Renunciando Hopi pa Algu Mas Grandi

MANERA JULIUS OWO BELLO A RELAT’E

Pa 32 aña mi tabata un aladura.a Mi a kere cu sanacion di fe i oracion lo resolvé tur mi problemanan i cura tur enfermedad. Mi nunca a cumpra ningun remedi, ni sikiera calmante contra dolor. Durante e añanan ei, ningun hende den mi famia hamas a drenta hospital. Ki ora cu cualkier un di mi yunan a bira malu, mi tabata haci oracion pa nan dia i anochi te ora nan a recuperá. Mi a kere cu Dios tabata contestando mi oracionnan i bendicionando mi.

MI TABATA pertenecé na Egbe Jolly, e club social di mas prominente na Akure, un pueblo den e parti west di Nigeria. Mi amigunan tabata e hendenan di mas ricu i mas poderoso den nos comunidad. E Deji, rey di Akure, hopi biaha a bishitá mi na mi cas.

Tambe mi tabata un polígamo, teniendo seis casá i hopi concubina. Mi negoshi a prosperá. Tur cos tabata bayendo bon cu mi. Sin embargo, mescos cu e comerciante biahero den Jesus su ilustracion dje perla, mi a haña algu asina precioso cu mi a renunciá cincu di mi esposanan, mi concubinanan, iglesia, club social i prominencia mundano a cambio di dje.—Mateo 13:45, 46.

Con Mi A Bira un Aladura

Mi a tende pa promé biaha dje aladuranan na 1936, ora mi tabatin 13 aña di edad. Un amigu yamá Gabriel a contá mi: “Si bo bishitá e Iglesia Apostólico di Cristo, lo bo tende Dios papia.”

“Con Dios ta papia?” mi a puntr’é.

El a bisa: “Bin, i lo bo mira.”

Mi tabata ansioso pa scucha Dios. Pues e anochi ei, mi a bai cu Gabriel n’e misa. E edificio chikitu tabata yená cu adoradornan. E congregacion a cuminsá canta: “Boso bini! Aki ta caminda Jesus ta!”

Durante e cantamentu aki, un hende a grita: “Bin abou, spiritu santu!” Un otro hende a bati un bel, i e congregacion a keda ketu. Siguientemente, un muher a cuminsá haci babel den un forma excitá na un lenga straño. Di ripiente el a sclama: “Boso scucha e mensahe di Dios! Esaki ta loke Dios a bisa: ‘Resa p’e yagdónan pa nan no mata hende!’” E ambiente tabata cargá cu emocion.

Mi a kere cu Dios a papia pa medio di dje, pues e siguiente aña mi a ser bautisá como miembro dje Iglesia Apostólico di Cristo.

Promé Contacto cu Testigonan di Jehova

Na 1951, mi a aceptá un ehemplar dje revista Toren di Vigilancia for di un Testigo yamá Adedeji Boboye. E revista tabata interesante, pues mi a aboná riba dje i a les’é regularmente. Na 1952, mi a asistí na un congreso di distrito di Testigonan di Jehova di cuater dia na Ado Ekiti.

Loke mi a mira n’e congreso a impresioná mi. Mi a pensa seriamente tocante bira un Testigo di Jehova pero mi a deshací dje idea. Mi problema tabata cu mi tabatin tres casá i un concubina e tempu ei. Mi a pensa cu di ningun manera mi por a biba cu solamente un casá.

Ora mi a regresá Akure, mi a bisa Adedeji pa stop di bishitá mi, i mi no a renobá mi abonament riba e Toren di Vigilancia. Mi a bira mas activo den mi iglesia. Al fin i al cabo, mi a razoná, Dios a bendicioná mi desde cu mi a djoin e Iglesia Apostólico di Cristo. Mi a casa cu tres muher i a producí hopi yu. Mi a construí mi mes cas. Mi nunca a drenta un hospital. Siendo cu a parce cu Dios tabata contestá mi oracionnan, pakico cambia mi religion?

Mas Prominencia Huntu cu Desilusion

Mi a cuminsá contribuí hopi placa n’e iglesia. Pronto nan a hací mi un anciano di iglesia, un posicion cu a permití mi mira e funcionamentu di paden dje iglesia. Loke mi a mira a molestiá mi. E pastor i e “profetanan” tabata stima placa; nan golosidad a repugná mi.

Por ehempel, na mart 1967 mi a haña tres yu cu diferente esposa. Tabata e custumber den iglesia pa tene un ceremonia di duna yu nomber. Pues mi a hiba regalo p’e pastor—piscá, djus di lamunchi i refresco na botter—como preparacion p’e ceremonia.

Riba e dia dje sirbishi di misa, e pastor a bisa dilanti henter e congregacion: “Hende ricu den e iglesia aki a sorprendé mi. Nan kier tene un ceremonia di duna yu nomber, i tur loke nan ta trece ta refresco cu piscá. Nada di carni! Nada di cabritu! Imaginá bo! Cain a ofrecé Dios un sacrificio di yams grandi, tog Dios no a aceptá e sacrificio ei ya cu no tabatin sanger den dje. Dios kier cosnan cu sanger den nan. Abel a trece un animal, i Dios a aceptá su sacrificio.”

Cu esei, mi a lanta para i a ranca sali bai pafó. Sin embargo, mi a sigui asistí n’e iglesia. Mi a bai dedicá cada bes mas i mas tempu socialisando i asistiendo n’e reunionnan di mi club. Algun biaha mi a asistí na reunionnan n’e Salon di Reino i mi a renobá mi abonament riba e E Toren di Vigilancia. No obstante, ainda mi no tabata cla pa bira un Testigo di Jehova.

