Siguiendo den E Pasonan di Mi Mayornan

MANERA HILDA PADGETT A CONT’E

“Mi bida ta dedicá n’e sirbishi dje Haltísimo,” e informe di prensa a bisa, “i mi no por sirbi dos doño.” E palabranan ei for di mi declaracion n’e autoridadnan dje Ministerio Británico di Labor i Sirbishi Nacional na 1941 a presentá mi motibu pa nenga nan asignacion pa presta servicio obligatorio den un hospital durante Guera Mundial II. Djis despues di esei mi a ser condená i sentenciá na tres luna di prizon pa mi nengamentu.

KICO a hincá mi den e posicion difícil aki? No, no tabata algun antoho hubenil of conducta rebelde. Mas bien, e motibunan ta data bek n’e tempu cu mi tabata apénas un mucha.

Tata Su Celo p’e Reino

Mi a nace dia 5 di juni, 1914, na Horsforth cerca di Leeds, den e parti nort di Inglatera. Mi mayornan, Atkinson i Pattie Padgett, tabata maestronan di ‘zondagsschool’ i miembronan di coro n’e Capiya Metodista Primitivo caminda Tata tabata toca orgel. Tempu mi tabata un baby, nos cas tabata unu felis cu excepcion di un cos. Condicionnan di mundu a preocupá Tata. El a odia guera i violencia i a kere e mandamentu di Bijbel: “Lo bo no mata.”—Exodo 20:13, King James Version.

Na 1915 e gobiernu a urgi tur homber hóben pa drenta e ehército boluntariamente i asina evitá reclutamentu obligatorio. Cu algun duda Tata a para henter dia den awaceru sperando su turno pa registrá como soldat. E siguiente dia mes, henter su bida a cambia!

Miéntras cu e tabata trahando como ‘loodgieter’ na un cas grandi, e tabata papia cu otro trahadornan tocante sucesonan di mundu. E hardinero a entregu’é un tratado chikitu, Gathering the Lord’s Jewels [Recogiendo e Hoyanan di Señor]. Tata a bai cas cuné, a les’é i bolbe les’é. “Si esei ta e berdad,” el a bisa, “e ora ei tur otro cos ta robes.” E siguiente dia, el a pidi mas informacion, i pa tres siman largu henter anochi te mardugá, el a studia e Bijbel. E tabata sa cu el a haña e berdad! Diadomingo, 2 di januari, 1916, su diario ta bisa: “Mi a bai Capiya parti mainta, mi a bai I.B.S.A. [Asociacion di Studiantenan Internacional di Bijbel, manera Testigonan di Jehova tabata conocí e tempu ei na Inglatera] parti anochi—studiando Hebreonan 6:9-20—mi promé bishita cerca e rumannan.”

Oposicion a lanta pronto. Nos famianan i amigunan di iglesia a pensa cu Tata tabata loco. Pero el a tuma su decision. Baimentu di reunion i studio tabata e cosnan principal den su bida, i pa mart el a simbolisá su dedicacion na Jehova mediante bautismo bou di awa. Despues di un par di siman cu Tata tabata bai reunion su so, Mama a stop di resistí di bai. El a poné mi den mi garoshi di baby i a cana e ocho kilometernan pa Leeds, yegando net ora e reunion a finalisá. Bo por imaginá Tata su goso. For dje tempu ei padilanti, nos famia tabata uní den Jehova su sirbishi.

Tata su posicion tabata masha difícil—un boluntario den e ehército i despues dentro di un par di siman, un persona cu un obhecion conciencial [cu pa motibu di concenshi ta nenga servicio militar]. Ora el a ser yamá pa sirbi, el a nenga di carga un skopet, i pa juli 1916 el a enfrentá e promé di cincu corte marcial, siendo sentenciá na 90 dia den prizon. Despues di a cumpli cu e promé sentencia, Tata a haña un verlof pa dos siman, siguí pa un otro corte marcial i 90 dia mas den prizon. Despues di su segundo término di encarcelacion, el a ser transferí n’e Cuerpo Médico di Ehército Real, i dia 12 di februari, 1917, el a nabegá riba un barcu cu ta transportá soldat pa Rouen, Francia. Su diario ta relatá cu ei e tabata bira cada dia mas disgustá cu su situacion. El a realisá cu e simplemente tabata cuidando soldatnan heridá pa nan bai bek i bringa.

