E Berdad Tocante Jesus

NO TA parce di tin un fin na teoria i speculacionnan en cuanto ken Jesus tabata i kico el a logra. Pero kico di Bijbel mes? Kico e ta conta nos tocante Jesucristo?

Loke Bijbel Ta Bisa

Lesando Bijbel cuidadosamente, lo bo ripará e echonan clave aki:

◻ Jesus ta e Yu unigénito di Dios, e primogénito di tur creacion.—Juan 3:16; Colosensenan 1:15.

◻ Rond di dos mil aña pasá, Dios a transferí e bida di Jesus n’e matris di un bírgen hudiu p’e nace como hende.—Mateo 1:18; Juan 1:14.

◻ Jesus tabata mas cu solamente un bon hende. E tabata den tur sentido un refleccion leal dje bunita personalidad di su Tata, Jehova Dios.—Juan 14:9, 10; Hebreonan 1:3.

◻ Durante su ministerio terenal, Jesus amorosamente a atendé n’e necesidadnan di esnan oprimí. Milagrosamente el a cura e enfermonan i asta a lanta morto.—Mateo 11:4-6; Juan 11:5-45.

◻ Jesus a proclamá e Reino di Dios como e único speransa pa humanidad afligí, i el a entrená su disipelnan pa sigui cu e trabou di predicá aki.—Mateo 4:17; 10:5-7; 28:19, 20.

◻ Dia 14 di nísan (rond di 1 di april), 33 E.C., Jesus a ser arestá, husgá, sentenciá i ehecutá riba e acusacion falsu di a causa un lantamentu.—Mateo 26:18-20, Mat 26:48–27:50.

◻ Jesus su morto ta sirbi como un rescate, librando humanidad creyente for di nan estado pecaminoso i habriendo asina e caminda na bida eterno pa tur cu ehercé fe den dje.—Romanonan 3:23, 24; 1 Juan 2:2.

◻ Dia 16 di nísan, Jesus a ser resucitá, i djis despues di esei el a subi bek na shelu p’e paga na su Tata e balor di rescate di su bida humano perfecto.—Marco 16:1-8; Lucas 24:50-53; Echonan 1:6-9.

◻ Como Jehova su Rey nombrá, e Jesus resucitá tin autoridad completo p’e cumpli cu e propósito original di Dios pa hende.—Isaías 9:6, 7; Lucas 1:32, 33.

Pues, Bijbel ta presentá Jesus como e figura clave den e realisacion di Dios su propósitonan. Pero con bo por ta sigur cu esaki ta e berdadero Jesus—e Jesus di historia, kende a nace na Bétlehem i a cana riba e tera aki rond di 2.000 aña pasá?

Base pa Confiansa

Hopi duda por ser eliminá simplemente dor di lesa e Scritura Griego Cristian cu un mente habrí. Haciendo esei, lo bo ripará cu e relato di Bijbel no ta un naracion vago di sucesonan, locual sí ta e caso cu mitologia. Mas bien, nombernan, fechanan specífico i lugánan exacto ta ser mencioná. (Por ehempel, mira Lucas 3:1, 2.) Ademas, e disipelnan di Jesus ta ser pintá cu un onestidad remarcabel, cu un frankesa cu ta inspirá confiansa den e lector. E escritornan no a tapa pa ningun hende—ni pa nan mes—na interes di un registro fiel. Sí, lo bo mira cu Bijbel tin e zonido di e berdad.—Mateo 14:28-31; 16:21-23; 26:56, 69-75; Marco 9:33, 34; Galationan 2:11-14; 2 Pedro 1:16.

Pero tin mas. Descubrimentunan arkeológico bes tras bes a confirmá e registro di Bijbel. Por ehempel, si bo bishitá e Museo di Israel na Jerusalem, bo por mira un piedra cu tin un inscripcion cu ta mencioná Poncio Pilato. Otro descubrimentunan arkeológico ta confirmá Lisanias i Sergio Paulo, kendenan Bijbel ta mencioná, como personanan real mas bien cu creacion ficticio dje cristiannan di promé. Sucesonan cu ta ser raportá den e Scritura Griego Cristian (Testament Nobo) ta haña confirmacion abundante den referencianan di parti di escritornan antiguo, incluyendo Juvenal, Tácito, Seneca, Suetonio, Plinio e Menor, Luciano, Celso i e historiador hudiu Josefo.a

