Un Mihó Bida Ta Ser Primintí

ABO lo kier ta liber dje problemanan cu ta haci bida difícil? Bo kier biba den un mundu caminda bida ta mes deleitabel cu manera e ta den e esena ilustrá riba e kaft dilanti i patras dje revista aki? Wak e plachi ei bon. Hende tin cuminda na abundancia. Nan realmente lo disfrutá dje cuminda delicioso ei. Tur hende ta contentu. Hende di diferente rasa ta na pas cu otro. Asta e bestianan ta na pas! Ningun hende ta bringa cu otro. Ningun hende ta pober. Ningun hende ta enfermo. Tin un ambiente agradabel, palunan bunita, i awa puru i limpi. Ki un situacion espléndido!

E tera aki hamas lo yega di ta asina? Sí, lo e ta un paradijs. (Lucas 23:43) Dios, kende a crea e tera, a proponé pa hende disfrutá di un mihó bida riba un tera paradísico. I abo por ta einan!

Cua Bida Lo Bo Preferá?

Den ki sentido e futuro Paradijs terenal lo ta diferente for dje mundu den cua nos ta biba awor? Actualmente, mas cu mil miyon hende ta pasa hamber tur dia. Pero den e Paradijs cu Dios a proponé p’e tera, tur hende lo tin cuminda na abundancia. Bijbel ta primintí: “Jehova di ehércitonan siguramente lo prepará pa tur pueblo . . . un bankete di plato cu hopi zeta, un bankete di biña mantení riba kachi-kachi.” (Isaías 25:6) Lo no tin scarcedad di cuminda, pasobra Bijbel ta bisa: “Lo yega di tin abundancia di grano riba e tera; riba e top dje cerunan lo tin un sobreabundancia.”—Salmo 72:16.

Awe, hopi hende ta biba den casnan i barionan cu condicionnan di vivienda sumamente deplorabel, of nan ta lucha pa paga nan huur. Otronan no tin cas i ta drumi riba caya. Segun e Organisacion Mundial di Salú, un cantidad di 100 miyon mucha rond mundu ta sin cas. Pero den e Paradijs binidero, tur hende lo tin un cas cu e por bisa ta di su mes. E Palabra di Dios ta bisa: “Nan siguramente lo construí casnan i ocupá nan; i nan siguramente lo planta hofinan di wijndruif i come nan fruta.”—Isaías 65:21.

Hopi hende tin un trabou cu nan no ta gusta. Hopi biaha nan ta traha duru i hopi ora pa dia, pero ta ricibí un salario abou. Mas of ménos 1 di cada 5 hende den e mundu ta biba riba un entrada di ménos cu US$ 500 pa aña. Sin embargo, den e Paradijs binidero, hende lo disfrutá di nan trabou i lo mira bon resultado for di dje. Dios ta primintí: “E obra di nan propio mannan mi scogínan lo usa na un grado cabal. Nan lo no afaná pornada.”—Isaías 65:22, 23.

Awor tur caminda tin malesa i enfermedad. Hopi hende ta ciegu. Algun ta surdu. Otronan no por cana. Pero den Paradijs, hende lo ta liber di malesa i enfermedad. Jehova ta bisa: “Ningun residente lo bisa: ‘Mi ta malu.’ ” (Isaías 33:24) En cuanto esnan cu ya caba tin hendikep, e promesa conmovedor ta: “N’e tempu ei wowo dje ciegunan lo ser habrí, i orea mes dje surdunan lo ser habrí. N’e tempu ei e coho lo subi net manera un biná [machu], i e lenga di esun muda lo sclama di alegria.”—Isaías 35:5, 6.

Actualmente tin sufrimentu i dolor, tristesa i morto. Pero den e Paradijs riba tera, tur e cosnan aki lo stop di existí. Sí, asta morto lo disparcé! Bijbel ta bisa: “Dios mes lo ta cu nan. I lo e seca tur lágrima for di nan wowo, i morto lo no existí mas, ni lo no tin mas lamento ni sclamacion ni dolor. E cosnan anterior a pasa.”—Revelacion 21:3, 4.

Claramente, anto, Jehova su Paradijs terenal primintí lo nificá un mihó bida pa humanidad. Pero con nos por ta sigur cu esei lo bini? Na ki tempu lo e bini, i con? Kico abo mester haci pa bo ta eiden?