Bo Tin Miedu di Confia Otro Hende?

‘NO TIN ningun hende cu mi por papia cuné. Hende lo no comprendé. Nan ta muchu ocupá cu nan mes problemanan. Nan no tin tempu pa di mi.’ Hopi hende ta sinti asina, p’esei nan ta tene cos pa nan mes. Ora otronan ta puntra con ta cu nan, hopi biaha nan kier bisa nan, pero nan no ta hacié. Nan simplemente no por habri nan curason.

En berdad, tin persona cu no kier yudansa di otro hende. Sin embargo, hopi sí kier yudansa desesperadamente pero tin miedu di revelá nan pensamentu, sintimentu i experencianan di mas personal. Abo ta un di nan? Realmente no tin ningun hende cu bo por confia?

Comprendiendo e Miedu

Den e mundu djawe tin un clima di desconfiansa. Hóbennan no ta papia cu nan mayornan. Mayornan no por papia cu otro. Poco hende ta dispuesto na papia cu esnan den puesto di autoridad. Incapas pa confia otro hende, algun ta acudí na alcohol, droga of un estilo di bida desenfrená pa purba scapa for di nan problemanan.—Proverbionan 23:29-35; Isaías 56:12.

Confiansa den figuranan di autoridad, manera miembro di clero, dokter, terapista i maestronan a ser sagudí dor di un avalancha di casonan di desonestidad i inmoralidad cu a sali na cla. Por ehempel, un cálculo ta mustra cu mas cu 10 porciento di miembronan di clero ta enbolbí den mal comportacion sexual. E “kibradornan di confiansa aki,” segun un escritor, “ta coba vayenan hundu i brechanan inmenso den relacionnan humano.” Con esaki ta afectá nan parokianonan? E ta destruí confiansa.

E degeneracion extenso di normanan moral tambe a hiba na crísis den famia, te n’e punto cu famianan cu problema ta casi e regla, no e excepcion. Un tempu cas tabata un ambiente cu a fomentá bon criansa. Awe hopi biaha e no ta mas cu un pomp pa pasa yena tanki. Ora un mucha ta lanta den un famia caminda no tin “cariño natural,” un resultado comun ta cu ora nan bira grandi nan no por confia otro hende.—2 Timoteo 3:3.

Ademas, segun cu condicionnan di mundu ta empeorá, nos ta ser exponé mas i mas na experencianan potencialmente traumático. Den un situacion parecido, profeta Mikéas a skirbi: “No pone bo confiansa den un amigu íntimo.” (Mikéas 7:5) Tal bes bo ta sinti mescos despues di un desapunte chikitu, un confiansa kibrá of un suceso den cua bo tabata den gran peliger di perde bo bida. Bo ta haña cu ta difícil pa confia otro hende atrobe i bo ta bira emocionalmente insensibel, bibando cada dia tras di un muraya emocional. (Compará cu Salmo 102:1-7.) Ta cierto cu un actitud asina kisas por yudá bo funcioná, pero bo “dolor di curason” ta hortá bo di cualkier berdadero goso den bida. (Proverbionan 15:13) E berdad ta cu pa bo ta spiritualmente, emocionalmente, mentalmente i físicamente saludabel, e muraya ei mester bini abou i bo mester siña confia hende. Esei ta posibel? Sí.

Pakico e Muraya Mester Bini Abou?

Confia un problema na otro hende ta aliviá un curason afligí. Ana tabatin e experencia aki. E tabatin un bon matrimonio, un cas sigur, pero e tabata profundamente afligí. Aunke e tabata “amargá di alma,” e sabiamente “a cuminsá haci oracion na Jehova” cu un intensidad cu a haci su lipnan silencioso tembla. Sí, el a confia den Jehova. Despues el a habri su curason na Eli, representante di Dios. Cu ki resultado? “[Ana] a procedé di bai riba su caminda i come i su cara no a bolbe mustra preocupacion pa su propio situacion.”—1 Samuel 1:1-18.

Mayoria cultura a yega di conocé e beneficionan di papiamentu confidencial. Por ehempel, por ta beneficioso pa compartí idea i experencianan cu esnan cu tabata den situacionnan similar. Investigadornan ta concluí: “Isolacion emocional ta producí enfermedad—nos tin cu revelá cosnan pa keda mentalmente sano.” Un cantidad creciente di investigacion científico ta confirmá e berdad dje proverbio inspirá cu ta bisa: “Un persona cu ta isolá su mes lo busca su mes anhelo egoista; contra tur sabiduria práctico lo e lanta.”—Proverbionan 18:1.

