Nan A Haña Pas den un Mundu di Disturbio
E ILUSTRACION riba e kaft dje revista aki ta mustra un esena di bataya feros di Bosnia i Herzegovina. Pas por existí den un lugá asina? Sorprendentemente, e contesta ta sí. Miéntras e comunidadnan católico romano, oost ortodox i moslim den e pais di tragedia ei ta bringa pa teritorio, hopi individuo ta anhelá pa pas, i algun a hañ’é.
Famia Djorem tabata residente di Sarajevo, i nan tabata Testigonan di Jehova. Meimei di tur e disturbio den e stad ei, nan tabatin e custumber di bishitá nan próhimo pa compartí cu nan e bon nobo dje Reino di Dios. (Mateo 24:14) Pakico? Pasobra famia Djorem tabata sa cu e Reino aki ta berdadero, cu e ta establecí caba den cielu, i cu e ta humanidad su mihó i único speransa pa pas. Testigonan di Jehova tin confiansa completo den loke apostel Pablo a yama “e bon nobo di pas.” (Efesionan 2:17) Danki na hendenan manera Bozo i Hena Djorem, hopi persona ta hañando pas na Bosnia i Herzegovina.
Un Berdadero Pas den Futuro
Tin mas cos di bisa tocante famia Djorem. Ma, promé cu esei, laga nos papia di un otro pareha cu a haña confiansa den e Reino di Dios. Nan nombernan ta Artur i Arina. Nan huntu cu nan yu hombernan yong tabata biba den un república den e teritorio di ex-Union Soviético. Ora guera civil a cuminsá, Artur a bringa pa un dje bandanan. Aunke, pronto despues, el a puntra su mes, ‘Pakico mi ta bringa contra e hendenan aki cu tabata mi bisiñanan?’ El a bandoná e pais i, despues di hopi dificultad, el a yega cu su famia yong na Estonia.
Durante un bishita na St. Petersburg, Rusia, Artur a topa Testigonan di Jehova i a keda impresioná pa loke el a siña tocante e Reino di Dios. Jehova su boluntad ta pa masha pronto e Reino di Dios lo ta e único gobernacion riba humanidad. (Daniel 2:44) E ora ei e tera lo ta un lugá pacífico, sin ningun guera civil mas of conflictonan internacional. Isaías a profetisá tocante e tempu ei: “Nan lo no haci ningun daño ni causa ningun ruina den tur mi ceru santu; pasobra e tera siguramente lo ser yená cu e conocimentu di Jehova mescos cu e awanan ta cubri laman mes.”—Isaías 11:9.
Ora Artur a mira e pintura artístico dje futuro tera pacífico ei den un buki di studio di Bijbel cu un Testigo a mustr’é, el a remarcá cu un tempu e tabata biba na un lugá cu a parce esei. Sin embargo, awor e tabata ser ruiná dor di guera civil. Awor cu nan ta bek na Estonia, Artur i su famia ta siñando mas tocante e Reino di Dios mediante un studio di Bijbel cu Testigonan di Jehova.
Pas Meimei di Disturbio
Salmo 37:37 ta bisa: “Vigilá esun sin culpa i mantené esun recto na bista, pasobra e futuro di e homber ei lo ta pacífico.” En realidad, e pas di un persona cu ta sin culpa i recto den bista di Dios no ta limitá na su futuro. E ta disfrutá di dje awor aki mes. Con esei ta posibel? Considerá e experencia di un homber yamá Paul.
Paul ta biba den un campo di refugiado remoto den zuidwest Etiopia, aunke en realidad e ta bini di un pais bisiña. Na su pais natal, el a topa un Testigo di Jehova cu tabata traha pa un compania di petroli, i e homber aki a dun’é un buki di studio di Bijbel, E berdad cu ta hiba na bida eterna.a Nunca mas Paul a topa e Testigo, pero el a studia e buki cuidadosamente. Guera civil a obligu’é bai n’e campo di refugiado na Etiopia, i ei el a papia cu otronan tocante loke el a siña. Un grupo chikitu a bin aceptá esaki como e berdad. Basá riba loke nan a siña, pronto nan tabata predicando na otronan den e campamentu.
