Consuelo i Animacion—Hoyanan di Hopi Faceta
MAYORIA di nos a pasa dor di tempunan cu nos a sinti nos extremamente pober—no necesariamente financieramente pober sino deprimí. Nos tabata desanimá, asta profundamente deprimí. Sin embargo, na momentonan asina nos por wel tabatin den nos alcanse algu precioso cu lo por a yuda nos mashá tantu. E “hoya” ei ta animacion.
Den Bijbel e mésun palabra griego ta ser usa pa “animá” i “consolá.” Ambos palabra ta transmití e sentido di impartí animacion, fortalesa of speransa. Claramente, anto, ora nos ta sinti nos débil of kibrá, consuelo i animacion ta exactamente loke nos mester. Unda nan por ser hañá?
Bijbel ta sigurá nos cu Jehova ta “e Dios di tur consuelo.” (2 Corintionan 1:3) Tambe e ta bisa nos cu “e no ta leu for di cada un di nos.” (Echonan 17:27) Pues consuelo i animacion ta disponibel. Laga nos considerá cuater área general mediante cua Jehova ta percurá animacion.
Mediante un Relacion Personal cu Dios
E mayor fuente di consuelo ta un relacion personal cu Jehova Dios. E solo echo cu un relacion asina ta posibel ta animador. Al fin i al cabo, cua gobernante di mundu lo aceptá nos yamadanan di telefon of lo expresá un interes personal den nos problemanan? Jehova ta infinitamente mas poderoso cu hende asina. Sin embargo, e ta humilde—mas cu dispuesto pa trata cu hende inferior i imperfecto. (Salmo 18:35) Jehova asta a tuma e iniciativa den mustra amor na nos. Promé Juan 4:10 ta bisa: “Amor ta consistí den esaki, no cu nos a stima Dios, sino cu el a stima nos i a manda su Yu como un sacrificio di reconciliacion pa nos picánan.” Ademas, amorosamente Jehova ta atraé nos na su Yu.—Juan 6:44.
Bo a respondé i a busca consuelo den un amistad cu Dios? (Compará cu Santiago 2:23.) Por ehempel, si bo tin un amigu stimá i íntimo, no ta un placer pa dedicá algun tempu so cuné, papiando libremente tocante bo ansiedadnan i preocupacionnan, bo speransanan i gosonan? Jehova ta invitá bo pa haci mescos cuné. E no ta pone límite riba con largu bo por papia cuné den oracion—i e realmente ta scucha. (Salmo 65:2; 1 Tesalonicensenan 5:17) Jesus a haci oracion regularmente i fervientemente. Realmente, promé cu el a scoge su 12 apostelnan, el a pasa henter un anochi haciendo oracion.—Lucas 6:12-16; Hebreonan 5:7.
Periódicamente, nos cada un por logra di ta so cu Jehova. Djis sinta ketu na un bentana of dal un paseo trankil por percurá un bon oportunidad pa habri nos curason den oracion na Jehova. Haciendo esei por ta un fuente di tremendo alivio i consuelo. Si nos tin algun aspecto di Jehova su creacion pa contemplá miéntras nos ta meditando—maske ta un pida di cielu, algun palu of para—nos por haña ei den algun recordatorio consolador di Jehova su amor i interes den nos.—Romanonan 1:20.
Mediante un Studio Personal dje Palabra di Dios
Sin embargo, ta dor di un studio personal di Bijbel cu e cualidadnan di Jehova realmente ta ser manifestá na nos. Bes tras bes Bijbel ta revelá Jehova como “un Dios misericordioso i yen di gracia, tardá pa rabia i abundante den bondad amoroso.” (Exodo 34:6; Nehemías 9:17; Salmo 86:15) E deseo pa consolá su sirbidornan terenal ta un parti fundamental di Jehova su personalidad.
Tuma, por ehempel, Jehova su palabranan na Isaías 66:13: “Manera un homber kende su propio mama ta sigui consolá, asina ami mes lo sigui consolá boso.” Jehova a diseñá e amor di mama pa su yunan como unu leal i di sacrificio propio. Si bo a yega di mira un mama amoroso consolá su yu heridá, bo sa kico Jehova kier men ora e bisa cu lo e consolá su pueblo.
