Dedica Bo Mes na Lesamentu
“Miéntras mi ta yegando, sigui aplicá bo mes na lesamentu público, na exhortacion, na siñamentu.”—1 TIMOTEO 4:13.
1. Con nos por saca beneficio for di lesamentu di Bijbel?
JEHOVA DIOS a duna humanidad e abilidad maraviyoso di siña lesa i skirbi. Tambe el a percurá su Palabra, e Bijbel, di manera cu nos por ser bon instruí. (Isaías 30:20, 21) Na moda di papia, su páginanan ta permití nos “cana” cu patriarcanan temeroso di Dios manera Abraham, Isaac i Jacob. Nos por “mira” muhernan piadoso manera Sara, Rebeca i e moabita leal Rut. Sí, i nos por “tende” Jesucristo duna su Sermon Riba Ceru. Nos por haña tur e deleite i instruccion magnífico aki for dje Scritura Santu si nos ta bon lesador.
2. Kico ta indicá cu Jesus i su apostelnan por a lesa bon?
2 Indudablemente, e homber perfecto Jesucristo tabatin un excelente abilidad di lesa, i e siguramente tabata conocé e Scritura Hebreo masha bon. P’esei, ora e Diabel a tent’é, Jesus bes tras bes a referí na dje i a bisa, “Ta pará skirbí.” (Mateo 4:4, 7, 10) Na un ocasion n’e snoa den Nazaret, el a lesa públicamente i a aplicá na su mes un porcion dje profecia di Isaías. (Lucas 4:16-21) Kico di Jesus su apostelnan? Den nan skirbimentunan, hopi biaha nan a cita e Scritura Hebreo. Aunke e gobernantenan hudiu a considerá Pedro i Juan como hende no-educá i ordinario debí cu nan no tabata educá den e scolnan hebreo di ley dje fariseonan, nan cartanan inspirá dor di Dios ta proba claramente cu nan por a lesa i skirbi bon. (Echonan 4:13) Pero e abilidad di lesa ta realmente importante?
“Felis Ta Esun cu Ta Lesa na Bos Haltu”
3. Pakico ta asina importante pa lesa e Scritura i publicacionnan cristian?
3 Ganando i aplicando conocimentu exacto dje Scritura por resultá den bida eterno. (Juan 17:3) P’esei Testigonan di Jehova ta realisá cu ta vitalmente importante pa lesa i studia e Scritura Santu i e publicacionnan cristian cu Dios ta percurá mediante e clase di esclabo fiel i discreto di cristiannan ungí. (Mateo 24:45-47) En realidad, usando publicacionnan di Watch Tower specialmente diseñá, miles di hende a siña lesa i dje manera ei ta adkerí conocimentu dunador di bida dje Palabra di Dios.
4. (a) Pakico lesa, studia i aplicá e Palabra di Dios ta hiba na felicidad? (b) Relacioná cu lesamentu, kico Pablo a bisa Timoteo?
4 Lesa, studia i aplicá e Palabra di Dios ta hiba na felicidad. Esaki ta asina pasobra haciendo esei nos ta agradá i onra Dios, ta ricibí su bendicion i ta experenciá goso. Jehova kier pa su sirbidornan ta felis. P’esei, el a manda sacerdotenan lesa su Ley p’e pueblo di Israel di antigwedad. (Deuteronomio 31:9-12) Ora Esdras, e copista, i otronan a lesa e Ley na henter e pueblo cu a bini huntu den Jerusalem, su nificacion a ser clarificá, i e resultado tabata “un gran alegria.” (Nehemías 8:6-8, 12) Apostel cristian Pablo mas despues a bisa su co-trahador Timoteo: “Miéntras mi ta yegando, sigui aplicá bo mes na lesamentu público, na dunamentu di conseho, na siñamentu.” (1 Timoteo 4:13) Un otro traduccion ta bisa: “Dedicá bo mes n’e lesamentu público di Scritura.”—New International Version.
