Consuelo pa esnan cu un “spiritu abatí”

AWE, Satanas su mundu a yega di ta “mas ayá di tur sentido moral.” (Efesionan 4:19; 1 Juan 5:19) Adulterio i fornicacion ta pandémico. Den hopi pais 50 porciento of mas di matrimonionan ta caba na divorcio. Homosexualidad ta ampliamente aceptá. Violencia sexual—violacion—cu frecuencia ta den noticia. Pornografia ta un negoshi multimiyonario.—Romanonan 1:26, 27.

Entre e perversionnan di mas baho ta e abusu sexual di mucha inocente. Mescos cu e sabiduria dje mundu di Satanas, abusu sexual di mucha ta “animal, demoniaco.” (Santiago 3:15) Na Merca so, e revista Time ta bisa, “mas cu 400.000 informe di atakenan sexual cu por ser verificá ta ser raportá na autoridadnan tur aña dor di maestronan i dokternan.” Ora víctimanan dje abusu aki ta bira adulto, hopi ta keda marcá cu heridanan doloroso, i e heridanan ei ta berdadero! Bijbel ta bisa: “E spiritu [inclinacion mental, sintimentu i pensamentu interior] di un hende por soportá su enfermedad; pero en cuanto un spiritu abatí [heridá, afligí], ken por want’é?”—Proverbionan 18:14.

E bon nobo dje Reino di Dios ta atraé tur clase di hende, incluyendo “esnan kibrá di curason” i esnan cu un “spiritu desanimá.” (Isaías 61:1-4) No ta un sorpresa cu hopi hende cu tin dolor emocional ta respondé n’e invitacion: “Laga ken cu tin sed bini; laga ken cu kier tuma e awa di bida grátis.” (Revelacion 22:17) E congregacion cristian por ta un lugá di consuelo pa esakinan. Nan ta alegrá pa siña cu sufrimentu pronto lo ta un cos di pasado. (Isaías 65:17) Sin embargo, miéntras tantu, nan por tin e necesidad pa ser ‘consolá’ i pa nan heridanan ser ‘mará cu verband.’ Apropiadamente Pablo a consehá e cristiannan: “Papia di un manera consolador cu e almanan deprimí, apoyá e débilnan, mustra gran pacenshi pa cu tur.”—1 Tesalonicensenan 5:14.

“Recuerdonan Reprimí”

Den añanan recien algun tabatin un “curason kibrá” pa motibunan cu otro hende ta haña ta difícil pa comprendé. Nan ta adultonan cu, riba base di loke a ser describí como “recuerdonan reprimí,” ta bisa cu nan a ser abusá sexualmente tempu nan tabata mucha.a Algun no tin idea cu nan a ser abusá sexualmente te ora cu, inesperadamente, nan ta experenciá ‘flashbacks’ [impresionnan bibu di ripiente di experencianan di pasado cu ta bini bek na nan mente] i “recuerdonan” di un adulto (of adultonan) cu a abusá di nan tempu cu nan tabata yong. Cualkier persona den e congregacion cristian tin pensamentunan perturbador asina? Den algun pais, sí, i e personanan dedicá aki por experenciá angustia profundo, rabia, culpa, bergwensa of soledad. Mescos cu David nan por sinti nan isolá for di Dios i sclama: “Pakico, O Jehova, bo ta keda pará leu? Pakico bo ta keda scondí den tempu di angustia?”—Salmo 10:1.

Profesionalnan di salú mental no ta comprendé hopi aspecto dje “recuerdonan” aki. No obstante, e “recuerdonan” ei por afectá e spiritualidad di cristiannan dedicá. Pues nos ta acudí cu confiansa n’e Palabra di Dios pa guia den atendé cu nan. Bijbel ta percurá “dicernimentu den tur cos.” (2 Timoteo 2:7; 3:16) Tambe e ta yuda tur esnan concerní pa pone fe den Jehova, “e Tata di tierno misericordia i e Dios di tur consuelo, kende ta consolá nos den tur nos tribulacionnan.”—2 Corintionan 1:3, 4.

E Abusu A Sosodé Realmente?

Den e mundu, tin hopi controversia en cuanto kico e “recuerdonan” aki ta i te na ki grado nan ta representá cosnan cu realmente a sosodé. Testigonan di Jehova “no ta parti dje mundu” i no ta participá den e controversia aki. (Juan 17:16) Segun informenan publicá, “recuerdonan” algun biaha a resultá di ta exacto. Por ehempel, despues cu inspector di seguro Frank Fitzpatrick a “corda” cu un cierto pastor a abusá sexualmente di dje, casi cien otro víctima a bini padilanti pa afirmá cu e mésun pastor a abusá di nan tambe. Segun informe e pastor a admití cu el a cometé e abusu.

