“Mi Ta Precioso Pa Jehova!”

DEN e ‘tempu crítico aki, duru pa trata cuné,’ hopi fiel sirbidor di Jehova ta bringa un bataya constante cu sintimentunan di no ta bal nada. (2 Timoteo 3:1) Esaki no ta sorprendente, pasobra un di Satanas su “obranan mañoso” ta di pone nos sinti cu nos no ta ser stimá, ni pa nos Creador! (Efesionan 6:11, nota) Apropiadamente, e edicion di E Toren di Vigilancia di 1 di april, 1995, a contené dos artículo pa estudio di congregacion titulá “Bo Ta Precioso den Bista di Dios!” i “Incitá Otro na Amor i na Obranan Excelente—Con?” E artículonan aki a ser diseñá pa recordá nos cu Jehova ta atesorá nos esfuersonan. Ata aki algun comentario di aprecio cu nos a ricibí:

“Nunca den mi 27 añanan como Testigo di Jehova un revista a tocá mi asina tantu. Mi a yora sin por a yuda—e artículonan aki a duná mi asina un alivio. Awor mi ta sintí mi asina stimá pa Jehova. Tabata como si fuera un carga inmenso a ser kitá for di mi scoudernan.”—C. H.

“Mi a lesa e revista aki cuater biaha den un solo dia. Mi a gusta e manera cu e artículo a bisa cu bo a ser siñá un mentira si bo ta kere cu bo no ta bal nada. Mi ta bai usa e artículo aki den e trabou di pastoreo i e predicacion di cas-pa-cas.—M. P.

“Satanas a haci un excelente trabou di haci asta esnan cu ta stima Jehova sinti nan mes sin balor i como hende cu no por ser stimá. E echo cu e clase di “esclabo fiel” ta recordá nos cu Jehova ta stima nos profundamente i cu e ta apreciá tur e cosnan chikitu cu nos ta haci p’e ta un dje cosnan di mas animador cu mi a lesa. Pa hopi aña mi tabatin e sintimentunan cu boso ta papia di dje den e artículonan aki. Nunca mi a sintí mi digno di Jehova su amor, p’esei mi a trata na haci mas i mas den su sirbishi como un manera pa gana e amor ei. Pero mi a ser motivá dor di culpa i bergwensa. Pues sin importá cuantu ora mi a dedicá den e ministerio, of cuantu hende mi a yuda, mi a sinti cu e no tabata suficiente. Mi a mira solamente e falta den mi. Awor ora mi ta sirbi Jehova motivá pa amor, mi ta imaginá cu e tin un sonrisa i cu e ta orguyoso di mi. Esaki ta haci mi amor p’e crece asta mas i e ta lagá mi deseá di haci mas. Awor mi ta experenciá tremendo goso for di mi sirbishi na Jehova.”—R. M.

“Esakinan definitivamente ta e artículonan di mas excelente, di mas edificante, sí, sobresaliente cu a toca nos curason cu mi a yega di lesa! Mi ta lesando E Toren di Vigilancia pa 55 aña, i tabatin hopi edicion sobresaliente. Pero e edicion aki ta surpasá cualkier cos cu nos hamas tabatin pa trankilisá nos dudanan, miedunan i temornan cu nos ta ‘sin balor’ i ‘no por ser stimá’ i cu nos nunca por haci suficiente pa ‘gana’ Jehova su amor. E Toren di Vigilancia aki ta contené e clase di yudansa spiritual cu nos rumannan desesperadamente tin mester di dje. Ta mi intencion pa usa e artículonan aki bes tras bes ora di pastoreá.”—F. K.

