Jesus​—⁠su graf bashí. E echo cu Jesus su graf a ser hañá bashí tabata un echo indiscutibel pa su contemporáneonan, asta pa su opositornan. (Mateo 28:​11-15) Engaño fácilmente lo por a ser exponé! E encyclopedia ariba mencioná corectamente ta concluí: “Ningun splicacion bálido pa e graf bashí hamas a ser sugerí, cu excepcion dje declaracion bíblico, ‘E no ta ei; pasobra el a lanta’ (Mat. 28:⁠6).”

Algun hende ta protestá, bisando cu tabata solamente Jesus su mes disipelnan cu a proclamá tur caminda cu e tabata e Mesías resucitá. Esaki ta berdad. Pero e credibilidad di nan mensahe no tabata firmemente ancrá den echo histórico, specialmente den e morto i resureccion di Jesus? Naturalmente. Apostel Pablo tabata conciente dje coneccion aki ora el a skirbi: “Si Cristo no a ser lantá, nos predicacion siguramente ta en bano i nos fe ta en bano. Ademas, nos ta ser hañá tambe testigonan falsu di Dios, pasobra nos a duna testimonio contra Dios di cu el a lanta Cristo.”​—⁠1 Corintionan 15:​14, 15; compará cu Juan 19:35; 21:24; Hebreonan 2:⁠3.

Den e promé siglo, tabatin hopi hende kende nan identidad tabata bon conocí i kendenan por a testificá dje aparicion di Jesus despues di su morto. Entre nan tabatin e 12 apostelnan i Pablo, como tambe mas cu 500 otro testigo ocular.b (1 Corintionan 15:⁠6) Corda tambe e motibu pakico Matías a cumpli cu e cualificacionnan pa ta sucesor dje apostel infiel Hudas. Echonan 1:​21-23 ta informá cu Matías por a testificá dje resureccion di Jesus i di otro sucesonan mas promé relacioná cu Jesus. Si e bida i resureccion di Jesus tabata ficcion en bes di echo, tal rekisito pa e nombramentu siguramente lo tabata completamente sin sentido.

Debí cu asina tantu testigo ocular dje promé siglo por a testificá dje bida, milagernan, morto i resureccion di Jesus, cristianismo a plama relativamente lihé atrabes di henter e Imperio Romano, apesar dje obstáculonan mencioná ariba. Su siguidornan tabata dispuesto pa soportá dificultad, persecucion i asta morto pa asina declará tur caminda e resureccion i e berdad fundamental cu ta sali for di dje. Cua berdad fundamental? Cu su resureccion tabata posibel solamente debí na e poder di Dios. I pakico Jehova Dios a resucitá Jesus for di morto? E contesta pa e pregunta ei ta mustra ken e Jesus histórico ta.

Riba e dia di Pentecoste, apostel Pedro libremente a declará na e hudiunan pasmá den Jerusalem: “E Jesus aki Dios a resucitá, di cua echo nos tur ta testigo. P’esei, dor cu e tabata halsá n’e man drechi di Dios i a ricibí for dje Tata e spiritu santu primintí, el a drama esaki locual boso ta mira i ta tende. Realmente David no a subi na cielu, sino e mes ta bisa, ‘Jehova a bisa na mi Señor: “Sintá bo na mi man drechi, te ora cu mi pone bo enemigunan como banki pa bo pia.” ’ P’esei laga henter e cas di Israel sa cu tur siguridad cu Dios a haci’é Señor i tambe Cristo, e Jesus aki cu boso a claba na staca.” (Echonan 2:​32-36) Sí, Jehova Dios a haci Jesus di Názaret “Señor i tambe Cristo.” Dudanan relacioná cu su papel den e parti aki di Dios su propósito ta hustificá?

Pakico Duda di Jesus Su Papel Actual?

Con por core cu tur duda tocante e identidad i papel di Jesus? Dor dje echo cu e tabata claramente un profeta berdadero. El a pronosticá e gueranan, hamber, temblornan, crímen i falta di amor cu nos ta mira awe. Ademas, el a pronosticá: “E bon nobo aki dje reino lo ser predicá den tur e tera habitá como testimonio pa tur nacion; anto e fin lo yega.” (Mateo 24:​3-14) E cumplimentu dje profecianan aki ta proba cu Jesus ta e Cristo resucitá, gobernando invisiblemente ‘meimei di su enemigunan,’ i pronto lo e introducí e mundu nobo di Dios.​—⁠Salmo 110:​1, 2; Daniel 2:44; Revelacion 21:​1-5.

Awor manera nunca promé, humanidad urgentemente tin mester di un Salbador ekipá cu sabiduria sobrehumano. Pakico nos mester duda cu Jesus ta esun corectamente scogé pa salba humanidad? Juan, kende tabata un testigo ocular dje milagernan impresionante i dje resureccion di Jesus, a declará: “Ademas, nos mes a mira i ta dunando testimonio di cu e Tata a manda su Yu como Salbador dje mundu.” (1 Juan 4:14; compará cu Juan 4:42.) Mescos cu nos no tin ningun motibu razonabel pa duda di Jesus su existencia, milagernan, morto i resureccion, nos no tin motibu pa duda cu el a ser entronisá dor di Jehova Dios como Rey legítimo na Su man drechi. Sin duda, Jesus di Názaret ta e Rey di e Reino di Dios i “Salbador dje mundu.”​—⁠Mateo 6:⁠10.

[Notanan]