Hopi relato bíblico ta mustra tal consuelo den accion. Ora malbado Reina Jezabel a menasá profeta Elías cu morto, el a perde su curashi i a core pa su bida. E tabata asina desanimá cu el a cana den e desierto pa un biahe di un dia completo, evidentemente sin hiba awa ni provision huntu cuné. Den angustia Elías a bisa Jehova cu e kier a muri. (1 Reynan 19:1-4) Kico Jehova a haci pa consolá i animá su profeta?
Jehova no a reprendé Elías pa a sinti su mes solitario, sin balor i yen di miedu. Al contrario, e profeta a tende “un bos calmu i abou.” (1 Reynan 19:12) Si bo lesa 1 Reynan capitulo 19, lo bo ripará con Jehova a consolá Elías, a calm’é i a edificá su fe. E consuelo aki no tabata superficial. El a yega te n’e curason afligí di Elías, animando e profeta pa sigui padilanti. (Compará cu Isaías 40:1, 2.) Pronto, el a resumí su asignacion.
Jesucristo di igual manera ta consolá i animá su siguidornan leal. En realidad, Isaías a profetisá tocante e Mesías: “Señor Soberano Jehova . . . a mandá mi pa verband esnan di curason kibrá, . . . pa consolá tur esnan cu ta na luto.” (Isaías 61:1-3) Durante su bida, Jesus no a laga duda cu e palabranan aki a aplicá na dje. (Lucas 4:17-21) Si bo ta sinti cu bo tin mester di consuelo, meditá riba Jesus su trato suave i amoroso cu hende cu tabata afligí i den necesidad. En berdad, studio cuidadoso dje Bijbel ta un gran fuente di consuelo i animacion.
Mediante e Congregacion
Den e congregacion cristian, e hoyanan di consuelo i animacion ta lombra den nan hopi facetanan. Apostel Pablo a ser inspirá pa skirbi: “Sigui consolá otro i edificá otro.” (1 Tesalonicensenan 5:11) Con consuelo i animacion por ser hañá na reunionnan di congregacion?
Naturalmente, primeramente nos ta asistí na reunionnan cristian pa por ser “siñá pa Jehova,” pa ricibí instruccion tocante dje i su camindanan. (Juan 6:45) Tal instruccion ta intencioná pa ser animante i consolador. Na Echonan 15:32, nos ta lesa: “Hudas i Sílas... a animá e rumannan cu hopi discurso i a foralecé nan.”
Bo a yega di tin e experencia di a bai un reunion cristian ora bo tabata desanimá i a bini cas sintiendo muchu mas mihó? Tal bes algu cu a ser bisá den un discurso, den un comentario, of den un oracion a toca bo curason i a duna consuelo i animacion necesario. Pues no keda sin bai reunionnan cristian.—Hebreonan 10:24, 25.
Asociando cu nos rumannan den e ministerio i na otro ocasionnan por tin un efecto similar. Na hebreo vários verbo nificando “mara na otro” a yega di referí tambe na “fortalesa” of “fortalecé”—e aparente idea cu cosnan ta bira mas fuerte ora nan ser mará na otro. E principio aki ta cierto den e congregacion. Nos ta ser consolá, animá, sí, fortalecí, dor di asociá cu otro. I nos ta ser mará na otro mediante amor, e laso di mas fuerte.—Colosensenan 3:14.
Tin biaha ta e fieldad di nos rumannan spiritual cu ta animá nos. (1 Tesalonicensenan 3:7, 8) Tin biaha ta e amor cu nan ta mustra. (Filemon 7) I tin biaha ta simplemente trahando huntu, scouder cu scouder, miéntras cu nos ta papia cu otronan tocante e Reino di Dios. Si bo ta sintí bo débil i tin mester di animacion ora ta trata dje ministerio, pakico no haci areglo pa traha cu un publicador di Reino di mas edad of mas experenciá? Probablemente lo bo haña hopi consuelo haciendo esei.—Eclesiástes 4:9-12; Filipensenan 1:27.
Mediante “e Esclabo Fiel i Discreto”
Ken ta organisá e rasgonan consolador di nos adoracion? Jesus a nombra un clase cu el a apuntá como “e esclabo fiel i discreto” pa repartí ‘cuminda spiritual n’e tempu apropiado.’ (Mateo 24:45) Den e promé siglo E.C., e cuerpo aki di cristiannan ungí cu spiritu tabata funcionando caba. E cuerpo gobernante di ancianonan den Jerusalem a manda cartanan di instruccion i guia n’e congregacionnan. Cu ki resultado? Bijbel ta registá con e congregacionnan a reaccioná riba un carta asina: “Despues di a les’é, nan a alegrá riba e animacion.”—Echonan 15:23-31.
