Gososo den un Mundu sin Goso

“A LO peor, esaki tabata e siglo di Satanas,” asina un editorial den The New York Times di 26 di januari, 1995, a cuminsá. “Den ningun época anterior hende a mustra un aptitud i apetit asina grandi pa mata miyones di otro hende pa motibu di rasa, religion of clase.”

E di 50 aniversario dje liberacion di víctimanan inocente encarcelá den e camponan di concentracion nazista den cua hende a ser matá sistemáticamente, a inducí e skirbimentu di editorialnan manera esun mencioná ariba. Sin embargo, e mésun tipo di matamentunan salbahe ainda ta tuma lugá den partinan di Africa i Oost Europa.

Masacre, purificacion étnico, matansanan di tribu—con cu nan ser yamá—ta resultá den gran tristesa. Tog, meimei dje disturbionan violento innecesario ei ta lanta bosnan fuerte di goso. Por laga nos tira un bista na Alemania den añanan ’30.

Pa april di 1935, Hitler i su partido nazista a eliminá Testigonan di Jehova for di tur trabou den gobiernu. Tambe e Testigonan a ser arestá, encarcelá i mandá pa camponan di concentracion debí cu nan a mantené neutralidad cristian. (Juan 17:16) Na cabamentu di augustus di 1936, tabatin arestonan masal di Testigonan di Jehova. Miles di nan a ser mandá pa camponan di concentracion, unda mayoria di nan a permanecé te cu 1945 si nan a sobrebibí. No obstante, con e Testigonan a reaccioná n’e trato inhumano na cua nan a ser sometí den e camponan? Pa sorprendente cu por parce, nan tabata capas pa mantené goso apesar di nan ambiente sin goso.

“Un Baranca den Lodo”

E historiador británico Christine King a entrevistá un señora católico cu tabata den e camponan. “El a usa un frase cu mi no a lubidá nunca,” Dr. King a bisa. “El a papia cu luho di detaye tocante e horor dje bida, e condicionnan repugnante den cua e tabata biba. I el a bisa cu e tabata conocé Testigonan, i e Testigonan ei tabata un baranca den lodo. Un luga firme den tur e sushedad ei. El a bisa cu nan tabata e único hendenan cu no tabata scupi ora e guardianan tabata cana pasa. Nan tabata e único hendenan cu no tabata enfrentá e situacion den e camponan cu odio sino cu amor i speransa i e sintimentu cu tabatin un propósito.”

Kico a pone cu Testigonan di Jehova por a ser ‘barancanan den lodo’? Fe inkebrantabel den Jehova Dios i su Yu, Jesucristo. P’esei, Hitler su esfuersonan pa sofocá nan amor igoso cristian a fracasá.

Scucha segun cu dos sobrebibiente di campo di concentracion ta recordá cincu década despues cu nan a pasa dor dje prueba di fe aki cu éxito. Un di nan ta bisa: “Mi ta brota over cu goso sabiendo cu mi tabatin e privilegio único di proba mi amor i gratitud na Jehova bou dje circunstancianan di mas cruel. Ningun hende a forsá mi haci esaki! Al contrario, esnan cu a purba forsa nos tabata nos enemigunan cu a purba dor di menasanan pa pone nos obedecé Hitler mas cu Dios—pero sin éxito! No solamente mi ta felis awor pero, debí na un bon concenshi, mi tabata felis asta ora mi tabata tras dje murayanan di prizon.”—Maria Hombach, 94 aña di edad.

Un otro Testigo ta declará: “Mi ta reflehá riba mi dianan di encarcelacion cu gratitud i goso. E añanan cu mi a pasa bou di Hitler den prizonnan i camponan di concentracion tabata difícil i yen di prueba. Pero lo mi no tabata kier a perde nan, pasobra nan a siñá mi confia completamente den Jehova.”—Johannes Neubacher, 91 aña di edad.

“Confia completamente den Jehova”—esei tabata e secreto dje goso cu Testigonan di Jehova a experenciá. Pues, nan ta gososo, aunke nan ta rondoná pa un mundu sin goso. Nan goso tabata bisto n’e Congresonan di Districto “Alabadornan Gososo” den e lunanan recien. Laga nos repasá brevemente algun dje reunionnan gososo aki.

[Plachi na página 4]

Maria Hombach