Percurando Auxilio Meimei di Ruina

HENDE su esfuerso pa percurá auxilio despues di desaster ta siguramente encomendabel. Hopi programa di auxilio a yuda reconstruí cas, trece famianan huntu atrobe, i, mas cu tur cos, salba bida.

Ora desaster tuma lugá, Testigonan di Jehova ta haci uso di—i ta gradicidu pa—cualkier yudansa cu ta ser suministrá mediante programanan di auxilio seglar. N’e mésun tempu, nan tin un obligacion bíblico pa “obra loke ta bon . . . specialmente pa cu esnan relacioná cu [nan] den e fe.” (Galationan 6:10) Sí, e Testigonan ta sinti como si nan ta algu di otro; nan ta mira otro manera “famia.” P’e motibu ei nan ta yama otro “ruman.”—Compará cu Marco 3:31-35; Filemon 1, 2.

Pues, ora un desaster afectá un área, e ancianonan dje Testigonan di Jehova ta haci esfuerso cuidadoso pa averiguá e paradero i necesidadnan di cada miembro dje congregacion i ta haci areglo pa duna asistencia necesario. Considerá con esaki a tuma lugá na Accra, Ghana; San Angelo, Merca; i Kobe, Hapon.

Accra—“Un Mini Dia di Noe”

Awaceru a cuminsá cai rond di 11’or di anochi, i el a yobe non-stop pa oranan largu. “Awa tabata cai asina duru cu henter mi famia no por a drumi,” John Twumasi, un Testigo di Jehova na Accra, ta bisa. Daily Graphic a yam’é “un mini Dia di Noe.” “Nos a purba hiba algun cos di balor n’e piso ariba,” John ta continuá, “pero ora nos a habri e porta cu ta hiba n’e trapi, e awa a basha bin paden.”

Autoridadnan a bati alarma p’e habitantenan bandoná nan cas, sin embargo hopi hende a vacilá, temiendo cu un cas bashí—asta si e ta yen di awa—por invitá sakeadornan. Algun no por a sali ni maske nan tabata kier. “Ami cu mi mama no por a habri e porta pa sali,” un hobencita yamá Paulina ta bisa. “E awa a sigui subi, pues nos a para riba barí di palu i a tene na un balki dje dak. Finalmente, pa mas o ménos cinc’or di mainta, nos bisiñanan a rescatá nos.”

Tan pronto cu tabata posibel, Testigonan di Jehova a pone man na obra. Un ruman muher cristian yamá Beatrice ta conta: “E ancianonan dje congregacion tabata busca nos, i nan a haña nos n’e cas di un compañero Testigo, unda nos a tuma refugio. Apénas tres dia despues dje inundacion, e ancianonan i e miembronan mas hóben dje congregacion a sali na nos yudansa i a raspa e lodo kita for di paden i pafó di nos cas. E Sociedad Watch Tower a manda detergente, desinfectante, verf, matras, klechi, tela i paña p’e muchanan. E rumannan a manda cuminda pa nos pa vários dia. Mi tabata profundamente conmoví!”

John Twumasi, citá anteriormente, ta informá: “Mi a bisa e otro huurdónan dje cas cu nos Sociedad a manda detergente i desinfectante pa nos—suficiente pa limpia henter e cas. Rond di 40 huurdó a yuda cu e limpiesa. Mi a duna mi bisiñanan algun detergente, incluso un homber cu ta e pastor dje iglesia local. Mi coleganan di trabou a pensa ekibocadamente cu Testigonan di Jehova ta mustra amor solamente na nan mes hendenan.”

E rumannan cristian a apreciá masha tantu e asistencia amoroso cu nan a ricibí. Ruman Twumasi ta concluí: “Aunke e cosnan cu mi a perde den e inundacion tabata bal mas cu e artículonan di auxilio, ami cu mi famia ta sinti cu debí n’e percuracion conmovedor aki di parti dje Sociedad, nos a gana muchu mas cu nos a perde.”

San Angelo—“El A Zona Manera Mundu Ta Bai Caba”

E tornadonan cu a ruiná San Angelo dia 28 di mei, 1995, a saca palunan di mata for di tera, a kibra palunan di lus i a basha wayanan di electricidad cu coriente ariba, abou riba caya. Ráfaganan di bientu tabata yega te 160 kilometer pa ora, dañando e infrastructura di companianan di utilidad. Coriente a bai na mas cu 20.000 cas. Despues hagel a cuminsá cai. E Servicio Nacional di Tempu a informá di “hagel tamaño di bala di golf,” despues “hagel tamaño di softball” i finalmente, “hagel tamaño di grapefruit.” E zonido tabata hopi duru. Un habitante a bisa: “El a zona manera mundu ta bai caba.”