E relatonan cu a ser presentá den e Scritura Griego Cristian a ser aceptá mesora dor di miles di persona cu a biba den e promé siglo. Asta e enemigunan di cristianismo no a nenga e veracidad di loke e disipelnan di Jesus a informá cu el a haci i bisa. Pa loke ta e posibilidad di cu e personalidad di Jesus a ser hací mas atractivo dor di su disipelnan despues di su morto, profesor F. F. Bruce ta comentá: “Siguramente lo no por tabata asina fácil manera algun escritor ta parce di kere pa inventá palabra i accionnan di Jesus den e promé añanan ei, ora asina tantu di Su disipelnan ainda tabata na bida i cu por a corda loke a sosodé i loke no a sosodé. . . . E disipelnan no por a permití nan mes pa risca mencioná cosnan inexacto (pa no papia mes di manipulacion deliberá dje echonan), locual lo a ser exponé mesora dor di esnan cu lo tabata masha contentu pa haci esei.”

Pakico Nan No Ta Kere

No obstante, algun erudito ta keda sképtico. Miéntras nan ta asumí cu e registro bíblico ta ficticio, nan ansiosamente ta analisá skirbimentunan apócrifo i ta aceptá esakinan como creibel! Pakico? Obviamente, e registro bíblico ta contené cosnan cu hopi intelectual moderno no kier kere.

Den su Union Bible Companion, publicá na 1871, S. Austin Allibone a presentá un desafio na esnan sképtico. El a skirbi: “Puntra cualkier persona cu ta cuestioná e berdad histórico dje Evangelio ki motibu e tin pa kere cu César a muri den e Capitolio, of cu e Emperador Karel de Grote a ser coroná como emperador di Occidente dor di Papa Leo III na aña 800? . . . Nos ta kere tur e afirmacionnan . . . cu ta ser hací tocante e hombernan aki; i esei ta pasobra nos tin evidencia histórico di nan berdad. . . . Si ora presentá prueba manera esaki, cualkier persona ainda ta nenga di kere, nos ta lagu’é como estúpidamente cabesura of iremediablemente ignorante. Kico nos lo bisa, e ora ei, di esnan cu, apesar dje evidencia abundante cu a ser producí awor dje autenticidad dje Santu Scritura, ta declará cu nan no a keda convencí? . . . Nan no ta deseá di kere algu cu ta rebahá nan orguyo, i cu lo obligá nan pa hiba un bida diferente.”

Sí, algun sképtico tin motibunan scondí pa rechasá e Scritura Griego Cristian. E problema cu nan tin no ta cu su credibilidad pero cu su normanan. Por ehempel, Jesus a bisa di su siguidornan: “Nan no ta parti dje mundu, mescos cu ami no ta parti dje mundu.” (Juan 17:14) Sin embargo, hopi persona cu ta pretendé cu nan ta cristian ta profundamente enbolbí den e asuntunan político dje mundu aki, enbolbí asta den gueranan sangriente. En bes di conformá na normanan bíblico, hopi hende ta preferá p’e Bijbel conformá na nan mes normanan.

Considerá tambe e asuntu di moralidad. Jesus a duna conseho fuerte n’e congregacion na Tiatira dor cu el a tolerá e práctica di fornicacion. “Ami ta esun cu ta listra nir i curason,” el a bisa nan, “i lo mi duna na boso individualmente segun boso echonan.”b (Revelacion 2:18-23) Sin embargo, no ta cierto cu hopi persona cu ta pretendé di ta cristian ta tira normanan moral un banda? Nan lo preferá di rechasá loke Jesus a bisa cu rechasá nan curso di conducta inmoral.

Incliná pa no aceptá e Jesus di Bijbel, eruditonan a crea un Jesus di nan propio imaginacion. Nan ta bira culpabel di e trahamentu di mito di cua nan ta acusá falsamente e escritornan di Evangelio. Nan ta retené e partinan di Jesus su bida cu nan kier aceptá, rechasá e resto i agregá algun detaye di nan mes. En realidad, nan sabio ambulante of revolucionario social no ta e Jesus di historia cu nan ta pretendé di busca; mas bien, nan concepto di Jesus ta simplemente un producto di imaginacion erudito orguyoso.

Hañando e Berdadero Jesus

Jesus a haci esfuerso pa spierta e curason di esnan cu sinceramente tabatin hamber pa e berdad i husticia. (Mateo 5:3, 6; 13:10-15) Personanan asina ta respondé na Jesus su invitacion: “Bini cerca mi, boso tur cu ta afaná i cargá, i lo mi refrescá boso. Tuma mi yugo riba boso i siña di mi, pasobra mi ta di genio suave i humilde di curason, i boso lo haña refrescamentu pa boso alma. Pasobra mi yugo ta suave i mi carga ta leve.”—Mateo 11:28-30.

