Un Invitacion Amoroso Na Esnan Cansa

“Bini cerca mi, boso tur cu ta afaná i cargá, i lo mi refrescá boso.” ​—⁠MATEO 11:⁠28.

1.Kico Jesus a mira den Galilea riba su di tres biahe di predicacion?

CERCA dje cuminsamentu di aña 32 E.C., Jesus tabata riba su di tres biahe di predicacion den e districto di Galilea. El a biaha dor dje stadnan i pueblonan, “siñando den nan snoanan i predicando e bon nobo dje reino i curando tur sorto di malesa i tur sorto di enfermedad.” Segun cu e tabata haci esaki, el a mira e multitudnan, i “el a haña duele di nan, pasobra nan tabata soyá i plamá manera carné sin wardador.”​—⁠Mateo 9:​35, 36.

2. Con Jesus a yuda e pueblo?

² Sin embargo, Jesus a haci mas cu simplemente sinti duele dje multitudnan. Despues cu el a instruí su disipelnan pa haci oracion na “e Doño dje cosecha,” Jehova Dios, el a manda nan pa yuda e pueblo. (Mateo 9:38; 10:⁠1) Anto el a ofrecé e pueblo su garantia personal dje caminda cu ta hiba na berdadero alivio i consuelo. El a extendé na nan e invitacion caluroso aki: “Bini cerca mi, boso tur cu ta afaná i cargá, i lo mi refrescá boso. Tuma mi yugo riba boso i siña di mi, pasobra mi ta di genio suave i humilde di curason, i boso lo haña refrescamentu pa boso alma.”​—⁠Mateo 11:​28, 29.

3. Pakico e invitacion di Jesus ta mes atractivo awe?

³ Awe nos ta biba den un tempu den cua hopi hende ta sinti nan sumamente cargá. (Romanonan 8:22; 2 Timoteo 3:⁠1) Pa algun, pa djis gana nan pan di cada dia ta tuma asina tantu di nan tempu i energia cu no ta sobra mashá pa nan famia, amigu of cualkier otro cos. Hopi hende ta cargá cu malesa grave, afliccion, depresion i otro problema físico i emocional. Sintiendo e presion, algun ta purba haña alivio dor di enbolbé nan mes totalmente den buscamentu di placer, comementu, bebementu i asta abusu di droga. Esaki, naturalmente, solamente ta benta nan den un círculo vicioso, treciendo mas problema i presion pa nan. (Romanonan 8:⁠6) Claramente, Jesus su invitacion amoroso ta zona mes atractivo awe cu e tabata e tempu ei.

4. Ki preguntanan nos mester considerá pa por beneficiá dje invitacion amoroso di Jesus?

⁴ Sin embargo, na kico e hendenan den tempu di Jesus tabata sometí, di manera cu nan a mustra di tabata “soyá i plamá,” conmoviendo Jesus pa haña duele di nan? Kico tabata e carganan cu nan tabatin cu hiba, i con e invitacion di Jesus lo a yuda nan? E contestanan p’e preguntanan aki por yuda nos mashá pa beneficiá dje invitacion amoroso di Jesus na esnan cansá.

Esnan “Afaná i Cargá”

5. Pakico tabata apropiado cu apostel Mateo a informá dje suceso aki den Jesus su ministerio?

⁵ Ta interesante cu ta solamente Mateo a informá dje suceso aki den e ministerio di Jesus. Dor cu e tabata un cobrador di belasting, Mateo, kende tabata conocí tambe como Levi, tabata bon na altura di un carga en particular cu e pueblo tabata hibando. (Mateo 9:9; Marco 2:14) E buki Daily Life in the Time of Jesus ta bisa: “E belastingnan cu [e hudiunan tabatin] cu paga na placa i den forma di producto of servicio tabata excesivamente pisá, i nan tabata asta mas pisá p’e echo cu e hudiunan tabatin cu paga dos forma di belasting pareu, belasting civil i belasting religioso; i ningun di nan tabata leve.”