Paul a skirbi e sede mundial dje Sociedad Watch Tower pidiendo yudansa. Un minister mandá for di Addis Ababa a keda asombrá di haña 35 persona, wardando riba dje, cla pa siña mas tocante e Reino di Dios. Areglonan a ser hací pa duna yudansa riba un base regular.
Di ki manera por bisa cu hende manera Paul ta disfrutá di pas? Nan bida no ta fácil, pero nan tin fe den Dios. Ora nan ser afectá p’e disturbio dje mundu aki, nan ta aplicá e conseho bíblico: “No keda ansioso riba nada, sino den tur cos mediante oracion i súplica huntu cu gradicimentu, duna di conocé boso peticionnan na Dios.” Como resultado nan tin un contentamentu cu ta excepcional awe. E palabranan di apostel Pablo n’e congregacion filipense ta aplicá na nan: “E pas di Dios cu ta surpasá tur pensamentu lo warda boso curason i boso facultad mental pa medio di Cristo Jesus.” En berdad, nan ta sinti un relacion íntimo cu Jehova, “e Dios di pas.”—Filipensenan 4:6, 7, 9.
Un Pas Actual
E Rey entronisá dje Reino di Dios ta Jesucristo, yamá den Bijbel e “Prins di Pas.” (Isaías 9:6) Di dje e profeta di antigwedad a bisa: “E realmente lo papia pas cu e nacionnan; i su gobernacion lo ta di laman pa laman i for di e Riu te na e finnan dje tera.” (Zacarías 9:10) Palabranan inspirá manera esakinan tabatin un efecto profundo riba e bida di un homber yamá José.
Un tempu José tabata den prizon. E tabata un terorista i a ser arestá ora e tabata preparando pa bula un barak di polis. El a pensa cu solamente violencia lo forsa e gobiernu pa mehorá condicionnan den su pais. Miéntras e tabata den prizon, Testigonan di Jehova a cuminsá studia Bijbel cu su esposa.
Despues cu José a sali liber, e tambe a studia Bijbel, i pronto e palabranan di Salmo 85:8 a cuminsá aplicá na dje: “Lo mi tende loke e Dios berdadero Jehova lo papia, pasobra lo e papia pas cu su pueblo i cu su lealnan.” Sin embargo, e versículo ei ta concluí cu un spiertamentu: “Laga nan no bolbe na confiansa den nan mes.” Pues, un persona cu ta busca e pas di Jehova lo no tribi actua independientemente of na oposicion cu Su boluntad.
Awe, José i su esposa ta ministernan cristian. Nan ta dirigí otronan n’e Reino di Jehova como e solucion pa problemanan cu José anteriormente a purba solucioná cu bomnan cu el a traha na cas. Nan ta dispuesto pa confia Bijbel, cu ta bisa: “Jehova, di su parti, lo duna loke ta bon.” (Salmo 85:12) En berdad, José recientemente a bishitá e barak di polis cu e tabata planeá pa destruí. Pakico? Pa papia cu e famianan einan tocante e Reino di Dios.
Hendenan Pacífico
Na Salmo 37:10, 11, Bijbel ta bisa: “Solamente un poco tempu mas, i e malbado lo no t’ei mas; i siguramente lo bo duna atencion na su lugá, i lo e no t’ei. Pero e mansunan mes lo poseé e tera, i nan di berdad lo haña nan deleite exkisito den e abundancia di pas.” Ki un prospecto glorioso!
Sin embargo, ripará cu Jehova su pas ta solamente pa “e mansunan.” Esnan cu ta busca pas lo mester siña ser pacífico. Esaki tabata e caso cu Keith, kende ta biba na Nueva Zelandia. Keith a ser describí como un hende cu “un física i personalidad fuerte, agresivo i discutidor.” E tabata miembro di un ‘gang’ i tabata biba den un cas cu tabata un berdadero forti, cu un curá cu a ser patruyá dor di tres cachó di warda cas pa tene intrusonan pafó. Su esposa, mama di su seis yunan, a divorciá di dje.
