Wak Mas Ayá dje Cosnan Cu Bo Ta Mira!

UN BON bista físico ta un bendicion. En berdad, mayoria hende lo bisa cu poco cos cu nan ta poseé ta mas precioso cu esei. Sin embargo, pa cristiannan, tin un clase di bista cu apostel Pablo a papia di dje cu ta di mas balor cu asta un bon bista físico. “Nos ta tene nos bista fihá, no riba e cosnan cu ta ser mirá, sino riba e cosnan cu no ta ser mirá,” Pablo a skirbi. (2 Corintionan 4:18) Esei mester ta en berdad un clase di bista masha special cu ta permití un hende mira cosnan cu ta invisibel! Nos lo por yam’é un bista excelente di un clase spiritual.

Pakico Mester di Dje?

Cristiannan dje promé siglo tabata den berdadero necesidad pa tin e clase di bista spiritual aki. Nan tabata hibando a cabo nan ministerio cristian bou di hopi dificultad. Pablo a expres’é asina aki: “Nos ta ser oprimí den tur manera, pero no pertá di tal manera cu nos no por move; nos ta confundí, pero no absolutamente sin salida; nos ta ser persiguí, pero no lagá sin yudansa; nos ta ser tumbá, pero no destruí.”—2 Corintionan 4:8, 9.

Apesar di circunstancianan asina, e fiel disipelnan a para firme. Cu fe fuerte den Dios, nan por a bisa mescos cu Pablo: “Nos no ta entregá, pero, maske e hende cu nos ta di pafó ta bai gastando, siguramente e hende cu nos ta di paden ta bai renobando su mes dia tras dia.” Pero, kico a trece e renobamentu diario aki? Pablo a continuá bisando: “Pasobra aunke e tribulacion ta pa un momento i ta liviano, e ta obra pa nos un gloria cu ta di peso mas i mas excelente i ta eterno; miéntras cu nos ta tene nos bista fihá, no riba e cosnan cu ta ser mirá, sino riba e cosnan cu no ta ser mirá. Pasobra e cosnan cu ta ser mirá ta temporal, pero e cosnan cu no ta ser mirá ta eterno.”—2 Corintionan 4:16-18.

Pablo tabata animando su rumannan spiritual pa no permití problemanan, dificultadnan, persecucionnan—tribulacionnan di sea cual sea e naturalesa—nubla nan bista dje recompensa glorioso cu a ser poní dilanti nan. Nan mester wak mas ayá di nan circunstancianan actual, teniendo nan bista fihá riba e resultado felis dje curso cristian. Esei ta loke a yuda nan renobá riba un base diario nan determinacion di sigui padilanti den e lucha. Di igual manera cristiannan awe tin mester di un bon bista spiritual asina.

Mira Tribulacionnan Actual Como Temporal!

Sea cu nos ta gusta of no, tur dia nos ta mira cosnan cu nos lo a preferá di no mira. Un mirada den e spiel i nos no por evitá di ripará defectonan indeseabel dje curpa físico, indicacionnan di imperfeccion físico. Ora nos fiha den e spiel dje Palabra di Dios, nos ta mira defectonan spiritual, tantu den nos mes como den otronan. (Santiago 1:22-25) I ora nos wak corant of e pantaya di television, un bes relatonan di inhusticia, crueldad i tragedia ta ser trecí na nos atencion i ta causa nos pena.

Satanas lo gusta pa haci nos desesperá pa cosnan cu nos ta mira of pa nos desviá i cuminsá tambaleá den fe. Con nos por prevení esaki di sosodé? Nos mester sigui e ehempel cu Jesucristo a pone, manera apostel Pablo a recomendá ora el a bisa: “Realmente, p’e caminda aki boso a ser yamá, pasobra asta Cristo a sufri pa boso, lagando un modelo pa boso sigui su pasonan cu sumo cuidou i atencion.” (1 Pedro 2:21) Den tur aspecto di bida cristian, Jesus tabata e ehempel perfecto.

Señalando na Jesus como nos modelo, Pedro a mencioná particularmente cu Jesus a sufri. En berdad, Jesus a sufri masha hopi ora e tabata riba tera. Como Jehova su “obrero maestro” presente ora hende a ser creá, e tabata sa exactamente con Dios tabata kier pa hende ta. (Proverbionan 8:30, 31) Pero awor el a mira djacerca loke picá i imperfeccion a haci nan bira. Diariamente el a mira i tabatin cu trata cu imperfeccionnan i debilidadnan di hende. Esei mester tabata un prueba p’e.—Mateo 9:36; Marco 6:34.

Ademas dje tribulacionnan di otronan, tambe Jesus a mira esnan di dje mes. (Hebreonan 5:7, 8) Pero cu un bista spiritual perfecto, el a wak mas ayá di nan pa mira e recompensa di ser elevá na bida inmortal pa su curso di integridad. E ora ei como Rey Mesiánico, lo e tin e privilegio di elevá humanidad afligí for dje condicion degradá bek na e perfeccion cu Jehova tabatin como propósito originalmente. Teniendo su bista enfocá riba e futuro prospectonan invisibel aki a yud’é mantené goso den sirbishi piadoso apesar di tribulacionnan cu el a mira dia den dia afó. Pablo a skirbi mas despues: “P’e goso cu tabata poní su dilanti el a wanta un staca di tormento, despreciando bergwensa, i a sinta na man drechi dje trono di Dios.”—Hebreonan 12:2.