E berdadero Jesus no ta ser hañá den e bukinan cu eruditonan dje tempu actual a skirbi; ni e no ta ser hañá den e iglesianan di cristiandad, cuanan a bira un tera fértil pa tradicion cu hende a traha. Bo por haña e Jesus histórico den bo ehemplar di Bijbel. Lo bo kier siña mas tocante dje? Testigonan di Jehova lo ta contentu pa yudá bo haci esei.

[Nota]

[Kuadro na página 6]

SIGLONAN DI CRITICA

Crítica riba e Scritura Griego Cristian a cuminsá mas cu 200 aña pasá, ora e filósofo aleman Hermann Samuel Reimarus (1694-1768) a declará: “Nos ta hustificá pa haci un distincion absoluto entre e siñansa dje Apostelnan den nan skirbimentunan i loke Jesus Mes den Su propio bida a proclamá i siña.” For di Reimarus padilanti, hopi erudito a ser siñá pa kere mescos.

E buki The Real Jesus (E Berdadero Jesus) ta mencioná cu hopi crítico di pasado no a considerá nan mes apóstata. Mas bien, “nan a mira nan mes como e cristian mas genuino pa motibu cu nan a libra nan mes for dje cadenanan di doctrina i supersticion.” Nan a pensa cu crítica textual di Bijbel tabata un “forma purificá di cristianismo.”

E echo tristu ta cu cristiandad a bira un tera fértil pa tradicion cu hende a traha. E doctrinanan di alma inmortal, Trinidad i un fiernu di candela ta solamente algun dje siñansanan cu ta contrario cu Bijbel. Pero e escritornan dje Scritura Griego Cristian no tabata responsabel p’e corupcion aki di e berdad. Al contrario, nan a contrarestá e promé rastronan di siñansa falsu meimei dje promé siglo, ora Pablo a skirbi cu un apostasia entre esnan cu a pretendé di ta cristian tabata “obrando caba.” (2 Tesalonicensenan 2:3, 7) Nos por tin confiansa cu loke e Scritura Griego Cristian ta contené ta un registro di e berdad histórico i doctrinal.

[Kuadro na página 7]

NA KI TEMPU E EVANGELIONAN A SER SKIRBI?

Hopi crítico di e Testament Nobo ta insistí cu e Evangelionan a ser skirbí hopi tempu despues dje sucesonan cu nan ta describí i p’esei casi sigur ta contené cosnan inexacto.

Sin embargo, evidencia ta indicá un fecha mas trempan p’e skirbimentu di Mateo, Marco i Lucas. Subscritonan den algun copia di manuscrito di Mateo ta indicá cu e skirbimentu original a tuma lugá for di 41 E.C. Lucas probablemente a ser skirbí entre 56 pa 58 E.C., pasobra e buki di Echonan (probablemente completá na 61 E.C.) ta indicá cu e escritor, Lucas, ya a componé su “promé relato,” e Evangelio. (Echonan 1:1) E Evangelio di Marco lo mester a ser skirbí na Roma durante sea e promé of e segundo encarcelacion di apostel Pablo—probablemente entre 60 pa 65 E.C.

Profesor Craig L. Blomberg ta di acuerdo cu un fecha mas trempan di e Evangelionan ei. E ta mencioná cu asta ora nos agregá e Evangelio di Juan, cua a ser skirbí na fin dje promé siglo, “ainda nos ta muchu mas cerca dje sucesonan original compará cu hopi biografia antiguo. Por ehempel, Alexander de Grote su dos biógrafonan di mas promé, Ariano i Plutarco, a skirbi mas cu cuater shen aña despues di morto di Alexander na 323 P.C., tog historiadornan generalmente ta considerá nan fidedigno. En berdad leyendanan fabuloso tocante e bida di Alexander a desaroyá cu pasamentu di tempu, pero mayoria di nan a desaroyá solamente durante vários siglo despues dje dos escritornan aki.” E partinan histórico dje Scritura Griego Cristian siguramente ta bal por lo ménos mes tantu aceptacion cu historianan seglar.

[Plachi na página 8]

Goso absoluto lo reina pa tur hende den e binidero Paradijs terenal