E Decision pa Sirbi Jehova

E punto crucial pa mi a bini na 1968. Un dia mi a cuminsá lesa un artículo den E Toren di Vigilancia cu a describí e persecucion brutal di Testigonan di Jehova na Malawi. El a papia di un mucha muher di 15 aña di edad cu a ser mará na un palu i violá sexualmente seis biaha debí cu el a nenga di comprometé su fe. Profundamente di shok, mi a stop di lesa e revista, pero mi a sigui pensa riba dje. Mi a realisá cu ningun mucha muher den mi iglesia lo demostrá e clase di fe ei. Mas lat e anochi ei, mi a coge e revista i lesa e página atrobe.

Mi a cuminsá studia Bijbel seriamente. Segun cu mi a crece den conocimentu, mi a cuminsá mira cuantu e iglesia tabata gañando nos. Mescos cu tabata e caso den tempunan antiguo, nos pastornan no tabata ‘ocupá nan mes den nada otro cu libertinahe.’ (Oséas 6:9) Hombernan asina tabata entre e profetanan falsu cu Jesus a spierta contra dje! (Mateo 24:24) Mi no a pone fe mas den nan visionnan i obranan poderoso. Mi a dicidí di corta tur laso cu religion falsu i yuda otronan haci mescos.

Esfuersonan pa Tené Mi den e Iglesia

Ora e ancianonan dje iglesia a realisá cu mi tabata determiná pa bandoná e iglesia, nan a manda un delegacion pa rogá mi keda. Nan no kier a perde un fuente importante di entrada. Nan a ofrecé pa hací mi Baba Egbe, e patrono di un dje iglesianan apostólico di Cristo na Akure.

Mi a nenga e oferta i a bisa nan pakico. “E iglesia a bin ta gaña nos,” mi a bisa. “Nan ta bisa cu tur bon hende lo bai shelu. Pero ami a lesa Bijbel, i mi ta convencí cu ta solamente 144.000 persona lo bai shelu. Otro hende hustu lo biba den un paradijs riba tera.”—Mateo 5:5; Revelacion 14:1, 3.

E pastor dje iglesia a purba pone mi esposanan bai contra mi. El a bisa nan pa stroba Testigonan di Jehova di bini nos cas. Un di mi casánan a venená mi cuminda. Dos di nan a spiertá mi tocante un vision cu nan a mira den misa. E vision a mustra cu lo mi muri si mi bandoná e iglesia. Apesar di esei, mi a sigui duna testimonio na mi casánan, invitando nan pa bai reunion cu mi. “Boso lo haña otro esposonan ei,” mi a bisa nan. Sin embargo, ningun di nan a mustra interes, i nan a sigui trata na desanimá mi.

Finalmente, dia 2 di februari, 1970, ora mi a regresá cas for di un biahe pa un pueblo bisiña, mi a haña e cas bashí. Tur mi casánan a bai for di cas cu e yunan.

Pegando na un Solo Esposa

‘Awor mi por rectificá mi situacion matrimonial,’ mi a pensa. Mi a invitá mi promé casá, Janet, pa bin cas bek. El a bai eens. Sin embargo, su famia a oponé e idea fuertemente. Ora mi otro casánan a haña sa cu mi a pidi Janet pa bin bek, nan a bai n’e cas di su tata i a trata na batié. E ora ei su famia a manda yamá mi pa un reunion.

Tabatin rond di 80 persona presente p’e reunion. E tio di Janet, cu tabata cabes dje famia, a bisa: “Si bo kier bolbe casa cu nos yu muher, e ora ei bo mester tuma e otro muhernan bek. Pero si bo kier practicá bo religion nobo i keda cu un solo esposa, e ora ei bo mester busca un otro muher. Si bo tuma Janet bek, bo otro casánan lo mat’é, i nos no kier pa nos yu muher muri.”

Despues di hopi papiamentu, e famia a realisá cu mi tabata dicididu pa tin un solo esposa. Finalmente nan a entregá. E tio a bisa: “Nos lo no kita bo casá fo’i bo. Bo por bai cuné.”

Dia 21 di mei, 1970, ami cu Janet a casa legalmente. Nuebe dia despues mi a ser bautisá como un Testigo di Jehova. Na december dje mésun aña, Janet tambe a ser bautisá.

Disfrutando di Jehova Su Bendicion

E miembronan di nos iglesia di ántes a profetisá cu si nos bira Testigo, nos lo muri. Esei tabata casi 30 aña pasá. Asta si mi muri awor, esei lo ta pasobra mi a bira un Testigo di Jehova? Si mi esposa muri awor, un hende por bisa cu esei ta pasobra el a bira un Testigo di Jehova?

Mi a lucha pa mustra mi 17 yunan e caminda dje berdad. Aunke hopi di nan tabata adulto p’e tempu cu mi a bira un Testigo, mi a animá nan pa studia Bijbel i mi a hiba nan n’e reunionnan i congresonan. Ta un goso pa mi di por tin cincu di nan sirbiendo Jehova huntu cu mi. Un ta sirbi banda di mi como anciano den e congregacion. Un otro ta sirbidor ministerial den un congregacion cercano. Dos di mi yunan ta sirbi como pionero regular.

Ora mi wak bek, mi ta yena di maraviya pa Jehova su bondad inmerecí den yudá mi bira su sirbidor. Ki cierto ta Jesus su palabranan: “Ningun hende por bini cerca mi aménos cu e Tata, kende a mandá mi, atra’é”!—Juan 6:44.

[Nota]