Atrobe el a nenga di cooperá. E biaha aki e corte marcial a sentenci’é na cincu aña den e prizon militar británico na Rouen. Ora Tata a sigui pidi p’e ser transferí na un prizon civil como hende cu un obhecion conciencial, el a ser castigá cu tres luna riba pan cu awa, siguí pa cuminda regular di prizon te ora su peso a aumentá; despues henter e proceso tabata ser ripití. El a ser di boei cu su mannan tras di su lomba durante dia i cu su mannan dilanti durante anochi i na ora di come. Henter su bida, el a keda cu cicatris na su polsnan caminda e boeinan cu tabata muchu chikitu a corta den su carni, resultando den heridanan yen di pus. Tambe nan a mara cadenanan di pia na su cintura.

E autoridadnan di ehército a haci tur loke tabata na nan alcanse pa kibra su firmesa di determinacion pero en bano. Nan a kita su Bijbel i bukinan for di dje. E no tabata haña carta for di cas, ni e no por a manda ningun. Despues di dos aña el a dicidí di demostrá su sinceridad dor di drenta un welga di hamber. Pa siete dia el a mantené su determinacion, sin come ni bebe, resultando den su transferencia na un hospital di prizon, gravemente enfermo. El a proba su punto, aunke casi el a perde su bida como resultado. Añanan despues el a admití cu el a actua robes poniendo su bida na peliger den e manera aki, i nunca mas lo e tuma un accion asina atrobe.

E guera a caba na november 1918 cu Tata ainda den prizon na Rouen, pero na cuminsamentu dje siguiente aña, el a ser mandá na un prizon civil na Inglatera. Imaginá su goso ora el a ricibí tur Mama su cartanan i paketenan cu a acumulá, huntu cu su Bijbel i bukinan precioso! El a ser hibá na Prizon di Winchester, unda el a topa cu un ruman yong kende su experencianan durante guera tabata similar cu esun di dje. Su nomber tabata Frank Platt, kende despues a sirbi den Betel na Londen pa hopi aña. Nan a haci areglo pa topa su siguiente dia, pero p’e dia ei Frank a ser transferí pa otro caminda.

Dia 12 di april, 1919, Mama a ricibí un telegram: “Aleluya! Biniendo cas—yamando [Betel di] Londen.” Ki un tempu di alegria despues di tres aña di prueba, dificultad i separacion! Tata su promé pensamentu tabata pa yama e rumannan di Betel di Londen na telefon i pa reuní cu nan. Na 34 Craven Terrace, el a ricibí un bon biní caluroso. Despues di un baño i un feitá i bistí den un flus i sombré fiá, Tata a regresá cas. Bo por imaginá nos re-encuentro? Mi tabatin casi cincu aña di edad, i mi no tabata cord’é.

E promé reunion cu Tata a asistí na dje despues di recobrá su libertad tabata e Memorial. Ora el a subi e trapinan dje salon, ken el a topa tabata Frank Platt, kende a ser trasladá pa un hospital militar na Leeds. Ki un goso nan tabatin compartiendo nan experencianan! For dje tempu ei padilanti te ora cu el a bandoná hospital, Frank a haci nos cas su segundo cas.

Mama Su Sirbishi Fiel

Tur e tempu cu Tata tabata ausente, Mama tabata laba paña pa hende pa completá e poco entrada for di gobiernu. E rumannan tabata masha bondadoso cu nos. Cada tantu siman un dje ancianonan di congregacion tabata dun’é un envelop chikitu conteniendo un regalo anónimo. Semper Mama a bisa cu tabata e amor dje rumannan cu a hal’é cerca Jehova i a yud’é wanta atrabes dje tempunan difícil ei. E tabata asistí fielmente n’e reunionnan di congregacion durante henter Tata su ausencia. Su prueba di mas severo tabata tempu cu, pa mas cu un aña, e no tabatin ningun idea si Tata tabata bibu of morto. Como un carga adicional, na 1918 tantu ami como Mama a haña e griep spañó. Hende tabata muri tur rond di nos. Bisiña cu a bai yuda bisiña a haña e malesa i muri. Sin duda e scarcedad di cuminda n’e tempu ei a yuda reducí hende su resistencia pa infeccion.