Di un manera similar, den e último dianan crítico aki, e esclabo fiel i discreto ta repartiendo cuminda spiritual cu ta duna gran consuelo i animacion na Jehova su pueblo. Bo ta alimentá bo mes cu e cuminda ei? E ta fácilmente disponibel den e literatura imprimí cu e clase di esclabo ta haci disponibel na tur parti dje mundu. E revistanan Toren di Vigilancia i Spierta! i tambe e bukinan, foyetonan i tratadonan cu e Sociedad Watch Tower ta publicá a trece consuelo na un cantidad incontabel di lectornan.
Un superintendente biahero a skirbi: “Mayoria di nos rumannan kier haci loke ta corecto, pero hopi biaha nan ta lucha cu frustracionnan, temornan i e sintimentu cu nan ta impotente pa yuda nan mes. Artículonan den nos revistanan ta yudando hopi persona pa recuperá control riba nan bida i emocionnan. Tambe e artículonan ta duna ancianonan algu mas cu animacion superficial pa ofrecé.”
Haci pleno uso dje literatura for dje clase di esclabo fiel. E revistanan, bukinan i otro publicacionnan oportuno por yuda nos haña consuelo ora tempu ta difícil. N’e otro banda, si bo ta den un posicion pa ofrecé animacion na un persona cu ta deprimí, usa e informacion bíblico den e revistanan aki. E artículonan ta skirbí masha cuidadosamente, hopi biaha despues di hopi siman of luna di investigacion profundo, estudio i oracion. E conseho ta basá riba Bijbel, probá i berdadero. Algun a haña ta masha probechoso pa lesa un of dos artículo apropiado cu un persona cu ta sinti su mes kibrá. Esaki por resultá den hopi consuelo i animacion.
Si bo haña hoyanan precioso, lo bo montoná nan, of lo bo compartí generosamente algu di e rikesa cu otronan? Hacié un meta pa ta un fuente di consuelo i animacion pa bo rumannan den e congregacion. Si bo ta edificá en bes di kibra, encomendá en bes di criticá, papia cu “e lenga di esnan siñá” mas bien cu e ‘hincánan ireflexivo di un spada,’ bo por haci un diferencia den e bida di otronan. (Isaías 50:4; Proverbionan 12:18) En berdad, probablemente bo mes lo ser mirá como un hoya —un fuente di berdadero consuelo i animacion!
[Kuadro na página 20]
Consuelo pa Esnan den Necesidad
HOPI persona a comentá riba con cierto artículonan di Toren di Vigilancia of Spierta! a profundisá nan relacion personal cu Jehova. Un di nan a bisa: “Despues di a lesa e artículo aki, mi a sinti cu Jehova, cu tur su poder i grandesa, tabata ei mes cu mi. Mi a sinti cu e ta un berdadero persona.” Un otro carta a declará: “Nos curason i mente a ser cambiá asina dramáticamente den nos manera di mira Jehova cu nos no ta e mésun personanan mas. Ta como si fuera un hende a limpia nos glasnan di bril, i awor nos por mira tur cos masha cla.”
Algun ta skirbi pa bisa con e revistanan ta yuda nan trata cu problemanan of desafionan specífico, garantisando nan asina di Jehova su interes personal den nan. Un lector a expres’é asina aki: “Masha danki pa un biaha mas a laga nos mira cuantu Jehova ta stima su pueblo i ta interesá den dje.” Un señora na Hapon cu a perde un yu den morto a bisa esaki tocante e artículonan di Spierta! riba e tópico ei: “E profundidad di Dios su misericordia a basha for dje páginanan, i mi a yora i yora i yora. Mi a pone e artículonan aki na un lugá cu mi por lesa nan mesora ki ora cu mi sinti mi tristu i solitario.” Un otro señora na luto a skirbi: “E artículonan dje Toren di Vigilancia i Spierta! i e foyeto “Ora un Persona Stimá Muri” a duná mi e fortalesa cu mi tabatin mester pa soportá mi oranan di tristesa.”
E Scritura Santu ta e fuente principal di consuelo. (Romanonan 15:4) E Toren di Vigilancia ta pega na Bijbel como su autoridad, mescos cu su revista compañé, Spierta! Debí na esaki, e revista nan aki a resultá di ta un consuelo i animacion pa nan lectornan.
[Plachi na página 23]
E Dios di tur consuelo ta tambe e Tendedor di oracion