Bo Ta un Víctima di Prehuicio?

KICO violencia étnico, racismo, discriminacion, segregacion i genocidio tin en comun? Nan tur ta consecuencia di un inclinacion humano extensamente plamá—prehuicio!

Kico ta prehuicio? Un enciclopedia ta definié como “un opinion formá sin tuma e tempu of molester pa husga imparcialmente.” Como hende imperfecto, nos tin tendencia di mustra prehuicio na un cierto grado. Tal bes bo por pensa di casonan ora bo a husga un persona sin tabatin tur e detayenan. Bijbel ta haci contraste entre inclinacionnan pa mustra prehuicio cu e manera cu Jehova Dios ta husga. E ta bisa: “No e manera cu hende ta mira ta e manera cu Dios ta mira, pasobra e simpel hende ta mira loke ta parce na bista; pero en cuanto Jehova, e ta mira loke e curason ta.”—1 Samuel 16:7.

Prehuicio Por Causa Daño

No cabe duda cu tur hende a yega di ser husgá incorectamente dor di un persona. (Compará cu Eclesiástes 7:21, 22.) Den un sentido general, nos tur ta víctima di prehuicio. Sin embargo, ora nos deshací lihé di pensamentunan di prehuicio, probablemente nan lo causa poco of ningun daño. Ta ora nos alimentá pensamentunan asina e por resultá perhudicial. Esei por engañá nos pa kere un falsedad. Por ehempel, bou dje influencia di prehuicio, algun hende berdaderamente ta kere cu un persona por ta golos, floho, estúpido of orguyoso simplemente debí cu e ta pertenecé na un cierto grupo religioso, étnico of nacional.

Den hopi caso tal husgamentu robes ta hiba na trato inhustu, ofensivo of asta violento di otronan. Miyones di hende a perde nan bida den masacrenan, genocidionan, matansanan étnico i otro formanan di prehuicio extremo.

Na tur parti dje tera, gobiernunan a combatí prehuicio dor di garantisá legalmente e derechonan inkebrantabel di libertad, siguridad i igualdad. Si bo lesa e constitucion of coleccion di leynan di bo pais, sin duda lo bo haña un artículo of un enmienda diseñá pa protehá e derechonan di tur ciudadano, sin importá nan rasa, sexo of religion. Sin embargo, prehuicio i discriminacion ta reina riba escala mundial.

Bo ta un víctima di prehuicio? Bo a ser marcá como golos, floho, estúpido of orguyoso simplemente pa motibu di bo rasa, edad, sexo, nacionalidad of creencia religioso? Bo oportunidadnan pa ricibí educacion, empleo, bibienda i servicio social adecuá ta ser limitá debí na prehuicio? Si ta asina, con bo por enfrentá esei?

[Plachi na página 3]

Alimentando prehuicio ta fomentá odio racial

[Rekonosementu]

Nina Berman/Sipa Press