5. Con Revelacion 1:3 ta conectá felicidad cu lesamentu?
5 Cu nos felicidad ta dependé riba lesa i aplicá e Palabra di Dios ta evidente na Revelacion 1:3. Ei nos ta ser bisá: “Felis ta esun cu ta lesa na bos haltu i esnan cu ta tende e palabranan dje profecia aki, i cu ta warda e cosnan skirbí den dje; pasobra e tempu señalá ta cerca.” Sí, nos tin cu lesa na bos haltu i tende e palabranan profético di Dios den Revelacion i atrabes dje Scritura. E persona berdaderamente felis ta esun kende su “deleite ta den e ley di Jehova, i den su ley e ta lesa den un tono abou di dia i anochi.” E resultado? “Tur loke e haci lo tin éxito.” (Salmo 1:1-3) P’esei, Jehova su organisacion tin bon motibu pa urgi nos cada un pa lesa i studia su Palabra individualmente, como famia i cu rumannan.
Pensa Activamente i Meditá
6. Kico Hosué a ser instruí pa lesa, i di ki manera esaki tabata beneficioso?
6 Con bo por saca e máximo probecho di bo lesamentu dje Palabra di Dios i dje publicacionnan cristian? Probablemente lo bo haña ta beneficioso pa haci loke Hosué, un homber temeroso di Dios i un lider di Israel di antigwedad, a haci. El a ser mandá: “E buki aki dje ley no mag apartá for di bo boca, i bo mester lesa den dje den un tono abou di dia i anochi, pa bo por percurá di haci conforme cu tur loke ta skirbí den dje; pasobra e ora ei lo bo haci bo caminda exitoso i e ora ei lo bo actua sabiamente.” (Hosué 1:8) ‘Lesa den un tono abou’ ta nificá bisa e palabranan na bo mes den un bos abou. Esaki ta un yudansa pa memoria, pasobra e ta graba e material den e mente. Hosué mester a lesa den e Ley di Dios “di dia i anochi,” of regularmente. Esei tabata e manera pa ta exitoso i pa actua sabiamente cumpliendo cu e responsabilidadnan cu Dios a dun’é. Tal lesamentu regular dje Palabra di Dios por yudá bo den un manera similar.
7. Pakico nos no mester concentrá riba velocidad ora nos ta lesa e Palabra di Dios?
7 No concentrá riba velocidad ora di lesa e Palabra di Dios. Si bo a planea pa dedicá un periodo di tempu pa lesa Bijbel of algun publicacion cristian, kisas lo bo kier tuma bo tempu pa lesa. Esaki ta particularmente importante ora bo ta studiando cu e meta di corda puntonan importante. I ora bo ta lesa, pensa activamente. Analisá e declaracionnan dje escritor di Bijbel. Puntra bo mes, ‘Kico ta e propósito dje escritor? Con mi por aplicá e informacion aki?’
8. Pakico ta beneficioso pa meditá ora nos ta lesa e Scritura?
8 Tuma tempu pa meditá segun cu bo ta lesa e Scritura Santu. Esaki lo yudá bo recordá relatonan bíblico i aplicá principionan bíblico. Meditando riba e Palabra di Dios i fihando asina puntonan den bo mente, lo permití bo tambe papia di curason, dunando contestanan excelente na esnan sincero cu ta haci pregunta en bes di bisa algu cu despues por duel bo. Un proverbio inspirá dor di Dios ta bisa: “E curason dje hustu ta meditá pa contestá.”—Proverbionan 15:28.
Asociá Puntonan Nobo cu Esnan cu Bo Sa Caba
9, 10. Con bo lesamentu di Bijbel por ser mehorá dor di asociá puntonan bíblico nobo cu esnan cu bo sa caba?
9 Mayoria cristian mester admití cu na un tempu nan tabata sa masha poco tocante Dios, su Palabra i su propósitonan. Sin embargo, awe e ministernan cristian aki, cuminsando for di e creacion i hende su caida den picá, por splica e propósito dje sacrificio di Cristo, por papia dje destruccion dje mal sistema di cosnan aki, i por mustra con humanidad obediente lo ser bendicioná cu bida eterno den un paradijs riba tera. Esaki ta posibel principalmente pasobra e sirbidornan di Jehova aki a gana “e conocimentu mes di Dios” dor di studia Bijbel i publicacionnan cristian. (Proverbionan 2:1-5) Gradualmente nan a asociá puntonan nobo cu nan a siña cu esnan cu nan tabata comprendé caba.
