Bo Por Disfrutá di Amistad Duradero
TIN bareranan cu ta stroba amistad. En realidad, Bijbel a profetisá cu den e “último dianan” aki lo tin un falta di amor, cariño natural i lealtad. (2 Timoteo 3:1-5; Mateo 24:12) E condicionnan aki a trece cu nan un plaga sin precedente di soledad. Un persona a bisa: “Den mi becindario ta manera e arca di Noe. Si bo no ta un pareha casá, bo no por drenta.” No por tira tur e falta pa esaki riba cada individuo solitario. Den algun parti di mundu, problemanan relacioná cu amistad duradero ta incluí cosnan manera hende mudando mas frecuentemente, famianan kibrando for di otro, stadnan impersonal i peligroso, i un menguamentu notabel den tempu liber.
Un habitante di un stad di tempu moderno por bin den contacto cu mas hende den un siman cu un habitante di un pueblo di siglo 18 a mira den un aña of asta den henter su bida! Sin embargo, relacionnan awe hopi bes ta superficial. Hopi hende ta enbolbé nan mes totalmente den intentonan constante pa socialisá cu otro hende i pa pasa bon. Sin embargo, nos mester admití cu diberticion bano cu compañeronan mal scogé ta manera usa sumpiña pa combustibel. Eclesiástes 7:5, 6 ta bisa: “Ta mihó pa tende e reprendementu di un persona sabí cu pa ta e hende cu ta tende e cantica di esnan stúpido. Pues mescos cu e zonido di sumpiña bou di e wea, asina ta e harimentu di esun estúpido; i esaki tambe ta banidad.” Sumpiña brevemente ta haci un candela briyante i cu hopi boroto, pero e candela no tin suficiente substancia pa tene nos cayente. Di igual manera, compañeronan bochinchero i haridó tal bes ta distraí nos pa un ratu, pero nan lo no eliminá tur soledad i satisfacé nos necesidad di tin berdadero amigunan.
Ser bo so ta distinto for di soledad. Tin biaha ta necesario pa nos ta so pa refrescá nos mes i asina tin mas pa ofrecé como amigu. Hopi hende ora nan enfrentá soledad, inmediatamente ta acudí na un of otro forma di entretenimentu electrónico. Un investigacion a mustra cu un dje reaccionnan mas comun na soledad ta wak television. Sin embargo, e investigadornan a concluí cu wakmentu di television pa un periodo largu ta un dje pió cosnan cu nos por haci ora nos ta sinti nos solitario. E ta promové pasividad, fastidia i fantasia, birando un mal substituto pa relacionnan personal cu otro hende.
En realidad, ser so por ta masha balioso si nos usa nos tempu ora nos ta so constructivamente. Nos por haci esaki dor di lesa, skirbi carta, traha cosnan i sosegá. Soledad constructivo ta incluí haci oracion na Dios, studia e Bijbel i meditá riba dje. (Salmo 63:6) Esakinan ta maneranan pa hala mas cerca di Jehova Dios, esun cu por ta nos Amigu di mas importante.
Ehempelnan Bíblico di Amistad
Aunke ta bon pa ser amigabel cu hopi hende, Bijbel ta recordá nos cu “ta existí un amigu cu ta mas pegá cu un ruman.” (Proverbionan 18:24) Nos tur tin mester di un par di amigu íntimo kendenan berdaderamente ta interesá den nos, kendenan su amistad ta duna nos goso, fortalesa i pas. Aunke tal amistad berdadero por ta raro awendia, algun ehempel di antigwedad ta ser mencioná specialmente den Bijbel. Por ehempel, tabatin e amistad sobresaliente entre David i Jonatan. Kico nos por siña for di dje? Pakico nan amistad a dura?
Pa cuminsá, David i Jonatan tabatin interesnan importante en comun. Mas cu tur cos, nan a compartí un debocion profundo pa Jehova Dios. Ora el a ripará David su fe den Dios i su accionnan na defensa di e pueblo di Jehova, “Jonatan su alma mes a bira mará na e alma di David, i Jonatan a cuminsá stim’é manera su propio alma.” (1 Samuel 18:1) Pues, amor mutuo pa Dios ta yuda mara amigunan un na otro.
Jonatan i David tabata individuonan fuerte cu a biba segun principionan piadoso. P’esei nan un por a respetá e otro. (1 Samuel 19:1-7; 20:9-14; 24:6) En berdad nos ta bendicioná si nos tin amigunan piadoso cu ta ser dirigí dor di principionan bíblico.
Otro factornan a contribuí na e amistad di David i Jonatan. Nan relacion tabata onesto i franco, i cada un a depositá su confiansa den e otro. Jonatan lealmente a pone e interesnan di David promé cu esnan di dje mes. E no tabata yalurs debí cu David a ser primintí e reinado; mas bien, Jonatan a apoy’é emocionalmente i spiritualmente. I David a aceptá su yudansa. (1 Samuel 23:16-18) Den maneranan bíblicamente apropiado, David i Jonatan a revelá nan sintimentunan di amistad un pa otro. Nan amistad piadoso tabata basá riba berdadero aprecio i cariño. (1 Samuel 20:41; 2 Samuel 1:26) Nan amistad tabata inkebrantabel debí cu tur dos homber a permanecé fiel na Dios. Poniendo tal principionan na práctico por yuda nos edificá i mantené berdadero amistad.