Ora Keith a topa e Testigonan di Jehova, e bon nobo tabatin un efecto profundo riba dje. Pronto e i su yunan tabata asistiendo n’e reunionnan cu e Testigonan. El a corta su cabei cu tabata yega te na cintura i a cuminsá papia tocante e Reino di Dios cu su socionan di ántes. Algun di esakinan tambe a cuminsá studia Bijbel.
Mescos cu miyones di hende di curason recto rond mundu, Keith a cuminsá aplicá e palabranan di apostel Pedro: “Esun cu kier stima bida i mira bon dianan, . . . lagu’e apartá for di loke ta malu i haci loke ta bon; lagu’e busca pas i sigui tras di dje.” (1 Pedro 3:10, 11) Keith su ex-esposa a consentí pa bolbe casa cuné, i awor Keith ta siñando pa “busca pas i sigui tras di dje.”
Jehova su pas tabata un salbabida pa hopi hende, incluyendo un ex-atleta cu a nace na ex-Union Soviético. E homber aki a gana medayanan den competencia olímpico, pero el a bira desilusioná i a acudí na droga i alcohol. Despues di 19 aña yen di incidente cu a incluí un sentencia di tres aña den un campo di trabou forsá na Siberia, un biahe pa Cánada scondí riba barcu, i dos biaha casi morto debí na su uso di droga, el a resa na Dios pa yudansa pa haña un berdadero propósito den bida. Un studio di Bijbel cu Testigonan di Jehova di abla ruso a yud’é haña e contesta riba su preguntanan. Awe e homber aki, mescos cu miyones di otronan, a haña pas cu Dios i cu su mes.
E Speransa di Resureccion
Finalmente, laga nos bolbe na Bozo i Hena Djorem na Sarajevo. E pareha aki tabatin un yu muher, Magdalena, di cincu aña di edad. Na juli último, nan tres tabata saliendo cas pa bai traha un biaha mas den nan actividad di predicá ora nan tur a ser matá dor di un proyectil cu a explotá. Kico dje pas cu nan tabata predicá di dje na otronan? E proyectil cu a kita nan bida a mustra cu esaki no tabata un berdadero pas?
Di ningun manera! Den e sistema di cosnan aki, tragedianan ta sosodé. Hende ta ser matá dor di bom of proyectilnan. Otronan ta muri di enfermedad of den accidentenan. Hopi ta muri di behes. Esnan cu ta disfrutá dje pas di Dios no ta inmuno, pero e posibilidad di sucesonan asina no ta laga nan sin speransa.
Jesus a primintí su amiga Marta: “Ami ta e resureccion i e bida. Esun cu ta ehercé fe den mi, aunke e muri, lo e yega na biba.” (Juan 11:25) Famia Djorem a kere esaki, mescos cu tur Testigo di Jehova. I famia Djorem tabatin fe cu si nan mester muri, nan lo ser resucitá riba un tera cu e tempu ei lo ta un lugá berdaderamente pacífico. Jehova Dios lo “seca tur lágrima di nan wowo, i morto lo no existí mas, tampoco lo tin mas lamento ni sclamacion ni dolor. E cosnan anterior a pasa forbij.”—Revelacion 21:4.
Djis promé cu el a muri, Jesus a bisa su siguidornan: “Mi a duna boso mi pas. . . . No laga boso curason keda molestiá.” (Juan 14:27) Nos ta alegrá cu famia Djorem cu tabatin e pas ei i cu siguramente lo disfrutá di dje mas plenamente den e resureccion. Nos ta contentu pa tur esnan cu ta adorá Jehova, e Dios di pas. Esakinan tin pas mental. Nan ta disfrutá di pas cu Dios. Nan ta cultivá pas cu otronan. I nan tin confiansa den un futuro pacífico. Sí, nan a haña pas, aunke nan ta biba den un mundu di disturbio. En berdad, tur cu ta adorá Dios cu spiritu i berdad ta disfrutá di pas. Ta nos deseo pa abo tambe haña e pas ei.
[Nota]
a Publicá dor di Watchtower Bible and Tract Society of New York, Inc.
[Plachi na página 7]
Nan a haña pas apesar di ta biba den un mundu di disturbio