Informe di Proclamadornan Di Reino

“Haci e Trabou di un Evangelisador”

KICO kier men ser un evangelisador? E palabra ta un traduccion dje palabra griego eu·ag·ge·li·stesʹ, cua ta estrechamente relacioná cu e palabra eu·ag·geʹli·on, cu ta nificá “bon nobo.” P’esei, un evangelisador ta un predicador, of mensahero, di bon nobo.

Tur cristian berdadero ta evangelisador pasobra nan ta proclamá e bon nobo tocante e Reino di Dios. Apropiadamente, apostel Pablo a exhortá Timoteo pa “haci e trabou di un evangelisador.” Timoteo mester a tuma e trabou aki mashá na serio. Pablo a urgié pa ‘mantené su huicio den tur cos’ i pa ‘cumpli cu su ministerio plenamente.’—2 Timoteo 4:5.

Como evangelisadornan nos tambe ta tuma nos ministerio masha na serio i ta ‘mantené nos huicio,’ of ta keda alerto pa compartí e bon nobo na tur oportunidad. Asina hopi hende a yega na conocé Jehova i su promesanan despues cu nan a haña contacto cu Testigonan di Jehova pa medio di testimonio informal. Esaki ta loke a sosodé cu Seymore, un homber na Barbados.

Seymore tabata un maestro di scol público. Charles, un maestro cu ta traha ‘part-time’ n’e mésun scol i un Testigo di Jehova, tabata un evangelisador alerto. E tabata un minister di tempu completo, of pionero, i a usa tur oportunidad pa compartí e bon nobo cu otronan. Tabata mediante e testimonio informal di Charles cu Seymore a tende e mensahe di Reino pa promé biaha.

Pronto Seymore tambe tabata determiná pa compartí berdadnan bíblico cu mas tantu hende posibel. Pues el a cuminsá combersacionnan informal cu hende na su lugá di empleo, specialmente su studiantenan. Aunke den algun pais religion mester a ser mantené for di scolnan público, e homber aki tabata asigná pa siña balornan religioso i moral. Pero awor Seymore su opinionnan di ántes riba e asuntunan aki a ser reemplasá cu su conocimentu di Bijbel recien adkerí. Durante pausanan, e tabata papia cu su alumnonan tocante Dios su promesa di un mundu nobo i e prospecto di bida eterno.

Con e muchanan a reaccioná? Hopi a manifestá interes genuino den e bon nobo di Jehova su Reino. Cu tempu, Seymore a cuminsá conducí studio di Bijbel cu 13 di su studiantenan. Nan interes tabata asina grandi cu nan a haci areglo pa studia Bijbel dos biaha pa siman. Cu tempu mayoria di nan a cuminsá asistí n’e reunionnan cristian n’e Salon di Reino local di Testigonan di Jehova. Te asina leu nuebe di nan a bira Testigonan dedicá i bautisá di Jehova. Pa loke ta Seymore, awor e ta cumpli cu su ministerio plenamente sirbiendo como pionero regular i anciano den un dje congregacionnan di Testigonan di Jehova na Barbados.

Esaki ta solamente un ehempel con Testigonan di Jehova rond mundu ta ‘haci e trabou di evangelisador,’ en parte dor di participá den testimonio informal. Nan ta sigui e spiertamentu bíblico hañá na Colosensenan 4:5, 6, cu ta bisa: “Sigui cana den sabiduria pa cu esnan djafó, cumprando e tempu oportuno pa boso mes. Laga boso expresion semper sea cu gracia, sasoná cu salu, pa boso por sa con boso mester duna un contesta na cada un.”