Si bo no habri bo curason pa otronan, con nan por yudá bo? Aunke Jehova Dios ta un lesador di curason, bo pensamentunan i sintimentunan di mas íntimo ta un buki cerá pa famia i amigu—aménos cu bo habri bo curason. (1 Crónicanan 28:9) Ora e problema ta enbolbé un violacion dje ley di Dios, posponiendo confesion di un asuntu solamente ta hacié pió.—Proverbionan 28:13.

Siguramente, e beneficionan di confia bo situacion di angustia na otronan ta pisa hopi mas cu e rísiconan di ser ofendí. Naturalmente, esei no kier men cu nos tin cu divulgá detayenan personal pa loco. (Compará cu Huesnan 16:18; Jeremías 9:4; Lucas 21:16.) “Ta existí compañeronan cu ta dispuesto pa kibra otro na pida-pida,” Proverbionan 18:24 ta spierta, pero ta agregá despues: “Ta existí un amigu cu ta mas pegá cu un ruman.” Unda bo por haña un amigu asina?

Confia den Bo Famia

Si bo tin un problema, bo a purba discutié cu bo casá of cu bo mayornan? “Pa loke ta un gran cantidad di problema, tur loke ta necesario ta pa tene un combersacion profundo riba nan,” un consehero experenciá ta reconocé. (Proverbionan 27:9) Esposonan cristian cu ta ‘stima nan esposa mescos cu nan mes,’ esposanan cu ta “sumiso na nan esposo,” i mayornan cu ta tuma e responsabilidad cu Dios a duna nan na serio pa ‘cria nan yunan den e regulacion mental di Jehova’ lo traha duru pa bira scuchadornan cu empatia i conseheronan atento. (Efesionan 5:22, 33; 6:4) Aunke e no tabatin esposa ni yu den e sentido carnal, ki un ehempel maraviyoso Jesus a pone al respecto!—Marco 10:13-16; Efesionan 5:25-27.

Kico si e problema ta mas grandi cu loke e miembronan dje famia por manehá? Den e congregacion cristian, nos no tin nodi ta nos so nunca. “Ken ta débil, i ami no ta débil?” apostel Pablo a bisa. (2 Corintionan 11:29) El a spierta: “Sigui wanta e carganan di otro.” (Galationan 6:2; Romanonan 15:1) Entre nos rumannan spiritual, sin duda nos por haña mas cu un “ruman cu ta nací pa ora tin angustia.”—Proverbionan 17:17.

Confia den e Congregacion

Den e mas cu 80.000 congregacionnan di Testigonan di Jehova rond mundu, tin hombernan humilde cu ta sirbi como “colaboradornan pa boso goso.” (2 Corintionan 1:24) Esakinan ta e ancianonan. “Cada un,” Isaías ta remarcá, “mester resultá di ta manera un lugá di sconde for di bientu i un lugá di sconde for di tempestad di awaceru, manera riu di awa den un tera secu, manera e sombra di un baranca grandi den un tera agotá.” Esei ta loke ancianonan ta trata di ta.—Isaías 32:2; 50:4; 1 Tesalonicensenan 5:14.

Ancianonan ta yena rekisitonan bíblico promé cu nan ser ‘nombrá pa spiritu santu.’ Sabiendo esaki lo fortalecé bo confiansa den nan. (Echonan 20:28; 1 Timoteo 3:2-7; Tito 1:5-9) Loke bo papia cu un anciano lo keda estrictamente confidencial. Ser digno di confiansa ta un di su cualificacionnan.—Compará cu Exodo 18:21; Nehemías 7:2.

E ancianonan den e congregacion ta “vigilando pa boso alma como esnan cu lo rindi cuenta.” (Hebreonan 13:17) Esaki no ta impulsá bo pa pone bo confiansa den e hombernan aki? Naturalmente, no ta tur anciano ta sobresalí den e mésun cualidadnan. Algun por parce mas acercabel, bondadoso, of comprensivo cu otronan. (2 Corintionan 12:15; 1 Tesalonicensenan 2:7, 8, 11) Pakico no confia den un anciano cu ken bo ta sintí bo cómodo?

