Informe di Proclamadornan di Reino

Testificacion Ta Duna Fruta na Cas i na Scol

BIDA di un cristian ta enbolbé hacimentu di bon na otronan, specialmente compartiendo cu nan e bon nobo dje Reino di Dios. Proverbionan 3:27 ta bisa: “No retené loke ta bon for di esnan na ken bo ta deb’é, ora ta sosodé cu ta den poder di bo man pa hacié.” Na Argentina un Testigo hóben den su di tres aña di scol secundario kier a compartí e bon nobo di Reino cu un amigu di scol. Haciendo esei tabatin resultadonan di largu alcanse.

Un dia e Testigo hóben a mencioná na su amigu cu no ta tur religion ta bon. Ora e mucha homber hóben a contestá cu e no a haci nada malu, e Testigo a bisa: “Bo no ta haci nada pa Dios tampoco.” Esaki a pone e hóben pensa. Mas despues e Testigo a splica cu esakinan ta e último dianan i cu pa por gana e aprobacion di Dios, un persona mester haña conocimentu exacto di Bijbel i aplik’é. Su amigu di scol a bai di acuerdo. Pero su famia lo a permití p’e tin un studio di Bijbel? Pa duna su amigu algu pa pensa ariba, e Testigo a pidié pa lesa e buki Bo por biba pa semper den Paradijs riba tera.

Tempu a pasa i e amigu a kita for di scol. No a tende nada di dje pa mas cu un aña. Anto riba un dia e Testigo hóben a keda sorprendí pa ricibí un yamada di telefon for di su amigu cu a bisa cu e por a mira cu profecianan di Bijbel realmente tabata cumpliendo. Mesora e Testigo a haci areglo pa studia Bijbel cuné.

Ora el a bai n’e cas di su amigu bieu di scol, el a ripará cu e mayornan di su amigu tabata basta preocupá en cuanto loke nan yu tabata enbolbiendo su mes aden. Asta e amigu su ruman mas chikitu a pensa cu e tabata birando loco. P’esei e mayornan a laga e ruman mas chikitu participá den e siguiente studio. Despues di esei, cu awa na wowo, e mucha homber hóben aki a informá e mayornan cu su ruman grandi no tabata loco, riba cua e mama a sclama, “En bes di un problema, awor mi tin dos!”

Pues, n’e siguiente studio e mama mes tabata presente i tabatin cu duna boca cu e dos mucha hombernan no tabata loco. Despues a haci areglo pa un studio di Bijbel cuné i su esposo. Pronto henter e famia a cuminsá asistí n’e reunionnan di congregacion na Salon di Reino. Cu tempu, e abuelonan tambe a cuminsá studia Bijbel i a cuminsá bai e reunionnan. For dje tempu ei, e promé mucha homber hóben a ser bautisá. El a casa, i e cu su casá ta publicadornan celoso.

Ademas, mediante testimonio informal na scol, e Testigo hóben a yuda dos otro compañero di scol i tambe e mama i ruman muher di un di nan cuminsá studia Bijbel. Na tur, 11 persona a siña e berdad di Bijbel debí cu e Testigo hóben no a retené loke ta bon pa su compañeronan di scol. Ki un resultado felis! Berdaderamente, “Felis ta e pueblo kende su Dios ta Jehova!”—Salmo 144:15.