“Corda e Dianan Cu A Pasa”—Pakico?

“CORDA e dianan cu a pasa.” E spiertamentu aki di apostel Pablo, skirbí rond di 61 E.C., tabata dirigí n’e cristiannan hebreo na Hudea. (Hebreonan 10:32, The New English Bible) Kico a impulsá e remarke aki? Pakico tabatin un necesidad p’e adoradornan di Jehova di e promé siglo ei no lubidá e pasado? Nos por saca beneficio dor di haci caso di un recordatorio similar awe?

Durante siglonan, escritornan di Bijbel bes tras bes a spierta contra neglishá of ignorá e pasado. Hende mester a tene cosnan i sucesonan di pasado na mente i considerá nan. Jehova mes a bisa: “Corda e promé cosnan di hopi tempu atras, cu ami ta Esun Divino i no tin ningun otro Dios, ni ningun manera ami.” (Isaías 46:9) Laga nos examiná tres motibu poderoso pa haci caso dje spiertamentu aki.

Motivacion i Animacion

Na promé lugá, esei por ta un gran fuente di motivacion i animacion. Ora Pablo a skirbi su carta n’e congregacion hebreo, e tabata skirbiendo na compañeronan cristian cu diariamente a pasa den prueba di nan fe debí n’e oposicion for dje hudiunan. Reconociendo nan necesidad pa cultivá awante, Pablo a bisa: “Sigui corda e dianan di ántes den cua, despues cu boso a ser iluminá, boso a wanta un lucha grandi bou di sufrimentu.” (Hebreonan 10:32) E echo cu nan a recordá obranan di lealtad di pasado den e lucha spiritual lo a sirbi pa duna nan e curashi necesario pa finalisá e careda. Di igual manera, profeta Isaías a skirbi: “Corda esaki, pa boso por cobra ánimo.” (Isaías 46:8) Tabata cu un mes efecto deseabel na mente cu Jesucristo a bisa e congregacion na Efeso: “P’esei corda for di kico bo a cai [e amor cu bo tabatin na principio], i repentí i haci e echonan di ántes.”—Revelacion 2:4, 5.

E spiertamentu pa “corda e dianan di antigwedad, boso considerá di generacion pa generacion e añanan di pasado” tabata un tema cu a keda bini bek den e discursonan cu Moises a duna Israel, ora e tabata urgi e nacion pa desplegá lealtad sin miedu na Jehova. (Deuteronomio 32:7) Tuma nota di su palabranan, registrá na Deuteronomio 7:18: “Bo no mester tin miedu di nan [e cananeonan]. Sin falta bo mester corda loke Jehova bo Dios a haci cu Fárao i henter Egipto.” E cordamentu bek riba Jehova su obranan di salbacion na fabor di su pueblo mester tabata un estímulo pa nan sigui pega fielmente n’e leynan di Dios.—Deuteronomio 5:15; 15:15.

Lamentablemente, e israelitanan hopi biaha a entregá n’e picá di lubidá e pasado. Cu ki resultado? “Bes tras bes nan tabata pone Dios na prueba, i nan tabata causa dolor asta n’e Santu di Israel. Nan no a corda su man, e dia cu el a rescatá nan for dje adversario.” (Salmo 78:41, 42) Cu tempu, nan lubidamentu di Jehova su mandamentunan a pone cu nan a ser rechasá dor di dje.—Mateo 21:42, 43.

Un ehempel excelente ta loke e salmista a pone, kende a skirbi: “Lo mi corda e prácticanan di Jah; pues siguramente lo mi corda bo obranan maraviyoso di hopi tempu atras. I siguramente lo mi meditá riba tur bo actividad, i den bo tratonan lo mi interesá mi mes intensamente.” (Salmo 77:11, 12) Tal cordamentu cu meditacion riba sirbishi leal di pasado i Jehova su obranan amoroso lo duna nos e motivacion, animacion i aprecio necesario. Tambe, “sigui corda e dianan di ántes” por sirbi pa core cu cansancio i por incitá nos pa haci tur nos posibel i pa mantené fiel awante.