E hombernan aki no ta profesionalnan pagá. Mas bien, nan ta “donnan den hende” cu Jehova a percurá pa yudá bo. (Efesionan 4:8, 11-13; Galationan 6:1) Den ki manera? Usando Bijbel ábilmente, nan lo aplicá su poder sanador na bo situacion personal. (Salmo 107:20; Proverbionan 12:18; Hebreonan 4:12, 13) Nan lo haci oracion cu bo i pa bo. (Filipensenan 1:9; Santiago 5:13-18) Yudansa for di conseheronan amoroso asina por contribuí hopi pa cura un spiritu afligí i restorá pas mental.

Con pa Edificá Relacionnan di Confiansa

Pidi yudansa, conseho of pa djis un orea scuchador no ta un señal di debilidad of fracaso. Esei ta solamente un reconocimentu realístico cu nos ta imperfecto i cu ningun hende tin contesta pa tur cos. Siguramente, nos consehero i persona di confiansa di mas grandi ta nos Tata celestial, Jehova Dios. Nos ta di acuerdo cu e salmista kende a skirbi: “Jehova ta mi forsa i mi escudo. Den dje mi curason a confia, i mi a ser yudá.” (Salmo 28:7) Den oracion nos por ‘drama nos curason’ na dje ki ora cu ta i sin reserva, cu e confiansa cu e ta tende nos i ta interesá den nos.—Salmo 62:7, 8; 1 Pedro 5:7.

Pero con bo por siña confia e ancianonan i otro hende den e congregacion? Na promé lugá examiná bo mes. Bo temornan ta hustificá? Bo ta sospechoso dje motibunan di otro hende? (1 Corintionan 13:4, 7) Tin un manera pa minimisá e rísico di ser ofendí? Sí. Con? Purba conocé e persona cu bo ta scoge como unu cu lo bo por confia, den un ambiente spiritual. Papia cuné na reunionnan di congregacion. Traha huntu den e trabou di cas-pa-cas. Confiansa, mescos cu respet, ta algu cu un persona mester gana. P’esei tene pacenshi. Por ehempel, segun cu bo ta conocé un wardador spiritual, bo confiansa den dje lo crece. Revelá bo preocupacionnan gradualmente. Si e respondé den un manera apropiado, compasivo i discreto, kisas e ora ei bo por purba papia cosnan mas confidencial.

Co-adoradornan di Jehova, specialmente ancianonan cristian, ta traha duru pa imitá e cualidadnan atractivo di Dios den nan relacionnan un cu otro. (Mateo 5:48) Esaki ta resultá den un atmósfera di confiansa den e congregacion. Un ruman cu ta anciano pa hopi aña ta bisa: “E rumannan mester ta conciente di un cos: Sin importá kico un persona haci, e anciano no ta perde su amor cristian p’e. Kisas e anciano no ta gusta loke e persona a haci, pero tog e ta stima su ruman ainda i ta deseá na yud’é.”

P’esei no tin motibu pa sintí bo so cu un problema. Papia cu un persona cu tin “cualidadnan spiritual” cu por yudá bo carga bo problema. (Galationan 6:1) Corda cu “preocupacion ansioso den curason di un hende ta loke lo hacié dobla,” pero “dichonan agradabel ta un panal, dushi pa e alma i un curacion p’e wesunan.”—Proverbionan 12:25; 16:24.

[Kuadro na página 26]

Cualkier cristian por ser acercá pa yuda un pariente, amigu of un ruman spiritual cu un problema. Abo sa con pa yuda?

Un Consehero Eficas

ta acercabel: Mateo 11:28, 29; 1 Pedro 1:22; 5:2, 3

ta scoge e ocasion corecto: Marco 9:33-37

ta trata na comprendé e problema: Lucas 8:18; Santiago 1:19

no ta reaccioná den un manera exagerá: Colosensenan 3:12-14

ta yuda pa enfrentá emocionnan angustioso: 1 Tesalonicensenan 5:14; 1 Pedro 3:8

ta reconocé su propio limitacionnan: Galationan 6:3; 1 Pedro 5:5

ta duna conseho specífico: Salmo 19:7-9; Proverbionan 24:26

ta mantené confidencialidad: Proverbionan 10:19; 25:9