E palabranan di apostel Pedro a proba di ta masha cierto pa nos famia: “Despues cu boso a sufri pa poco tempu, . . . Dios . . . lo haci boso firme, lo e haci boso fuerte”! (1 Pedro 5:10) E sufrimentu di mi mayornan a yuda nan desaroyá un fe insagudibel den Jehova, un garantia absoluto cu e ta interesá den nos i cu nada por separá nos for dje amor di Dios. Mi tabata specialmente bendicioná di tin un criansa asina den e fe.—Romanonan 8:38, 39; 1 Pedro 5:7.

Sirbishi Hubenil

Despues dje liberacion di Tata, sirbishi di Reino a bira e centro di nos bida. Mi no por corda cu mi hamas a perde un reunion, sino tabata pa malesa. Pronto despues cu el a regresá cas, Tata a bende su cámara i Mama su pulsera di oro pa haña placa pa asistí na un congreso. Aunke nos no tabatin cen pa bai cu vacansi, nos nunca a perde e reunionnan aki, incluyendo esnan na Londen.

E promé dos of tres aña despues dje guera tabata tempu di refrescamentu. Tata i Mama a probechá plenamente di tur oportunidad pa compartí compañerismo i asociá cu rumannan. Mi por corda con nos tabata bishitá otro rumannan, i ami, como un hobencita, tabata sinta kleur i pinta miéntras mi grandinan tabata papia cu otro pa oranan largu tocante comprendimentu nobo dje berdad. Papiando cu otro, cantando huntu cu acompañamentu musical di orgel, disfrutando di compañerismo dushi, a haci nan masha felis i refrescá.

Mi mayornan tabata masha estricto cu mi entrenamentu. Na scol mi a resaltá como diferente, for di cincu aña di edad, bayendo cu mi “Testament Nobo” pa lesa miéntras e klas tabata haña les di catisashi. Despues mi a ser exhibí dilanti henter e scol como un mucha cu un “obhecion conciencial” debí cu mi no tabata tuma parti den e celebracionnan di Dia di Veterano.a Mi no ta lamentá mi criansa. En realidad, e tabata un proteccion i a hacié mas fácil pa keda riba e ‘caminda smal.’ Unda cu mi mayornan a bai, na reunionnan of den sirbishi, mi a bai cu nan.—Mateo 7:13, 14.

Mi ta corda specialmente e diadomingo mainta ei ora pa promé bes mi a cuminsá predicá mi so. Mi tabatin apénas 12 aña di edad. Ora mi tabata un tiener mi ta corda con mi a anunciá un diadomingo mainta cu mi ta bai keda cas. Ningun hende a criticá mi of forsá mi pa bai predicá, di manera cu mi a sinta den curá studiando mi Bijbel i sintiendo mi mes totalmente incomfortabel. Despues di a haci esaki pa un of dos siman, mi a bisa Tata: “Mi ta kere cu lo mi bai cu Tata awe mainta!” For dje tempu ei padilanti, hamas mi a wak patras.

Ki un aña maraviyoso 1931 tabata! No solamente nos a ricibí nos nomber nobo, Testigonan di Jehova, pero mi a ser bautisá na un congreso nacional na Palacio di Alexandra, Londen. Lo mi no lubidá e dia ei nunca mas. Nos a bisti paña largu pretu i a sosodé cu esun di mi tabata unu muhá cu ya a ser usá caba dor di un otro candidato!

Mi ambicion como mucha semper tabata pa ta un colporteur, manera predicadornan di tempu completo a ser yamá e tempu ei. Segun cu mi a bira mas grandi, mi a sinti cu mi mester haci mas den Jehova su sirbishi. Pues na mart 1933, cu 18 aña di edad, mi a drenta e fila di sirbidornan di tempu completo.

