Informe di Proclamadornan di Reino

Tumando un Posicion Firme na Scol Tin Su Recompensa

BIJBEL ta predicí: “Tur bo yunan lo ta personanan siñá pa Jehova, i e pas di bo yunan lo ta abundante.” (Isaías 54:13) Den un sentido amplio di palabra, por aplicá “tur bo yunan” n’e totalidad di Dios su sirbidornan riba tera, incluyendo esnan hopi yong. Awe, mayornan cristian ta haci sigur cu nan yunan ta ser “siñá pa Jehova” na cas i na reunionnan cristian.

Sin embargo, ora hóbennan cristian ta bai scol, nan ta haña nan enfrentá cu desafionan difícil. Hopi biaha nan ta haña nan ta tuma un posicion firme basá riba loke nan a siña for di Bijbel. Ora nan haci esei, e resultadonan por ta beneficioso pa tantu e studiantenan como e maestronan, manera e siguiente experencia for di Micronesia ta mustra.

Riba e isla chikitu di Tol den parti west di Laman Pacífico, como parti di Islanan Chuuk, e maestronan di e scol local a bisa tur e muchanan pa prepará pa i participá den un celebracion di Halloween na scol. E alumnonan Testigo tabata conciente cu e celebracion por a enbolbé decoracionnan i disfrasnan cu a representá spiritu, kabouter i heks—tur relacioná cu tradicionnan spiritista. E muchanan aki pa motibu di nan concenshi no por a participá.a

For di nan entrenamentu basá riba Bijbel na cas i den e congregacion cristian, nan tabata sa cu e custumbernan ei ta desagradá Dios, asta ora hende ta haci nan meramente como diberticion. Pa yuda splica nan posicion mas claramente, e muchanan a invitá Barak, un dje misioneronan Testigo riba e isla, pa papia cu nan maestronan.

Despues di a tende e splicacion, e maestronan a haci areglo pa un di dos reunion, na cua Barak por a papia cu henter e personal dje scol. N’e reunion aki, Barak a presentá detayenan pa mustra e berdadero nificacion di Halloween. El a obtené su informacion for di vários publicacion di Watch Tower i tambe for di otro fuentenan. E maestronan i personal administrativo a keda asombrá cu loke nan a siña tocante e orígen, historia i caracter religioso dje celebracion. Nan a scoge pa tene un reunion cu e personal pa dicidí con pa resolvé e situacion.

Un par di dia despues, un decision inesperá a ser anunciá. Tur preparacion pa Halloween a ser cancelá. E scol definitivamente lo no celebrá Halloween e aña ei. Ki un resultado faborabel e determinacion dje Testigonan hóben ei pa haci loke ta corecto na scol, a duna! Hóbennan nunca mester tin miedu of bergwensa pa tuma un posicion firme p’e berdad di Bijbel.

Rond mundu, Testigonan di Jehova ta siña nan yunan pa siña bon na scol. Testigonan yong ta ser entrená tambe pa biba segun principionan di Bijbel i pa compartí nan speransa i creencianan cu otro studiantenan segun cu nan ta haña oportunidad. Asta ora e resultadonan no ta mes faborabel of inmediato manera nan tabata den e caso aki, hóbennan por tin e confiansa i satisfaccion cu ta bini for di haci loke ta corecto. I mas importante, nan por ta sigur cu nan Tata celestial ta contentu cu nan i lo bendicioná nan pa nan fiel obedencia.

[Nota]