Sirbiendo e Dios Digno di Confiansa

Manera Kimon Progakis a relatá

Tabata un anochi extremadamente friu na 1955. Ami cu mi esposa, Giannoula, a cuminsá preocupá pasobra nos yu homber di 18 aña, George, no a bini cas for dje kiosko caminda e tabata traha. Inesperadamente, un polis a bati na nos porta. “Un auto a dal boso yu homber ora e tabata biniendo cas riba su baiskel,” el a bisa, “i e ta morto.” Anto el a lèn dilanti i a fluister: “Nan lo bisa boso cu tabata un accidente, pero keré mi, el a ser asesiná.” E pastor local i algun lider paramilitar a conspirá pa mat’é.

DEN e añanan ei, ora Grecia tabata recobrando di tempunan di conflicto i dificultad, tabata peligroso pa ta un Testigo di Jehova. Mi tabata conocé personalmente e poder dje Iglesia Griego Ortodox i dje organisacionnan paramilitar ya cu pa mas cu 15 aña, mi a yega di ta un miembro activo di nan. Lagá mi contá bo tocante e sucesonan cu a hiba na e tragedia aki den nos famia mas cu 40 aña pasá.

Creciendo den Grecia

Mi a nace na 1902 den un famia bon-pará den un pueblito chikitu cerca dje pueblo di Chalcis, Grecia. Mi tata tabata activo den política local, i nos famia tabata miembronan deboto di e Iglesia Griego Ortodox. Mi a bira un lector ardiente di bukinan tocante política i religion na un tempu ora e mayoria di mi paisanonan tabata analfabeta.

E pobresa i inhusticia cu a prevalecé na principio di siglo 20 a crea den mi un deseo pa un mundu cu mihó condicionnan. Mi a pensa cu religion lo mester por mehorá e situacion tristu di mi paisanonan. Debí na mi inclinacion religioso, hombernan importante di mi pueblito a proponé pa mi bira e pastor griego ortodox di nos comunidad. Sin embargo, aunke mi a bishitá hopi monasterio i a tene discusionnan largu cu obispunan i abadnan di monasterio, mi no a sintí mi prepará of dispuesto pa aceptá un responsabilidad asina.

Meimei di Guera Civil

Añanan despues, na april 1941, Grecia a cai bou di ocupacion nazi. Cu esaki a cuminsá un periodo tristu di matansanan, hamber, miseria i un sinfin di sufrimentu humano. Un movementu fuerte di resistencia a lanta, i mi a djoin un dje gruponan gueriyero cu a lucha contra e invasornan nazi. Como resultado, vários biaha mi cas a ser pegá na candela, mi a ser tirá, i nan a destruí mi cosecha. Na principio di 1943 ami cu mi famia no tabatin ningun otro opcion cu hui pa e cerunan yen di baranca skerpi. Nos a keda einan te na fin dje ocupacion aleman na october 1944.

Conflictonan interno, político i civil, a brota despues cu e alemannan a bai. E grupo gueriyero di resistencia na cua mi a pertenecé a bira un dje forsanan principal bringando den e guera civil. Aunke e idealnan comunista di husticia, igualdad i camaraderia a atraé mi, cu tempu e realidad dje ideologia ei a lagá mi totalmente desilusioná. Ya cu mi tabatin un puesto haltu den e grupo, mi a mira personalmente cu poder tin tendencia di corumpí hende. Apesar di teoria i idealnan aparentemente noble, egoismo i imperfeccion ta daña e mihó intencionnan político.

Loke a shok mi specialmente tabata cu na vários banda dje conflicto civil, clero ortodox tabata tumando arma pa mata esnan di nan propio religion! Mi a pensa den mi mes, ‘Con e cleronan aki por bisa cu nan ta representá Jesucristo, kende a spierta: “Tur esnan cu ta tuma spada lo perecé pa spada”?’—Mateo 26:52.

Durante e guera civil, na 1946, mi tabata scondiendo cerca dje pueblo di Lamia, den parti central di Grecia. Mi pañanan tabata completamente gastá, pues mi a dicidí na disfrasá mi mes i bai na un sastre den stad pa laga cose paña nobo. Tabatin un debate ardiente tumando lugá ora mi a yega, i pronto mi a haña mi mes papiando, no tocante política, sino tocante mi amor bieu, religion. Riparando mi puntonan di bista informá, mirones a sugerí pa mi papia cu un cierto ‘profesor di teologia.’ Mesora, nan a bai busk’é.