10 Ta beneficioso i recompensador pa asociá puntonan bíblico nobo cu esnan cu bo conocé caba. (Isaías 48:17) Ora leynan i principionan bíblico, of asta ideanan un tiki abstracto ta ser presentá, asociá esakinan cu loke ya bo sa caba. Armonisá e informacion cu loke bo a siña tocante “e patronchi di palabranan saludabel.” (2 Timoteo 1:13) Busca informacion cu por yudá bo fortalecé bo relacion cu Dios, cu por mehorá bo personalidad cristian, of cu por yudá bo compartí e berdadnan bíblico cu otronan.
11. Kico lo bo por haci ora bo lesa algu cu Bijbel ta bisa tocante conducta? Ilustrá.
11 Ora bo ta lesando algu cu Bijbel ta bisa tocante conducta, purba dicerní e principio enbolbí. Meditá riba dje, i dicidí loke lo bo haci bou di circunstancianan similar. Jacob su yu Josef consistentemente a nenga di enbolbé su mes den inmoralidad sexual cu e esposa di Pótifar, puntrando: “Con mi por cometé e gran maldad aki i realmente peca contra Dios?” (Génesis 39:7-9) Den e relato conmovedor aki, bo ta haña un principio fundamental—inmoralidad sexual ta un picá contra Dios. Bo por asociá e principio aki mentalmente cu otro declaracionnan den e Palabra di Dios, i lo bo saca probecho for dje conocimentu aki si bo ser tentá pa participá den tal malecho.—1 Corintionan 6:9-11.
Visualisá Incidentenan Bíblico
12. Pakico visualisá relatonan bíblico segun cu bo ta lesa nan?
12 Pa graba puntonan den bo mente segun cu bo ta lesa, visualisá loke ta sosodiendo. Mira mentalmente e tereno, e casnan, e hendenan. Tende nan bosnan. Sinti e holó dje pan cu ta hornando. Rebibá e esenanan. E ora ei bo lesamentu lo ta un experencia conmovedor, pasobra bo por mira un stad antiguo, subi un ceru haltu, admirá e maraviyanan di creacion, of asociá cu hende homber i muher di gran fe.
13. Con lo bo describí loke ta ser registrá na Huesnan 7:19-22?
13 Suponé cu bo ta lesando Huesnan 7:19-22. Visualisá loke ta tumando lugá. Hues Gideon i treshen homber israelita balente a tuma nan lugá na rand dje campamentu madianita. Ta rond di dies’or di anochi, e cuminsamentu dje “warda di mei’anochi.” E guardianan madianita a caba di subi nan warda, i scuridad ta cubri e campamentu dje enemigunan di Israel na soño. Mira! Gideon i su hombernan ta ekipá cu cachunan. Nan tin poron grandi di awa cu ta tapa e flambeunan cu nan ta tene cu nan man robes. Di ripiente, e tres gruponan di shen homber cada un ta supla e cachunan, ta kibra e poronnan, ta hisa e flambeunan na haltu, i ta grita: “E spada di Jehova i di Gideon!” Bo ta wak e campamentu. Figurá bo, e madianitanan ta sali na careda i ta cuminsá grita! Segun cu e treshen hombernan ta sigui supla nan cachunan, Dios ta pone e madianitanan mata otro cu spada. Madian a hañ’é ta hui, i Jehova a duna Israel e victoria.
