Celebra e Memorial Dignamente

TABATA riba e anochi di 14 di nísan, aña 33 E.C., cu Jesus a instituí e Memorial.a El a caba di observá e celebracion dje Pascu hudiu huntu cu su 12 apostelnan, pues nos por ta sigur dje fecha. Despues di manda Hudas, e traidor, bai, Jesus “a tuma un pan, a pronunciá un bendicion, a kibr’é i a dun’é na nan, i a bisa: ‘Tum’é, esaki ta nificá mi curpa.’ I tumando un copa, el a duna gradicimentu i a dun’é na nan, i nan tur a bebe di dje. I el a bisa nan: ‘Esaki ta nificá mi “sanger dje pacto,” cu lo ser dramá na fabor di hopi.’”—Marco 14:22-24.

Jesus a manda su disipelnan conmemorá su morto debí na su importancia. (Lucas 22:19; 1 Corintionan 11:23-26) Su sacrificio tabata e único cu lo por a libra humanidad for dje maldicion di picá i morto heredá. (Romanonan 5:12; 6:23) E pan i e biña cu el a usa tabata símbolonan di su curpa perfecto i di su sanger. Sabiendo e fecha original cu Jesus a instituí e Memorial, nos por celebrá e ocasion riba e dia corespondiente tur aña, mescos cu tabata ser hací cu e Pascu hudiu. Pero nos mester haci esei dignamente. Pakico?

Apostel Pablo a bisa cu esnan cu ta tumando dje emblemanan di pan i biña lo a “sigui proclamá e morto di Señor, te ora e yega.” (1 Corintionan 11:26) E enfoke dje celebracion lo tabata anto riba e morto di Jesus i su nificacion pa humanidad. E ocasion lo tabata serio, un tempu pa refleccioná riba e bondad di Dios i riba e aprecio cu nos lo mester tin pa Jehova i su Yu. (Romanonan 5:8; Tito 2:14; 1 Juan 4:9, 10) P’esei, Pablo a spierta: “Consecuentemente, ken cu come e pan of bebe e copa di Señor indignamente lo ta culpabel respecto e curpa i e sanger di Señor.”—1 Corintionan 11:27.

Dignamente—Con?

Claramente, Dios lo no keda contentu si nos profaná e ocasion dor di participá den prácticanan cuestionabel of dor di adoptá custumbernan pagano. (Santiago 1:27; 4:3, 4) Esaki lo excluí e eventonan popular dje temporada di Pascu di Resureccion. Siguiendo e instruccion di Jesus pa “sigui haci esaki na [su] recuerdo,” nos lo kier observá e Memorial precis manera el a instituy’é. (Lucas 22:19; 1 Corintionan 11:24, 25) Esaki lo excluí e adornonan cu e iglesianan di cristiandad a agregá na e celebracion. New Catholic Encyclopedia ta admití cu “e sacrificio di misa djawe ta diferenciá mashá for dje ceremonia masha simpel cu Cristo i Su Apostelnan a sigui.” I dor di celebrá e sacrificio di misa frecuentemente, asta diariamente, cristiandad a desviá for di loke Jesus su intencion tabata i a hacié un evento comun.

Pablo a skirbi e cristiannan corintio tocante tumando dje emblemanan indignamente debí cu un problema a lanta den e congregacion relacioná cu e Cena di Señor. Algun cristian no a respetá su santidad. Nan a trece nan cena huntu cu nan i a come esei promé of durante e reunion. Hopi bes nan a come i a bebe di mas. Esaki a haci nan zonzá i a dof nan sintínan. Dor di no ta mentalmente i spiritualmente alerto, nan no por a “dicerní e curpa” i pues a bira “culpabel respecto e curpa i e sanger di Señor.” Miéntras tantu, esnan cu no a cena tabatin hamber i tambe a ser distraí. Casi ningun di nan tabata den condicion pa tuma dje emblemanan cu aprecio i pleno realisacion dje seriedad dje ocasion—cu e celebracion tabata na memoria di e morto di Señor. Esaki a resultá den un huicio contra nan, pasobra nan tabata demostrando falta di respet, asta desprecio, p’e ocasion.—1 Corintionan 11:27-34.

Dicernimentu Ta Necesario

Algun hende a tuma dje emblemanan di Memorial aunke, despues, nan a realisá cu nan no mester a haci esei. Esnan cu legítimamente ta tuma dje emblemanan di Memorial a ser scogé dor di Dios i tin e testimonio dje spiritu di Dios pa cu esei. (Romanonan 8:15-17; 2 Corintionan 1:21, 22) No ta nan decision of determinacion personal cu ta haci nan digno. Dios a limitá e cantidad di esnan cu lo goberná cu Cristo den shelu na 144.000, un cantidad relativamente chikitu compará cu tur esnan cu ta beneficiá dje rescate di Cristo. (Revelacion 14:1, 3) E scogementu a cuminsá den tempu di Jesus, pues consecuentemente awe ta solamente un par di participante tin. I segun cu morto ta alcansá nan, e cantidad ei lo mester mengua.

Pakico un persona eróneamente por tuma dje emblemanan? Esei por ta debí na puntonan di bista religioso di ántes—cu tur hende fiel ta bai shelu. Of esei por ta debí na ambicion of egoismo—un sintimentu cu bo ta mas merecedor cu otronan—i un deseo pa prominencia. Kisas esei ta e resultado di emocionnan fuerte cu ta resultá di problemanan severo of un tragedia cu ta pone un persona perde interes den bida riba tera. Tambe esei por ta debí na un amistad íntimo cu un persona cu tin e yamamentu celestial. Nos tur tin cu corda cu e decision ta solamente di Dios, no di nos. (Romanonan 9:16) Pues si un persona, “despues di scudriñamentu,” ta haña cu realmente e no mester ta tumando dje emblemanan, e mester keda sin hacié awor.—1 Corintionan 11:28.

E speransa cu Dios a pone dilanti mayor parti di humanidad ta esun di bida eterno riba un tera paradísico. Esei ta un gran bendicion pa spera cu anhelo, i un bendicion cu nos fácilmente por sinti nos atraí na dje. (Génesis 1:28; Salmo 37:9, 11) Ta riba tera cu esnan fiel lo ser uní atrobe cu nan stimánan resucitá i lo topa e personanan hustu di antigwedad, manera Abraham, Sara, Moises, Rahab, David i Juan Bautista—cuanan tur a muri promé cu Jesus a habri e caminda pa bida celestial.—Mateo 11:11; compará cu 1 Corintionan 15:20-23.

Esnan cu speransa terenal ta celebrá e Cena di Señor dignamente dor di ta presente i presta atencion respetuoso, maske nan no ta tuma dje pan i biña. Nan tambe ta beneficiá di Cristo su sacrificio, cua ta haci posibel pa nan tin un posicion faborabel dilanti Dios. (Revelacion 7:14, 15) Segun cu nan ta scucha na e discurso cu ta ser duná, nan aprecio pa cosnan sagrado ta ser fortalecé, i nan deseo pa permanecé den unidad cu e pueblo di Dios tur caminda ta crece.

E aña aki, despues cu solo baha riba diamars, 2 di april, e Memorial lo ser celebrá den tur dje mas cu 78.000 congregacionnan di Testigonan di Jehova mundialmente. Lo bo ta presente?

[Nota]

[Plachi na página 8]

Testigonan di Jehova ta celebrá e Memorial un biaha tur aña