Pregunta di Lector

“E Toren di Vigilancia” di 15 di augustus, 1996, a bisa: “Den e parti final dje tribulacion, ‘carni’ cu a hui n’e banda di Jehova lo ser salbá.” Esei ta indicá cu despues dje promé fase dje tribulacion grandi, hopi persona nobo lo bini n’e banda di Dios?

Esei no tabata loke nos kier a bisa.

Jesus su palabranan hañá na Mateo 24:22 lo ser cumplí principalmente den futuro mediante un salbacion atrabes dje promé parti dje binidero tribulacion grandi, e atake riba religion. E artículo a bisa: “Corda cu ‘carni,’ di tantu e resto ungí como dje ‘multitud grandi,’ lo a ser salbá caba ora Babilonia e Grandi ta ser destruí rápidamente i completamente den e promé parti dje tribulacion.”

E personanan fiel ei lo no ta den peliger ora Jesus i su ehército celestial drenta den accion den e parti final dje tribulacion. Pero ken lo sobrebibí anto e fase ei dje tribulacion? Revelacion 7:9, 14 ta mustra cu un multitud grandi cu tin un speransa terenal lo sobrebibí. Kico di cristiannan ungí cu spiritu? “Pregunta di Lector” den La Atalaya di 15 di augustus, 1990, a considerá pakico nos no por bisa categóricamente na ki tempu e resto dje ungínan lo ser tumá na shelu. P’esei e artículo recien (15 di augustus, 1996) a laga e asuntu habrí, dunando e comentario general: “Di igual manera den e parti final dje tribulacion, ‘carni’ cu a hui n’e banda di Jehova lo ser salbá.”

Pa loke ta e posibilidad cu si hende nobo lo por siña e berdad i bini n’e banda di Dios despues cu e tribulacion grandi cuminsá, tuma nota di Jesus su palabranan registrá na Mateo 24:29-31. Despues cu e tribulacion dal aden, e señal dje Yu di hende lo aparecé. Jesus a bisa cu tur e tribunan dje tera lo bati nan mes i lamentá. E no a bisa nada tocante hende cu lo reaccioná riba e situacion, repentí, tuma nan posicion n’e banda di Dios i bira disipelnan berdadero.

Di manera similar, den e comparacion di carné i cabritu, e Yu di hende ta aparecé i ta separá hende hudicialmente a base di loke nan a haci of laga di haci den pasado. Jesus no a papia nada tocante hende cu pa hopi tempu a manifestá atributonan di cabritu i cu di ripiente ta combertí i bira manera carné. E ta bini pa husga hende a base di loke nan ya caba a duna prueba di ta.—Mateo 25:31-46.

Sin embargo, atrobe den e caso aki no tin motibu pa ta categórico riba e punto aki. E pueblo di Dios, tantu e ungínan como e multitud grandi, sa kico nan tin cu haci awor—predicá i haci disipel. (Mateo 28:19, 20; Marco 13:10) Awor aki ta e periodo pa nos tuma na pechu e spiertamentu: “Trahando huntu cuné, nos tambe ta suplicá boso pa no aceptá e bondad inmerecí di Dios i keda sin cumpli cu su propósito. Pasobra e ta bisa: ‘Den un tempu aceptabel mi a tendé bo, i den un dia di salbacion mi a yudá bo.’ Mira! Awor ta e tempu specialmente aceptabel. Mira! Awor ta e dia di salbacion.”—2 Corintionan 6:1, 2.