Un calmu menasante a sigui despues dje tormenta. E hendenan tabata sali lentamente for di nan cas destrosá pa inspeccioná e daño. Palunan di mata cu a keda pará a perde tur nan blachinan. Casnan cu a keda pará a parce manera cos cu nan a ser soyá. Den algun área acumulacion di hagel a cubri e tera te cu un meter hundu. Miles di bentana di cas i di auto a ser kibrá den e tormenta, di manera cu awor pidanan di glas kibrá tabata briya banda dje hagel cu a cubri e tera manera un klechi. “Ora mi a yega cas,” un muher ta bisa, “mi a djis sinta den mi auto n’e entrada di mi cas i yora. E daño tabata asina grandi cu mi no por a contené mi mes.”

Programanan di auxilio i hospitalnan rápidamente a duna asistencia financiero, material di construccion, tratamentu médico i guia sicológico. Di un manera encomendabel, hopi hende cu nan mes tabata víctima dje tormenta, a haci loke nan tabata por pa yuda otronan.

E congregacionnan di Testigonan di Jehova tambe a drenta accion. Aubrey Conner, un anciano na San Angelo, ta informá: “Tan pronto cu e tormenta a terminá, nos tabata na telefon pa averiguá e situacion di tur nos rumannan. Nos a yuda nos mes i nos bisiñanan no-Testigo pa tapa bentananan cu palu, pone tapol riba dak i sigurá e casnan mas tantu posibel contra e weer. Despues nos a traha un lista di tur persona den e congregacion kende nan cas a ser afectá. Rond di shen cas mester a ser drechá, i e material cu a ser suministrá dor di agencianan di auxilio no tabata suficiente. Di manera cu nos a cumprá extra material i a organisá nos mes pa traha. Na tur, rond di 1.000 Testigo a yuda como boluntario, rond di 250 cada siman. Nan a bini asta for di lugánan 740 kilometer leu. Tur a traha incansablemente, hopi biaha den temperaturanan di casi 40° Celsius. Asta un ruman muher di 70 aña di edad a traha cu nos tur fin di siman cu excepcion di unu, i esei tabata ora su propio cas tabata ser drechá. I den e fin di siman ei e tabata riba su propio dak yudando cu e reparacionnan!

“Hopi biaha nos a tende expresionnan for di mirones manera, ‘Lo no ta bunita si otro religionnan ta haci esaki pa nan miembronan?’ Nos bisiñanan a keda impresioná ora nan a mira un ploeg di 10 pa 12 boluntario (incluyendo ruman muher) yega diabierne mainta trempan na cas di un compañero Testigo, prepará pa drecha of asta reconstruí henter e dak sin cobra nada. Den mayoria caso e trabou a ser completá den un fin di siman. A yega di sosodé cu miéntras un contratista no-Testigo tabata trahando duru caba riba ponementu di un dak nos ploeg a yega na un cas bisiña. Nos tabata kita e dak bieu i reconstruí nos dak i limpia e curá promé cu e contratista i su trahadornan a caba cu di nan. Algun biaha nan tabata para nan trabou djis pa observá nos!”

Ruman Conner ta concluí: “Nos tur ta bai sinti falta dje experencianan cu nos a disfrutá huntu. Nos a conocé otro for di un perspectiva diferente dor di mustra i ser mustrá amor fraternal manera nunca promé. Nos ta kere cu esaki ta djis un muestra di con lo ta den e mundu nobo di Dios, cu rumannan un yudando otro pasobra nan berdaderamente ta deseá esei.”—2 Pedro 3:13.

Kobe—“Un Ruina di Palu, Mescla di Cement i Curpa Humano”

E habitantenan di Kobe supuestamente mester tabata prepará. En berdad, tur 1 di september nan ta observá e Dia di Prevencion di Desaster. Muchanan di scol ta haci ehercicionan físico i mental di kico pa haci ora di temblor, militarnan ta ensayá misionnan di rescate cu helicopter, i cuerponan di bombero ta saca nan ekipo di simulacion di temblor, den cua boluntarionan ta practicá nan abilidadnan pa sobrebibí un temblor den un container tamaño di un cuarto cu ta sagudí i tembla mescos cu un temblor. Pero ora e temblor mes a tuma lugá dia 17 di januari, 1995, tur e preparacion a parce inútil. Dies di miles di dak a cai aden—algu cu nunca no a sosodé den e simuladornan di temblor. Treinnan a boltu; seccionnan di careteranan principal a desintegrá; pipanan di gas i awa a rementá; casnan a cai den otro manera carton. Revista Time a describí e esena como “un ruina di palu, mescla di cement i curpa humano.”