“Pa esnan entre nos cu ta lucha cu sintimentunan di poco balor, of asta cu sintimentunan di ta odia nan mes, por ta asina difícil pa reuní nos forsa pa sigui den e berdad. E artículo aki a reflehá asina un profundidad di compasion i comprendimentu, e tabata manera huntamentu di un ungwento calmante i sanador direct n’e curason. Ki un consuelo pa lesa palabranan asina den E Toren di Vigilancia i pa sa sin ningun duda cu Jehova sí ta comprendé! Danki pa a recordá nos cu Jehova no ta purba motivá su pueblo mediante sintimentu di culpa, bergwensa of temor. Maske recientemente mi contribucion n’e trabou di predicacion a ser limitá severamente debí na dificultadnan financiero i problemanan cu salú den nos famia, ainda mi ta haña satisfaccion den loke mi por haci. Mi ta haña cu mi ta muchu mas felis den sirbishi ora mi purba laga amor ser mi forsa motivador.”—D. M.

“Net mi a caba di lesa ‘Bo ta Precioso den Bista di Dios!’ Cada paragraf a trece lágrima den mi wowonan. Mi a bini di un famia cu a mustra poco amor. Nan tabata menospreciá mi, tentá mi i harí mi. Pues, trempan den bida mi tabata sintí mi sin balor. Ainda mi ta carga sintimentunan cerá den mi for di mi pasado cu ta bashá mi abou ora mi ta experenciá calamidad. Ora mi a stop di sirbi como anciano di congregacion, mi a sintí mi un fracaso manera custumber—pa Dios, pa mi famia i pa mi rumannan den e congregacion. E sintimentunan aki no ta disparcé unbes, pero e artículo oportuno aki a yudá mi recobrá un midí di balansa. El a haci mi perspectiva mas briyante.”—D. L.

“Danki p’e artículo ‘Bo Ta Precioso den Bista di Dios!’ Mi tin un odio intenso contra mi mes i sintimentunan profundo di no ta bal nada cu tin nan rais den abusu sexual tempu mi tabata mucha. Ta definitivamente apropiado pa mira e pensamentu trocí aki como un obra mañoso di Satanas mes. E por asta kibra un hende su gana di biba. Ami berdaderamente mester traha tur dia pa resistí e mentira cu mi no por ser stimá. E artículo aki ta nificá mas pa mi cu boso posiblemente por pensa.”—C. F.

“Awe e rumannan ta reaccioná positivamente specialmente n’e pensamentu cu Jehova ta apreciá obranan motivá pa amor mas bien cu pa obligacion of presion. Un consideracion di Jehova su personalidad caluroso i afectuoso, su interes den su pueblo como personanan individual i e manera amoroso den cua e ta duna tur yudansa ta refrescante i motivador. En bista di esaki, asina nos a ricibí e artículo ‘Bo Ta precioso den Bista di Dios!’ hopi ruman a expresá aprecio. E ta parce di ta habriendo e caminda pa hopi ruman desaroyá un relacion mas personal cu Jehova. Ami i mi esposa kier expresá aprecio p’e estilo di skirbi i ternura expresá den e revistanan recien di Toren di Vigilancia. Nos ta trahando pa aplicá hopi dje puntonan aki segun cu nos ta bishitá e congregacionnan.”—For di un superintendente biahero.

“Mi ta un fiel lector pa casi 30 aña, pero nunca mi a lesa algu asina inspirador, asina edificante. E textonan poderosamente i ábilmente aplicá a yudá mi eliminá e mentiranan scondí den mi propio sintimentunan, permitiendo mi pa hala mas cerca Jehova. Pa hopi aña mi a sirbi Jehova motivá dor di culpa. Mi tabatin solamente un comprendimentu intelectual dje rescate i di Dios su amor. Danki p’e artículonan yen di perspicacia i consideracion. Mi ta spera di lesa hopi mas manera nan.”—M. S.

“Den tur mi 29 añanan den e berdad, mi no por corda cu un artículo a causa den mi un reaccion di asina tantu gratitud i emocion profundo. Aunke mi a ser lantá cu hopi amor i den un famia cu a percurá bon pa mi, nunca mi a sintí mi digno di ta na bida, laga para digno di sirbi Jehova. Despues dje artículo aki, mi a cai na rudia, i cu sniknan profundo mi a gradicí Jehova. Lo mi keda corda e artículo aki pa semper. Lo mi wak mi mes na un manera diferente pasobra awor mi tin e comprendimentu cu mi ta precioso pa Jehova.”—D. B.