Pregunta di Lector
Tin biaha nos ta tende rumannan papia of pidi den oracion p’e Reino di Dios bini n’e tera. Esaki ta un expresion corecto?
Den un sentido estricto, esei no ta un manera bíblico pa expres’é. E Reino di Dios ta celestial. Pues, apostel Pablo por a skirbi: “Señor lo librá mi di tur mal obra i lo salbá mi pa su reino celestial. Na dje sea gloria pa semper hamas. Amen.”—2 Timoteo 4:18; Mateo 13:44; 1 Corintionan 15:50.
E Reino a ser establecé den shelu na 1914, i hamas lo e ser transferí n’e Paradijs terenal restorá of cualkier otro caminda. Jesucristo ta Rey dje Reino. Como Rey, Jesus tin autoridad riba e angelnan. P’esei, su debido lugá di gobernacion ta n’e man drechi di Dios den shelu. Cristiannan ungí ta uni cuné como rey i sacerdote den shelu.—Efesionan 1:19-21; Revelacion 5:9, 10; 20:6.
Esaki ta nificá anto, cu nos no mester expresá mas na Dios e peticionnan hañá den e parti dje Oracion di Nos Tata cu ta bisa: “Laga bo reino bini. Laga bo boluntad sea cumplí, mescos cu den shelu, tambe riba tera”? (Mateo 6:10) Al contrario, e oracion ei ta apropiado i ainda ta yen di nificacion.
E Reino di Dios lo tin cu actua ainda den un manera decisivo pa cu e tera aki, i esaki ta loke nos tin na mente ora nos ta haci oracion i ta usa expresionnan similar n’e palabranan dje Oracion di Nos Tata. Por ehempel, Daniel 2:44 ta predicí cu e Reino lo “bini” pa destruí tur e nacionnan i lo tuma mando riba e tera aki. Revelacion 21:2 ta papia di Jerusalem Nobo bahando for di shelu. Jerusalem Nobo ta consistí dje 144.000 cristiannan ungí cu lo ta e bruid di Cristo. Tambe nan ta co-heredero cu Jesus den e Reino. Pues Revelacion 21:2 ta describí con nan ta dirigí nan atencion n’e tera, treciendo gran bendicionnan pa humanidad fiel.—Revelacion 21:3, 4.
Te ora cu e maraviyoso profecianan aki i otronan ser cumplí, lo sigui ser apropiado pa haci oracion na Jehova Dios na armonia cu e palabranan di Jesus, “Laga bo reino bini.” Pero nos mester tene na mente cu e Reino lo no bini n’e planeta Tera den un sentido literal. E sitio dje gobernacion di Reino ta den shelu, no riba tera.
[Rekonosementu pa Potrèt na página 31]
Tera: Basá riba NASA photo