6. (a) Ki sistema di belasting a existí den Jesus su tempu? (b) Pakico cobradornan di belasting tabatin un reputacion asina malu? (c) Pablo a sinti e necesidad pa recordá su compañeronan cristian di kico?

⁶ Loke a haci tur esaki specialmente pisá tabata e sistema di belasting n’e tempu ei. Autoridadnan romano a otorgá e derecho di cobra belasting den e provincianan na esnan cu a ofrecé mas placa. Nan, en buelta, a empleá hende den e comunidadnan local pa supervisá e trabou mes di cobra e belasting. Tur persona den e sistema di piramid a sinti cu tabata completamente hustificá pa nan agregá nan mes comision, of porcion. Por ehempel, Lucas a relatá cu “tabatin un homber yamá p’e nomber Zakeo; i e tabata un cobrador principal di belasting, i e tabata ricu.” (Lucas 19:⁠2) E “cobrador principal di belasting” Zakeo i esnan bou di su supervision aparentemente a edificá nan fortuna riba e miseria dje pueblo. E abusu i corupcion cu un sistema asina a crea a pone e pueblo clasificá cobradornan di belasting huntu cu pecadornan i prostitutanan, i probablemente den mayoria caso cu nan rason. (Mateo 9:10; 21:​31, 32; Marco 2:15; Lucas 7:34) Ya cu e pueblo a sinti un carga casi insoportabel, no ta nada straño cu apostel Pablo a sinti e necesidad pa recordá su compañeronan cristian pa no iritá nan mes bou dje yugo romano sino pa “rindi na tur loke ta debí na nan, na esun cu ta exigí belasting, belasting; na esun cu ta exigí tributo, tributo.”​—⁠Romanonan 13:7a; compará cu Lucas 23:⁠2.

7. Con e leynan penal romano a aumentá e carga dje pueblo?

⁷ Tambe Pablo a recordá cristiannan pa rindi “na esun cu ta exigí temor, tal temor; na esun cu ta exigí onor, tal onor.” (Romanonan 13:7b) E romanonan tabata conocí p’e crueldad i severidad di nan leynan penal. Golpi, sota, condicionnan severo di prizon i ehecucionnan tabata ser aplicá cu frecuencia pa tene e pueblo sumiso. (Lucas 23:​32, 33; Echonan 22:​24, 25) Asta e lidernan hudiu a ricibí autoridad pa aplicá tal castigu ora nan a haña tabata apropiado. (Mateo 10:17; Echonan 5:40) Un sistema asina tabata siguramente masha represivo of asta opresivo, pa cualkier persona cu ta biba bou di dje.

8. Con e lidernan religioso a pone un carga riba e pueblo?

⁸ Sin embargo, pió cu e belasting i leynan romano tabata e carga cu e lidernan religioso dje tempu ei a pone riba e pueblo comun. En realidad, esaki aparentemente tabata Jesus su preocupacion primario ora el a describí e pueblo como “afaná i cargá.” Jesus a bisa cu en bes di duna e pueblo oprimí speransa i consuelo, e lidernan religioso “ta mara carga pisá i ta pone nan riba scouder di hende, pero nan mes no kier move nan cu nan dede.” (Mateo 23:4; Lucas 11:46) Bo no por keda sin ripará den e Evangelionan e descripcion inekibocabel dje lidernan religioso​—⁠specialmente e escribanan i e fariseonan​—⁠como un grupo orguyoso, sin piedad i hipócrita. Nan a menospreciá e pueblo comun como hende no-educá i impuru, i nan a despreciá e stranheronan meimei di nan. Un comentario riba nan actitud ta remarcá: “Un homber cu ta carga un cabai demasiado awendia ta culpabel dilanti ley. Kico di un homber cu a carga 613 mandamentu riba ‘e pueblo comun’ cu no tabatin entrenamentu religioso; anto, sin haci nada pa yuda nan, a condená nan como malbado?” Naturalmente, e berdadero carga tabata, no e Ley di Moises, sino e gran cantidad di tradicion imponé riba e pueblo.

