Pregunta di Lector

Nos por bisa cu e sirbidornan di Dios djawe cu tin e speransa terenal tin mes tantu dje spiritu di Dios cu e cristiannan ungí cu spiritu?

E pregunta aki no ta unu nobo. E mésun asuntu aki a ser tratá den “Pregunta di Lector” den E Toren di Vigilancia [edicion ingles] di 15 di april, 1952. Hopi hende a bira Testigo desde e tempu ei, pues nos por considerá e pregunta atrobe i segun cu nos ta haci esaki repasá loke e informacion mas promé ei a bisa.

Básicamente, e contesta ta, sí, e rumannan fiel dje clase di otro carnénan por ricibí mes tantu spiritu santu di Dios cu e ungínan.—Juan 10:16.

Esaki, naturalmente, no ta nificá cu e spiritu ta obra den e mésun manera riba tur individuo. Corda riba e fiel sirbidornan den tempunan pre-cristian, kendenan siguramente a ricibí e spiritu di Dios. Cu e poder cu nan a haña dje spiritu, algun di nan a mata bestia feros, a cura enfermo, asta a lanta morto. I nan tabatin mester dje spiritu pa skirbi bukinan inspirá di Bijbel. (Huesnan 13:24, 25; 14:5, 6; 1 Reynan 17:17-24; 2 Reynan 4:17-37; 5:1-14) E Toren di Vigilancia a bisa: “Aunke esakinan no tabata dje clase ungí, nan tabata yená cu spiritu santu.”

For di un otro ángulo, considerá homber i muhernan den e promé siglo cu tabata ungí cu spiritu santu, birando yunan spiritual di Dios cu e speransa celestial. Tur tabata ungí, pero esei no a nificá cu e spiritu djei padilanti a obra den e mésun manera riba nan tur. Esei ta bisto for di 1 Corintionan capítulo 12. Ei apostel Pablo a papia dje donnan di spiritu. Nos ta lesa na versículo 8, 9 i 11: “Na un ta ser duná via e spiritu abla di sabiduria, na un otro abla di conocimentu segun e mésun spiritu, na un otro fe mediante e mésun spiritu, na un otro donnan di curacion mediante e mésun spiritu. . . . Pero tur e obramentunan aki e solo i mésun spiritu ta efectuá, haciendo un distribucion na cada un respectivamente segun su disposicion.”

Ta remarcabel cu no tur ungí e tempu ei a haña donnan milagroso dje spiritu. Na 1 Corintionan capítulo 14, Pablo a mencioná un reunion di congregacion den cua un ungí tabatin e don di lenga, pero ningun persona presente tabatin e don di traduccion. No obstante, na un ocasion anterior, cada un di nan a experenciá ungimentu cu spiritu. Lo ta razonabel pa bisa cu e ruman cu tabatin e don di lenga tabatin mas dje spiritu cu e otronan presente? No. E otro ungínan ei no tabata den desbentaha, como si fuera incapas pa comprendé Bijbel mes bon cu esun cu tabatin e don of incapas pa enfrentá prueba. E spiritu a obra den un manera special riba e ruman cu por a papia den lenga. Tog, tantu e como e otronan mester a keda pegá na Jehova i “sigui ser yená cu spiritu,” manera Pablo a skirbi.—Efesionan 5:18.

Pa loke ta esnan dje resto awe, nan siguramente a ricibí e spiritu di Dios. Na un dado momento el a obra riba nan den un manera special—n’e tempu ora cu nan a ser ungí i adoptá como yunan spiritual. Despues di esei nan ta “sigui ser yená cu spiritu,” teniendo su yudansa ora nan ta busca pa comprendé Bijbel mas claramente, hiba delantera den e trabou di predicacion, of enfrentá pruebanan—personal of organisacional.

Aunke e miembronan dje “otro carnénan” no tin e experencia di ta ungí, den otro sentidonan sí nan ta ricibí spiritu santu. E Toren di Vigilancia di 15 di april, 1952, a comentá:

“Awe e ‘otro carnénan’ ta efectuá e mésun trabou di predicacion cu e resto, bou dje mésun condicionnan difícil, i ta manifestá e mésun fieldad i integridad. Nan ta alimentá n’e mésun mesa spiritual, comiendo e mésun cuminda, absorbando e mésun berdadnan. Siendo dje clase terenal, cu speransa terenal i cu un interes intenso den cosnan terenal, kisas nan ta mas interesá den textonan relacioná cu condicionnan terenal den e mundu nobo; miéntras cu e resto ungí, cu speransa celestial i un interes personal firme den cosnan dje spiritu, kisas ta studia mas diligentemente e cosnan dje spiritu den e Palabra di Dios. . . . Sin embargo, echo ta keda cu e mésun berdadnan i e mésun comprendimentu ta disponibel pa ámbos clase, i ta solamente e grado cu nan ta dedicá nan mes na estudio ta determiná e comprendimentu di cosnan celestial i terenal cu nan ta adkerí. E spiritu dje Señor ta disponibel den porcionnan igual pa ámbos clase, i conocimentu i comprendimentu ta ser ofrecé igualmente na ámbos, cu igual oportunidad pa absorb’é.”