Siñando for di Erornan di Pasado

Na di dos lugá, no lubidando e pasado por ta un manera pa siña for di erornan i nan consecuencianan. Cu esaki na mente, Moises a consehá e israelitanan: “Corda: No lubidá con bo a provocá Jehova bo Dios den e desierto. For dje dia cu bo a sali for dje tera di Egipto te ora boso a yega e lugá aki, boso a resultá di ta rebelde den boso comportacion pa cu Jehova.” (Deuteronomio 9:7) E resultado dje desobedencia ei di parti dje israelitanan tabata, manera Moises a señalá, cu ‘Jehova nan Dios a haci nan cana cuarenta aña den e desierto.’ Pakico nan a ser animá pa corda esaki? Esei tabata afin di humiyá nan i pa sirbi como un coreccion di nan camindanan rebelde pa asina nan “warda e mandamentunan di Jehova [nan] Dios dor di cana den su camindanan i dor di tem’é.” (Deuteronomio 8:2-6) Nan mester a siña den e sentido di no ripití nan erornan di pasado.

Un escritor a comentá: “Un persona prudente ta beneficiá di experencia personal, pero un persona sabí ta beneficiá di experencia di otronan.” Miéntras Moises a manda e pueblo di Israel pa saca probecho dor di considerá nan propio erornan di pasado, apostel Pablo a spierta otronan—e congregacion cristian di promé siglo i, den un sentido mas amplio, nos—pa saca un les for dje mésun registro histórico. El a skirbi: “Awor e cosnan aki a sigui sosodé nan [e israelitanan] como ehempel, i nan a ser skirbí como un spiertamentu pa nos riba ken e fin dje sistema di cosnan a yega.” (1 Corintionan 10:11) Jesucristo tabatin un otro suceso bíblico mas na mente i e necesidad pa siña for di dje ora el a bisa: “Corda e esposa di Lot.” (Lucas 17:32; Génesis 19:1-26) E poëta i filósofo ingles Samuel Taylor Coleridge, a skirbi: “Si hende por a siña for di historia, ki un les esei lo por siña nos!”

Modestia i Gratitud

Na di tres lugá, cordamentu por producí den nos e cualidadnan di modestia i gratitud cu ta agradá Dios. Segun cu nos ta alegrá den e hopi aspectonan di nos paradijs spiritual mundial, laga nos nunca lubidá cu e ta basá riba cierto cualidadnan fundamental. Esakinan ta incluí lealtad, amor, sacrificio propio, curashi den tempu di adversidad, awante, gran pacenshi i fe—cualidadnan cu nos rumannan cristian, cu décadanan pasá a habri e trabou den vários pais, a demostrá. Na conclusion di su informe riba e historia di tempu actual dje pueblo di Dios na México, e Anuario de los testigos de Jehová para 1995 a bisa: “Pa personanan cu apénas recientemente ta asociá cu Testigonan di Jehova, e pruebanan cu esnan cu a participá den habri e trabou na México a enfrentá, por bini como un sorpresa. Nan ta custumbrá cu un paradijs spiritual caminda tin un abundancia di alimento spiritual, unda tin cientos di miles di socionan temeroso di Dios, i unda sirbishi na Dios ta ser efectuá na un manera bon organisá.”

E promé pioneronan ei hopi biaha a traha nan so of den gruponan isolá chikitu. Nan a enfrentá soledad, necesidad i otro pruebanan severo di integridad segun cu nan a perseverá den proclamá e mensahe di Reino. Aunke hopi dje sirbidornan aki di pasado a muri, ta ki un animacion pa sa cu Jehova ta corda nan sirbishi fiel! Apostel Pablo a confirmá esaki, ora el a skirbi: “Dios no ta inhustu p’e lubidá boso trabou i e amor cu boso a mustra pa su nomber.” (Hebreonan 6:10) Si Jehova ta corda cu aprecio, nos no mester corda di igual manera cu un spiritu di gratitud?

Esnan cu recientemente a familiarisá nan mes cu e berdad por conocé e historia tras di esaki mediante e publicacion Los testigos de Jehová, proclamadores del Reino de Dios.a Ademas, si nos tin e privilegio di pertenecé na un famia of na un congregacion cristian kende su miembronan ta incluí rumannan cu a sirbi pa hopi tempu, Bijbel ta urgi nos den e spiritu di Deuteronomio 32:7 pa “corda e dianan di antigwedad, boso considerá di generacion pa generacion e añanan di pasado; puntra bo tata, i e por informá bo; bo grandinan, i nan por bisá bo di dje.”

Sí, cordando obranan di debocion piadoso di pasado por incitá nos pa sigui wanta gososamente den nos sirbishi cristian. Tambe, historia ta contené lesnan cu nos mester siña. I meditando riba nos paradijs spiritual bendicioná dor di Dios ta producí e cualidadnan atractivo di modestia i gratitud. Berdaderamente, “corda e dianan cu a pasa.”

[Nota]