Nunca Jesus a permití e dificultadnan i circunstancianan di prueba hacié desesperá, desviá of tambaleá den su fe. Como su disipelnan, nos mester sigui su ehempel destacá cu sumo cuidou i atencion.—Mateo 16:24.

Enfocá Riba Cosnan Eterno Invisibel!

Papiando di loke a capacitá Jesus pa wanta, Pablo a señalá tambe n’e curso pa nos ora el a skirbi: “Laga nos core cu awante e careda cu ta poní dilanti nos, mirando atentamente n’e Agente Principal i Perfeccionador di nos fe, Jesus.” (Hebreonan 12:1, 2) Sí, pa core e careda cristian exitosamente i gososamente, nos mester wak mas ayá dje cosnan cu ta net dilanti nos. Pero con nos ta ‘mira atentamente’ na Jesus, i cu kico esei lo yuda nos?

Pa cuminsá, na 1914, Jesus a ser instalá como Rey dje Reino di Dios, i ta gobernando for di cielu. Tur esaki, naturalmente, ta invisibel pa nos wowo físico. Pero, si nos ‘mira atentamente’ na Jesus, nos bista spiritual lo yuda nos mira cu awor e ta cla pa tuma accion pa trece e fin di e actual sistema malbado di cosnan i benta Satanas i su compinchinan demoniaco den cadenanan di inactividad. Mirando asta mas leu, nos vision spiritual lo revelá e maraviyoso mundu nobo den cua “morto lo no t’ei mas, tampoco lo tin mas lamento ni sclamacion ni dolor. E cosnan anterior a pasa caba.”—Revelacion 19:11-16; 20:1-3; 21:4.

Pues, anto, en bes di bira cargá cu e tribulacionnan temporal cu nos lo por tin cu enfrentá tur dia, pakico no enfocá nos bista riba e cosnan cu ta eterno? Cu wowonan di fe, pakico no wak mas ayá di e malesa i e golosidad riba e tera contaminá aki pa mira un paradijs yená cu hende sano, felis i amoroso? Pakico no wak mas ayá di nos defectonan, tantu físico como spiritual i mira nos mes librá di nan pa semper gracias na Cristo su sacrificio di rescate? Pakico no wak mas ayá dje matansa cu guera, crímen i violencia ta laga atras i mira esnan recien resucitá ser instruí den e pas i husticia di Jehova?

Ademas, ‘mira atentamente’ na Jesus mester encerá tambe enfocá nos bista spiritual riba loke e Reino, aunke invisibel, a logra caba entre e pueblo di Dios riba tera: unidad, pas, amor, cariño fraternal i prosperidad spiritual. Un muher cristian na Alemania, despues di a mira e video United by Divine Teaching [Uní dor di Siñansa Divino] a skirbi: “E video lo yudá mi pa cada bes mas mi mantené mi mente riba e echo cu asina tantu rumannan cristian rond mundu ta sirbiendo Jehova lealmente n’e momentonan aki mes—i haciendo esaki apesar di oposicion di hende. Ki precioso nos unidad fraternal den un mundu di violencia i odio ta!”

Bo tambe ta “mira” Jehova, Jesus, e angelnan fiel i miyones di compañeronan cristian parando na bo banda? Si ta asina, lo bo no bira demasiado preocupá cu “e ansiedad dje sistema di cosnan aki” cu lo por poné bo tranca pa via di desanimacion i poné bo bira “infructífero” den e sirbishi cristian. (Mateo 13:22) Pues ‘mira atentamente’ na Jesus dor di enfocá bo wowonan spiritual riba e Reino di Dios establecí i su bendicionnan, tantu actual como den futuro.

Biba pa Mira Loke Awor Ta Invisibel!

Mirando e contraste skerpi entre e mundu nobo eterno di Dios i e mundu bieu djawe cu ta cayendo den otro, nos mester ser impulsá pa comportá nos mes di tal manera cu nos lo ser contá digno di biba pa mira literalmente e cosnan cu nos por mira awe solamente cu wowonan di fe. Multitudnan di esnan resucitá apénas lo kere nan wowo ora nan lanta pa mira un hustu tera paradísico asina diferente for dje mundu cu nan a mira promé cu nan a muri. Imaginá bo nos goso di ta na bida pa saludá nan i pa splica nan loke Dios a haci!—Compará cu Joël 2:21-27.

Sí, ki precioso ta un bon bista spiritual, i ki vital ta pa ten’é skerpi! Nos por haci esaki dor di regularmente ocupá nos mes den studio personal di Bijbel, asistí na reunionnan cristian, papia cu otronan tocante nos speransa basá riba Bijbel, i riba tur cos, haci oracion pa guia divino. Esaki lo mantené nos vision spiritual skerpi i bon definí, haciendo posibel pa nos wak mas ayá dje cosnan cu nos ta mira!