Un goso special pa nos tabata “Simannan di Pionero” den cierto stadnan grandi, ora cu casi un dozijn di sirbidor di tempu completo tabata bini huntu, keda cerca rumannan local, i traha como un ekipo. Nos tabata entregá foyeto n’e lidernan religioso i otro hombernan prominente. A exigí curashi pa acercá nan. Mayoria biaha nos a ser ricibí cu menosprecio, i hopi di nos a ser rechasá dor di doñonan di cas cu a dal porta cera den nos cara. No cu esaki a preocupá nos, pasobra nos entusiasmo tabata asina grandi cu nos a alegrá pa ser reprochá p’e nomber di Cristo.—Mateo 5:11, 12.

Na Leeds nos a combertí un garoshi di baby, un baiskel di tres wiel i Tata su motocicleta cu asiento den banda, i despues su auto, pa transportá aparato di tocadisco cu ‘speaker’ grandi. Dos ruman homber tabata bai den un caya cu e aparato, toca un disco musical pa alertá hende i pone nan bini na porta, despues sigui esaki cu un discurso di cincu minuut grabá dor di Ruman Rutherford. Despues di esei nan tabata sigui p’e siguiente caya miéntras cu nos, e publicadornan, a sigui i ofrecé literatura bíblico.

Pa añanan, tur diadomingo atardi despues di reunion, nos tabata bai n’e Plasa di Stadhuis unda tabatin un Skina di Orador i duna sosten scuchando un dje discursonan grabá di un ora largu di Ruman Rutherford, entregando pamfleta i acercando cualkier persona cu a mustra interes. Nos a bira bon conocí ei. Asta e polisnan a respetá nos. Riba un anochi nos a bini huntu manera custumber ora, djaleu, nos a tende e zonidu di tambú i un banda musical. Djis despues un parada di rond di cien facista tabata marcha den caya. Nan a marcha rond nos tras i a bin para cu nan banderanan tené na laira. E banda a stop, i silencio a reina net ora Ruman Rutherford su bos a resoná: “Laga nan saludá nan banderanan i saludá hende si nan ta deseá. Nos lo adorá i saludá solamente Jehova nos Dios!” Nos a puntra nos mes kico exactamente lo a bai sosodé siguientemente! Nada no a sosodé, excepto cu nan a haña un bon testimonio, i e polisnan a pone nan keda ketu di manera cu nos por a tende e resto dje lectura público.

Pa awor e tocadisco a cuminsá ser usá pa yuda nos duna un tremendo testimonio. Riba stupi di porta, nos tabata mantené nos bista cuidadosamente fihá riba e disco pa animá e hendenan pa scucha pa un cincu minuut completo n’e sermon grabá di Bijbel. Hopi biaha doñonan di cas tabata invitá nos paden i tabata contentu pa nos bini bek i toca mas disco.

Aña 1939 tabata hopi druk i difícil, cu manifestacionnan di oposicion i violencia. Promé cu un di nos congresonan, e rumannan a experenciá bastante actividad di multitud desordená riba caya. P’esei durante e asamblea, nan a traha plan pa un eskuadron special di rumannan homber den auto pa predicá den e áreanan problemático miéntras e ruman muhernan i e otro rumannan homber a bai caminda tabata mas sigur. Trahando cu un grupo den un caya, mi a pasa dor di un hanchi smal pa bishitá e casnan patras. Miéntras mi tabata na un porta, mi a tende un bochincha cuminsá—tabatin gritamentu den caya. Mi a djis sigui papia cu e persona n’e porta, prolongando e combersacion te ora mi por a tende cu cosnan a calma. E ora ei mi a cana pasa dor dje hanchi i sali riba caya hañando cu e otro rumannan a drenta den pánico ora nan no por a hañá mi! Sin embargo, mas despues riba e dia ei, e hacidornan di bochincha a purba interumpí nos reunion, pero nan a ser escoltá afó dor dje rumannan.

Guera Mundial II Ta Dal Aden

Pa awor reclutamentu tabata na vigor, i hopi ruman yong a ser encarcelá pa esei for di 3 pa 12 luna. E ora ei Tata a ricibí un privilegio adicional, esun di bishitá prizon. Tur diadomingo e tabata conducí e Studio di Toren di Vigilancia den e prizon local. Riba diarason anochi e tabata bishitá e rumannan den nan celnan. Teniendo e mes un experencia di prizon asina largu i difícil durante e promé guera mundial, e tabata specialmente contentu pa sirbi esnan cu tabata pasando dor di pruebanan similar. El a haci esaki pa 20 aña, te na su morto na 1959.

