“Solamente un dje Hopi Bidanan Cu Bo A Influenciá”

NA JANUARI di 1996, Carol tabata malu cu un tumor celebral. E tabatin 60 i picu aña i te cu e tempu ei semper e tabata un muher contentu i fuerte cu un palabra di animacion pa tur hende. Pero awor e dokternan tabata tratando pa controlá e crecementu mortífero. Meimei di su lucha, Carol a ricibí e siguiente carta:

“Kerida Carol,

“Ta duel mi mashá cu bo salú ta bayendo atras. Afortunadamente, nos tin e berdadero speransa cu Bijbel ta yuda nos sa di dje i stima. E speransa aki ta p’e Reino di Jehova goberná e tera pa asina nos por biba den un condicion paradísico, un tempu cu nos tur ta anhelá p’e.

“Mi kier pa bo sa cu bo trabou personal di predicá a scapa hopi hende for di morto eterno. Ami ta un dje hendenan aki. Mi no sa si bo ta corda e promé biaha cu nos a topa. E tempu ei mi tabatin 20 aña di edad. Mi tabatin cabei largu, tabata bende droga i tabata slenter rond cu un pandiya di bagamundu. Nos tur tabatin revolver i no tabatin berdadero amor pa ningun hende excepto pa nos mes.

“Bo a bati na mi porta huntu cu un otro Testigo i a ofrecé mi E Toren di Vigilancia i Spierta! Mi a purba duná bo un dollar i a bisa cu mi no tabata kier e revistanan. Bo a lagá mi sa cu bo no tabata predicá djis pa haña donacion. Bo a bisá mi cu bo tabata haciendo un trabou pa yuda hende lesa Bijbel. Mi no ta corda si mi a tuma e revistanan of a lesa nan. Sin embargo, bo a planta e simia dje berdad den mi bida.

“Algun aña despues un otro Testigo, Gary, a bini na cas di mi mama ora ami tabat’ei presente. Mi a bis’é dje bishita cu bo a hací mi algun aña promé. Gary a studia Bijbel cu mi pa un tempu largu te ora finalmente mi a ser bautisá na 1984. Awor mi ta siñando mi yunan e berdad dje Reino di Dios.

“Mi ta sigur cu mi ta solamente un dje hopi bidanan cu bo a influenciá den bo añanan di fiel sirbishi. Sin embargo, dor dje bondad amoroso aki, bo a permití ami i mi famia yega na conocé e Gran Dios, Jehova, i su Yu, Cristo Jesus. Mi ta anhelá e dia ora mi por mirá bo den e sistema nobo di cosnan ora Jehova lo seca tur lágrima for di nos wowo, i morto lo no t’ei mas.—Revelacion 21:4.

“Pa loke ta ami i mi famia, nos ta contentu cu nos tabatin e chens di conocé bo i di ta parti di bo trabou di duna testimonio. Danki.

“Cu amor fraternal,

Peter”

Despues di un enfermedad di seis luna, Carol a muri na mart 1996, despues di a sembra hopi simia dje berdad den su 35 añanan como un evangelisador celoso. El a siña cu nunca bo no sa ki ora un simia lo duna fruta, asta añanan despues.—Mateo 13:23.