Hañando un Speransa Confiabel

Den e discusion cu a sigui, e “profesor” a puntrá mi cua tabata e base pa mi creencianan. “E Tatanan Santu i e Sinodonan Eucuménico,” mi a contestá. En bes di contradicí mi, el a habri su Bijbel chikitu na Mateo 23:9, 10, i a pidí mi lesa e palabranan di Jesus: “Ademas, no yama ningun hende boso tata riba tera, pasobra un so ta boso Tata, Esun celestial. Tampoco sea yamá ‘lider,’ pasobra un so ta boso Lider, e Cristo.”

Esei sí a habri mi wowonan! Mi a sinti cu e homber aki tabata papiando e berdad. Ora el a identificá su mes como un Testigo di Jehova, mi a puntr’é pa algun literatura pa lesa. El a trece pa mi e buki Light (Lus), cu ta un comentario riba e buki bíblico di Revelacion, i mi a bai cuné na mi escondite. Pa basta tempu, e bestianan cu Revelacion ta referí na dje tabata un misterio pa mi, pero awor mi a siña cu esakinan a representá organisacionnan político cu ta existí den nos siglo 20. Mi a cuminsá comprendé cu Bijbel tin nificacion práctico pa nos tempu i cu mi mester studi’é i adaptá mi bida na armonia cu su berdadnan.

Capturá i Encarcelá

Djis despues di esei, soldatnan a basha drenta den mi escondite i a arestá mi. Nan a tirá mi den cashot. Siendo cu mi tabata un fugitivo di ley buscá pa basta tempu, mi a pensa cu nan lo a ehecutá mi. Ei, den mi cel, mi a ricibí un bishita dje Testigo cu a papia cu mi pa promé biaha. El a animá mi pa confia implícitamente den Jehova, locual mi a haci. Mi a ser sentenciá na seis luna di exilio riba e isla egeo di Ikaria.

Asina cu mi a yega, mi a identificá mi mes, no como un comunista, sino como un Testigo di Jehova. Otronan cu a siña berdadnan bíblico tambe tabata exiliá einan, pues mi a localisá nan, i nos a studia Bijbel regularmente huntu. Nan a yudá mi gana mas conocimentu for dje Scritura i un mihó comprendimentu di nos Dios digno di confiansa, Jehova.

Na 1947, ora mi sentencia a terminá, mi a ser yamá n’e oficina dje fiscal público. El a bisá mi cu el a keda impresioná cu mi conducta i a bisa cu lo mi por usa su nomber como referencia ki ora cu mi ser exiliá atrobe. Despues di yega Aténas, na unda mi famia a muda entretantu, mi a cuminsá asociá cu un congregacion di Testigonan di Jehova i pronto a ser bautisá como símbolo di mi dedicacion na Jehova.

Acusá di Proselitismo

Pa décadanan, Grecia a hiba Testigonan di Jehova dilanti corte pa leynan pasá na 1938 i 1939 cu ta prohibí proselitismo. Pues, di 1938 pa 1992, tabatin 19.147 aresto di Testigonan na Grecia, i e cortenan a imponé sentencianan cu a combiná un total di 753 aña, di cua 593 a ser sintá en realidad. Personalmente, mi a ser arestá mas cu 40 biaha pa predicacion dje bon nobo dje Reino di Dios, i na tur mi a sinta 27 luna den vários prizon.

Un di mi arestonan a bin como resultado di un carta cu mi a skirbi na un clero griego ortodox na Chalcis. Na 1955, congregacionnan di Testigonan di Jehova a ser animá pa manda e foyeto chikitu La cristiandad o el cristianismo—¿cuál es “la luz del mundo”? na tur clero. Un dje cleronan den puesto haltu na ken mi a skirbi, a demandá mi pa proselitismo. Durante tratamentu dje caso, tantu e abogado cu ta Testigo como e abogado local a duna un defensa maestral, splicando e obligacion cu cristiannan berdadero tin di predicá e bon nobo tocante e Reino di Dios.—Mateo 24:14.

E hues presidiendo e corte a puntra e archimandrita (un dignatario di iglesia posicioná bou di un obispu): “Bo a lesa e carta i e foyeto chikitu?”

“No,” el a contestá rabiá, “mi a sker nan i a deshací di nan asina cu mi a habri e envelop!”

“Con bo por bisa anto cu e homber aki a purba combertí bo?” e hues presidente a puntra.

Siguientemente nos abogado a cita ehempelnan di profesornan i otronan cu a haci donacion di monton di bukinan na bibliotecanan público. “Lo bo bisa cu e hendenan ei a purba combertí otronan?” el a puntra.