Pa 1941 nos tabata custumbrando cu e amargura i hostilidad cu hopi hende a expresá riba nos posicion di neutralidad. No tabata fácil pa para riba caya cu e revistanan i enfrentá esaki. N’e mésun tempu, nos tabata contentu pa yuda e refugiadonan cu tabata biba den nos área. E latvionan, polaconan, estonionan, alemannan—ki un goso pa mira nan cara briya cu alegria ora nan a mira E Toren di Vigilancia of Consolacion (awor Spierta!) den nan propio idioma!

E ora ei mi prueba a yega p’e posicion neutral cu mi a adoptá durante Guera Mundial II. Cerá den mi cel pa 19 ora for di cada 24, mi a haña bida di prizon duru. E promé tres dianan tabata esnan di mas difícil, pasobra mi tabata so. Riba e di cuater dia, mi a ser yamá n’e oficina dje gobernador unda mi a haña dos otro mucha muher pará. Un dje mucha muhernan a fluister na mi: “Pa ki motibu bo ta cerá?” Mi a bis’é: “Lo bo keda sorprendí si bo tabata sa.” El a fluister cu un bos tenso, puntrando: “Bo ta un TJ (Testigo di Jehova)?” E otro mucha muher a tend’é i a puntra nos tur dos: “Boso ta TJ?” i nos tur tres a brasa otro. Nos no tabata so mas!

Sirbishi di Tempu Completo Encantador

Librá for di prizon, mi a sigui mi sirbishi di tempu completo, i un hobencita di 16 aña cu a caba di bandoná scol a uni cu mi. Nos a muda pa Ilkley, un bunita pueblo na rand dje Vayenan di Yorkshire. Pa seis luna completo, nos a haci hopi esfuerso pa haña un lugá apropiado pa nos reunionnan. Finalmente nos a huur un garashi chikitu, cua nos a combertí den un Salon di Reino. Tata a yuda nos cu e tarea difícil aki, percurando iluminacion i calefaccion. Tambe el a decorá e edificio pa nos. Pa añanan e congregacion cercano a sostené nos, asignando rumannan homber tur siman pa duna discurso público. Cu Jehova su bendicion nos a prosperá i a crece, i cu tempu un congregacion a ser establecé.

Na januari 1959, di ripiente Tata a bira malu. Mi a ser yamá bek na cas, i el a muri na april. E añanan cu a sigui tabata difícil. Mama su salú a bai atras i tambe su memoria, haciend’e un lucha pa mi. Pero Jehova su spiritu a tené mi activo, i mi tabata capas pa cuid’é te na su morto na 1963.

Mi a haña asina tantu bendicion for di Jehova atrabes dje añanan. Nan ta muchu pa relatá. Mi a mira e congregacion caminda mi a lanta, crece i dividí cuater biaha, mandando publicadornan i pioneronan, algun como misionero na paisnan mes leu cu Bolivia, Láos i Uganda. Circunstancianan a desaroyá di tal manera cu mi no a casa of establecé un famia. Esei no a hací mi tristu; mi tabata muchu ocupá. Aunke mi no tin famia carnal di mi mes, mi tin hopi yu i nietu den Señor, asta cien biaha mas tantu.—Marco 10:29, 30.

Hopi bes mi ta invitá pioneronan yong i otro hóbennan na mi cas pa disfrutá di compañerismo cristian. Nos ta prepará huntu p’e Studio di Toren di Vigilancia. Tambe nos ta relatá experencianan i ta canta canticanan di Reino, mescos cu mi mayornan tabatin custumber di haci. Rondoná pa un grupo alegre di hóbennan, mi ta mantené un perspectiva yong i contentu. No tin un mihó bida pa mi cu sirbishi di pionero. Mi ta gradicidu na Jehova cu mi tabatin e privilegio di sigui den e pasonan di mi mayornan. Mi oracion ta pa mi por sigui sirbi Jehova atrabes di eternidad.

[Notanan]

[Plachi na página 23]

Hilda Padgett cu su mayornan, Atkinson i Pattie

[Plachi na página 23]

E tratado cu a chispa Tata su interes den e berdad