Berdadero Causa di Sufrimentu

9. Con e condicionnan dje pueblo den tempu di Jesus tabata na comparacion cu esnan den tempu di Sálomon?

⁹ Tabatin tempu cu e carga financiero riba e pueblo tabata unu pisá, di manera cu tabatin pobresa extenso. E israelitanan tabatin cu paga e belastingnan razonabel fihá dor dje Ley di Moises. Despues durante e gobernacion di Sálomon, e pueblo a percurá pa proyectonan nacional masha costoso, manera construccion dje tempel i otro edificionan. (1 Reynan 7:​1-8; 9:​17-19) Tog, Bijbel ta bisa nos cu e pueblo tabata “come i bebe i alegrá. . . . I Huda i Israel a sigui biba den siguridad, cada un bou di su mes palu di wijndruif i bou di su mes palu di figu, for di Dan te na Beer-seba, tur e dianan di Sálomon.” (1 Reynan 4:​20, 25) Kico a haci e diferencia?

10. Kico tabata e motibu pa Israel su situacion pa rond dje promé siglo?

¹⁰ Tanten cu e nacion a permanecé firme pa adoracion berdadero, nan a disfrutá di Jehova su fabor i tabata bendicioná cu siguridad i prosperidad apesar dje gastu nacional pisá. Sin embargo, Jehova a spierta cu si nan “definitivamente bolbe for di sigui[é] i no warda [su] mandamentunan,” nan situacion lo a cambia pa lo contrario. En realidad, “Israel realmente lo bira un dicho proverbial i un bofon entre tur e pueblonan.” (1 Reynan 9:​6, 7) Cosnan a sali exactamente asina. Israel a bini bou di dominacion stranhero, i e reino cu un tempu tabata glorioso a ser reducí na un mero colonia di imperionan stranhero. Ki un consecuencia teribel pa neglishá nan obligacionnan spiritual!

11. Pakico Jesus a sinti cu e pueblo “tabata soyá i plamá manera carné sin wardador”?

¹¹ Tur esaki ta yuda nos comprendé pakico Jesus a sinti cu e pueblo cu el a mira “tabata soyá i plamá.” Esakinan tabata israelitanan, Jehova su pueblo, kendenan en general tabata purbando pa biba segun e leynan di Dios i pa hiba nan adoracion den un manera aceptabel. No obstante, nan a ser tratá inhustamente i oprimí, no solamente dor di e podernan político i comercial sino tambe dor di lidernan religioso apóstata entre nan. Nan tabata “manera carné sin wardador” pasobra nan no tabatin ningun hende pa percurá pa nan of pa defendé nan. Nan tabatin mester di yudansa pa enfrentá e realidadnan duru di bida cu éxito. Ki oportuno Jesus su invitacion amoroso i tierno tabata!

Jesus Su Invitacion Awe

12. Ki presionnan sirbidornan di Dios i otro hende sincero ta sinti awe?

¹² Den hopi manera cosnan ta similar awe. Hende sincero cu ta purba gana nan pan di cada dia den un manera onesto ta haña e presionnan i exigencianan dje sistema di cosnan corupto difícil pa soportá. Asta esnan cu a dedicá nan bida na Jehova no ta inmuno. Informenan ta mustra cu algun entre Jehova su sirbidornan ta haña cu ta cada bes mas difícil pa cumpli cu tur nan responsabilidadnan, aunke nan kier cumpli cu nan. Nan ta sinti nan cargá, cansá, agotá. Algun asta ta sinti cu lo ta un alivio si nan por a djis tira tur cos den bientu i disparcé un of otro caminda pa bini bij atrobe. Abo a yega di sinti asina? Bo conocé un persona yegá di bo den e situacion ei? Sí, Jesus su invitacion conmovedor tin un gran nificacion pa nos awe.