Con pa Cultivá Amistad
Bo ta buscando berdadero amigunan? Tal bes bo no tin cu busca masha leu. Algun hende entre esnan cu bo ta asociá cuné regularmente por ta bo amigunan, i tal bes nan tin mester di bo amistad. Specialmente relacioná cu compañeronan cristian, ta sabí pa aplicá e conseho di apostel Pablo pa ‘hancha nos mes.’ (2 Corintionan 6:11-13) Sin embargo, no wori si tur esfuerso pa cera amistad no ta resultá den un laso profundo. Generalmente ta tuma tempu pa desaroyá un amistad, i no ta tur relacion lo ta mésun profundo. (Eclesiástes 11:1, 2, 6) Naturalmente, pa disfrutá di berdadero amistad, nos mester ta inegoista, i nos tin cu sigui e conseho di Jesus: “P’esei, tur loke boso kier pa hende haci na boso, boso tambe di igual manera tin cu haci na nan.”—Mateo 7:12.
Ken tin mester di bo amistad? Ademas di esnan di bo mes edad, ki tal di esnan mas hóben of hende di mas edad? E amistadnan di David cu Jonatan, Rut cu Noemí, i Pablo cu Timoteo tur a enbolbé un diferencia den edad. (Rut 1:16, 17; 1 Corintionan 4:17) Bo por extendé bo amistad na biudanan i otro persona no-casá? Pensa, tambe, riba esnan cu ta nobo den bo becindario. Tal bes nan a perde e asociacion di mayoria of tur nan amigunan dor di muda of dor di cambia nan estilo di bida. No spera pa otro hende busca bo amistad. Si bo ta un cristian, forma amistadnan duradero dor di aplicá Pablo su conseho: “Den amor fraternal tene tierno cariño un pa otro. Hiba delantera mustrando onor un pa otro.”—Romanonan 12:10.
Nos por considerá amistad como un forma di dunamentu. Jesus a bisa cu si nos practicá dunamentu, hende lo duna na nos. Tambe el a indicá cu tin mas felicidad den duna cu tin den ricibí. (Lucas 6:38; Echonan 20:35) Bo a topa hende di vários antecedente? E congresonan internacional di Testigonan di Jehova a duna prueba cu hende di vários cultura por forma amistadnan berdadero i duradero ora nan tin e adoracion di Dios en comun.
Manteniendo Amistadnan Intacto
Lamentablemente, hende considerá di ta amigu di otro tin biaha ta causa otro dolor. Redu perhudicial, un confiansa traicioná, falta di aprecio—esakinan ta entre e cosnan cu ta masha doloroso ora nan ta originá cu un persona cu bo a considerá di ta un amigu berdadero. Kico por haci den situacionnan asina?
Pone un bon ehempel. Haci tur cos cu bo por pa evitá di causa dolor innecesario. Den algun lugá ta popular pa amigunan ridiculisá e faltanan di otro. Pero trato severo of tramposo lo no hala amigunan mas cerca di otro, asta si nan supuestamente ta “pasando pret.”—Proverbionan 26:18, 19.
Haci esfuerso pa mantené amistadnan. Malcomprendimentu tin biaha ta presentá ora amigunan ta spera demasiado for di otro. Un amigu cu ta malu of ta preocupá debí na un problema grave probablemente lo no por mustra e mésun calor di amistad cu normal. Na ocasionnan asina, anto, purba di ta comprensivo i apoyador.
Resolvé problemanan rápidamente i bondadosamente. Haci esei den privá si ta posibel. (Mateo 5:23, 24; 18:15) Haci sigur cu bo amigu sa cu bo kier mantené un bon relacion. Amigunan sincero ta pordoná otro. (Colosensenan 3:13) Lo bo ta e clase di amigu ei—un cu ta mas pegá cu un ruman?
Lesando i pensando tocante amistad ta solamente un comienso. Si nos ta experenciando soledad, laga nos tuma accion apropiado, i nos lo no ta solitario pa hopi tempu. Si nos haci esfuerso, nos por haña berdadero amigunan. Cu algun di nan, nos lo forma un laso special. Pero ningun persona por tuma e lugá di Dios, e Amigu di mas importante. Solamente Jehova por conocé, comprendé i apoyá nos completamente. (Salmo 139:1-4, 23, 24) Ademas, su Palabra ta ofrecé un maraviyoso speransa pa e futuro—un mundu nobo caminda lo ta posibel pa tin berdadero amigunan pa semper.—2 Pedro 3:13.
[Plachi na página 5]
David i Jonatan a disfrutá di berdadero amistad, i nos tambe por