Sin embargo, ta notabel cu un cantidad di individuo tabata incapas pa confirmá nan “recuerdonan.” Algun persona afligí den e manera aki tabatin recoleccionnan bibu di un cierto individuo cu a cometé abusu of dje abusu cu a ser cometé na un cierto lugá specífico. Pero, mas despues, evidencia legítimo cu tabata contrario a haci cla cu e personanan aki a “corda” detayenan cu no por tabata cierto.

Percurando un Refugio

No obstante, con consuelo por ser duná na esnan cu ta experenciá un “spiritu abatí” pa motibu di “recuerdonan” asina? Corda riba Jesus su comparacion dje próhimo samaritano. Un homber a ser atacá dor di ladron, maltratá i despohá di su posesionnan. Ora e samaritano a pasa ei banda, el a sinti duele dje homber heridá. Kico el a haci? El a insistí pa tende delaster detaye tocante e maltrato? Of e samaritano a haña un descripcion dje ladronnan i mesora a sali nan tras? No. E homber tabata heridá! Pues e samaritano a limpia i mara su heridanan suavemente i a hib’é amorosamente n’e siguridad di un posada den cercania unda e por a recuperá.—Lucas 10:30-37.

Innegablemente, tin un diferencia entre herida físico i un “spiritu abatí” causá pa abusu sexual real di infancia. Pero ámbos ta causa gran sufrimentu. P’esei, loke e samaritano a haci p’e hudiu heridá ta mustra kico por ser hací pa yuda un compañero cristian afligí. E promé prioridad ta pa duna consuelo amoroso i yud’é recuperá.

E Diabel a afligí fiel Job, aparentemente keriendo sigur cu sea dolor emocional of físico lo a kibra su integridad. (Job 1:11; 2:5) Desde e tempu ei, Satanas hopi biaha a purba usa sufrimentu—sea cu e ta caus’é directamente of no—pa debilitá e fe di sirbidornan di Dios. (Compará cu 2 Corintionan 12:7-9.) Nos por duda cu e Diabel awor ta haci uso di abusu di mucha i dje “spiritu desanimá” di hopi adulto cu a sufri esaki (of cu ta ser molestiá pa “recuerdonan” di a sufri di dje) pa purba debilitá e fe di cristiannan? Mescos cu Jesus ora e tabata bou di atake di Satanas, un cristian cu ta sufri di dolor pero cu balentemente ta nenga di bandoná su integridad ta bisa: “Bai, Satanas!”—Mateo 4:10.

Permanecé Spiritualmente Fuerte

“E esclabo fiel i discreto” a publicá informacion pa yuda trata e herida spiritual i emocional causá pa abusu di mucha. (Mateo 24:45-47) Experencia ta mustra cu esun cu ta sufri ta ser yudá si e por dependé riba e ‘poder dje Señor i e potencia di su forsa,’ bistiendo “e armadura completo for di Dios.” (Efesionan 6:10-17) E armadura aki ta incluí e “berdad” di Bijbel, cu ta exponé Satanas como e berdadero enemigu i ta core cu e scuridad den cua e i su compinchinan ta obra. (Juan 3:19) Tambe tin “e corasa di husticia.” Esun afligí mester forsa pa pega na normanan hustu. Por ehempel, algun víctima tin impulsonan fuerte pa causa daño na nan mes of pa cometé inmoralidad. Cada biaha cu nan resistí e impulsonan aki, nan ta gana un victoria!

Armadura spiritual ta incluí tambe “e bon nobo di pas.” Papiando cu otronan tocante Jehova su propósitonan ta fortalecé esun cu ta papia i tambe cualkier persona cu ta scucha. (1 Timoteo 4:16) Si bo ta un persona cu un “spiritu abatí,” poniendo cu ta difícil pa bo papia tocante e bon nobo, purba compañá un otro cristian segun cu e ta haci e trabou vital aki. I no lubidá “e escudo grandi di fe.” Tene fe cu Jehova ta stimá bo i cu lo e restorá tur loke bo a perde. Kere sin reserva cu Jesus tambe ta stimá bo, i el a proba esaki dor di a muri pa bo. (Juan 3:16) Satanas semper a pretendé falsamente cu Jehova no ta percurá pa su sirbidornan. Esei ta djis un mas di su mentiranan flagrante i malicioso.—Juan 8:44; compará cu Job 4:1, 15-18; 42:10-15.

