Loke Bo Mester Sa Tocante Yaluzi

KICO ta yaluzí? E ta un emocion intenso cu por haci un persona sinti su mes inkieto, tristu of rabiá. Nos por experenciá yaluzí ora un persona ta parce di tin mas éxito den un tarea cu nos. Of nos por bira yalurs ora un amigu ricibí mas elogio cu nos. Pero ta semper malu pa ta yalurs?

Hende dominá pa yaluzí tin tendencia di ta sospechoso di rivalnan potencial. Rey Saul di Israel di antigwedad tabata un ehempel di esaki. Na principio e tabata stima su cargador di arma, David, asta promoviend’e pa ser un lider dje ehército. (1 Samuel 16:21; 18:5) Anto riba un dia Rey Saul a tende hende muher alabá David cu e palabranan: “Saul a tumba su milnan, i David su dies milnan.” (1 Samuel 18:7) Saul no mester a permití esaki afectá su bon relacion cu David. Sin embargo, el a sinti su mes ofendí. “Saul tabata mirando David continuamente cu sospecho for dje dia ei padilanti.”—1 Samuel 18:9.

Un persona yalurs kisas no ta deseá un otro malu. Kisas e ta djis sinti rencor contra e éxito di un compañero i ta anhelá p’e tin e mésun cualidadnan of circunstancianan. Di otro banda, envidia ta un forma particularmente negativo di yaluzí. Un persona envidioso por retené di un manera scondí e bon for di e persona cu ta lanta su yaluzí of por deseá pa bay’e malu. Tin biaha, un persona envidioso no por sconde su sintimentunan. E por ser impulsá pa haci un otro persona daño abiertamente, mescos cu Rey Saul a purba mata David. Na mas cu un ocasion, Saul a tira un lansa den un intento “pa claba David n’e muraya.”—1 Samuel 18:11; 19:10.

‘Pero mi no ta un persona yalurs,’ bo por respondé. Ta cierto cu yaluzí kisas no ta dominá bo bida. Sin embargo, te na un cierto grado, nos tur ta ser afectá pa yaluzí—nos propio sintimentunan yalurs i esnan di otro hende. Aunke nos ta lihé pa tuma nota di yaluzí den otronan, nos por ta slow pa mir’é den nos mes.

“Un Tendencia pa cu Envidia”

E registro dje naturalesa humano pecaminoso manera e ta ser revelá den e Palabra di Dios, e Bijbel, hopi biaha ta resaltá picánan di envidia. Bo ta corda e relato di Cain i Abel? Tur e dos yunan aki di Adam i Eva a ofrecé sacrificio na Dios. Abel a haci esei debí cu e tabata un homber di fe. (Hebreonan 11:4) E tabatin fe den Dios su abilidad pa cumpli cu Su magnífico propósito relacioná cu e tera. (Génesis 1:28; 3:15; Hebreonan 11:1) Tambe Abel a kere cu Dios lo recompensá hende fiel cu bida den e binidero Paradijs terenal. (Hebreonan 11:6) P’esei, Dios a mustra su satisfaccion cu Abel su sacrificio. Si Cain berdaderamente a stima su ruman, lo e tabata contentu cu Dios a bendicioná Abel. En bes di esei, Cain a “consumí cu gran rabia.”—Génesis 4:5.

Dios a urgi Cain p’e haci bon di manera cu e tambe lo por a ricibí un bendicion. Despues Dios a spierta: “Si bo no dirigí bo mes pa haci loke ta bon, tin picá di bùk n’e entrada, i su deseo fuerte ta pa bo; i abo, di bo parti, lo logra domin’é?” (Génesis 4:7) Lamentablemente, Cain no a dominá su rabia yalurs. Esei a impuls’é p’e mata su ruman hustu. (1 Juan 3:12) For dje tempu ei, bataya i gueranan a exigí cientos di miyones di bida. “Algun dje causanan básico di guera por ta un deseo pa mas tera, un deseo pa mas rikesa, un deseo pa mas poder of un deseo pa siguridad,” The World Book Encyclopedia ta splica.

Cristiannan berdadero no ta participá den e gueranan dje mundu aki. (Juan 17:16) Sin embargo, lamentablemente cristiannan individual tin biaha ta haña nan enbolbí den peleanan verbal. Si otro miembronan dje congregacion ta tuma parti pa esun of e otro, e peleanan aki por crece bira gueranan verbal perhudicial. “Di ki fuente e gueranan ta i di ki fuente e peleanan entre boso ta?” e escritor di Bijbel, Santiago, a puntra compañeronan creyente. (Santiago 4:1) El a contestá e pregunta ei desenmascarando nan golosidad materialista i a agregá, “Boso ta sigui . . . cudishá,” of siendo “yalurs.” (Santiago 4:2, nota) Sí, materialismo por hiba na cudishi i siendo yalurs riba esnan cu ta parce di ta disfrutá di mihó circunstancianan. P’e motibu aki, Santiago a spierta contra e ‘tendencia humano pa cu envidia.’—Santiago 4:5.

Ki beneficio tin den analisá e causanan di yaluzí? Wel, esaki por yuda nos ser onesto i promové mihó relacionnan cu otronan. Tambe e por yuda nos ser mas compasivo, tolerante i pordonador. Mihó cu tur cos, e ta resaltá hende su necesidad desesperá pa Dios su provision amoroso di salbacion i rescate for di tendencianan humano pecaminoso.—Romanonan 7:24, 25.

Un Mundu Sin Yaluzí Pecaminoso

For di un punto di bista humano, un mundu sin yaluzí pecaminoso por zona imposibel. Autor Rom Landau a admití: “E sabiduria acumulá di hopi época, cu tur loke filósofonan . . . i sicólogonan a bisa riba e tópico, no ta ofrecé ningun guia n’e homber tormentá pa yaluzí. . . . Cualkier dokter hamas a yega di cura un homber di yaluzí?”

Pero e Palabra di Dios ta ofrecé e speransa di alcansá bida humano perfecto den un mundu nobo unda ningun hende hamas lo ser tormentá atrobe pa yaluzí of envidia malbado. Ademas, e pas dje mundu nobo ei lo no ser desbaratá dor di hende cu ta manifestá tal característicanan malbado.—Galationan 5:19-21; 2 Pedro 3:13.

Sin embargo, no tur yaluzí ta incorecto. En realidad, Bijbel ta declará cu Jehova “ta un Dios yalurs.” (Exodo 34:14) Kico esei ta nificá? I kico Bijbel ta bisa tocante yaluzí dje clase corecto? Na mésun tempu, con un persona por dominá yaluzí dje clase incorecto? Mira e siguiente artículonan.