Pregunta di Lector
Kico e disipel Santiago kier a men ora el a bisa: “No hopi di boso mester bira maestro, mi rumannan, sabiendo cu nos lo ricibí huicio mas severo”?—Santiago 3:1.
Santiago siguramente no tabata desanimando cristiannan di siña e berdad na otronan. Na Mateo 28:19, 20, Jesus a manda su disipelnan pa “haci disipel di hende di tur nacion, . . . siñando nan pa warda tur e cosnan cu mi a manda boso.” Pues, tur cristian lo mester ta maestro. Apostel Pablo a consehá cristiannan hebreo pasobra nan ainda no tabata maestro. El a skirbi: “Aunke boso lo mester ta maestro en bista dje tempu, boso atrobe tin mester di un hende pa siña boso desde e principio e cosnan fundamental dje declaracionnan sagrado di Dios.”—Hebreonan 5:12.
Di kico, anto, Santiago tabata papiando? E tabata referí na esnan cu privilegionan special di duna siñansa den e congregacion. Na Efesionan 4:11, nos ta lesa: “El [Jesucristo, e Cabes dje congregacion] a duna algun como apostel, algun como profeta, algun como evangelisador, algun como wardador i maestro.” Tabatin privilegionan special di duna siñansa den e congregacionnan di promé siglo mescos cu tin awe. Por ehempel, e Cuerpo Gobernante ta representá “e esclabo fiel i discreto” i tin responsabilidad special pa supervisá e siñamentu dje congregacion mundial. (Mateo 24:45) Superintendentenan biahero i ancianonan di congregacion tambe tin responsabilidadnan special di duna siñansa.
Santiago tabata bisando hombernan cristian cualificá cu nan no mester aceptá e papel di maestro pa miedu di Dios su huicio mas severo? Di ningun manera. E puesto di anciano ta un gran privilegio, manera ta ser indicá dor di 1 Timoteo 3:1, cu ta bisa: “Si cualkier homber ta percurando pa alcansá un puesto di superintendente, e ta deseoso di un trabou excelente.” Un dje rekisitonan pa nombramentu como un anciano di congregacion ta cu un homber mester ta “cualificá pa siña.” (1 Timoteo 3:2) Santiago no a contradicí Pablo su palabranan inspirá.
Sin embargo, ta parce cu den e promé siglo E.C., algun tabata designá nan mes como maestro, aunke nan no tabata cualificá i no a ser nombrá. Probablemente, nan a sinti cu tabatin algu di prominencia den e papel ei i nan a deseá gloria personal. (Compará cu Marco 12:38-40; 1 Timoteo 5:17.) Apostel Juan a mencioná Diótrefes, kende ‘a gusta pa tin e promé lugá, pero no a ricibí nada for di Juan cu respet.’ (3 Juan 9) Promé Timoteo 1:7 ta papia di cierto personanan cu ‘kier tabata maestro di ley pero cu no a percibí sea e cosnan cu nan tabata bisando of e cosnan tocante cua nan tabata haciendo afirmacion fuerte.’ E palabranan di Santiago 3:1 ta specialmente apropiado pa hombernan cu ta deseá di ser maestro pero cu tin e motivacion robes. Tal personanan lo por perhudicá e tou seriamente i lo ricibí corespondientemente un huicio mas severo.—Romanonan 2:17-21; 14:12.
Santiago 3:1 tambe ta un bon recordatorio pa esnan cu ta cualificá i cu ta sirbi como maestro. Ya cu hopi a ser confiá na nan, hopi lo ser rekerí di nan. (Lucas 12:48) Jesus a bisa: “Pa cada palabra bano cu hende papia, nan lo rindi cuenta riba Dia di Huicio.” (Mateo 12:36) Esaki ta specialmente cierto di esnan kendenan su palabra tin mas influencia, e ancianonan nombrá.
Ancianonan lo rindi cuenta pa e manera cu nan ta trata cu e carnénan di Jehova. (Hebreonan 13:17) Loke nan ta bisa ta afectá bidanan. Pues, un anciano mester ta cauteloso pa e no promové su mes opinionnan of maltratá e carnénan manera e fariseonan a haci. E mester haci esfuerso pa desplegá e mésun amor profundo cu Jesus a demostrá. Den tur situacion di duna siñansa, i specialmente ora e ta enbolbí den asuntunan hudicial, un anciano mester pisa su palabranan, no papiando sin pensa of expresando ideanan puramente personal. Dor di dependé completamente riba Jehova, su Palabra i su guia mediante su organisacion, e wardador lo ricibí e bendicion ricu di Dios, no “huicio mas severo.”