Si dolor di curason ta pone cu ta difícil pa kere cu Jehova ta interesá den bo, asociacion cu otronan cu ta kere firmemente cu e ta interesá den nos, lo yuda. (Salmo 119:107, 111; Proverbionan 18:1; Hebreonan 10:23-25) Nenga di permití Satanas hortá bo dje premio di bida. Corda, “e helm di salbacion” ta parti dje armadura; mescos tambe “e spada di spiritu.” Bijbel ta inspirá dor di spiritu santu, locual Satanas no por derotá. (2 Timoteo 3:16; Hebreonan 4:12) Su palabranan di curacion por calma dolor emocional.—Compará cu Salmo 107:20; 2 Corintionan 10:4, 5.

Finalmente, pidi constantemente den oracion p’e forsa pa wanta. (Romanonan 12:12; Efesionan 6:18) Oracion sincero a sostené Jesus atrabes di su agonia emocional intenso, i esei por yuda abo tambe. (Lucas 22:41-43) Ta difícil pa bo haci oracion? Pidi otronan pa haci oracion cu bo i pa bo. (Colosensenan 1:3; Santiago 5:14) Spiritu santu lo apoyá bo oracionnan. (Compará cu Romanonan 8:26, 27.) Mescos cu un malesa físico doloroso, algun persona cu herida emocional profundo kisas no ta ser curá completamente den e sistema di cosnan aki. Pero cu Jehova su yudansa nos por wanta, i awante ta victoria, mescos cu e tabata den Jesus su caso. (Juan 16:33) “Confia den [Jehova] na tur tempu, O pueblo. Dilanti dje drama boso curason. Dios ta un refugio pa nos.”—Salmo 62:8.

Kico dje Presunto Abusador?

Un persona cu realmente ta abusá sexualmente di un mucha ta un violador sexual i mester ser considerá como tal. Cualkier hende cu a bira víctima den e manera aki tin e derecho di acusá su abusador. Tog, un acusacion no mester ser hací purá si e ta basá solamente riba “recuerdonan reprimí” di abusu. Den e caso aki e cos di mas importante ta pa esun cu ta sufri recuperá un midí di stabilidad emocional. Despues cu algun tempu a pasa, lo e por ta den un mihó posicion pa evaluá e “recuerdonan” i dicidí kico e kier haci tocante nan, si e kier haci algu mes.

Considerá e caso di Donna. Segun informe e tabatin trastorno di comementu i a bai cerca un consehero—aparentemente un di capacidad dudoso. Djis despues e tabata acusando su tata di incesto i su tata a ser hibá corte. E hurado no por a yega na un acuerdo, di manera cu e tata no a bai prizon, pero e mester a paga US$ 100.000 na gastunan hudicial. Anto, despues di tur esei, Donna a bisa su mayornan cu e no tabata kere mas cu e abusu a tuma lugá!

Sabiamente, Sálomon a bisa: “No sali pa conducí un caso hudicial muchu lihé.” (Proverbionan 25:8) Si tin algun motibu válido pa sospechá cu e presunto violador ainda ta abusando di mucha, kisas un spiertamentu lo tin cu ser duná. E ancianonan di congregacion por yuda den un caso asina. Di otro manera, tuma bo tempu. Eventualmente, kisas bo por contentá bo mes cu bandoná e asuntu. Pero, si tog bo kier confrontá e presunto violador (despues di a evaluá promé con lo bo sinti tocante e posibel reaccionnan), bo tin e derecho di haci esei.

Durante e tempu cu esun cu ta experenciá “recuerdonan” ta curando, por surgi situacionnan incómodo. Por ehempel, un individuo por tin imágennan mental bibu di a ser abusá sexualmente dor di un persona cu e ta mira tur dia. No por establecé ningun regla pa trata esaki. “Cada ken lo hiba su mes carga.” (Galationan 6:5) Tin biaha un persona por sinti cu un pariente of miembro di famia djacerca ta enbolbí. Corda e caracter dudoso di algun “recuerdo reprimí” ora ta trata di identificá esun cu ta ser sospechá di ta un violador. Den un situacion asina, tanten cu e asuntu no a ser firmemente establecí, kedando den contacto cu e famia—por lo ménos mediante bishitanan ocasional, mediante carta, of mediante telefon—lo demostrá cu bo ta tratando di sigui un curso bíblico.—Compará cu Efesionan 6:1-3.

Kico e Ancianonan Por Haci?

Si e ancianonan ser acercá dor di un miembro dje congregacion cu ta experenciando flashback of “recuerdonan reprimí” di abusu como mucha, generalmente dos di nan ta ser asigná pa yuda. E ancianonan aki mester animá bondadosamente esun afligí pa concentrá tanten riba con pa enfrentá e angustia emocional cu éxito. E nomber di cualkier abusador cu ta ser “recordá” mester ser wardá estrictamente confidencial.