13. Pakico nos por ta sigur cu Jesus por yuda nos haña consuelo i refrescamentu?

¹³ Promé cu Jesus a emití su invitacion amoroso, el a declará: “Tur cos a ser entregá na mi dor di mi Tata, i ningun hende conocé e Yu plenamente sino e Tata, ni ningun hende conocé e Tata plenamente sino e Yu, i esun na ken e Yu kier revel’é.” (Mateo 11:27) Pa motibu dje relacion íntimo aki entre Jesus i su Tata, nos ta ser sigurá cu aceptando Jesus su invitacion i birando su disipelnan, nos por drenta den un relacion personal estrecho cu Jehova, “e Dios di tur consuelo.” (2 Corintionan 1:3; compará cu Juan 14:⁠6.) Ademas, ya cu ‘tur cos a ser entregá na dje,’ Jesucristo so tin e poder i autoridad pa haci nos carganan leve. Cuanan? Esnan imponé dor dje sistemanan político, comercial i religioso corupto, i tambe e carga imponé dor di nos picá i imperfeccion heredá. Ki un pensamentu animador i trankilisante esei ta for dje momento cu nos a tend’é!

14. For di ki afan Jesus por a duna refrescamentu?

¹⁴ Jesus a sigui bisando: “Bini cerca mi, boso tur cu ta afaná i cargá, i lo mi refrescá boso.” (Mateo 11:28) Jesus siguramente no tabata desconsehá hende pa traha duru, pasobra hopi biaha el a consehá su disipelnan pa haci esfuerso vigoroso den e trabou cu nan tabatin nan dilanti. (Lucas 13:24) Pero “afaná” (“laborando,” Kingdom Interlinear) ta implicá labor prolongá i fatigante, hopi biaha sin ningun resultado bale la pena. I “cargá” ta transmití e idea di ser cargá mas ayá dje capacidad normal. E diferencia por ser compará cu esun entre un homber cu ta coba en busca di un tesoro scondí i un cu ta coba canal den un campo pa trabou forsá. Nan ta haciendo e mésun trabou duru. Cerca esun, e tarea ta ser efectuá cu entusiasmo, pero cerca e otro, e ta un trabou penoso interminabel. Loke ta haci e diferencia ta e propósito dje trabou of e falta di propósito.

15. (a) Ki preguntanan nos mester haci nos mes si nos ta sinti cu nos ta hiba un carga pisá riba nos scoudernan? (b) Kico por ser bisá dje fuente di nos carganan?

¹⁵ Bo ta sinti cu bo ta “afaná i cargá,” cu tin simplemente demasiado exigencia riba bo tempu i energia? E carganan cu bo ta hibando ta parce muchu pisá pa bo? Si ta asina, lo ta bon pa bo puntra bo mes, ‘Kico mi ta afanando p’e? Ki sorto di carga mi ta hibando?’ Relacioná cu esaki, un comentarista di Bijbel a remarcá mas cu 80 aña pasá: “Si nos considerá e carganan di bida nan ta cai den dos categoria; nos por yama esakinan esnan cu nos a imponé riba nos mes i esnan cu ta inevitabel: esnan cu ta debí na nos propio accionnan i esnan cu no ta debí na nos propio accionnan.” Anto el a agregá: “Hopi di nos lo keda sorprendí, despues di un rigoroso examinacion propio, pa descubrí cu un gran porcentahe di nos carganan ta esnan cu nos mes a pone riba nos mes.”