Claramente, tal actividad no ta constituí proselitismo. Mi a gradicí Jehova ora mi a tende e veredicto: “Inocente.”

E Morto di Mi Yu Homber

Mi yu homber George tambe tabata ser molestiá continuamente, generalmente bou di instigacion di clero ortodox. E tambe a ser arestá hopi biaha debí na su celo hubenil den declará e bon nobo dje Reino di Dios. Finalmente, e opositornan a dicidí di deshací di dje i, na mésun tempu, manda un mensahe intimidante na e resto di nos pa stop di predicá.

E polis cu a bin na nos cas pa informá dje morto di George a bisa cu e pastor griego ortodox local i algun lider paramilitar a conspirá pa mata nos yu. “Accidentenan” asina tabata comun durante e tempu peligroso ei. Apesar dje tristesa cu su morto a causa, nos determinacion pa sigui activo den e trabou di predicá i pa confia plenamente den Jehova solamente a ser fortalecé.

Yudando Otronan Confia den Jehova

Meimei di añanan ’60, mi esposa i yunan tabata pasa lunanan di zomer den e pueblito costero di Skala Oropos, rond di 50 kilometer for di Aténas. N’e tempu ei, ningun Testigo di Jehova tabata biba ei, pues nos a haci testificacion informal na bisiñanan. Algun cunukero local a respondé faborablemente. Ya cu e hombernan tabata traha te lat den nan cunucu durante dia, nos tabata conducí studio di Bijbel cu nan anochi lat, i un cantidad di nan a bira Testigo.

Mirando con Jehova tabata bendicioná nos esfuersonan, pa rond di 15 aña, nos a biaha bai ei tur siman afin di conducí studio di Bijbel cu hende interesá. Casi 30 persona cu nos a studia cuné einan a progresá te n’e punto di bautismo. Inicialmente, a forma un grupo di studio, i mi a ser asigná pa conducí e reunionnan. Despues e grupo a bira un congregacion, i awe mas cu shen Testigo dje área ei ta forma e Congregacion Malakasa. Nos ta alegrá cu cuater dje personanan cu nos a yuda, awor ta sirbiendo como ministernan di tempu completo.

Un Herencia Ricu

Djis despues cu mi a dedicá mi bida na Jehova, mi esposa a cuminsá progresá spiritualmente i a ser bautisá. Durante e periodo difícil di persecucion, su fe a keda fuerte i el a para firme i sin tambaleá den su integridad. Nunca el a keha tocante e hopi trabou cu el a pasa como resultado di mi encarcelacionnan frecuente.

Atrabes dje añanan, nos a conducí hopi studio di Bijbel huntu, i di un manera eficas el a yuda hopi hende cu su manera simpel i entusiasmá. Actualmente, e tin un ruta di revista cu ta incluí decenas di persona na ken e ta entregá regularmente E Toren di Vigilancia i Spierta!

Principalmente debí n’e apoyo di mi casá amoroso, nos tres yunan na bida i nan famianan, cu ta incluí seis nietu i cuater bisanietu, tur ta activo den e sirbishi di Jehova. Aunke nan no tabatin cu enfrentá e persecucion i oposicion amargo cu ami i mi esposa a enfrentá, nan a pone nan confiansa implícito den Jehova, i nan ta sigui cana den su camindanan. Lo ta ki un goso pa nos tur, pa reencontrá cu nos kerido George ora e regresá den e resureccion!

Dicididu pa Confia den Jehova

Durante tur e añanan aki, mi a mira Jehova su spiritu obra riba su pueblo. Su organisacion dirigí pa spiritu a yudá mi mira cu nos no por pone nos confiansa den e esfuersonan humano. Nan promesanan pa un mihó futuro ta sin balor, en realidad nan ta simplemente un gran mentira.—Salmo 146:3, 4.

Apesar di mi edad avansá i problemanan severo di salú, mi bista ta enfocá riba e realidad dje speransa di Reino. Berdaderamente ta duel mi e añanan cu mi a dedicá na religion falsu i na purba trece mihó condicionnan via medionan político. Si mi tabatin cu biba mi bida di nobo, sin duda lo mi bolbe dicidí di sirbi Jehova, e Dios digno di confiansa.

(Kimon Progakis recientemente a bai drumi den morto. E tabatin un speransa terenal.)

[Plachi na página 26]

Un potret recien di Kimon huntu cu su esposa, Giannoula