Despues candela a cuminsá. Edificionan tabata kima miéntras cu bomberonan frustrá tabata pegá den kilometernan largu di tráfico. Esnan cu a alcansá e candelanan hopi biaha a ripará cu no por a haña awa for dje stad su leiding dañá di awa. “E promé dia tabatin un pánico total,” un funcionario a bisa. “Nunca mi a sintí mi asina impotente den mi bida, sabiendo cu tabatin asina tantu hende derá den e casnan na candela ei. I sabiendo cu no tabatin nada cu mi por a haci tocante esei.”

Na tur, rond di 5.000 hende a ser matá, i aproximadamente 50.000 edificio a ser ruiná. Kobe tabatin solamente un tercer parti dje cuminda cu e tabatin mester. Pa obtené awa algun a recurí na recogé líkido sushi for di bou dje pipanan di awa cu a rementá. Hopi di esnan sin cas a hui bai na lugánan di refugio, di cua algun a racioná cuminda, partiendo pa cada persona un bola di aros pa dia. Malcontentu a plama pronto. “E autoridadnan no a haci nada,” un homber a keha. “Si nos sigui dependé riba nan nos lo muri di hamber.”

E congregacionnan di Testigonan di Jehova na Kobe i den áreanan den becindario a drenta inmediatamente den accion. Un piloto di helicopter cu a mira nan trabou personalmente a bisa: “Mi a bai n’e área di desaster riba e dia dje temblor i a pasa un siman ei. Ora mi a yega na un dje lugánan di refugio, tur cos tabata caótico. Ningun clase di trabou di auxilio tabata ser hací. Testigonan di Jehova tabata e úniconan cu a pura bai n’e sitio i tabata caba cu un trabou tras di otro.”

En berdad, tabatin hopi trabou di haci. Dies Salon di Reino no tabata apto mas pa usa, i mas cu 430 Testigo a perde nan cas. Ademas, 1.206 cas den cua nan tabata biba mester a ser drechá. No solamente esei sino tambe e famianan dje 15 Testigonan cu a muri den e desaster tabata den gran necesidad di consuelo.

Rond di 1.000 Testigo for di rond e pais a ofrecé nan tempu pa yuda den e trabou di reparacion. Un ruman a bisa: “Ora nos tabata traha riba e casnan di studiantenan di Bijbel cu ainda no a bautisá, semper e studiantenan tabata puntra nos, ‘Cuantu nos mester paga pa tur esaki?’ Ora nos a bisa nan cu ta e congregacionnan a sostené e trabou financieramente, nan a gradicí nos, bisando, ‘Loke nos a studia awor ta un realidad!’”

Hopi hende a keda impresioná cu e reaccion rápido i cabal dje Testigonan n’e desaster. “Mi tabata profundamente impresioná,” e piloto citá anteriormente a bisa. “Boso ta yama otro ‘ruman.’ Mi a mira con boso ta yuda otro; boso realmente ta un famia.”

E Testigonan mes a siña lesnan balioso for dje temblor. Un ruman muher a admití: “Semper mi a haña cu mas grandi un organisacion bira, mas difícil ta pa mustra interes personal.” Pero e atencion tierno cu el a ricibí a cambia su punto di bista. “Awor mi sa cu Jehova ta percurá pa nos no solamente como organisacion sino tambe como individuo.” Sin embargo, alivio permanente for di desasternan ta den futuro ainda.

ALIVIO PERMANENTE PRONTO!

Testigonan di Jehova ta anhelá e tempu ora bida humano i e medionan di sosten lo no ser cortá mas dor di desaster. Den e mundu nobo di Dios, hende lo ser siñá pa cooperá cu e medio ambiente dje tera. Segun cu hende ta eliminá prácticanan egoista, nan lo ta ménos vulnerabel pa desasternan natural.

Ademas, Jehova Dios—e Creador di forsanan natural—lo percurá pa su famia humano i creacion terenal no ser menasá nunca mas pa forsanan di naturalesa. E ora ei e tera lo ta berdaderamente un paradijs. (Isaías 65:17, 21, 23; Lucas 23:43) E profecia di Revelacion 21:4 lo haña un cumplimentu glorioso: “Lo e seca tur lágrima di nan wowo, i morto lo no t’ei mas, tampoco lo tin mas lamento ni sclamacion ni dolor. E cosnan anterior a pasa caba.”

[Plachi na página 5]

Beatrice Jones (banda robes) ta demostrá con e i otronan a forma un cadena pa pasa dor dje awanan di inundacion

[Plachi na página 6]

Trabou di auxilio despues dje tornadonan