Siñando Lesnan Balioso
14. Con Huesnan capítulo 9 por ser usá pa siña un yu e necesidad pa ser humilde?
14 Dor di lesa e Palabra di Dios, nos por siña hopi les. Por ehempel, tal bes bo kier inculcá den bo yunan e necesidad pa ta humilde. Wel, lo mester ta fácil pa visualisá i capta e punto di loke e profecia dje yu di Gideon, Jotam, a bisa. Cuminsá lesa na Huesnan 9:8. Jotam a bisa: “Ta sosodé cu un biaha e palunan a bai ungi un rey riba nan.” E palu di olijfi, e palu di figu i e palu di wijndruif a nenga di goberná. Pero e humilde mata di sumpiña tabata contentu pa bira un gobernante. Despues di a lesa e relato na bos haltu pa bo yunan, bo por splica cu e matanan balioso a representá personanan digno cu no a busca e posicion di gobernacion riba nan compañeronan israelita. E mata di sumpiña, cu tabata sirbi solamente pa combustibel, a representá e gobernacion di Abímelec orguyoso, un asesino cu kier a dominá otronan pero cu a topa un fin na cumplimentu dje profecia di Jotam. (Huesnan, capítulo 9) Cua mucha lo kier crece i bira mescos cu un mata di sumpiña?
15. Con e importancia di lealtad ta ser resaltá den e buki di Rut?
15 E importancia di lealtad ta ser clarificá den e buki bíblico di Rut. Suponé cu miembronan di bo famia ta lesa e relato ei na bos haltu beurt pa beurt i ta purba absorbá loke e ta bisa. Bo ta mira e moabita Rut riba un biahe pa Betlehem cu su suegra biuda, Noemí, i bo ta tende Rut bisa: “Bo pueblo lo ta mi pueblo, i bo Dios mi Dios.” (Rut 1:16) Bo ta mira Rut diligente recogé cosecha tras dje cosechadornan den e tereno di Boaz. Bo ta tende Boaz encomend’é, bisando: “Tur persona den e porta di mi pueblo ta conciente di cu bo ta un muher excelente.” (Rut 3:11) Pronto, Boaz ta casa cu Rut. Na armonia cu e areglo pa matrimonio di suá, pa medio di Boaz, Rut ta duna un yu “na Noemí.” Rut ta bira un antepasado di David i cu tempu di Jesucristo. Asina el a ricibí “un salario perfecto.” Ademas, esnan cu ta lesa e relato bíblico ta siña un les balioso: Sea leal na Jehova, i lo bo ser ricamente bendicioná.—Rut 2:12; 4:17-22; Proverbionan 10:22; Mateo 1:1, 5, 6.
16. Ki prueba e tres hebreonan a pasa aden, i con e relato aki por yuda nos?
16 E relato dje hebreonan yamá Sadrac, Mesac i Abednego por yuda nos ser fiel na Dios den situacionnan difícil. Visualisá e suceso segun cu Daniel capítulo 3 ta ser lesá na bos haltu. Un imágen inmenso di oro ta para haltu asina riba e vaye di Dura, unda e funcionarionan babilónico a reuní huntu. Riba e zonidu di instrumentonan musical, nan ta cai abou i ta adorá e imágen cu Rey Nabucodonosor a traha. Esta, tur cu excepcion di Sadrac, Mesac i Abednego ta haci asina. Respetuosamente, pero di un manera firme, nan ta bisa e rey cu nan lo no sirbi su diosnan i adorá e imágen di oro. E hebreonan yong aki ta ser tirá den un fornu cu a ser hací extremamente cayente. Pero kico ta sosodé? Mirando paden, e rey ta mira cuater homber físicamente capacitá, di cua un di nan “tin e aparencia di un yu dje diosnan.” (Daniel 3:25) E tres hebreonan ta ser sacá for dje fornu, i Nabucodonosor ta bendicioná nan Dios. Tabata recompensador pa visualisá e relato. I ki un les esaki ta duna relacioná cu fieldad na Jehova bou di prueba!