E tarea primario dje ancianonan ta pa actua como wardadornan. (Isaías 32:1, 2; 1 Pedro 5:2, 3) Nan mester ta specialmente cuidadoso pa “bisti [nan mes] cu e tierno cariño di compasion, bondad, humildad di mente, suavedad i gran pacenshi.” (Colosensenan 3:12) Laga nan scucha den un manera bondadoso i despues aplicá palabranan curativo for dje Scritura. (Proverbionan 12:18) Algun persona cu ta afligí cu “recuerdonan” doloroso a expresá gratitud pa ancianonan cu ta bishitá nan regularmente of asta ta yama na telefon pa averiguá con ta bai cu nan. Contactonan asina no tin nodi tuma hopi tempu, pero nan ta demostrá cu Jehova su organisacion ta mustra interes. Ora e persona afligí realisá cu su rumannan cristian berdaderamente ta stim’é, e por ser yudá pa recobrá un midí considerabel di balansa emocional.

Kico si esun cu ta sufri dicidí cu e kier haci un acusacion?b E ora ei e dos ancianonan por conseh’é cu, na armonia cu e principio na Mateo 18:15, e personalmente mester acercá e persona acusá tocante e asuntu. Si e acusador no ta emocionalmente capas pa haci esaki cara-cara, esei por ser hací via telefon of tal bes dor di skirbi un carta. Den e manera aki e acusado ta ser duná e oportunidad pa haci un declaracion solem dilanti Jehova cu su contesta riba e acusacion. Lo ta asta posibel p’e por presentá evidencia cu e no por a cometé e abusu. Of tal bes e acusado lo confesá, i un reconciliacion por ser lográ. Ki un bendicion esei lo ta! Si tin un confesion, e dos ancianonan por atendé asuntunan mas aleu na armonia cu principionan bíblico.

Si e acusacion ta ser nengá, e ancianonan mester splica e acusador cu no por haci nada mas den un sentido hudicial. I e congregacion lo sigui considerá esun acusá como un persona inocente. Bijbel ta bisa cu mester tin dos of tres testigo promé cu accion hudicial por ser tumá. (2 Corintionan 13:1; 1 Timoteo 5:19) Asta si mas cu un persona ta “corda” abusu dje mésun individuo, e caracter dje recuerdonan aki ta simplemente demasiado insigur pa basa decision hudicial riba nan sin otro evidencia apoyador. Esaki no kier men cu tal “recuerdonan” ta ser considerá como falsu (of cu nan ta ser considerá como berdadero). Pero mester sigui principionan di Bijbel pa establecé un asuntu hudicialmente.

Kico si e persona cu ta ser acusá—aunke e ta nenga e malecho—ta realmente culpabel? E ta “scapa castigu,” na moda di papia? Siguramente cu no! E cuestion di su culpabilidad of inocencia por ser lagá trankilamente den man di Jehova. “E picánan di algun hende ta ser manifestá públicamente, hibando directamente na huicio, pero en cuanto otro hende nan picánan tambe ta ser manifestá mas despues.” (1 Timoteo 5:24; Romanonan 12:19; 14:12) E buki di Proverbionan ta bisa: “E expectativa dje hustunan ta un alegria, pero e speransa mes dje malbadonan lo perecé.” “Ora un malbado muri, su speransa ta perecé.” (Proverbionan 10:28; 11:7) Al final, Jehova Dios i Cristo Jesus ta administrá huicio eterno den husticia.—1 Corintionan 4:5.

Resistiendo e Diabel

Ora almanan dedicá ta wanta apesar di gran dolor físico of emocional, ki un evidencia esei ta di nan fortalesa interno i amor pa Dios! I ki un testimonio dje poder di Jehova su spiritu pa sostené nan!—Compará cu 2 Corintionan 4:7.

Pedro su palabranan ta aplicá na hende asina: “Tuma boso posicion contra [Satanas], sólido den fe.” (1 Pedro 5:9) Haciendo esei kisas no ta fácil. Tin biaha, por ta asta difícil pa pensa claramente i lógicamente. Pero no desanimá! Pronto, e Diabel i su obranan mañoso lo no existí mas. Berdaderamente, nos ta anhelá p’e tempu ei ora “Dios mes . . . lo seca tur lágrima di nan wowo, i morto lo no existí mas, tampoco lo tin mas lamento ni sclamacion ni dolor. E cosnan anterior a pasa forbij.”—Revelacion 21:3, 4.

[Notanan]