16. Ki carga nos por pone imprudentemente riba nos mes?

¹⁶ Cua ta algun dje carganan cu nos por trece riba nos mes? Awe nos ta biba den un mundu materialista, buscador di placer i inmoral. (2 Timoteo 3:​1-5) Asta cristiannan dedicá ta bou di presion constante pa conformá n’e moda di bisti i estilo di bida dje mundu. Apostel Juan a skirbi tocante “e deseo di carni i e deseo di wowo i e exhibicion grandioso di bo medio di biba.” (1 Juan 2:16) Esakinan ta influencianan poderoso cu por afectá nos fácilmente. Ta conocí cu algun tabata dispuesto pa haci debe pisá afin di disfrutá mas dje placernan mundano of pa mantené un cierto estilo di bida. Despues nan ta haña cu nan tin cu dedicá un cantidad excesivo di tempu na trabou, of busca vários trabou, pa haña e placa pa paga nan debenan.

17. Ki situacion por hacié asta mas difícil pa hiba e carga, i con esaki por ser remediá?

¹⁷ Aunke un persona por razoná cu no ta malu pa e tin of pa e haci algun dje cosnan cu otronan tin of ta haciendo, ta importante pa analisá si e ta aumentando su carga innecesariamente. (1 Corintionan 10:23) Siendo cu un persona tin un límite na loke e por carga, algu mester ser eliminá p’e por tuma un otro carga. Frecuentemente, ta e cosnan esencial pa nos bienestar spiritual​—⁠studio personal di Bijbel, asistencia na reunionnan i e ministerio di veld​—⁠cu ta ser eliminá promé. E resultado ta pérdida di fortalesa spiritual, cu, en buelta, ta hacié mas difícil ainda pa hiba e carga. Jesucristo a spierta contra un peliger asina ora el a bisa: “Presta atencion na boso mes pa boso curason nunca bira cargá debí na comementu di mas i bebementu di mas i ansiedadnan di bida, i di ripiente e dia ei ta riba boso instantáneamente manera un las.” (Lucas 21:​34, 35; Hebreonan 12:⁠1) Ta difícil pa reconocé un trampa i scapa for dje si un persona ta cargá i cansá.

Alivio i Refrescamentu

18. Kico Jesus a ofrecé esnan cu bini cerca dje?

¹⁸ P’esei, amorosamente Jesus a ofrecé e remedi: “Bini cerca mi, . . . i lo mi refrescá boso.” (Mateo 11:28) E palabranan “refrescá” aki i “refrescamentu” den versículo 29 ta bini for dje palabranan griego cu ta corespondé cu e palabra cu e version Setenta ta usa pa traducí e palabra hebreo pa “sabat” of “wardamentu di sabat.” (Exodo 16:23) Pues, Jesus no a primintí cu esnan cu bini cerca dje lo no tin trabou mas, pero el a primintí cu lo e refrescá nan di manera cu nan lo ta cla p’e trabou cu nan mester efectuá na armonia cu e propósito di Dios.

19. Con un persona ta ‘bini cerca Jesus’?

¹⁹ Pero con un hende ta ‘bini cerca Jesus’? Na su disipelnan, Jesus a bisa: “Si un hende kier bini tras di mi, lagu’é nenga su mes i tuma su staca di tormento i siguí mi continuamente.” (Mateo 16:24) Pues, bini cerca Jesus ta implicá someté bo mes boluntad na esun di Dios i di Cristo, aceptando un cierto carga di responsabilidad, haciendo esei continuamente. Tur esaki ta demasiado exigente? E prijs ta muchu haltu? Laga nos considerá loke Jesus a bisa despues cu el a duna e invitacion amoroso na esnan cansá.

Bo Por Corda?

◻ Den ki maneranan e pueblo den e tempu di Jesus tabata cargá?

◻ Kico tabata e berdadero causa dje pueblo su sufrimentu?

◻ Con nos mester examiná nos mes si nos ta sinti nos excesivamente cargá?

◻ Ki carga nos por pone imprudentemente riba nos mes?

◻ Con nos por ricibí e refrescamentu cu Jesus a primintí?

[Plachi na página 15]

Pa cortesia dje Ministerio di Turismo di Bahámas

[Rekonosementu di e plachi na página 15]

Cua ta algun dje carganan cu nos por trece riba nos mes?