Beneficiá For di Lesa Bijbel Como Famia
17. Cita brevemente algun dje cosnan beneficioso cu bo famia por siña lesando Bijbel huntu.
17 Bo famia por disfrutá di hopi beneficio si boso ta dedicá tempu regularmente pa lesa Bijbel huntu. Cuminsando den Génesis, boso por visualisá creacion i loer den hende su hogar paradísico original. Boso por compartí e experencianan dje fiel patriarcanan i nan famia i sigui e israelitanan segun cu nan ta pasa dor dje fondo secu di Laman Corá. Boso por mira e hóben wardador David derotá e gigante filisteo Goliat. Bo famia por tuma nota dje construccion dje tempel di Jehova den Jerusalem, boso por mira con e ta ser desolá dor di ehércitonan babilónico, i boso por mira con e ta ser reconstruí bou di Gobernador Zorobabel. Huntu cu wardadornan humilde cerca di Betlehem, boso por tende e anuncio angelical di Jesus su nacementu. Boso por haña detaye tocante su bautismo i su ministerio, mir’é entregá su bida humano como un rescate, i compartí e goso di su resureccion. Siguientemente, boso por biaha cu apostel Pablo i observá e establecimentu di congregacionnan segun cu cristianismo ta plama. Anto, den e buki di Revelacion, bo famia por disfrutá di apostel Juan su magnífico vision pa futuro, incluyendo Cristo su Reinado di Mil Aña.
18, 19. Ki sugerencia ta ser duná relacioná cu lesamentu di Bijbel como famia?
18 Si bo ta lesando Bijbel na bos haltu como famia, les’é cu claridad i entusiasmo. Ora bo ta lesa algun porcion dje Scritura, un miembro di famia—posiblemente e tata—lo por lesa e partinan narativo. Otro miembronan di famia por asumí e rolnan specífico di personahenan bíblico, lesando bo partinan cu sintimentu apropiado.
19 Segun cu bo ta participá den lesamentu di Bijbel como famia, bo abilidad di lesa por mehorá. Probablemente, bo conocimentu di Dios lo aumentá, i esaki mester halá bo mas cerca dje. Asaf a canta: “En cuanto ami, halando cerca Dios ta bon pa mi. Den e Señor Soberano Jehova mi a pone mi refugio, pa declará tur bo obranan.” (Salmo 73:28) Esaki lo yuda bo famia ser manera Moises, kende a “sigui firme como si el a mira Esun cu ta invisibel,” esta, Jehova Dios.—Hebreonan 11:27.
Lesamentu i e Ministerio Cristian
20, 21. Con nos comision di predicá ta relacioná cu e abilidad di lesa?
20 Nos deseo pa adorá “Esun cu ta invisibel” mester impulsá nos pa haci esfuerso pa ser bon lesador. E abilidad di lesa bon ta yuda nos duna testimonio for dje Palabra di Dios. Esei siguramente ta yuda nos sigui padilanti den e trabou di predicacion di Reino cu Jesus a comisioná su siguidornan pa haci ora el a bisa: “Bai . . . i haci disipel di hende di tur nacion, bautisando nan den e nomber dje Tata i dje Yu i dje spiritu santu, siñando nan pa warda tur loke mi a manda boso.” (Mateo 28:19, 20; Echonan 1:8) Dunamentu di testimonio ta e trabou principal di Jehova su pueblo, i e abilidad di lesa ta yuda nos cumpli cuné.
21 Esfuerso ta necesario pa ser un bon lesador i un maestro ábil dje Palabra di Dios. (Efesionan 6:17) Pues, ‘haci bo sumo posibel pa presentá bo mes aprobá na Dios, manehando e palabra dje berdad corectamente.’ (2 Timoteo 2:15) Aumentá bo conocimentu dje berdad bíblico i bo abilidad como un Testigo di Jehova dor di dedicá bo mes na lesamentu.
Con Bo Ta Contestá?
◻ Con felicidad ta dependé riba lesamentu dje Palabra di Dios?
◻ Pakico meditá riba loke bo ta lesa den Bijbel?
◻ Pakico ta bon pa visualisá i asociá cosnan cu otro ora bo ta lesa e Scritura?
◻ Cua ta algun les cu nos por siña for di lesamentu di Bijbel?
◻ Pakico lesa Bijbel na bos haltu como famia, i ki coneccion lesamentu tin cu e ministerio cristian?
[Plachi na página 13]
Ora di lesa Bijbel como famia, visualisá e relatonan i meditá riba nan nificacion